Cabʌl reyob tsiʼ meleyob (chaʼleyob) mach bʌ weñic yaʼ tiʼ yumʌntel jiñi 10 tribu i chaʼan Israel, pero Acab jiñʌch tsaʼ bʌ i ñumen chaʼle mach bʌ tojic. Tsaʼ ñujpuñi yicʼot jontol (simaron) bʌ xʼixic muʼ bʌ i chʼujutesan jiñi dios Baal. I cʼabaʼ Jezabel. Acab yicʼot Jezabel tsiʼ ñijcʌbeyob i pusicʼal jiñi wiñicob xʼixicob chaʼan miʼ chʼujutesañob Baal. Tsiʼ wen tsʌnsayob jeʼel xʼaltʼañob i chaʼan bʌ Jehová. ¿Chuqui tsiʼ mele Jehová? Tsiʼ choco majlel jiñi xʼaltʼan Elías chaʼan miʼ yʌqʼuen jumpʼejl tʼan jiñi Acab.

Elías tiʼ sube Acab chaʼan maʼañic miʼ cajel jaʼal yaʼ ti Israel come mach tojic chuqui woli (choncol) i mel. Ñumen ti uxpʼejl jab jiñi pʌcʼʌbʌl maʼañic tsaʼ coli i jiñi wiñicob xʼixicob tsaʼ caji i yubiñob wiʼñal. Jehová tsiʼ choco majlel Elías chaʼan miʼ chaʼ pejcan jiñi Acab. Jiñi rey Acab tsiʼ sube Elías: «Cojach maʼ chʼʌm tilel wocol. Tiʼ pejtelel ili luʼ a mul». Elías tsiʼ jacʼbe: «Mach c mulic cheʼ maʼañic miʼ chaʼlen jaʼal. An i tiquiñal pañimil come maʼ chʼujutesan Baal. Tempan jiñi israelob yicʼot xʼaltʼañob i chaʼan Baal yaʼ ti wits Carmelo. An chuqui mi caj lac mel».

Tiʼ pejtelelob jiñi Israel tsaʼ luʼ majliyob yaʼ ti wits, cheʼ jiñi Elías tsiʼ yʌlʌ: «Yom miʼ laʼ ñaʼtan. Mi jiñʌch Jehová jiñi isujm bʌ Dios, tsajcanla. Mi jiñʌch Baal, tsajcanla. Laʼ la c mel iliyi: Jiñi 450 xʼaltʼañob i chaʼan Baal yom miʼ chajpañob pulbil bʌ majtañʌl yicʼot yom miʼ pejcañob i dios. Mi caj c chajpan jaʼel pulbil bʌ majtañʌl yicʼot mi caj c pejcan Jehová. Jiñi dios muʼ bʌ i choc tilel cʼajc, jiñʌch isujm bʌ Dios». Tsaʼʌch i jacʼʌyob.

Jiñi xʼaltʼañob i chaʼan Baal tsaʼ caji i chajpañob jiñi majtañʌl. Jumpʼejl qʼuin tsiʼ pejcayob i dios: «¡Baal, jacʼʌ jiñi lon c tʼan!». Elías tsaʼ caji i wajleñob come Baal maʼañic woli (choncol) i jacʼ, i tiʼ subeyob: «Ñumen tsʌts yom miʼ laʼ pejcan. Amecu wʌyʌlic i yom mi laʼ chʼojyesan». Tsaʼ caji ti ochel icʼan, i jiñi xʼaltʼañob i chaʼan Baal tsaʼ caji i bej pejcañob, pero maʼañic tsaʼ jacʼbentiyob.

Elías tsiʼ yʌcʼʌ i chaʼan yaʼ ti pulʌntib i tsiʼ mulu ti jaʼ. Cheʼ jiñi tsiʼ pejca Dios: «C Yum, Jehová, laʼ i cʌñetob ili wiñicob chaʼan jatetʌch jiñi isujm bʌ Dios». Ti orajach  Jehová tsiʼ choco jubel cʼajc tsaʼ bʌ i pulu jiñi majtañʌl. Tsaʼ cajiyob ti oñel: «¡Jehová jiñʌch isujm bʌ Dios!». Elías tsiʼ yʌlʌ: «mach laʼ wʌcʼ tiʼ putsʼel mi juntiquilic xʼaltʼan i chaʼan Baal». Ti jiñi bʌ ora, tiʼ tsʌnsayob 450 xʼaltʼañob i chaʼan Baal.

Ti wiʼil, tsiʼ pʌsʌ i bʌ tocal yaʼ ti mar, Elías tiʼ sube Acab: «Tal tsʌts bʌ jaʼal. Chajpan a carreta i cucu ti a wotot». Tsaʼ loqʼui icʼcupam bʌ tocal, tsaʼ caji icʼ yicʼot wen tsʌts bʌ jaʼal. Tsaʼ lajmi i tiquiñal pañimil. Acab ajñel tsaʼ majli yaʼ ti carreta. Jehová tsiʼ colta Elías chaʼan ñumen ajñel miʼ majlel bajcheʼ jiñi carreta. Pero ¿tsaʼix ba lajmi i wocol Elías? Laʼ laj qʼuel.