Yaʼ ti ventanajlel i palacio am bʌ ti Jezreel, jiñi rey Acab tsiʼ wen qʼuelbe i tsʼusubil Nabot. Acab tsiʼ mulaj jiñi lum i tsiʼ jopʼo i mʌnben. Pero Nabot mach yomic i chonben come i mandar Jehová miʼ yʌl chaʼan maʼañic miʼ mejlel ti chojñel jiñi lum muʼ bʌ i cʌy jiñi tatʌl. Nabot tojʌch chuqui tsiʼ mele (chaʼle). ¿Tsaʼ ba i qʼuele ti ñuc Acab jiñi tsaʼ bʌ i yʌlʌ Nabot? Maʼañic. Acab tsaʼ wen michʼa i mach yomix loqʼuel tiʼ yotot yicʼot mi añic to chuqui yom i cʼux.

I yijñam Acab jiñʌch jiñi jontol (simaron) bʌ Jezabel. Tiʼ sube Acab: «Jatetʌch rey ti Israel, jin chaʼan miʼ mejlel a taj chuqui jach a wom. Joñon miʼ caj cʌqʼueñet jiñi lum». Tiʼ tsʼijbube carta tac jiñi ancianojob ti jiñi tejclum. Ti jiñi carta tac tsiʼ jopʼbe i mul Nabot chaʼan tsiʼ wajle Dios yicʼot chaʼan yom miʼ tsʌnsʌntel ti xajlel (tun). Jiñi ancianojob tsiʼ meleyob cheʼ bajcheʼ tsiʼ yʌlʌ Jezabel. Cheʼ jiñi, tiʼ sube Acab: «Tsaʼix chʌmi Nabot. Muqʼuix i mejlel a chʼʌmben i tsʼusubil».

Jezabel mach cojach tiʼ tsʌnsa Nabot. Cabʌl tiʼ tsʌnsa muʼ bʌ i cʼuxbiñob Jehová. Tsiʼ chʼujutesa diosteʼ yicʼot tsiʼ wen mele mach bʌ weñic. Pero Jehová tsiʼ laj qʼuele jiñi jontolil. ¿Chuqui miʼ caj i tumben Jehová jiñi Jezabel?

Cheʼ bʌ tsaʼix chʌmi Acab, tsaʼ to tsʼitaʼ jalʼa chaʼan miʼ tech i yumʌntel i yalobil, i cʼabaʼ Joram (Jehoram). Cheʼ jiñi tsiʼ choco majlel Jehová juntiquil wiñic i cʼabaʼ Jehú chaʼan miʼ yʌqʼuen i toj i mul Jezabel yicʼot i familia.

Jehú tsaʼ letsi tiʼ carreta i tsaʼ majli ti Jezreel, yaʼ baqui chumul Jezabel. Joram tsaʼ letsi tiʼ carreta jaʼel chaʼan miʼ majlel i pejcan Jehú. Cheʼ bʌ tsiʼ tajayob i bʌ yaʼ ti bij, Joram tsiʼ cʼajtibe: «¿Am ba ñʌchʼtʌlel ti lac tojlel?». Jehú tsiʼ jacʼʌ: «Maʼañic ñʌchʼtʌlel mi maʼañic miʼ cʌy i  mel mach bʌ weñic jiñi a ñaʼ Jezabel». Joram tsiʼ ñopo i sutqʼuin i bʌ chaʼan miʼ sujtel, pero Jehú tsiʼ julu tiʼ flecha i tiʼ tsʌnsa.

Cheʼ jiñi, Jehú tsaʼ majli tiʼ palacio Jezabel. Tsaʼ yubi chaʼan yaʼix i tilel Jehú, jin chaʼan tsiʼ boño i bʌ, tsiʼ wen cʌchʌ i jol i tsiʼ pijta yaʼ ti ventana am bʌ tiʼ chaʼlajmlel jiñi otot. Cheʼ bʌ tsaʼ cʼoti Jehú, Jezabel mach tojic bajcheʼ tsiʼ pejca. Jehú tiʼ subeyob ti cʼam bʌ tʼan jiñi xʼeʼtelob i chaʼan Jezabel: «¡Chocola jubel!». Tsiʼ chocoyob jubel yaʼ ti ventana i tsaʼ chʌmi.

Ti wiʼil, Jehú tiʼ tsʌnsa jiñi 70 i yalobilob Acab i tsiʼ jisa i chʼujutesʌntel Baal ti jiñi país. ¿Tsaʼ ba a ñaʼta? Jehová mi luʼ qʼuel i mi yʌqʼuen i toj i mul jiñi muʼ bʌ i mel mach bʌ weñic.