Elcaná chʼoyol ti Israel i chaʼtiquil i yijñam: Ana yicʼot Peniná. Pero miʼ ñumen cʼuxbin Ana. Cabʌl i yalobil Peniná, pero Ana maʼañic i chaʼan. Jin chaʼan Peniná miʼ wajlen Ana. Ti jujumpʼejl jab, Elcaná miʼ pʌy majlel i familia ti Siló, chaʼan miʼ chʼujutesañob Jehová yaʼ ti tabernáculo. An junsujtel cheʼ bʌ yaʼañob ti tabernáculo, Elcaná tsiʼ qʼuele chaʼan chʼijiyem jiñi Ana. Jin chaʼan tiʼ sube: «A wocolic mach a chaʼlen uqʼuel. Wʌʼañon quicʼotet i mic wen cʼuxbiñet».

Ti wiʼil, Ana tsaʼ bajñel majli i chaʼlen oración. Maʼañic tsiʼ cʌyʌ uqʼuel, tsiʼ wersa cʼajtibe Jehová chaʼan miʼ coltan i tiʼ sube: «Jehová, cheʼ muqʼuic a wʌqʼueñon juntiquil calobil, miʼ caj cʌqʼueñet chaʼan miʼ mel a weʼtel tiʼ pejtelel ora».

Jiñi ñuc bʌ motomaj Elí tsiʼ qʼuele chaʼan Ana woli (choncol) ti uqʼuel yicʼot chaʼan woliʼ ñijcan i tiʼ, i tsiʼ ñaʼta chaʼan yʌc (qʼuixin). Ana tsiʼ jacʼbe: «C yum, maʼañic japʌl c chaʼan. An wen tsʌts bʌ c wocol i tsaʼ c pejca Jehová». Elí tsiʼ ñaʼta chaʼan maʼañic qʼuixin i tiʼ sube: «Laʼ i yʌqʼueñet tsaʼ bʌ a cʼajtibe Jehová». Ana tsiʼ taja i tijicñʌyel i tsaʼ majli. Maʼañic tsaʼ ñumi jumpʼejl jab, tsiʼ qʼuele juntiquil i yalobil i tsiʼ yotsʌbe i cʼabaʼ Samuel. ¿Muʼ ba a ñaʼtan bajcheʼ cʼamel i tijicñʌyel Ana?

 Ana maʼan tsaʼ ñajʌyi i chaʼan jiñi i tʼan tsaʼ bʌ i yʌqʼue Jehová. Jin jach cheʼ bʌ tsiʼ cʌyʌ i chuʼ Samuel, tsiʼ pʌyʌ majlel chaʼan miʼ melben i yeʼtel (troñel) Dios yaʼ ti tabernáculo. Ana tiʼ sube Elí: «Tsaʼ c chaʼle oración chaʼan miʼ yʌqʼueñon Jehová ili calobil. Wʌle mi cʌqʼuen chaʼan miʼ melben i yeʼtel tiʼ pejtel ora». Elcaná yicʼot Ana jujumpʼejl jab tsiʼ julaʼtayob Samuel i tsiʼ chʼʌmbeyob majlel i pislel mach bʌ añic i cʼʌb. Ti wiʼil, Jehová tsiʼ yʌqʼue Ana uxtiquil chʼiton bʌ i yalobil yicʼot chaʼtiquil xchʼoc.