Ti Filipos, an juntiquil xchʼoc muʼ bʌ i ñaʼtan chuqui mi caj i yujtel ti wiʼil come an i xibʌjlel. Ili xchʼoc tsiʼ wen aqʼueyob i taj taqʼuin i yumob. Cheʼ bʌ Pablo yicʼot Silas tsaʼ cʼotiyob ti Filipos, cabʌl qʼuin tsaʼ caji i wen tsajcañob ñumel. Jiñi xiba tsaʼ yʌcʼʌ chaʼan miʼ yʌl ti cʼam bʌ tʼan: «xʼEʼtelob i chaʼan jiñi Cʼax ñuc bʌ Dios ili wiñicob». Ti wiʼil, Pablo tiʼ sube jiñi xiba: «¡Mic subeñet tiʼ cʼabaʼ Jesús chaʼan maʼ loqʼuel tiʼ tojlel ili xchʼoc!». Jiñi xiba tsaʼ loqʼui tiʼ tojlel.

Cheʼ bʌ i yumob jiñi xchʼoc tsiʼ ñaʼtayob chaʼan maʼañix mi caj i chʌn cʼʌñob ti locʼ taqʼuin, tsaʼ wen michʼayob. Tsiʼ pʌyʌyob majlel Pablo yicʼot Silas yaʼ baqui an jiñi Juezob i tiʼ subeyob: «¡Ili wiñicob maʼañic miʼ jacʼob jiñi mandar i woli jach i yʌcʼob ti juʼucñiyel jiñi tejclum!». Jiñi Juezob tsaʼ yʌlʌyob chaʼan miʼ jatsʼob Pablo yicʼot Silas yicʼot chaʼan miʼ yotsañob ti cárcel. Jiñi xcʌntaya tsiʼ yotsayob yaʼ ti cojix bʌ i malil cárcel, yaʼ baqui ñumen icʼjowan. Cheʼ jaʼel, tsiʼ ñetʼbeyob i yoc ti tocol bʌ teʼ.

Pablo yicʼot Silas tsaʼ cajiyob ti cʼay chaʼan miʼ ñuqʼuesañob Jehová i tsiʼ ñʌchʼtayob jaʼel jiñi yaʼ bʌ ñupʼulob. Cheʼ tiʼ yojlil (xiñil) acʼʌlel, tsaʼ tili tsʌts bʌ i yujquel lum i tsiʼ ñijca jiñi cárcel. Jiñi puerta tac tsaʼ jajmi, tsaʼ tujqʼui cadena tac yicʼot tsaʼ cojliyob yaʼ baqui ñetʼelob i yoc. Jiñi xcʌntaya tsaʼ majli ti ajñel yaʼ tiʼ malil jiñi cárcel i tsiʼ qʼuele chaʼan jamʌlix jiñi puerta tac. Tsiʼ ñaʼta chaʼan tsaʼix putsʼiyob, jin chaʼan tsiʼ chʼʌmʌ jumpʼejl espada chaʼan miʼ tsʌnsan i bʌ.

Ti jiñi jach bʌ ora, Pablo cʼam tiʼ sube: «¡Mach a tʌcʼlan a bʌ! ¡Wʌʼʌch añon lojon!». Ajñel tsaʼ majli jiñi xcʌntaya yaʼ baqui an Pablo yicʼot Silas i tsiʼ lij choco i bʌ tiʼ tojlelob. Tsiʼ cʼajtibeyob: «¿Chuqui yom mic mel chaʼan mic taj j cuxtʌlel?». Tsiʼ jacʼbeyob: «Jatet yicʼot jiñi yaʼ bʌ añob ti a wotot yom mi laʼ wʌcʼ ti ñuc Jesús». Cheʼ jiñi, Pablo yicʼot Silas tsiʼ pʌsbeyob i sujmlel i tʼan Jehová, i tsiʼ chaʼle chʼʌmjaʼ jiñi xcʌntaya yicʼot jiñi añoʼ bʌ tiʼ yotot.