Cheʼ bʌ David tiʼ tsʌnsa Goliat, Saúl tsiʼ waʼchoco David tiʼ yum soldadojob. David tsiʼ wen chaʼle ganar yaʼ ti guerra i tsaʼ caji ti wen cʌjñel. Cheʼ miʼ sujtel ti guerra, jiñi xʼixicob miʼ loqʼuel i tajob, miʼ chaʼleñob son yicʼot miʼ cʼʌyiñob: «Saúl cabʌl tiʼ tsʌnsa i contrajob, pero David ñumen on tiʼ tsʌnsayob». Jin chaʼan, Saúl tsaʼ caji i michʼ qʼuel yicʼot tsiʼ ñaʼta bajcheʼ miʼ mejlel i tsʌnsan.

David yujil i ñijcʌntel arpa. Ti jumpʼejl bʌ qʼuin, Saúl tsiʼ julu tiʼ lanza jiñi David cheʼ bʌ woli (yʌquel) i ñijcan jiñi arpa chaʼan miʼ ñʌchʼtan Saúl. Pero David tsiʼ wutschoco i bʌ, i jiñi lanza tsaʼ tsʼʌp cʌyle yaʼ ti otot. Saúl tsiʼ chʌn ñopo i tsʌnsa David. Jin chaʼan tsaʼ putsʼi i tsiʼ mujcuj i bʌ yaʼ ti tiquin bʌ lum.

Tsaʼ majli Saúl yicʼot 3 mil i soldadojob chaʼan miʼ sʌclañob. Maʼañic ñaʼtʌbil i chaʼan Saúl cheʼ bʌ tsaʼ ochi yaʼ tiʼ yebal xajlel (tun)  baʼ mujcubil David yicʼot i wiñicob. Tsiʼ mucu subeyob David: «I yorajlelix chaʼan maʼ tsʌnsan Saúl». David tsiʼ lʌcʼtesa i bʌ yaʼ baqui an Saúl i tsiʼ xutʼ tsepbe i pislel. Cheʼ bʌ tsaʼ ujti i mel (chaʼlen) jiñi, mach tijicñayic tsaʼ yubi come maʼañic tsiʼ qʼuele ti ñuc jiñi yajcʌbil bʌ i chaʼan Jehová. Jin chaʼan maʼañic chuqui tsiʼ tumbe. Cheʼ bʌ tsaʼ loqʼui Saúl yaʼ tiʼ yebal tun, David cʼam tiʼ sube: «Colel c tsʌnsañet pero maʼañic tsaʼ c mele». ¿Utsʼatix ba tsaʼ caji i qʼuel Saúl jiñi David?

Maʼañic. Saúl tsaʼ caji i chʌn sʌclan David. Ti jumpʼejl bʌ acʼʌlel, David yicʼot Abisái tsaʼ mucu ochiyob yaʼ ti pisil bʌ i yotot Saúl. Tsaʼ wʌyi jaʼel Abner, jiñi xcʌntaya bʌ i chaʼan Saúl. Abisái tiʼ sube David: «¡Tsaʼix cʼoti ora i chaʼan! Aqʼueñon c tsʌnsan». Pero David tsiʼ jacʼbe: «Laʼ laj cʌyben ti cʼʌb Jehová. Coxla, chʼʌmben tilel i lanza yicʼot i yaʼal».

Cheʼ jiñi, David tsaʼ letsi ti jumpʼejl wits lʌcʼʌl bʌ yaʼ baqui an Saúl. David cʼam tsiʼ pejca cheʼ bʌ yaʼan tiʼ pam wits: «¡Abner! ¿Chucoch maʼañic tsaʼ cʌnta a rey? ¿Baqui an i yaʼal yicʼot i lanza?». Saúl tsiʼ cʌmbe i tʼan David i tsiʼ yʌlʌ: «Tsaʼ tsʌnsayon cheʼ a womic pero maʼañic tsaʼ mele. Woliyix j qʼuel chaʼan jatet mi caj a wochel ti tsijiʼ bʌ rey yaʼ ti Israel». Saúl tsaʼ majli tiʼ palacio. Pero an i familiajob Saúl yomʌch bʌ i qʼuelob David.