Cheʼ bʌ añix chaʼpʼejl uw i loqʼuel jiñi israelob ti Egipto, tsaʼ cʼotiyob yaʼ ti wits Sinaí i tsiʼ waʼchocoyob i yotot. Jehová tiʼ sube Moisés chaʼan miʼ letsel yaʼ ti wits i tsiʼ yʌlʌ: «Joñon tsaʼ j coltan jiñi israelob. Miʼ mucʼʌch i jacʼob jiñi c tʼan yicʼot jiñi c mandar, mi caj i sujtelob ti c tejclum». Cheʼ bʌ Moisés tsaʼ jubi yaʼ ti wits, tiʼ sube jiñi israelob tsaʼ bʌ i yʌlʌ Jehová. ¿Bajcheʼ tsiʼ jacʼʌyob? «Mi caj c chaʼlen lojon tiʼ pejtelel muʼ bʌ i yʌl Jehová».

Moisés tsaʼ chaʼ letsi yaʼ ti wits. Jehová tiʼ sube: «Tiʼ yuxpʼejlel qʼuin mi caj c pejcan jiñi israelob. Subeñob chaʼan maʼañic miʼ ñopob letsel wʌʼ ti wits». Moisés tsaʼ jubi i tiʼ sube jiñi israelob chaʼan miʼ chajpañob i bʌ come Jehová mi caj i pejcañob.

Tiʼ yuxpʼejlel qʼuin, tsiʼ qʼueleyob i cʼʌcʼal chajc yicʼot icʼcupam bʌ tocal yaʼ ti wits. Tsaʼ yubiyob wen tsʌts bʌ chajc yicʼot i tʼan trompeta. Jehová tsaʼ jubi tiʼ yojlil (xiñil) jumpʼejl cʼajc yaʼ ti wits. Tsiʼ wen bʌcʼñayob. An butsʼ tiʼ pejtelel jiñi wits yicʼot wen tsʌts tsiʼ ñijca i bʌ jiñi lum. Tsaʼ ñumen caji i sub i bʌ jiñi trompeta. Jehová tsiʼ yʌlʌ: «Joñoñʌch Jehová. Mach yom mi laʼ chʼujutesan yambʌ dios».

Moisés tsaʼ chaʼ letsi ti wits, yaʼi Jehová tsiʼ yʌqʼue mandar tac chaʼan i tejclum. Ti jiñi mandar tac tsiʼ yʌlʌ bajcheʼ yom miʼ chʼujutesʌntel yicʼot bajcheʼ yilal yom miʼ chaʼleñob i bʌ. Moisés tiʼ tsʼijbu, tsiʼ pejcʌbe jiñi israelob i tsiʼ yʌlʌyob: «Mi caj c chaʼlen lojon tiʼ pejtelel muʼ bʌ i yʌl Jehová». Tsaʼʌch i yʌcʼʌyob i tʼan, pero ¿muʼ ba caj i tsʼʌctesañob?