An tsaʼ ujti wiʼñal ti Israel. Jin chaʼan, Noemí yicʼot i ñoxiʼal yicʼot chaʼtiquil i yalobilob tsaʼ majliyob ti chumtʌl yaʼ ti Moab. Ti wiʼil, i ñoxiʼal Noemí tsaʼ chʌmi. I yalobilob tsaʼ ñujpuñi yicʼot xʼixicob ti Moab: Rut yicʼot Orpá. Chʼijiyem jax come ili chaʼtiquil i yalobilob Noemí tsaʼ chʌmiyob jaʼel.

Cheʼ bʌ Noemí tsiʼ ñaʼta chaʼan maʼañix wiʼñal, tsaʼ chaʼ majli ti Israel. Rut yicʼot Orpá tsaʼ majli yicʼotob, pero yaʼ ti bij Noemí tiʼ subeyob: «Wen tsaʼ laʼ cʌnta calobilob yicʼot wen tsaʼ laʼ qʼueleyon. Mic mulan cheʼ muqʼuic laʼ chaʼ ñujpuñel. Chaʼ cucu ti laʼ wotot yaʼ ti Moab». Rut yicʼot Orpá tsiʼ jacʼbeyob: «Mi lon c wen cʼuxbiñet, mach com lon c bajñel cʌyet». Noemí tsiʼ chʌn subeyob chaʼan miʼ sujtelob tiʼ yotot. Orpá tsaʼʌch sujti, pero Rut maʼañic. Noemí tiʼ sube Rut: «Orpá tsaʼix majli tiʼ yotot yicʼot i chaʼ i chʼujutesan i dios tac. Cucu a wicʼot i chaʼ sujten majlel tiʼ yotot a ñaʼ». Pero Rut tiʼ sube: «Maʼañic mi caj j cʌyet. A lum mi caj i sujtel tic lum i a Dios mi caj i sujtel tic Dios». ¿Bajcheʼ yubil tsaʼ yubi Noemí maʼ wʌl cheʼ tsaʼ yʌlʌ jiñi?

Rut yicʼot Noemí tsaʼ cʼotiyob ti Israel cheʼ tiʼ yorajlel i tempʌntel cebada. Ti jumpʼejl bʌ qʼuin, Rut tsaʼ majli i lot i colobal cebada yaʼ ti lum Boaz, ili i yalobilʌch Rahab. Boaz an i yubi chaʼan jiñi Rut, jiñi chʼoyol bʌ ti Moab, xucʼul tsaʼ ajñi tiʼ tojlel Noemí yicʼot chaʼan tsaʼ cʌyle i cʌntan. Boaz tiʼ sube i wiñicob chaʼan miʼ tsʼitaʼ cʌybeñob Rut jiñi cebada.

 Ti jiñi acʼʌlel, Noemí tsiʼ cʼajtibe Rut: «¿Majqui i lum ba tsaʼ chaʼle eʼtel sajmʌl?». Rut tsiʼ jacʼʌ: «I lum Boaz». Noemí tiʼ sube: «Boaz tilem tiʼ familia c piʼʌl. Bej chaʼlen eʼtel (troñel) yaʼ tiʼ lum awicʼot yambʌ xchʼocob. Tijicña mi caj a wajñel yaʼi».

Rut tsiʼ chaʼle eʼtel yaʼ tiʼ lum Boaz cʼʌlʌl tsaʼ ujti ti tempʌntel jiñi cebada. Boaz tsiʼ cʌñʌ chaʼan jiñʌch wen bʌ xʼixic jiñi Rut yicʼot chaʼan wen yujil troñel. Ti jiñi bʌ ora, mi juntiquil wiñic miʼ chʌmel i maʼañic i yalobil, i yijñam miʼ mejlel ti chaʼ ñujpuñel yicʼot i ñajtʌ piʼʌl i ñoxiʼal. Jin chaʼan Boaz tsaʼ ñujpuñi yicʼot Rut. Tsiʼ yʌcʼʌyob ti pañimil juntiquil i yalobil, i cʼabaʼ Obed. Ti wiʼil, Obed tsaʼ sujti ti i tatuch (ñox yum) jiñi rey David. Tsiʼ wen tajayob i tijicñʌyel i yamigajob Noemí. Tiʼ subeyob: «Ti ñaxan, Jehová tsiʼ yʌqʼuet jiñi Rut, jiñi wen bʌ miʼ qʼuelet. I wʌle añix a mam. Laʼ lac ñuqʼuesan Jehová chaʼan jiñi».