Jiñi tejclum tac yaʼ ti Canaán tsaʼ yubiyob chuqui tsaʼ ujti ti Jericó. Jiñi reyob yaʼ ti tejclum tac tsiʼ comol alʌyob chaʼan mi caj i contrajiñob jiñi israelob. Pero jiñi gabaoñob an chuqui tsiʼ ñaʼta i melob. Tsiʼ lʌpʌyob ñoxix bʌ pisil, tsaʼ majli i qʼuelob Josué i tiʼ subeyob: «Tilemon lojon ti ñajt bʌ lum. An cubi lojon ti alol jiñi Jehová yicʼot tiʼ pejtelel tsaʼ bʌ i mele ti laʼ tojlel yaʼ ti Egipto yicʼot ti Moab. Miʼ maʼ wʌcʼ la tʼan chaʼan maʼañic miʼ caj a contrajiñon lojon, mi caj c sujtel lojon ti laʼ wiñic».

Josué tsiʼ jacʼbeyob i tʼan i tsiʼ subeyob chaʼan maʼañic miʼ caj i contrajiñob. Pero tiʼ yuxpʼejlel qʼuin, Josué tsiʼ ñaʼta chaʼan mach ñajtic baʼ chʼoyolob, tilemob jach ti Canaán. Jin chaʼan, Josué tsiʼ cʼajtibeyob: «¿Chucoch tsaʼ laʼ chaʼle lot?». Tsiʼ jacʼʌyob: «Come tsaʼ c chaʼle lojon bʌqʼuen. Cujil lojon chaʼan miʼ coltañetla ti guerra jiñi laʼ Dios. Laʼ wocolic, mach laʼ tsʌnsañon lojon». Josué tiʼ tsʼʌctesa i tʼan i maʼañic tiʼ tsʌnsayob.

 Mach jalic tsaʼ ñumi ora, joʼtiquil reyob ti Canaán yicʼot i soldadojob tsiʼ contrajiyob Gabaón. Josué yicʼot i soldadojob jumpʼejl acʼʌlel tsiʼ chaʼleyob xʌmbal chaʼan miʼ majlel i coltañob Gabaón. Sʌcʼan tsaʼ tejchi jiñi guerra. Tsaʼ putsʼiyob jiñi cananeojob, pero Jehová tsiʼ choco jubel tuñijaʼ tiʼ tojlelob. Cheʼ jiñi Josué tiʼ sube Jehová chaʼan miʼ waʼtʌl jiñi qʼuin. Maʼañic baʼ waʼle jiñi qʼuin. ¿Chucoch tsiʼ cʼajti Josué jiñi? Come miʼ wen acʼ ti ñuc Jehová. Jin chaʼan maʼañic tsaʼ bʌjli jiñi qʼuin. Ti jimbʌ ora, maʼañic tsaʼ icʼa pañimil jinto tsiʼ jisayob jiñi reyob ti Canaán yicʼot i soldadojob.