Ti wiʼil, jiñi israelob tsiʼ chaʼ cʌyʌyob Jehová i tsaʼ caji i chʼujutesañob yambʌ dios tac. 7 jab tsaʼ ticʼlʌnti jiñi israelob tiʼ tojlel jiñi chʼoyoloʼ bʌ ti Madián, tsaʼ xujchʼibentiyob i yʌlacʼ yicʼot tsaʼ asibentiyob i pʌcʼʌbʌl. Tsiʼ mujcuyob i bʌ tiʼ yebal xajlel (tun) yicʼot ti wits tac chaʼan miʼ cʌntañob i bʌ. Tsiʼ wersa cʼajtibeyob Jehová chaʼan miʼ coltañob. Jin chaʼan Jehová tsiʼ cʼʌñʌ juntiquil ángel chaʼan miʼ suben jumpʼejl tʼan jiñi Gedeón: «Jehová tsiʼ waʼchocoyet chaʼan maʼ sujtel ti juntiquil pʼʌtʌl bʌ soldado». Gedeón tsiʼ jacʼbe: «¿Bajcheʼ mi caj j coltan Israel cheʼ maʼañic j cʼʌjñibal?».

Gedeón yom i ñaʼtan mi jiñʌch tsaʼ yajcʌnti ti Jehová. ¿Chuqui tsiʼ mele (chaʼle)? Tsiʼ tʌsʌ pisil melbil (pʌtbil) bʌ tiʼ tsutsel tiñʌmeʼ i tsiʼ yʌlʌ: «Mi achʼ ti yeʼeb ili pisil ti sʌcʼan ijcʼʌl, pero mi tiquin jiñi lum, mi caj c ñaʼtan chaʼan tsaʼʌch a waʼchocoyon chaʼan mij coltan jiñi israelob». Tiʼ yijcʼʌlel, wen achʼ tsiʼ taja jiñi pisil, pero tiquin jiñi lum. Cheʼ jiñi, Gedeón tsiʼ sube Jehová chaʼan yom tiquin jiñi pisil cheʼ tiʼ yijcʼʌlel, pero yom achʼ jiñi lum. Tsaʼ bʌ i cʼajti Gedeón tsaʼ chaʼ tsʼʌctiyi. Gedeón tsaʼ cʼoti i ñaʼtan chaʼan waʼchocobilʌch ti Jehová. Tsiʼ tempa i soldadojob chaʼan miʼ majlel i contrajiñob jiñi madiañob.

 Jehová tsiʼ sube Gedeón: «Mi caj j coltan jiñi israelob chaʼan miʼ chaʼleñob ganar. Cabʌl i soldadojob i miʼ mejlel i ñaʼtañob chaʼan tiʼ bajñel pʼʌtʌlelob jach tsiʼ mʌlʌyob (jotoyob) jiñi guerra. Suben chaʼan miʼ sujtelob tiʼ yotot jiñi mucʼoʼ bʌ ti bʌqʼuen». 22 mil tsaʼ sujtiyob i 10 mil tsaʼ cʌyleyob. Ti wiʼil, Jehová tiʼ sube: «Wen yonlelob to. Pʌyʌyob majlel ti jap jaʼ. Cojach yom maʼ cʌytʌl a wicʼotob jiñi yʌxʌloʼ bʌ i yoj tiʼ contrajob cheʼ woliʼ japob jaʼ». Cojach 300 yʌxʌlob i yo tsaʼ ajñiyob cheʼ bʌ woli (yʌquel) i japob jaʼ. Jehová tsiʼ yʌqʼueyob i tʼan chaʼan mi caj i jisañob jiñi 135 mil madiañob anquese mach cabʌlobic.

Ti jiñi acʼʌlel, Jehová tiʼ sube Gedeón: «I yorajlelix chaʼan mi laʼ contrajin jiñi madiañob». Gedeón tsiʼ yʌqʼueyob jumpʼejl trompeta yicʼot jumpʼejl ucʼum am bʌ xutunteʼlel tiʼ malil i tiʼ subeyob: «Qʼueleyonla i cheʼ yom mi laʼ chaʼlen bajcheʼ joñon». Gedeón tsiʼ wusu (cupu) i trompeta, tsiʼ topʼo i yucʼum, tsiʼ pʌntsʼu i xutunteʼ i cʼam tsiʼ chaʼle tʼan: «¡I yespada Jehová an tiʼ wenta Gedeón!». Cheʼʌch tsiʼ chaʼleyob jaʼel jiñi 300 wiñicob. Tsaʼ wen bʌcʼña jiñi madiañob i jin jachix baqui tsaʼ majliyob ti ajñel. Tsaʼ bajñel caji i contrajiñob i bʌ come mach junsujmix añob. Jehová tsiʼ chaʼ colta jiñi israelob chaʼan miʼ jisan i contrajob.