Ti jumpʼejl bʌ qʼuin, juncojt lucum tsiʼ pejca Eva cheʼ bʌ i bajñel jach. Tsiʼ cʼajtibe: «¿Isujm ba cheʼ maʼañic miʼ yʌqʼuetla Dios chaʼan mi laʼ cʼux i wut jiñi teʼ tac?». Eva tsiʼ jacʼʌ: «Miʼ mejlel lon j cʼux baqui jach bʌ i wut teʼ, cojach an juntejc mach bʌ yomic. Mi tsaʼ lon j cʼuxu, mi caj lon c chʌmel». Jiñi lucum tsiʼ yʌlʌ: «Maʼañic miʼ caj laʼ chʌmel. Mi mucʼʌch laʼ cʼux, mi caj laʼ sujtel bajcheʼ Dios». ¿Isujm ba jiñi? Maʼañic. Jumpʼejl jach lot, pero Eva tsaʼʌch i jacʼʌ. Cheʼ bʌ tsiʼ ñumen qʼuele i wut jiñi teʼ, tsiʼ ñumen mulaj i cʼux. Cheʼ jiñi tsiʼ cʼuxu yicʼot tsiʼ yʌqʼue jaʼel ñoxiʼal. Adán tsaʼʌch i cʼuxu anquese yujil chaʼan mi caj i chʌmelob cheʼ miʼ ñusʌbeñob i tʼan Dios.

Ti jiñi bʌ ora cheʼ ti ochʼajel qʼuin, Jehová tsiʼ pejca Adán yicʼot Eva. Tsiʼ cʼajtibeyob chucoch tsiʼ ñusʌbeyob i tʼan. Eva tsiʼ yʌqʼue i mulin jiñi lucum, i jiñi Adán tsiʼ yʌqʼue i mulin jiñi Eva. Jehová tsiʼ chocoyob loqʼuel yaʼ ti pʌcʼʌbʌl come tsiʼ ñusʌbeyob i tʼan. Cheʼ jaʼel, tsiʼ yʌcʼʌ ángelob yicʼot jumpʼejl espada am bʌ i cʼʌcʼal yaʼ tiʼ tiʼ jiñi pʌcʼʌbʌl chaʼan maʼañix miʼ yochelob.

Jehová tsiʼ yʌlʌ jaʼel chaʼan mi caj i toj jiñi tsaʼ bʌ i loti Eva. Tiʼ sujm, mach yoque lucumic tsaʼ bʌ i pejca Eva. Jehová maʼañic tsiʼ mele (pʌtʌ) lucum yujil bʌ tʼan. Juntiquilʌch jontol (maña) bʌ ángel tsaʼ bʌ i yʌcʼʌ ti tʼan jiñi lucum. Tsiʼ mulaj i lotin jiñi Eva. Jiñi ángel jiñʌch Satanás, jiñi Diablo. Ti talto bʌ qʼuin, Jehová mi caj i jisan Satanás. Maʼañix mi caj i chʌn lotiñonla chaʼan mi lac mel (chaʼlen) mach bʌ weñic.