Tsaʼ chumle juntiquil wiñic tsaʼ bʌ i chʼujutesa Jehová yaʼ ti Uz. I cʼabaʼ jiñʌch Job, wen an i chubʌʼan yicʼot wen yonlelob tiʼ familia. Wen uts i pusicʼal, tsiʼ colta jiñi pʼumpʼuñoʼ bʌ, jiñi tsaʼix bʌ chʌmiyob i ñoxiʼal yicʼot jiñi xbiʼtalob mach bʌ añobic i tat i ñaʼ. Job tsiʼ mele chuqui utsʼat. ¿Jimba ti caj maʼ wʌl jiñi cheʼ maʼañic i wocol?

Job mach yujilic, pero jiñi Diablo woli (choncol) i wen qʼuel. Jehová tiʼ sube jiñi Satanás: «¿Tsaʼ ba a wen qʼuele jiñi c wiñic Job? Maʼañic yambʌ lajal bʌ bajcheʼ Job ti pañimil. Miʼ jacʼ tʼan yicʼot wen i melbal». Satanás tsiʼ jacʼbe: «Tiʼ sujm mi jacʼ a tʼan, come maʼ cʌntan, maʼ wʌqʼuen a bendición, lum tac yicʼot añimal tac... Chilben (pojben) i chubʌʼan i maʼañix mi caj i chʼujutesañet». Jehová tiʼ sube: «Miʼ mejlel a wilʌben i pusicʼal, pero mach a tsʌnsan». Jehová tsiʼ yʌcʼʌ chaʼan Satanás miʼ yilʌben i pusicʼal Job, ¿a wujil ba chucoch? Come wen yujil chaʼan Job mi caj i chʌn jacʼben i tʼan.

Wen cabʌl bajcheʼ jiñi Satanás tsiʼ ticʼla Job chaʼan mi yilʌben i pusicʼal. Ti ñaxan, tsiʼ cʼʌñʌ jiñi sabeojob chaʼan miʼ xujchʼibeñob i wacax yicʼot i burro. Ti wiʼil, jiñi chajc tsiʼ laj pulbe i tiñʌmeʼ. Tsaʼ chʌmiyob jeʼel jiñi i wiñicob woli bʌ i cʌntañob jiñi añimal tac. Pero jiñi ñumen tsʌts bʌ wocol wiʼil to tsaʼ ujti: Tsaʼ tejñi i yalobilob ti otot cheʼ bʌ woliyob ti uchʼel i tsaʼ luʼ chʌmiyob. Job wen chʼijiyem tsaʼ yubi, pero maʼañic tsiʼ cʌyʌ i chʼujutesan Jehová.

Satanás yom to chaʼan Job miʼ ñumen ilan wocol, jin chaʼan tsiʼ yʌqʼue lecoj bʌ i tsoy tiʼ pejtelel i bʌcʼtal i wen cʼux tsaʼ yubi. Job mach yujilic chucoch woli  wen ñusan wocol tac, pero maʼañic tsiʼ cʌyʌ i chʼujutesan Jehová. Dios tsiʼ qʼuele i tsiʼ yubi i tijicñʌyel chaʼan woli bʌ i mel (chaʼlen) Job.

Ti wiʼil, Satanás tsiʼ choco majlel uxtiquil wiñic chaʼan miʼ yilʌbeñob i pusicʼal Job. Tiʼ subeyob: «Tsaʼ chaʼle mulil i wʌle a wom a poj muc. Jin chaʼan Dios woliʼ yʌqʼueñet a toj». Job tsiʼ jacʼʌ: «Maʼañic melbil c chaʼan mach bʌ weñic». Pero ti wiʼil tsaʼʌch i yʌqʼue i mulin Jehová jiñi i wocol i tiʼ sube Dios chaʼan mach tojic.

Juntiquil xcolel i cʼabaʼ Elihú woli jach i ñʌchʼtan woli bʌ i subentel Job. Pero tsaʼ caji ti tʼan i tsiʼ yʌlʌ: «Mach isujmic chuqui mi laʼ wʌl. Jehová wen ñuc, ñumen to cheʼ bajcheʼ mi lac ñaʼtan, Jehová maʼañic miʼ mel mach bʌ weñic. Miʼ luʼ qʼuel woli bʌ ti ujtel yicʼot miʼ coltan jiñi woli bʌ i ñusañob wocol».

Jehová tsiʼ pejca jaʼel jiñi Job. Tiʼ sube: «¿Baqui añet cheʼ bʌ tsaʼ c mele jiñi panchan yicʼot jiñi pañimil? ¿Chucoch maʼ wʌl chaʼan mach tojoñic? Toʼol tʼan jach maʼ chaʼlen cheʼ mach a wujilic chucoch miʼ yujtel jiñi wocol tac». Job tsiʼ ñaʼta chaʼan mach tojic tsiʼ chaʼle tʼan i tsiʼ yʌlʌ: «Tsaʼ ñajʌyiyon. Ñusʌbeñon chaʼan tsaʼ bʌ cʌlʌ. Tsaʼ cubiyet ti alol, pero wʌle j cʌñʌyet tiʼ sujmlel yicʼot mij qʼuel chaʼan miʼ mejlel a luʼ mel chuqui a wom».

Cheʼ bʌ tsaʼ ujti i yilʌbentel i pusicʼal Job, Jehová tsiʼ cʼoqʼuesa yicʼot ñumen to tsiʼ yʌqʼue chuqui an i chaʼan cheʼ bajcheʼ ti ñaxan. Job wen jal tsaʼ chumle yicʼot wen tijicña tsaʼ ajñi. Jehová tsiʼ yʌqʼue i bendición cheʼ tsiʼ chʌn jacʼbe i tʼan, anquese mach cʼuñic tsaʼ yubi. ¿Ixcu jatet? Cheʼ bʌ mi tilel chuqui jach ti a tojlel, ¿cheʼ ba mi caj a mel bajcheʼ Job yicʼot muʼ ba caj a chʌn chʼujutesan Jehová?