José jiñʌch ijtsʼiñʌlix bʌ i yalobil Jacob. I yʌscuñob tsiʼ taja i qʼuelob chaʼan José jiñʌch muʼ bʌ i ñumen cʼuxbintel tiʼ tat. ¿Bajcheʼ yubil tsiʼ yubiyob i bʌ maʼ wʌl? Tsiʼ wen michʼ qʼueleyob. Ti jumpʼejl bʌ acʼʌlel, José tsiʼ chaʼle lecoj bʌ ñajal i tiʼ sube i yʌscuñob. Tsiʼ ñaʼtayob chaʼan ti jumpʼejl bʌ qʼuin mi caj i lijchocoñob i bʌ tiʼ tojlel José. Jin chaʼan tsiʼ ñumen michʼqʼueleyob.

Ti jumpʼejl bʌ qʼuin, i yʌscuñob José woli (yʌquel) i cʌntañob tiñʌmeʼ tac tiʼ tʼejl jiñi tejclum Siquem. Cheʼ jiñi, Jacob tsiʼ choco majlel José chaʼan miʼ qʼuel bajcheʼ yilal i yʌscuñob. Cheʼ bʌ tsiʼ taja i ñajti qʼuelob, tsiʼ yʌlʌyob: «Yaʼ tilel jiñi yujil bʌ ñajal. ¡Laʼ lac tsʌnsan!». Tsiʼ chucuyob i tsiʼ chocoyob ochel ti tambʌ chʼen. Pero Judá, jiñi yambʌ i yʌscun, tsiʼ yʌlʌ: «Mach laʼ tsʌnsan. Laʼ lac chon chaʼan miʼ sujtel ti mozo». I cheʼʌch tsiʼ meleyob (chaʼleyob). Tsiʼ chombeyob ti 20 plata jiñi xchonoñelob ti Madián woli bʌ i majlelob ti Egipto.

Ti wiʼil, tsiʼ pʌcʼbeyob i pislel tiʼ chʼichʼel chivo, tsiʼ chʼʌmbeyob majlel i tat i tiʼ subeyob: «¿Mach ba i chaʼañic a walobil iliyi?». Jacob tsiʼ ñaʼta chaʼan juncojt añimal tiʼ tsʌnsa José i wen chʼijiyem tsiʼ yubi. Maʼañic majqui tsaʼ mejli i tijicñesan.

Cheʼ tsaʼ cʼotiyob ti Egipto, juntiquil wiñic ñuc bʌ i yeʼtel i cʼabaʼ Potifar tsiʼ mʌñʌ José bajcheʼ i mozo. Pero Jehová maʼañic tsiʼ cʌyʌ José. Potifar tsiʼ qʼuele chaʼan José wen yujil eʼtel (troñel) yicʼot chaʼan miʼ mejlel i yʌqʼuen i tʼan. Mach cabʌlic ora tsaʼ ñumi, José tsaʼ ochi tiʼ wenta i chubʌʼan Potifar.

 I yijñam Potifar tsiʼ qʼuele José chaʼan wen cʼoʼtajax yicʼot pʼʌtʌl, i mach junsujtel jach tiʼ sube chaʼan miʼ totsʼtʌlob. ¿Chuqui tsiʼ mele José? Maʼañic tsiʼ jacʼbe i tiʼ sube: «Maʼañic, jiñi mach weñic. C yum miʼ qʼuelon ti ñuc, i jatet i yijñamet. Woli c chaʼlen mulil tiʼ tojlel Dios mi tsaʼ c piʼleyet».

Ti jumpʼejl bʌ qʼuin, i yijñam Potifar tsiʼ wersa xiqʼui José chaʼan miʼ piʼlen. Tsiʼ chucu tiʼ pislel, pero tsaʼ loqʼui ti ajñel. Cheʼ bʌ Potifar tsaʼ cʼoti tiʼ yotot, i yijñam tsaʼ caji ti lot i tsiʼ yʌlʌ chaʼan José tsiʼ jopʼo i piʼlen. Potifar tsaʼ wen michʼa i tsaʼ yotsa ti cárcel. Pero Jehová maʼañic tsaʼ ñajʌyi i chaʼan José.