Jehová tiʼ sube Moisés: «Letsen tilel wʌʼ ti wits cheʼ ti sʌcʼan. Mi caj c tsʼijbun c mandar ti wechel bʌ xajlel (tun) i mi caj cʌqʼueñet». Moisés tsaʼ letsi majlel i 40 qʼuin yic’ot 40 acʼʌlel tsaʼ ajñi yaʼ ti wits. Cheʼ bʌ yaʼ to an ti wits, Jehová tiʼ tsʼijbu ti chaʼwejch tun jiñi 10 Mandar i tsiʼ yʌqʼue Moisés.

Mach jalic tsaʼ ñumi cheʼ bʌ jiñi israelob tsaʼ caji i ñaʼtañob chaʼan tsaʼix cʌjyiyob ti Moisés. Jin chaʼan tiʼ subeyob Aarón: «¡Com maʼ melbeñon lojon juntiquil dios muʼ bʌ i ñaxan majlel ti lon c tojlel!». Aarón tsiʼ jacʼʌ: «Chʼʌmʌla tilel jiñi oro am bʌ laʼ chaʼan». Cheʼ jiñi, tsiʼ yulmesa jiñi oro chaʼan miʼ mel (pʌt) juncojt alʌ tat wacax. Tsiʼ yʌlʌyob: «¡Ili alʌ tat wacax jiñʌch lac dios tsaʼ bʌ i locʼsayonla ti Egipto!». Tsiʼ meleyob (chaʼleyob) qʼuiñijel i tsiʼ chʼujutesañob jiñi alʌ tat wacax. ¿Tojʌch ba ili? Maʼañic, come tsiʼ yʌlʌyob chaʼan cojach Jehová mi caj i chʼujutesañob. Pero maʼañic woli (yʌquel) i tsʼʌctesañob i tʼan.

Jehová tsiʼ qʼuele yʌquel bʌ ti ujtel i tiʼ sube Moisés: «Cucu yaʼ baqui an israelob, come maʼañic  woliʼ jacʼob c tʼan. Woliʼ chʼujutesañob juntiquil dios mach isujmic». Moisés tsaʼ jubi yaʼ ti wits i chucul i chaʼan jiñi chaʼwejch xajlel.

Cheʼ bʌ Moisés woliʼ lʌcʼtesan i bʌ yaʼ baʼ jijlemob, tsiʼ yubi chaʼan woliyob ti cʼay. Cheʼ bʌ tsaʼ cʼoti, tsiʼ qʼuele chaʼan woliyob ti son yicʼot i chʼujutesañob jiñi wacax. Moisés tsaʼ wen michʼa, i tsiʼ topʼo jiñi chaʼwejch xajlel. Tsaʼ majli i jisan jiñi alʌ tat wacax i tsiʼ cʼajtibe Aarón: «¿Bajcheʼ tsiʼ qʼuextayob a pensar chaʼan maʼ chaʼlen ili mach bʌ weñic?». Aarón tsiʼ jacʼʌ: «Mach michʼaquet, a wujilix bajcheʼ yilalob. Yomobi juntiquil dios, jin chaʼan tsaʼ cotsa jiñi oro yaʼ ti cʼajc i tsaʼ loqʼui ili alʌ tat wacax». Aarón maʼañic tsiʼ mele i wentʌlel jiñi. Moisés tsaʼ chaʼ letsi yaʼ ti wits i tsiʼ cʼajtibe Jehová chaʼan miʼ ñusʌben i mul jiñi israelob.

Jehová tsiʼ ñusʌbe i mul jiñi tsaʼ bʌ i jacʼbeñob i tʼan. Wen ñuc i cʼʌjñibal cheʼ tsiʼ jacʼbeyob i tʼan Jehová yicʼot Moisés, ¿mach ba cheʼiqui?