Jehová tsiʼ yʌqʼue juezob jiñi israelob chaʼan miʼ tojʼesañob, pero yomob juntiquil rey. Jin chaʼan tiʼ subeyob Samuel: «Añob i rey jiñi yan tac bʌ tejclum, com lojon juntiquil jaʼel». Samuel tsiʼ ñaʼta chaʼan mach tojic chuqui woli (yʌquel) i cʼajtiñob. Tsiʼ chaʼle oración i Jehová tsiʼ jacʼʌ: «Mach jatet woli a tsʼaʼlentel, joñon woliʼ tsʼaʼleñoñob. Subeñob chaʼan mi caj i yʌqʼuentelob juntiquil rey pero cabʌl chuqui miʼ caj i cʼajtin». Tsiʼ yʌlʌyob: «¡Mach yʌlʌyic! ¡Com lojon juntiquil rey!».

Cheʼ jiñi, Jehová tiʼ sube Samuel chaʼan Saúl mi caj i yochel bajcheʼ ñaxam bʌ rey. Cheʼ bʌ Saúl tsiʼ julaʼta Samuel yaʼ ti Ramá, tsiʼ mulbe i jol ti aceite, chaʼan miʼ pʌs jiñi rey bʌ miʼ cajel.

Ti wiʼil, Samuel tsiʼ tempa jiñi israelob chaʼan miʼ cʌñob jiñi rey. Pero maʼañic tsiʼ tajayob Saúl. ¿A wujil ba chucoch? Come tsiʼ mujcuj i bʌ yaʼ baqui an cabʌl cuchʌl. Cheʼ bʌ tsiʼ tajayob, tsiʼ pʌyʌyob majlel yaʼ baqui an wiñicob xʼixicob (quixtañujob). Wen chan yicʼot wen i tʼojol jax. Samuel tsiʼ yʌlʌ: «Qʼuelela majqui tsiʼ yajca Jehová». Cʼam tsiʼ yʌlʌyob: «¡Laʼ ñuqʼuesʌntic jiñi rey!».

Ti ñaxan, jiñi rey Saúl mucʼʌch i jacʼben i tʼan Samuel yicʼot Jehová. Pero ti wiʼil tsaʼ qʼuextʌyi. Ti jumpʼejl bʌ qʼuin, Samuel tiʼ sube Saúl chaʼan miʼ pijtan chaʼan miʼ yʌcʼob pulbil bʌ majtañʌl. Jiñi rey mach mejlic i yʌcʼ jiñi pulbil bʌ majtañʌl. Pero Samuel tsaʼ jalʼa, jin chaʼan Saúl i bajñel jach tsiʼ yʌcʼʌ. ¿Chuqui tsiʼ mele (chaʼle) Samuel? Tiʼ sube: «I wentʌlel yom maʼ jacʼben i tʼan Jehová pero maʼañic tsaʼ jacʼbe». ¿Muʼ ba caj i cʌn Saúl chaʼan yom miʼ jacʼben i tʼan Jehová tiʼ pejtelel ora?

Ti wiʼil, Saúl tsaʼ majli i contrajin jiñi chumuloʼ bʌ ti Amalec, cheʼ jiñi Samuel tiʼ sube chaʼan maʼañic majqui cuxul miʼ cʌy. Pero Saúl maʼañic tiʼ tsʌnsa jiñi rey Agag. Cheʼ jiñi Jehová tiʼ sube Samuel: «Saúl tsaʼix i cʌyʌyon, maʼañix miʼ jacʼ c tʼan». Wen chʼijiyem tsaʼ yubi Samuel, jin  chaʼan tiʼ sube Saúl: «Jehová mi caj i yajcan yambʌ rey come jatet maʼañix maʼ jacʼben i tʼan». Cheʼ bʌ Samuel tiʼ sutqʼui i bʌ, Saúl tsiʼ chucu tiʼ pislel i tiʼ tsilbe. Samuel tiʼ sube Saúl: «Cheʼʌch mi caj i chilbeñet Jehová a yumʌntel bajcheʼ jiñi». Jiñi yom i yʌl chaʼan Jehová mi caj i sujtesan ti rey yambʌ wiñic mucʼʌch bʌ i cʼuxbin yicʼot i jacʼben i tʼan.