Jiñi ñuc bʌ motomaj Elí an chaʼtiquil i yalobilob: Ofni yicʼot Finees (Finehás). Motomajob yicʼot miʼ chaʼleñob eʼtel (troñel) yaʼ ti tabernáculo. Pero maʼañic miʼ jacʼbeñob i mandar Jehová yicʼot miʼ wen ticʼlan jiñi wiñicob xʼixicob (quixtañujob). Cheʼ bʌ jiñi israelob miʼ chʼʌmob majlel pulbil bʌ i majtan Jehová, Ofni yicʼot Finees miʼ chʼʌmob jiñi ñumen wem bʌ weʼel. Elí yujil chaʼan mach weñic i melbal i yalobilob, pero maʼañic tsiʼ tiqʼuiyob. ¿Am ba chuqui mi caj i mel Jehová maʼ wʌl?

Samuel maxto cheʼic i jabilel bajcheʼ Ofni yicʼot Finees, pero maʼañic tsiʼ mele (chaʼle) mach bʌ weñic. Jin chaʼan wen tijicña tsiʼ qʼuele Jehová. Ti jumpʼejl bʌ acʼʌlel cheʼ bʌ wʌyʌl Samuel, tsaʼ yubi chaʼan an majqui woli (choncol) i pejcan. Tsaʼ tejchi, tsaʼ majli ti ajñel yaʼ baqui an Elí i tiʼ sube: «Umbaʼañon». Pero Elí tsiʼ jacʼbe: «Maʼañic tsaʼ c pʌyʌyet. Chaʼ cucu ti wʌyel». Samuel tsaʼ majli ti totsʼtʌl. Tsaʼ pejcʌnti tiʼ chaʼ yajlel. Cheʼ bʌ Samuel tsaʼ pejcʌnti tiʼ yuxyajlel, Elí tsiʼ ñaʼta chaʼan Jehová woliʼ pejcan Samuel. Elí tiʼ sube Samuel chaʼan mi tsaʼ chaʼ pejcʌnti, yom miʼ jacʼ cheʼi: «Umbaʼañon Jehová. A wiñic woliʼ ñʌchʼtañet».

 Samuel tsaʼ majli tiʼ wʌyib i tsaʼ yubi ili tʼan: «Samuel, Samuel». Tsiʼ jacʼʌ: «Umbaʼañon Jehová. A wiñic woliʼ ñʌchʼtañet». Jehová tiʼ sube: «Suben Elí chaʼan mi caj cʌqʼuen i toj i mul yicʼot i familia. Yujil chaʼan mach tojic chuqui woliʼ mel i yalobilob yaʼ tic tabernáculo, pero maʼañic miʼ ticʼob». Tiʼ yijcʼʌlel, Samuel tsiʼ jambe i tiʼ tac jiñi tabernáculo, cheʼ bajcheʼ ñʌmʌl, pero tsiʼ bʌcʼña i suben jiñi tʼan tsaʼ bʌ subenti ti Jehová. Elí tsiʼ pʌyʌ i tsiʼ cʼajtibe: «Calobil, ¿chuqui tiʼ subet Jehová?». Jin chaʼan Samuel tsiʼ luʼ sube.

Cʼʌlʌl tsaʼ coli Samuel chʌn i yamigojʌch Jehová. Tiʼ pejtelel israelob tsiʼ ñaʼtayob chaʼan jiñʌch Jehová tsiʼ waʼchoco Samuel chaʼan miʼ sujtel ti xʼaltʼan yicʼot ti juez.