Josías tsaʼ caji ti yumʌntel ti Judá cheʼ bʌ an jaxto 8 i jabilel. Ti jimbʌ ora, jiñi wiñicob xʼixicob (quixtañujob) miʼ cʼʌñob magia yicʼot miʼ chʼujutesañob diosteʼ tac. Cheʼ bʌ Josías añix 16 i jabilel, toj tsaʼ caji i chʼujutesan Jehová. Ti wiʼil, cheʼ bʌ tiʼ tsʼʌctesa 20 jabilel, tsaʼ caji i jem jiñi diosteʼ tac yicʼot pulʌntib am bʌ tiʼ pejtelel jiñi país. Cheʼ bʌ añix 26 i jabilel, tsiʼ wen ñaʼta bajcheʼ mi caj i tojʼesʌben i templo Jehová.

Jiñi ñuc bʌ motomaj Hilcías (Hilquías), tsiʼ taja yaʼ ti templo jiñi jun baqui tsʼijbubil i mandar Dios. Tajol jiñʌch jiñi jun tsaʼ bʌ i tsʼijbu Moisés. Safán, i secretario jiñi rey, tsiʼ chʼʌmbe majlel Josías jiñi jun i tsiʼ pejcʌbe tiʼ cʼam bʌ tʼan. Josías tsiʼ ñʌchʼta i tsaʼ cʼoti i ñaʼtan chaʼan cabʌl jab tsiʼ wen ñusʌbeyob i tʼan Jehová jiñi tejclum. Jiñi rey Josías tsiʼ sube Hilcías: «Jehová wen michʼ yicʼotonla. Cʼajtiben chuqui yom mi lac mel». Jehová tsiʼ sube jiñi xʼaltʼan bʌ xʼixic Hulda: «Jiñi i tejclum Judá tsiʼ cʌyʌyon. Mi caj cʌqʼueñob i toj i mul, pero mach jiñic cheʼ tiʼ yorajlel i yeʼtel Josías come Josías añʌch i pecʼlel.

Cheʼ bʌ jiñi rey Josías tsaʼ yubi jiñi tʼan, tsaʼ majli ti templo i tsiʼ tempa jiñi wiñicob xʼixicob yaʼ ti Judá. Tsaʼ caji i pejcʌbeñob ti cʼam bʌ tʼan i mandar Jehová. Tsiʼ yʌlʌyob chaʼan tiʼ pejtelel i pusicʼal mi caj i jacʼbeñob i tʼan Dios.

Cabʌlix jab jiñi tejclum Judá maʼañic miʼ melob jiñi Pascua. Pero Josías tsiʼ pejca yaʼ ti mandar chaʼan yom miʼ mejlel jiñi Pascua ti  jujumpʼejl jab, jin chaʼan tiʼ subeyob: «Mi caj lac mel i qʼuiñilel Pascua chaʼan Jehová». Ti wiʼil, Josías tiʼ subeyob chaʼan miʼ chajpañob majtañʌl tac yicʼot chaʼan yom an xcʼayob ti templo. Tsiʼ meleyob (chaʼleyob) jiñi Pascua yicʼot i qʼuiñilel jiñi waj mach bʌ añic i levadurajlel, 7 qʼuin tsaʼ jalʼa. Maʼañix baʼ ujtem ili Pascua, cojachix tsaʼ mejli cheʼ bʌ cuxul to Samuel. Tiʼ sujm, Josías tsiʼ wen jacʼbe i Mandar Dios. Ixcu jatet, ¿muʼ baʼ mulan a cʌn i chaʼan bʌ Jehová?