Ñumeñix 10 qʼuin cheʼ bʌ Jesús tsaʼ chaʼ majli ti panchan. Cheʼ jiñi, tsiʼ chʼʌmʌyob chʼujul bʌ espíritu jiñi xcʌntʼañob. Tsaʼ cʼotiyob ti Jerusalén jiñi tilemoʼ bʌ ti yan tac bʌ tejclum chaʼan miʼ melob jiñi qʼuiñijel chaʼan Pentecostés cheʼ ti jabil 33. Cheʼ bʌ 120 xcʌntʼañob i chaʼan Jesús tsiʼ tempayob i bʌ tiʼ chaʼlajmlel jumpʼejl otot i an chuqui tsaʼ yʌcʼʌyob ti toj sajtel i pusicʼal. Tsaʼ caji i pʌs i bʌ cheʼ bʌ alʌ cʼajc tiʼ pam i jol jujuntiquil xcʌntʼañob i tsaʼ cajiyob ti yan tac bʌ tʼan. Tsaʼ caji i sub i bʌ wen pʼʌtʌl bʌ icʼ ti jiñi otot.

Jiñi tsaʼ bʌ cʼotiyob ti Jerusalén tsaʼ yubiyob jiñi woli (choncol) bʌ i sub i bʌ, i tsaʼ majliyob ti jiñi otot chaʼan miʼ qʼuelob. Toj sajtelob i pusicʼal cheʼ tsaʼ yubiyob chaʼan woliyob ti yambʌ tʼan jiñi xcʌntʼañob. Tsiʼ yʌlʌyob: «Ili tilemob ti Galilea, ¿bajcheʼ an cheʼ yujilob lac tʼan?».

Cheʼ jiñi, Pedro yicʼot yambʌ apóstolob tsaʼ waʼleyob tiʼ tojlel jiñi wiñicob xʼixicob. Pedro tsiʼ yʌlʌ: «Tsaʼ laʼ tsʌnsa Jesús, pero Jehová tsiʼ  chaʼ teche. Wʌle añix ti panchan i yaʼan tiʼ ñoj Dios. Tsiʼ yʌqʼueyon lojon chʼujul bʌ espíritu tsaʼ bʌ i wʌn subeyon lojon. Jin chaʼan miʼ laʼ qʼuel yicʼot mi laʼ wubin ili milagro».

Toj sajtelob i pusicʼal. Tsaʼ bʌ i yʌlʌ Pedro tsaʼ cʼotiyob tiʼ pusicʼal, jin chaʼan tsiʼ cʼajtiyob: «¿Chuqui yom mi lon c mel?». Pedro tsiʼ jacʼʌ: «Cʌyʌ laʼ mul yicʼot chʼʌmʌla jaʼ tiʼ cʼabaʼ Jesús. Ti wiʼil mi caj laʼ wʌqʼuentel chʼujul bʌ espíritu». Cheʼ bʌ 3 mil tsiʼ chʼʌmʌyob jaʼ ti jiñi qʼuin. Ti jiñi bʌ ora tsaʼ caji ti pʼojlel xcʌntʼañob yaʼ ti Jerusalén. Jiñi apóstolob tsaʼ caji i waʼchocoñob congregación tac yicʼot i coltaya jiñi chʼujul bʌ espíritu. Jiñi apóstolob tsiʼ cʌntesayob jiñi xcʌntʼañob come tsiʼ jacʼʌyob tsaʼ bʌ i yʌlʌ Jesús.