Ti wiʼil, cheʼ bʌ yaʼ to añob ti tiquin bʌ lum jiñi israelob, Coré, Datán, Abiram yicʼot yambʌ 250 wiñicob tsiʼ contrajiyob Moisés. Tiʼ subeyob: «¡Lujbeñoñix lojon ti laʼ tojlel! ¿Chucoch jatet c yumet lojon? ¿Chucoch tsaʼ waʼchoconti Aarón ti ñuc bʌ motomaj? Mach cojach an a wicʼot Jehová yicʼot Aarón, lon quicʼotʌch jaʼel». Jehová maʼañic tsiʼ mulaj tsaʼ bʌ i yʌlʌyob come tsiʼ ñaʼta chaʼan jin woli (choncol) i contrajiñob.

Moisés tiʼ sube Coré yicʼot jiñi lajaloʼ bʌ i tʼan yicʼot: «Laʼ laj ijcʼʌl wʌʼ ti tabernáculo i chʼʌmʌla tilel laʼ pom yicʼot i yajñib. Jehová mi caj i pʌsbeñonla majqui waʼchocobil i chaʼan».

Tiʼ yijcʼʌlel, Coré yicʼot jiñi 250 wiñicob tsiʼ tempayob i bʌ yicʼot Moisés yaʼ ti tabernáculo. Tsaʼ caji pulob jiñi pom i cheʼ tsiʼ poj meleyob (chaʼleyob) i bʌ bajcheʼ jiñi motomaj. Jehová tiʼ sube Moisés yicʼot Aarón: «Ñajtʼesan laʼ bʌ ti Coré yicʼot tiʼ wiñicob».

Coré tsajñʌch yaʼ ti tabernáculo yaʼ baqui an Moisés, pero Datán, Abiram yicʼot i familia maʼañic tsajñiyob. Jehová tiʼ sube jiñi israelob: «Ñajtʼesan laʼ bʌ yaʼ ti pisil bʌ i yotot Coré, Datán yicʼot Abiram». Ti ora tsiʼ ñajtʼesayob i bʌ jiñi israelob. I familia  Datán yicʼot Abiram waʼal tsaʼ cʌyleyob yaʼ tiʼ pat i yototob. Tsaʼ cajwi jiñi lum i tsiʼ bucʼu jiñi xñusatʼañob. Yaʼ ti tabernáculo, tsaʼ jubi cʼajc ti panchan i tsiʼ jisa Coré yicʼot jiñi 250 wiñicob.

Cheʼ jiñi, Jehová tiʼ sube Moisés: «Laʼ i chʼʌmob tilel i barateʼ jiñi yumʌloʼ bʌ ti jujumpʼejl tribu. Yom maʼ tsʼijbuben i cʼabaʼ yaʼ tiʼ barateʼ jujuntiquil yumʌl. Pero yaʼ tiʼ tribu Leví, tsʼijbuben i cʼabaʼ Aarón. Luʼ otsan jiñi barateʼ yaʼ ti tabernáculo. Mi caj i loqʼuel i ñich i barateʼ jiñi muʼ bʌ caj c waʼchocon».

Tiʼ yijcʼʌlel, Moisés tsiʼ luʼ locʼsa jiñi barateʼ i tsiʼ pʌsbe jiñi yumʌlob. I barateʼ Aarón tsaʼ coli i ñich yicʼot cʼʌñix bʌ almendra. Jehová tsaʼ yʌcʼʌ ti cʌñol chaʼan jiñʌch Aarón tsiʼ waʼchoco ti ñuc bʌ motomaj.