Moisés yicʼot Aarón tsaʼ majli i subeñob faraón tsaʼ bʌ i yʌlʌ Dios: «Mi maʼañic maʼ wʌcʼ ti loqʼuel c wiñicob, mi caj c choc tilel jaj tiʼ pejtelel Egipto». Ili jaj jiñʌch xcʼoj yujil bʌ cʼux. Cʌlʌxix tsaʼ ochi tiʼ yotot egiptojob: Tiʼ yotot añoʼ bʌ i taqʼuin yicʼot pʼumpʼuñoʼ bʌ. Tsaʼ pʼojli xcʼoj tiʼ pejtelel Egipto. Pero ti Gosén, yaʼ baqui chumul jiñi israelob, maʼañic xcʼoj. Ili i chʌnchajplel wocol yicʼot jiñi tsaʼ bʌ wiʼil tili jin jach tsiʼ ticʼla egiptojob. Faraón tiʼ sube Moisés: «Suben Jehová chaʼan miʼ choc loqʼuel ili jaj tac, i miʼ mejlel ti majlel a wiñicob». Cheʼ bʌ Jehová tsiʼ lajmesa jiñi wocol, faraón tsiʼ qʼuexta i tʼan. ¿Muʼ ba caj i chʼʌmben isujm maʼ wʌl ti jumpʼejl bʌ qʼuin jiñi faraón?

Jehová tsiʼ yʌlʌ ti wiʼil: «Mi maʼañic miʼ yʌcʼ loqʼuel c wiñicob jiñi faraón, mi caj i cʼamʼan yicʼot i chʌmel i yañimal jiñi egiptojob». Tiʼ yijcʼʌlel, tsaʼ tsʼʌctiyi i tʼan Jehová, pero maʼañic chuqui tsiʼ chaʼle i yañimal jiñi israelob. Faraón maʼañic tsiʼ qʼuexta i pensar come tsʌts i pusicʼal. Cheʼ jiñi, Jehová tsiʼ choco majlel Moisés yaʼ baqui an faraón i tsiʼ wejtu jiñi tan. Jiñi tan tsaʼ sujti ti tsʼubejn, tsiʼ pʌyʌ majlel icʼ i tsaʼ yajli tiʼ tojlel jiñi egiptojob. Jiñi tsʼubejn tsiʼ yʌqʼueyob cʼux bʌ pasel i tsiʼ yʌqʼueyob jaʼel jiñi añimal tac. Pero faraón tiʼ sube jiñi israelob chaʼan maʼañic miʼ mejlelob ti majlel.

Jehová tsiʼ chaʼ choco majlel Moisés yaʼ baqui an faraón chaʼan miʼ suben: «¿Maxto a womic a choc  majlel jiñi c wiñicob? Ijcʼʌl mi caj cʌcʼ ti yajlel tuñijaʼ». Tiʼ yijcʼʌlel, Jehová tsiʼ choco jubel tuñijaʼ, chajc yicʼot cʼajc. Maʼañic baʼ ujtem yambʌ tsʌts bʌ jaʼal ti Egipto. Tsiʼ luʼ buchu teʼ tac yicʼot pʌcʼʌbʌl, pero yaʼ ti Gosén maʼañic chuqui tsaʼ ujti. Cheʼ jiñi faraón tsiʼ yʌlʌ: «Suben Jehová chaʼan miʼ lajmel ili wocol, i mi laʼ mejlel ti majlel». Cheʼ bʌ tsaʼ lajmi jiñi jaʼal yicʼot tuñijaʼ, faraón tsiʼ yʌñʌ i tʼan.

Jin chaʼan Moisés tsiʼ yʌlʌ: «Jiñi sajcʼ mi caj i cʼuxben i yopol jiñi teʼ tac tsaʼ to bʌ i cʌyle cheʼ tsaʼ ñumi jiñi tsʌts bʌ jaʼal». Tsiʼ cʼuxu tsaʼ bʌ cʌyle yaʼ ti teʼ tac yicʼot yaʼ ti pʌcʼʌbʌl. Faraón tiʼ sube Moisés: «Suben Jehová chaʼan miʼ locʼsan jiñi sajcʼ tac». Cheʼ bʌ Jehová tsiʼ locʼsa jiñi sajcʼ, faraón maʼañic tsaʼ qʼuextʌyi.

Jehová tsiʼ sube Moisés: «Letsan a cʼʌb». Ti ora jach icʼchʼipan tsaʼ cʌyle pañimil. Uxpʼejl qʼuin maʼañic chuqui tsaʼ mejli i qʼuel jiñi egiptojob. Cojach an i sʌclel pañimil tiʼ yotot jiñi israelob.

Faraón tsiʼ sube Moisés: «Maʼ mejlel ti majlel a wicʼot a piʼʌlob, pero yom mi laʼ cʌy jiñi laʼ wʌlacʼ». Moisés tsiʼ jacʼbe: «Yom mic pʌy lon majlel chaʼan mi cʌqʼuen lon c Dios bajcheʼ i majtan». Faraón wen michʼ tsaʼ yʌlʌ: «¡Loqʼuen majlel! Mi tsaʼ chaʼ qʼueleyet, mi caj c tsʌnsañet».