Moisés cabʌl jab tsiʼ colta jiñi israelob, i wʌle tsʼitaʼ jachix yom chaʼan miʼ chʌmel. Jehová tiʼ sube: «Mach jatetix mi caj a pʌy majlel israelob yaʼ ti Lum tsaʼ bʌ c wʌn Subeyob. Pero mi caj cʌqʼueñet a ñajti qʼuel jiñi lum». Cheʼ jiñi, Moisés tiʼ sube Jehová chaʼan miʼ waʼchocon yambʌ yumʌl chaʼan miʼ cʌntan jiñi israelob. Jehová tsiʼ jacʼbe: «Chaʼlen tʼan a wicʼot Josué i suben chaʼan jiñʌch tsaʼ bʌ c waʼchoco».

Moisés tiʼ sube jiñi israelob chaʼan mux caj i chʌmel yicʼot chaʼan Jehová tsiʼ waʼchoco Josué chaʼan miʼ pʌyob majlel yaʼ ti Lum tsaʼ bʌ wʌn Subentiyob. Moisés tiʼ sube Josué: «Mach a chaʼlen bʌqʼuen. Jehová mi caj i coltañet». Mach jalic tsaʼ ñumi ora, Moisés tsaʼ letsi yaʼ ti wits Nebo. Yaʼi, Jehová tsiʼ pʌsbe jiñi lum tsaʼ bʌ i wʌn sube Abraham, Isaac yicʼot Jacob. Moisés an 120 jabilel cheʼ bʌ tsaʼ chʌmi.

Jehová tiʼ sube Josué: «Cʼaxen yaʼ ti Jordán jaʼ i ochen yaʼ ti Canaán. Mi caj j coltañet cheʼ bajcheʼ tsaʼ j colta Moisés. Chʌn pejcan c Mandar ti jujumpʼejl qʼuin. Mach a chaʼlen bʌqʼuen, yom pʼʌtʌlel. Cucu i mele tiʼ pejtelel tsaʼ bʌ c subeyet».

 Josué tsiʼ choco majlel chaʼtiquil wiñicob chaʼan miʼ qʼuelob jiñi tejclum Jericó. Ti yambʌ cʌntesʌntel mi caj lac qʼuel chuqui tsaʼ ujti yaʼi. Cheʼ bʌ tsajñobix ti Jericó jiñi chaʼtiquil wiñicob, tsiʼ yʌlʌyob chaʼan jiñʌch wen bʌ qʼuin chaʼan miʼ yochelob ti Canaán. Tiʼ yijcʼʌlel, Josué tiʼ sube jiñi israelob chaʼan miʼ chejob i yotot. Tsiʼ ñaxan choco majlel yaʼ ti Jordán jaʼ jiñi motomajob woli (choncol) bʌ i qʼuechob majlel jiñi Arca chaʼan trato. Wen tam jiñi jaʼ, pero cheʼ bʌ tsiʼ yotsayob i yoc jiñi motomajob, jiñi jaʼ tsaʼ tiqui i tsaʼ cajiyob ti cʼaxel. Cheʼ tsaʼ cʼotiyob tiʼ yojlil (xiñil), tsiʼ pijtayob chaʼan miʼ cʼaxel jiñi israelob. Cheʼ bʌ tsiʼ qʼueleyob iliyi, ¿tsaʼ ba i cʼajtesayob maʼ wʌl tsaʼ bʌ i mele (chaʼle) Jehová yaʼ ti Chʌchʌc bʌ mar?

Tsaʼ cʼotiyob yaʼ ti Lum tsaʼ bʌ wʌn Subentiyob, anquese añix cabʌl jab i cajelob ti xʌmbal. Muqʼuix i mejlel i sujtesañob ti tejclum yicʼot i waʼchocoñob i yotot. Mi mejlel i pʌcʼob i cholel, tsʼusubil yicʼot yambʌ wut teʼ tac. Jiñʌch jumpʼejl lum am bʌ i chaʼan leche yicʼot chab.