Jiñi mozo bʌ israelob miʼ yʌjqʼuelob ti tsʌts bʌ eʼtel (troñel) yaʼ ti Egipto. Jehová tsiʼ choco majlel Moisés yicʼot Aarón chaʼan miʼ subeñob faraón: «Acʼʌ majlel jiñi c wiñicob yaʼ ti tiquin bʌ lum chaʼan miʼ chʼujutesañoñob». Faraón ñoj chan tsiʼ yubi i bʌ i tsiʼ yʌlʌ: «Mach c cuenta chuqui miʼ yʌl Jehová. Maʼañic mi caj c choc majlel jiñi israelob». Faraón tsiʼ ñumen acʼʌyob ti tsʌts bʌ eʼtel. Pero Jehová an chuqui tsiʼ pʌsbe. ¿Chuqui? Tsiʼ chocbe majlel 10 wocol. Jehová tiʼ sube Moisés: «Faraón maʼañic miʼ jacʼ c tʼan. Sʌcʼan mi caj i majlel yaʼ ti jaʼ Nilo. Cucu suben chaʼan mi caj i pʌntʌyel ti chʼichʼ jiñi jaʼ come maʼañic miʼ yʌcʼ loqʼuel jiñi c tejclum». Moisés tsaʼ majli i suben. Faraón tsiʼ qʼuele chaʼan Aarón tsiʼ jatsʼʌ tiʼ teʼ jiñi jaʼ, i tsaʼ pʌntʌyi ti chʼichʼ. Tsaʼ wen tuwʼan jiñi jaʼ, mach mejlic ti japol i tsaʼ luʼ chʌmi jiñi chʌy. Pero maʼañic tsiʼ yʌcʼʌyob majlel yaʼ ti tiquin bʌ lum.

Cheʼ bʌ tsaʼix ñumi 7 qʼuin, Jehová tiʼ chaʼ choco majlel Moisés chaʼan miʼ suben faraón: «Mi maʼañic maʼ wʌcʼ loqʼuel jiñi c wiñicob, mi  caj i pʼojlel xpequejc (xmuch) ti Egipto». Aarón tsiʼ letsa i teʼ i tsaʼ wen pʼojli xmuch ti Egipto come faraón maʼañic tsiʼ jacʼbe i tʼan Dios. An cabʌl xpequejc ti ototal, ti wʌyibʌl, ti chʼejew tac... ¡Jin jachix baqui tac an! Faraón tiʼ sube Moisés: «Suben Jehová chaʼan miʼ lajmesan ili wocol. Cheʼ jiñi mi caj cʌcʼ majlel jiñi israelob». Jehová tsiʼ lajmesa jiñi wocol, i jiñi egiptojob wen on tsiʼ tempayob chʌmeñix bʌ xmuch. Tsaʼ caji ti tuwʼan jiñi lum, pero faraón maʼañic tsiʼ yʌcʼʌyob majlel jiñi israelob.

Ti wiʼil, Jehová tiʼ sube Moisés: «Laʼ i jatsʼ lum Aarón yicʼot i teʼ. Mi tsiʼ jatsʼʌ, jiñi tsʼubejn mi caj i sujtel ti us [o xchax]». I cheʼʌch tsaʼ ujti, tsaʼ wen pʼojli xchax i tsaʼ cʼuxleyob. An egiptojob tsaʼ bʌ i subeyob faraón: «¡Tilem ti Dios ili wocol!». Pero faraón maʼañic tsiʼ choco majlel jiñi israelob.