Cheʼ bʌ Salomón muʼto i chʼujutesan Jehová, an ñʌchʼtʌlel ti Israel. Pero tsaʼ ñujpuñi yicʼot cabʌl xʼixicob tilemoʼ bʌ ti yan tac bʌ país yicʼot muʼ bʌ i chʼujutesañob dios teʼ. Cʼunteʼ cʼunteʼ tsaʼ caji ti qʼuextʌyel Salomón i tsaʼ caji i chʼujutesan jaʼel jiñi dios tac. Jehová tsaʼ michʼa i tiʼ sube: «Mi caj c chilben a familia i yumʌntel Israel i mi caj c tʼox ti chaʼchajp. Jiñi ñumen on bʌ yumʌntel mi caj i chʼʌm juntiquil xʼeʼtel a chaʼan, i jiñi mach bʌ oñic a familia mi caj i yuman».

Jehová an yambʌ chuqui tsiʼ mele (chaʼle) chaʼan miʼ ñumen chʼʌmbeñob isujm jiñi tsaʼ bʌ i yʌlʌ. Juntiquil xʼeʼtel i chaʼan Salomón, i cʼabaʼ Jeroboam (Jeroboán), tsiʼ taja yaʼ ti bij jiñi xʼaltʼan Ahías (Ahíya). Ili xʼaltʼan tsiʼ jocho i bujc i tiʼ tsili ti 12 parte. Cheʼ jiñi tiʼ sube Jeroboán: «Jehová mi caj i chilben i familia Salomón jiñi yumʌntel ti Israel i mi caj i tʼox ti chaʼchajp. Chʼʌmʌ ili 10 wejl pisil, come mi caj a yuman 10 mojt wiñicob xʼixicob». Cheʼ bʌ Salomón tsaʼ yubi jiñi, tsiʼ jopʼo i tsʌnsan Jeroboam. Jin chaʼan tsaʼ putsʼi majlel ti Egipto. Roboam (Rehoboam), i yalobil Salomón, tsaʼ caji ti yumʌntel cheʼ bʌ tsaʼ chʌmi Salomón. Jeroboam tsiʼ ñaʼta chaʼan maʼañix an ti wocol, i tsaʼ chaʼ majli ti Israel.

 Jiñi ancianojob ti Israel tiʼ subeyob Roboam: «Mi wen maʼ qʼuel jiñi wiñicob xʼixicob, wen mi caj a qʼuejlel jaʼel». Pero i yamigojob tiʼ subeyob: «Yom tsʌts maʼ mel a bʌ tiʼ tojlelob. Ñumen xiqʼuiyob ti eʼtel». Roboam tsiʼ jacʼbe i tʼan i yamigojob i tsaʼ caji i ticʼlan jiñi wiñicob xʼixicob. Jin chaʼan tsaʼ caji i contrajiñob Roboam i tsiʼ waʼchocoyob Jeroboán chaʼan miʼ yuman jiñi 10 mojt wiñicob xʼixicob. Ili 10 mojt tsaʼ cʌjñi bajcheʼ i yumʌntel Israel. Jiñi yambʌ chaʼmojt tsaʼ cʌjñi bajcheʼ i yumʌntel Judá i xucʼul tsaʼ ajñiyob tiʼ tojlel Roboam. Cheʼʌch tsaʼ tʼoxle bajcheʼ iliyi jiñi 12 mojt israelob.

Jerusalén an ti wenta i yumʌntel Roboam. Pero Jeroboam mach yomic chaʼan miʼ majlel i chʼujutesañob Jehová jiñi wiñicob xʼixicob yaʼ ti Jerusalén. ¿A wujil ba chucoch? Come tsiʼ bʌcʼña chaʼan jiñix Roboam miʼ jacʼbentel i tʼan. Jin chaʼan tsiʼ mele (pʌtʌ) chaʼcojt alʌ tat wacax ti oro i tiʼ sube i wiñicob: «Jerusalén wen ñajt. Cʌylenla wʌʼi chaʼan mi laʼ chʼujutesan ili alʌ tat wacax». Tsiʼ jacʼbeyob i tʼan Jeroboán i tsiʼ chaʼ cʌyʌyob Jehová.