Isaac 40 i jabilel cheʼ bʌ tsaʼ ñujpuñi yicʼot Rebeca. Tsiʼ wen cʼuxbi. Tsaʼ yila pañimil loj (lutj) bʌ i yalobilob.

Esaú i cʼabaʼ jiñi ascuñʌl bʌ, Jacob i cʼabaʼ jiñi ijtsʼiñʌl bʌ. Esaú miʼ wen mulan xʌmbal ti mateʼel i yujil i yajñesʌntel bʌteʼel. Pero Jacob miʼ mulan cʌytʌl ti otot.

Ti jimbʌ ora, cheʼ bʌ miʼ chʌmel jiñi tatʌl, jiñi ascuñʌl bʌ miʼ ñumen aqʼuentel lum yicʼot taqʼuin bajcheʼ jiñi ijtsʼiñʌl bʌ. Ili cʌmbil ti español bajcheʼ herencia. Tiʼ familia Isaac, jiñi herencia yaʼ ochem jaʼel jiñi tʼan tsaʼ bʌ i yʌcʼʌ Jehová tiʼ tojlel Abraham. Esaú maʼañic tsiʼ chʼʌmʌ ti ñuc jiñi tʼan tac. Pero Jacob tsaʼʌch i wen chʼʌmʌ ti ñuc.

An junsujtel Esaú wen lujben tsaʼ cʼoti tiʼ yotot come jumpʼejl qʼuin tsiʼ yajñesa bʌteʼel. Cheʼ jiñi, tsaʼ yubibe i yujtsʼil sumuc bʌ bʌlñʌcʼʌl woli (choncol) bʌ i chajpan Jacob, i tsiʼ yʌlʌ: «¡Cʼuñix pañimil woli cubin chaʼan wiʼñal! ¡Aqʼueñon jiñi chʌchʌc bʌ bʌlñʌcʼʌl!». Jacob tiʼ sube: «Weno, ñaxan aqʼueñon a tʼan chaʼan miʼ mejlel c chʼʌm jiñi a herencia». Esaú tsiʼ yʌlʌ: «¡Mach c wentajic jiñi herencia! Cʌylen a wicʼot. Com bʌ joñon jiñʌch bʌlñʌcʼʌl». ¿Wen chʼejl ba Esaú maʼ wʌl cheʼ bʌ tsiʼ mele (chaʼle) jiñi? Maʼañic. Tsiʼ qʼuexe ti jumpʼejl chʼejew bʌlñʌcʼʌl jiñi wen ñuc bʌ i cʼʌjñibal.

 Cheʼ bʌ ñoxix Isaac, tsaʼ cʼoti i yorajlel chaʼan miʼ yʌqʼuen i bendición jiñi Esaú. Pero Rebeca tsiʼ colta Jacob chaʼan jin miʼ yʌqʼuentel jiñi bendición. Cheʼ bʌ Esaú tsaʼ yubi jiñi, tsaʼ wen michʼa i tsaʼ caji i chajpan bajcheʼ miʼ mejlel i tsʌnsan i yijtsʼin. Isaac yicʼot Rebeca yom i cʌntañob Jacob, jin chaʼan tsiʼ subeyob: «Cucu ti putsʼel yaʼ baqui an a wichan Labán, jinto cheʼ lajmeñix i michʼajel a wʌscun». Jacob tsiʼ chʼujbibeyob i tʼan i tsaʼ putsʼi chaʼan maʼañic miʼ tsʌnsʌntel.