Jiñi israelob tsaʼ chaʼ ñajayiyob i chaʼan Jehová i tsaʼ caji chʼujutesañob dios tac. Pero jiñi dios tac maʼañic miʼ coltañob cheʼ bʌ miʼ contrajiñob jiñi Amoñob. Cabʌl jab tsaʼ yilayob wocol. Ti wiʼil, tiʼ subeyob Jehová: «Tsaʼ c chaʼle lojon mulil. A wocolic, coltañon lojon». Tsiʼ topʼoyob jiñi dios tac i tsiʼ chʼujutesayob Jehová. Cheʼ jiñi, Jehová tsiʼ pʼuntayob come woliʼ yilañob wocol.

Jiñi israelob tsiʼ waʼchocoyob juntiquil yujil bʌ guerra, i cʼabaʼ Jefté. Jiñʌch ñaxam bʌ mi caj i majlel chaʼan miʼ contrajin jiñi amoñob. Jefté tiʼ sube Jehová: «Mi maʼ coltañon lojon ti jiñi guerra, mi caj cʌqʼueñet jiñi muʼ bʌ i ñaxam loqʼuel i tajon cheʼ mij cʼotel ti cotot». Jehová tsiʼ yubibe i tʼan Jefté i tsaʼʌch i colta.

 Cheʼ bʌ tsaʼ sujti majlel tiʼ yotot Jefté, jiñʌch cojach bʌ i yixicʼal (yixicpʼeñal) tsaʼ ñaxan loqʼui i taj. Woli (yʌquel) ti son yicʼot woliʼ jatsʼ pandereta. ¿Chuqui tsiʼ mele (chaʼle) Jefté? Tsaʼ cʼajtiyi i chaʼan i tʼan tsaʼ bʌ i yʌcʼʌ i tsaʼ yʌlʌ: «¡Calobil, pʼumpʼuñon jax! Tsaʼix a wʌqʼueyon c chʼijiyemlel. Tsaʼ cʌqʼue c tʼan Jehová, i chaʼan mic tsʼʌctesan, yom mic choquet majlel yaʼ ti tabernáculo am bʌ ti Silo». I yixicʼal tsiʼ jacʼʌ: «C tat, mi tsaʼix a wʌqʼue a tʼan Jehová, yom maʼ tsʼʌctesan. Cojach mij cʼajtibeñet chaʼan maʼ wʌcʼon majlel chaʼpʼejl uw quicʼot camigajob yaʼ ti wits tac. Cheʼ jiñi, mic majlel yaʼ ti tabernáculo». Xucʼul tsaʼ ajñi i yixicʼal Jefté i yaʼ tsaʼ ajñi ti tabernáculo tiʼ pejtelel ora. I yamigajob miʼ yajñel i julaʼtañob ti jujumpʼejl jab yaʼ ti Silo.