Cheʼ bʌ tsiʼ yubi faraón chaʼan jiñi israelob tsaʼix loqʼuiyob ti Egipto, tsiʼ chaʼ ñaʼta chucoch tsiʼ yʌcʼʌyob majlel. Tiʼ sube i soldadojob: «Chajpanla j carro chaʼan bʌ guerra, i laʼ la cajñesañob. Maʼañic tsaʼ la cʌcʼʌyob majlel i wentʌlel». Cheʼ jiñi, tsaʼ caji i yajñesañob jiñi israelob.

Jehová woli (choncol) i pʌsben majlel bij i tejclum, tsiʼ yʌcʼʌ ti loqʼuel tocal cheʼ ti qʼuiñil yicʼot tsiʼ yʌqʼueyob cʼajc cheʼ ti acʼʌlel. Tsiʼ pʌyʌyob majlel yaʼ ti Chʌchʌc bʌ mar i tiʼ subeyob chaʼan miʼ waʼchocoñob pisil bʌ i yototob.

Ti wiʼil, jiñi israelob tsiʼ qʼueleyob chaʼan yaʼ tilel i yajñesañob jiñi faraón yicʼot i soldadojob. Maʼañobic i putsʼib come mʌctʌbilob ti mar yicʼot ti egiptojob. Tsaʼ cajiyob ti oñel i tiʼ subeyob Moisés: «¡Mi caj lac chʌmel! ¿Chucoch tsaʼ locʼsayon lojon ti Egipto?». Pero Moisés tsiʼ jacʼbeyob: «Mach laʼ chaʼlen bʌqʼuen. Pijtanla i qʼuelela bajcheʼ mi caj i coltañonla Jehová». Moisés tsiʼ wen acʼʌ ti ñuc Jehová.

Ti wiʼil, Jehová tiʼ sube jiñi israelob chaʼan miʼ chejob jiñi pisil bʌ i yototob. Ti jiñi acʼʌlel, Jehová tsiʼ ñijca jiñi tocal i tsiʼ yʌcʼʌ tiʼ xiñil jiñi egiptojob yicʼot jiñi israelob. Icʼchʼipan yaʼ baqui an egiptojob, pero an i sʌclel pañimil yaʼ baqui an israelob.

Cheʼ jiñi, Jehová tiʼ sube Moisés chaʼan miʼ sʌtsʼ majlel i cʼʌb yaʼ ti  mar. Jumpʼejl aʼbal tsiʼ choco tilel tsʌts bʌ icʼ. Tsaʼ loqʼui jumpʼejl bij yaʼ tiʼ yojlil (xiñil) jiñi mar. Jiñi israelob tsaʼ cʼaxiyob ti tiquin bʌ lum cʼʌlʌl tsaʼ cʼotiyob ti yambʌ junwejl.

I soldadojob faraón tsiʼ yajñesayob jiñi israelob i tsaʼ ochiyob jaʼel yaʼ ti bij am bʌ tiʼ xiñil jiñi mar. Pero Jehová tsiʼ lam pucu jiñi egiptojob. Tsiʼ jembe (yʌsibe) i yoc tac i carretajob. Jiñi soldadojob tsaʼ cajiyob ti oñel: «¡Laʼ putsʼiconla loqʼuel! Jehová woliʼ contrajiñonla chaʼan miʼ coltan i wiñicob».

Jehová tiʼ sube Moisés: «Sʌtsʼʌ majlel i cʼʌb yaʼ ti mar». Ti ora jach tsiʼ chaʼ ñupʼu i bʌ jiñi mar i yaʼ tsaʼ cʌyle jiñi egiptojob. Jiñi Faraón yicʼot i wiñicob tsaʼ chʌmiyob.

Ti yambʌ i junwejlel jiñi mar, tsaʼ caji i ñuqʼuesañob Dios yicʼot jumpʼejl cʼay: «Mi caj j cʼʌyin Jehová, come tsiʼ wen ñuqʼuesa i bʌ. Tsaʼix i choco ochel ti mar jiñi cʼʌchʌloʼ bʌ ti caballo». Cheʼ bʌ yʌquelob ti cʼay, jiñi xʼixicob tsaʼ cajiyob ti son yicʼot tsiʼ ñijcayob jiñi pandereta. Wen tijicñayob come librejobix.