Jiñi israelob añix 40 jab yaʼañob ti tiquin bʌ lum. Cabʌlix tsiʼ jisayob pʼʌtʌl tac bʌ tejclum. Wʌle yaʼ jijlemob ti país Moab, yaʼ tiʼ junwejlel Jordán jaʼ baʼ miʼ pasel qʼuin, i tsʼitaʼ jachix yom chaʼan miʼ yochelob yaʼ ti Lum tsaʼ bʌ wʌn Subentiyob. Balac, jiñi rey bʌ yaʼ ti Moab, woli (yʌquel) i bʌcʼñan jiñi israelob come miʼ mejlel i chilbeñob i lum. Jin chaʼan, tsiʼ choco ti pʌyol juntiquil wiñic i cʼabaʼ Balaam chaʼan miʼ tilel i pʼaj jiñi israelob yaʼ ti Moab.

Pero Jehová tiʼ sube Balaam: «Mach yom maʼ pʼaj jiñi israelob». Jin chaʼan Balaam maʼañic tsiʼ jacʼʌ majlel ti Moab. Jiñi rey Balac tsiʼ chaʼ pʌyʌ i tiʼ sube chaʼan mi caj i yʌqʼuen chuqui jach miʼ cʼajtin, pero Balaam maʼañic tsiʼ chaʼ jacʼʌ. Cheʼ jiñi Dios tiʼ sube: «Mi caj cʌqʼuet majlel. Pero cojach miʼ mejlel a wʌl jiñi muʼ bʌ caj c subeñet».

Balaam tsaʼ cʼʌchle tiʼ ñaʼ burro i tsaʼ majli ti Moab. Tsaʼ majli i pʼaj jiñi israelob, anquese Jehová tiʼ sube chaʼan maʼañic miʼ majlel ti pʼajoñel. Cheʼ jiñi, uxyajl tsiʼ pʌsʌ i bʌ i yángel Jehová yaʼ ti bij. Balaam maʼañic tsiʼ qʼuele jiñi ángel, pero jiñi ñaʼ burro tsaʼʌch. Ti ñaxan, jiñi ñaʼ burro tsaʼ loqʼui ti bij i tsaʼ ochi ti mateʼel. Tsiʼ meʼtʌbe i yoc Balaam yaʼ ti muro i tsiʼ pʌcchoco i bʌ yaʼ ti bij. Cheʼ bʌ woli to ti ujtel jiñi, Balaam tsiʼ jatsʼʌ yicʼot juntsʼijt teʼ.

Ti wiʼil, Jehová tsaʼ yʌcʼʌ ti tʼan jiñi ñaʼ burro i tsiʼ cʼajtibe Balaam: «¿Chucoch maʼ jatsʼon?». Balaam tsiʼ jacʼʌ: «Come cheʼ bʌ juntiquil tonto maʼ chaʼleñon. Cheʼ añic juntsʼijt quespada, mic tsʌnsañet». Jiñi ñaʼ burro tiʼ sube: «Añix ora cajel a cʼʌchtañon. ¿Am ba c tumbeyet bajcheʼ ili?».

Cheʼ jiñi, Jehová tsaʼ yʌcʼʌ chaʼan jiñi Balaam miʼ qʼuel jiñi ángel. Jiñi ángel tiʼ sube: «Jehová tsiʼ wʌn subet chaʼan maʼañic miʼ majlel a pʼaj jiñi israelob». Balaam tsiʼ jacʼʌ: «Mach toj tsaʼ bʌ c chaʼle. Mi caj c chaʼ majlel ti cotot». Pero jiñi ángel tiʼ sube: «Maʼ mejlel ti majlel ti Moab, anquese cojach miʼ mejlel a wʌl jiñi muʼ bʌ caj i subeñet Dios».

 ¿Tsaʼ ba i ñaʼta pañimil Balaam? Maʼañic, come uxyajl tsiʼ ñopo i pʼaj jiñi israelob. Pero ti jiñi uxyajl, Jehová tsaʼ yʌcʼʌ chaʼan miʼ yʌl jumpʼejl bendición i mach pʼajoñelic. Jiñi israelob tsiʼ contrajiyob jiñi añoʼ bʌ ti Moab i Balaam tsaʼ chʌmi. Ñumen wen cheʼ tsaʼic i jacʼbe i tʼan Jehová, ¿mach ba cheʼiqui?