Josafat (Jehosafat) jiñʌch juntiquil rey ti Judá tsaʼ bʌ i jisa i pulʌntib jiñi dios Baal yicʼot yambʌ dios tac am bʌ yaʼ tiʼ país. Yom chaʼan miʼ cʌmbeñob i mandar tac Jehová jiñi wiñicob xʼixicob (quixtañujob). Jin chaʼan, tsiʼ choco majlel príncipejob yicʼot levitajob tiʼ pejtelel Judá chaʼan miʼ pʌsbeñob i mandar Jehová jiñi quixtañujob.

Jiñi tejclum tac yaʼ bʌ añob tiʼ tʼejl miʼ bʌcʼñan i contrajiñob Judá come yujilob chaʼan Jehová miʼ coltañob. Tsaʼ to i chʼʌmbeyob majlel majtañʌl tac jiñi rey Josafat. Pero jiñi moabob, amoñob yicʼot yambʌ tejclum tac yaʼ ti Seir tsaʼ majli i contrajiñob Judá. Josafat yujil chaʼan yom i coltaya Jehová. Jin chaʼan tsiʼ tempa wiñicob, xʼixicob yicʼot xbiʼtalob yaʼ ti Jerusalén. Tsaʼ caji ti oración: «Jehová, mach mejlic c bajñel jisan lojon jiñi soldadojob. A wocolic, subeñon lojon chuqui yom mi lon c mel».

Jehová tsiʼ ñʌchʼta Josafat i tsiʼ jacʼbe: «Mach laʼ chaʼlen bʌqʼuen, mi caj j coltañetla. Cucula ti guerra pero cheʼ jach yom waʼaletla i qʼuelela bajcheʼ mi caj j coltañetla». ¿Bajcheʼ tsiʼ coltayob Jehová?

Cheʼ tiʼ yijcʼʌlel, Josafat tsiʼ waʼchoco xcʼayob i tsiʼ subeyob chaʼan ñaxam miʼ majlelob tiʼ tojlel jiñi soldadojob. Tsaʼ loqʼuiyob ti Jerusalén i tsaʼ majliyob ti Tecoa, yaʼ baqui miʼ cajelob ti guerra.

Wen tsʌts woliyob (yʌquelob) ti cʼay cheʼ bʌ Jehová woliʼ jisan i contrajob. Tsiʼ qʼuextʌbeyob i pensar jiñi amoñob yicʼot jiñi moabob, tsiʼ laja contrajiyob i bʌ i tsaʼ laj chʌmiyob. Jehová tsiʼ colta jiñi tilemoʼ bʌ ti Judá, jiñi soldadojob yicʼot jiñi motomajob. Jiñi tejclum tac yaʼ bʌ añob tiʼ tʼejl tsaʼ yubiyob tsaʼ bʌ i mele (chaʼle) Jehová i tsiʼ ñaʼtayob chaʼan mucʼʌch i chʌn coltan i tejclum. ¿Bajcheʼ miʼ coltan Jehová i tejclum? An cabʌl bajcheʼ. Maʼañic miʼ cʼajtin i coltʌntel ti quixtañujob.