Jehová tsiʼ yʌqʼue i tʼan Jacob chaʼan mi caj i cʌntan, cheʼ bajcheʼ tsiʼ mele (chaʼle) tiʼ tojlel Abraham yicʼot Isaac. Jacob tsaʼ majli ti chumtʌl ti Harán i yaʼʌch tsaʼ ñujpuñi. Tsiʼ yʌcʼʌ cabʌl i yalobil yicʼot tsaʼ sujti ti juntiquil wen am bʌ i taqʼuin.

Cheʼ añix ora chumul yaʼi, Jehová tiʼ sube Jacob: «Sujten tiʼ lumal a tat baʼan a piʼʌlob». Jin chaʼan Jacob yicʼot i familia tsaʼ cajiyob ti majlel baʼan i tat. Cheʼ yaʼix añob ti bij, i wiñicob tsaʼ tili i subeñob: «A wʌscun Esaú woliʼ tilel baʼañonla yicʼot 400 wiñicob». Jacob tsiʼ bʌcʼña Esaú come tsiʼ ñaʼta chaʼan miʼ mejlel i ticʼlʌben i familia. Jin chaʼan tsiʼ pejca Jehová ti oración: «A wocolic, locʼsañon tiʼ cʼʌb cʌscun». Tiʼ yijcʼʌlal, Jacob tsiʼ chocbe majlel Esaú yonlel tiñʌmeʼ, chivo, wacax, camello yicʼot burro.

Ti jiñi acʼʌlel, cheʼ bʌ i bajñel jach Jacob, tsiʼ qʼuele juntiquil ángel. Jiñi ángel tsaʼ caji ti jatsʼ yicʼot Jacob cʼʌlʌl ti sʌcʼan. Jacob maʼañic tsaʼ lujbʼa anquese tsaʼ lojwi. Jiñi ángel tiʼ sube: «Acʼʌyon sujtel». Pero Jacob tsiʼ jacʼbe: «Maʼañic, jinto maʼ wʌqʼueñon c bendición».

Jiñi ángel tsiʼ yʌqʼue i bendición Jacob. Wʌle Jacob yujil chaʼan Jehová maʼañic miʼ caj i yʌcʼ chaʼan miʼ ticʼlʌntel ti Esaú.

 Ti jiñi bʌ sʌcʼan, Jacob tsiʼ ñajti qʼuele Esaú yicʼot 400 i wiñicob. Jin tsaʼ ñaxan loqʼui i pejcan Esaú, i wucyajl (7) tsaʼ ñucle tiʼ tojlel. Esaú tsaʼ majli ti ajñel i mecʼ Jacob. Tsaʼ laja cajiyob ti uqʼuel i tsiʼ yutsʼesayob i bʌ. ¿Tsaʼ ba i mulaj Jehová maʼ wʌl tsaʼ bʌ i mele Jacob?

Ti wiʼil, Esaú tsaʼ sujti tiʼ yotot, i jiñi Jacob tsaʼ bej caji ti xʌmbal. Jacob an 12 i yalobil: Rubén, Simeón, Leví, Judá, Dan, Neftalí, Gad, Aser, Isacar, Zabulón, José yicʼot Benjamín. Ti wiʼil, Jehová mi caj i cʼʌmben juntiquil i yalobil Jacob chaʼan miʼ coltan i tejclum, ili jiñʌch José. ¿A wom baʼ ñaʼtan bajcheʼ? Laʼ laj qʼuel.