Jehová tsiʼ yʌlʌ: «Maʼañix miʼ cajel uqʼuel, cʼuxyajiyel, cʼamʼan yicʼot chʌmel. Mi caj c sujcun i yaʼlel laʼ wut. Maʼañix mi caj i cʼajtiyel laʼ chaʼan tsaʼix bʌ ñumi».

Jehová tsaʼ yʌcʼʌ Adán yicʼot Eva yaʼ ti Edén chaʼan tijicña yicʼot ñʌchʼʌl miʼ chumtʌlob. Yom miʼ chʼujutesañob Jehová yicʼot yom miʼ pʼolob i yalobil chaʼan miʼ butʼob ili Lum. Adán yicʼot Eva tsiʼ ñusʌbeyob i tʼan Jehová, pero maʼañic qʼuextʌyem chuqui ñaʼtʌbil i chaʼan. Ti ili libro tsaʼ laj qʼuele chaʼan Dios miʼ tsʼʌctesan i tʼan. I Yumʌntel mi caj i chʼʌm tilel bendición ila ti lum i miʼ caj i tsʼʌctiyel tsaʼ bʌ i sube Abraham.

Mach jalix miʼ caj i jisʌntel Satanás, i xibajob yicʼot jiñi jontol (mañajoʼ) bʌ. Mi caj i chʼujutesʌntel Jehová tiʼ petol pañimil. Maʼañix miʼ caj laj cʼamʼan yicʼot lac chʌmel. An lac pʼʌtʌlel mi caj lac tejchel ti jujumpʼejl qʼuin i mi caj la cubin lac tijicñʌyel come cuxulonla. Mi caj i sujtel ti paraíso ili lum. Mi caj lac taj sumuc bʌ i bʌl lac ñʌcʼ yicʼot  wem bʌ la cotot. Maʼañix mi caj laj qʼuel jiñi jontoloʼ bʌ come mi caj i tojʼañob. Maʼañix miʼ caj lac bʌcʼñan simaron bʌ añimal tac mi jiñic to mi caj i bʌcʼñañoñobla.

Tijicña mi caj lac cubin cheʼ bʌ Jehová miʼ chaʼ tejchesan jiñi chʌmeñoʼ bʌ. Mi caj la cʌqʼuen i tijicñʌyel jiñi tsaʼ bʌ chumleyob ti wajali, cheʼ bajcheʼ Abel, Noé, Abraham, Sara, Moisés, Rut, Ester yicʼot David. Mi caj i coltañonla chaʼan mi lac sujtesan ti paraíso ili lum. Cabʌl chuqui mi caj lac mel.

Jehová yom chaʼan maʼ chumtʌl ti Paraíso. Yaʼi mi caj lac ñumen cʌn i chaʼan bʌ Dios. Jin chaʼan, ¡laʼ lac lʌcʼtesan lac bʌ ti Jehová, wʌle yicʼot tiʼ pejtelel ora!