Jezabel tsaʼ yila pañimil xchʼoc bʌ i yalobil i cʼabaʼ Atalía i jontol (simaron) bajcheʼ i ñaʼ. Atalía tsaʼ ñujpuñi yicʼot jiñi rey bʌ ti Judá. Jiñi rey tsaʼ chʌmi i tsaʼ caji ti yumʌntel i yalobil. Cheʼ bʌ tsaʼ chʌmi i yalobil, Atalía tsaʼ cʌyle tiʼ wenta i yumʌntel Judá. Chaʼan maʼañic majqui miʼ chilben yetel, tsiʼ ñopo i laj tsʌnsʌben i yalobilob jiñi rey yicʼot tiʼ pejtelel muʼ bʌ i mejlel tiʼ ochel bajcheʼ yumʌl. ¡Yicʼot to i butsob! Jin chaʼan miʼ wen bʌcʼñañob.

Jiñi ñuc bʌ motomaj Joiadá (Jehoiadá) yicʼot i yijñam i cʼabaʼ Josaba (Jehoseba), yujilob chaʼan mach weñic i melbal Atalía. Colel i yʌcʼob i bʌ ti chʌmel cheʼ bʌ tsiʼ mucbeyob i buts Atalía, ili jiñʌch Joás (Jehoás). Tsiʼ cosayob yaʼ ti templo.

Cheʼ bʌ añix 7 i jabilel Joás, Joiadá tsiʼ tempa i yum xcʌntayajob yicʼot levíjob. Tiʼ subeyob: «Cʌntanla i tiʼ jiñi templo. Maʼañic majqui yom miʼ yochel». Cheʼ jiñi, Joiadá tsiʼ yʌqʼue i corona jiñi Joás chaʼan miʼ yochel bajcheʼ rey ti Judá. Jiñi wiñicob xʼixicob (quixtañujob) ti Judá tsiʼ chaʼleyob cʼam bʌ tʼan: «¡Laʼ ñuqʼuesʌntic jiñi rey!».

Jiñi reina Atalía tsaʼ yubi chaʼan wen juʼucñayob wiñicob i tsaʼ majli ti ajñel yaʼ ti Templo. Cheʼ bʌ tsiʼ qʼuele jiñi tsijiʼ bʌ rey, cʼam tsiʼ yʌlʌ: «¡Tsaʼix i juchʼteqʼueyoñob!». Jiñi i yum xcʌntayajob tsiʼ chucuyob jiñi reina, tsiʼ pʌyʌyob loqʼuel i tiʼ tsʌnsayob. Mach weñic bʌ melbal tsiʼ pʌsʌ. ¿Chuqui miʼ caj ti ujtel wʌle?

Joiadá tsiʼ colta jiñi tejclum chaʼan miʼ mel jumpʼejl trato yicʼot Jehová. Ti jiñi trato, tsiʼ yʌcʼʌyob i tʼan chaʼan cojach Dios mi caj i chʼujutesañob. Joiadá tsaʼ yʌcʼʌ ti jisʌntel i templo  Baal yicʼot yambʌ dios tac. Tsaʼ yʌcʼʌ ti eʼtel motomajob yicʼot levíjob yaʼ ti templo chaʼan miʼ chaʼ chʼujutesʌntel Jehová. Tsaʼ yʌcʼʌ xcʌntayajob yaʼ ti templo chaʼan maʼañic miʼ yochel mach bʌ sʌquic. Ti wiʼil, Joiadá yicʼot i yum xcʌntayajob tsiʼ pʌyʌyob majlel Joás yaʼ ti palacio i tsiʼ yʌcʼʌyob tiʼ buchlib. Tsiʼ wen tajayob i tijicñʌyel yaʼ ti Judá. Muqʼuix i mejlel i chʼujutesañob Jehová come librejix añob tiʼ tojlel Atalía yicʼot tiʼ tojlel i chʼujutesʌntel Baal. ¿Tsaʼ ba i chaʼle bʌqʼuen Joiadá maʼ wʌl? Maʼañic, come tsiʼ colta cabʌl quixtañujob.