Cabʌl israelob tsaʼ chaʼ caji i chʼujutesañob yambʌ dios tac. Jin chaʼan Jehová tsiʼ yʌcʼʌ chaʼan jiñi filisteojob miʼ contrajiñob jiñi israelob. Pero an israelob tsaʼʌch bʌ i cʼuxbiyob Jehová, cheʼ bajcheʼ Manoa. Ili xñujpuñel maʼañobic i yalobil. Ti jumpʼejl bʌ qʼuin, Jehová tsiʼ choco majlel juntiquil ángel chaʼan miʼ suben i yijñam Manoa: «Mi caj a wʌcʼ ti pañimil alʌ chʼiton i mi caj i coltan jiñi israelob chaʼan maʼañix miʼ chʌn ticʼlʌntel ti filisteojob. Mi caj i yajñel bajcheʼ nazareo». ¿A wujil ba chuqui jiñi nazareo? Jiñʌch chʼujul bʌ miʼ melben i yeʼtel Jehová yicʼot maʼañic bʌ miʼ setʼ i jol.

Mach jalic tsaʼ ñumi ora chaʼan miʼ yilan pañimil i yalobil Manoa, i tsaʼ yotsʌbeyob i cʼabaʼ Sansón. Cheʼ bʌ tsaʼ coli, Jehová tsiʼ yʌqʼue i pʼʌtʌlel. ¡Tiʼ cʼʌb jach miʼ mejlel i tsʌnsan juncojt bajlum! An tiʼ bajñel tsʌnsa 30 filisteojob. Jin chaʼan jiñi filisteojob tsaʼ caji i tsʼaʼleñob i tsaʼ caji i ñaʼtañob i tsʌnsañob. Ti jumpʼejl bʌ acʼʌlel, Sansón tsaʼ cʌyle ti wʌyel yaʼ ti Gaza. Cheʼ jiñi tsaʼ majli i contrajob i pijtañob yaʼ tiʼ puertajlel jiñi tejclum chaʼan miʼ tsʌnsañob cheʼ miʼ sʌcʼan. Pero Sansón tsaʼ tejchi cheʼ tiʼ yojlil (xiñil) acʼʌlel i tsaʼ majli i boʼtsʼ i puertajlel jiñi tejclum. Tsiʼ qʼueche majlel yaʼ ti wits am bʌ tiʼ tʼejl Hebrón.

Jiñi filisteojob tsaʼ majli i pejcʌbeñob i novia Sansón, i cʼabaʼ Dalila, i tiʼ subeyob: «Cabʌl mil plata mi caj cʌqʼueñet lojon mi tsaʼ mejli a ñaʼtan baqui tilem i pʼʌtʌlel Sansón. Com j cʌch lojon chaʼan miʼ yochel ti cárcel». Dalila yom jiñi taqʼuin, jin chaʼan tsaʼʌch i jacʼʌ. Ti ñaxan, Sansón mach yomic i suben Dalila baqui tilem i pʼʌtʌlel. Pero Dalila tsiʼ wersa cʼajtibe i Sansón tsaʼ caji i suben. Tsiʼ yʌlʌ: «Maʼañic baʼ i setʼeyob col come nazareojon. Mi tiʼ setʼeyob col, mi caj i jilel c pʼʌtʌlel». Mach weñic cheʼ tsiʼ luʼ sube Dalila.

Ti ora jach tiʼ sube jiñi filisteojob: «¡Cujilix chucoch an cabʌl i pʼʌtʌlel!». Tsiʼ yotsʌbe i wʌyel Sansón tiʼ pam i yaʼ i tsiʼ pʌyʌ juntiquil wiñic chaʼan miʼ setʼben i jol. Cheʼ jiñi, Dalila cʼam tsiʼ chaʼle tʼan:  «¡Sansón, wʌʼix an jiñi filisteojob!». Tsaʼ cajñi i wut, pero maʼañix i pʼʌtʌlel. Jiñi filisteojob tsiʼ chucuyob, tsiʼ locʼsʌbeyob i wut i tsaʼ yotsayob ti cárcel.

Ti jumpʼejl bʌ qʼuin, yonlel filisteojob tsiʼ tempayob i bʌ yaʼ baqui miʼ chʼujutesañob jiñi dios Dagón. Cʼam tsiʼ yʌlʌyob: «Lac dios tsaʼix i yʌqʼueyonla Sansón. Locʼsanla tilel chaʼan miʼ tijicñesañonla jumucʼ». Tsiʼ xin acʼʌyob yaʼ baqui an i yoyel jiñi templo i tsiʼ wajleyob. Sansón cʼam tsiʼ chaʼle tʼan: «C Yum, Jehová, a wocolic, chaʼ aqʼueñon c pʼʌtʌlel». Chaʼ colemix i jol ti jimbʌ ora, i tsaʼ caji i choc tiʼ pejtelel i pʼʌtʌlel jiñi oy. Tsaʼ jejmi jiñi templo i tsaʼ luʼ chʌmiyob. Sansón tsaʼ chʌmi jaʼel.