Josué cabʌl jab tsiʼ colta i tejclum Jehová, i tsaʼ chʌmi cheʼ bʌ añix 110 i jabilel. Jiñi israelob tsiʼ chʼujutesayob Jehová cheʼ bʌ cuxul to Josué. Pero cheʼ bʌ tsaʼ chʌmi, tsaʼ caji i chʼujutesañob diosteʼ tac cheʼ bajcheʼ yaʼ ti Canaán. Jiñi israelob maʼañix tsiʼ jacʼbeyob i tʼan Jehová, jin chaʼan tsaʼ yʌcʼʌyob tiʼ cʼʌb jiñi rey Jabín ti Canaán chaʼan miʼ yʌqʼueñob wocol. Cheʼ jiñi, tsaʼ caji i subeñob Jehová chaʼan miʼ coltañob. Jehová tsiʼ waʼchoco tsijiʼ bʌ yumʌl i cʼabaʼ Barac. Ili yumʌl mi caj i coltan jiñi israelob chaʼan miʼ chaʼ chʼujutesañob Jehová.

Débora xʼaltʼañʌch i tsiʼ xiqʼui ti pʌyol Barac chaʼan miʼ suben jiñi tʼan tsaʼ bʌ i yʌlʌ Jehová: «Cucu yaʼ ti jaʼ Cisón yicʼot jiñi 10 mil wiñicob chaʼan maʼ contrajin i soldadojob Jabín. Sísara, i yum jiñi soldadojob, mi caj i sʌt jiñi guerra». Barac tiʼ sube Débora: «Mucʼʌch c majlel mi mucʼʌch a majlel jaʼel». Tsiʼ jacʼbe: «Mi caj c majlel quicʼotet, pero yom maʼ ñaʼtan chaʼan mach jatet mi caj a tsʌnsan jiñi Sísara. Jehová tsiʼ yʌlʌ chaʼan juntiquil xʼixic mi caj i tsʌnsan».

Débora tsaʼ letsi yaʼ ti wits Tabor yicʼot Barac yicʼot i soldadojob chaʼan miʼ chajpañob i bʌ chaʼan jiñi guerra. Cheʼ bʌ Sísara tsaʼ yubi  jiñi, tsiʼ tempa i carro tac chaʼan bʌ guerra yicʼot i soldadojob. Débora tsiʼ sube Barac: «Jehová mi caj i coltañet chaʼan maʼ mʌl jiñi guerra». Barac yicʼot jiñi 10 mil wiñicob tsaʼ jubiyob yaʼ ti wits chaʼan miʼ contrajiñob jiñi pʼʌtʌl bʌ i soldadojob Sísara.

Jehová tsaʼ yʌcʼʌ ti bujtʼel jiñi jaʼ Cisón, i carro tac Sísara chaʼan bʌ guerra tsaʼ cʌyle ti ocʼol. Sísara tsaʼ jubi yaʼ ti carro i tsaʼ majli ti ajñel. Barac yicʼot i soldadojob tsiʼ jisayob i wiñicob Sísara, pero Sísara tsiʼ mujcuj i bʌ tiʼ yotot Jael. Ili xʼixic tsiʼ yʌqʼue i jap leche i tsiʼ moso ti pisil. Sísara tsaʼ wʌyi come wen lujben. Cheʼ jiñi, Jael tsiʼ mucu lʌcʼtesa i bʌ yaʼ baqui toʼtsʼol, tsiʼ sʌl jecʼbe i jol ti jay bʌ teʼ i tsaʼ chʌmi.

Ti wiʼil, tsaʼ cʼoti Barac i sʌclan Sísara. Jael tsaʼ loqʼui ti pisil bʌ i yotot i tsiʼ sube: «Ochen, mi caj c pʌsbeñet jiñi wiñic woli bʌ a sʌclan». Barac tsaʼ ochi yaʼ ti otot i tsiʼ qʼuele chaʼan tsaʼix chʌmi jiñi Sísara. Cheʼ jiñi, Barac yicʼot Débora tsiʼ chaʼleyob cʼay chaʼan miʼ ñuqʼuesañob Jehová come jiñʌch tsiʼ coltayob i jisañob i contrajob. Ñʌchʼʌl tsaʼ ajñi jiñi israelob ti jiñi yambʌ 40 jab.