Wen jontolob (simaroñob) yaʼ ti tejclum Asiria tsaʼ bʌ cʌjñi bajcheʼ Nínive. Jehová tsiʼ choco majlel jiñi xʼaltʼan Jonás yaʼ ti Nínive, chaʼan miʼ suben wiñicob xʼixicob (quixtañujob) chaʼan miʼ qʼuextañob i melbal. Pero Jonás tsaʼ letsi ti jumpʼejl barco majlel bʌ mucʼ ti Tarsis i maʼañic tsaʼ majli ti Nínive.

Cheʼ bʌ yaʼix añob ti mar, tsaʼ caji tsʌts bʌ icʼ jaʼal, i tsaʼ wen bʌcʼña jiñi yaʼ bʌ añob ti barco. Tsiʼ pejcayob i dios i tsiʼ cʼajtibeyob i bʌ: «¿Chucoch woli ti ujtel iliyi?». Ti wiʼil, Jonás tsiʼ subeyob: «C mul joñon. Woliyon ti putsʼel chaʼan maʼañic mic mel tsaʼ bʌ i subeyon Jehová. Chocoyonla ochel yaʼ ti jaʼ chaʼan miʼ lajmel jiñi icʼ yicʼot jaʼal». Jiñi xʼeʼtelob yaʼ ti barco mach yomobic i choc ochel yaʼ ti jaʼ, pero Jonás tsiʼ wersa subeyob chaʼan mucʼʌch. Jin chaʼan tsiʼ chocoyob ochel yaʼ ti mar, i tsaʼ lajmi jiñi icʼ yicʼot jaʼal.

Jonás tsiʼ ñaʼta chaʼan miʼ caj ti chʌmel. Cheʼ bʌ tsaʼ bej sujpʼij yaʼ ti jaʼ, tsiʼ pejca Jehová. Cheʼ jiñi, Jehová tsiʼ choco majlel colem chʌy i tsiʼ bucʼu Jonás, pero maʼañic tsaʼ chʌmi. Jonás tsiʼ pejca Jehová cheʼ bʌ yaʼan tiʼ malil jiñi chʌy: «Mi cʌqʼueñet c tʼan chaʼan mi caj c bele tsʼʌctesan chuqui maʼ subeñon». Jehová tsiʼ colta Jonás chaʼan uxpʼejl qʼuin miʼ yajñel tiʼ malil jiñi chʌy. Ti wiʼil, Jehová tsiʼ choco majlel jiñi chʌy yaʼ baqui tiquin lum chaʼan miʼ xejtan Jonás.

Jehová tsiʼ colta Jonás, pero ¿yom ba i yʌl jiñi chaʼan maʼañix mi caj  i majlel ti Nínive? Maʼañic. Jehová tsiʼ chaʼ choco majlel, i wʌle tsaʼʌch i jacʼʌ. Tsaʼ cʼoti i suben jiñi jontoloʼ bʌ: «Jehová mi caj i jisan ili tejclum ti 40 qʼuin». Cheʼ jiñi, an chuqui tsaʼ ujti mach bʌ pijtʌbilic i chaʼan Jonás. Tsiʼ jacʼbeyob i tʼan i tsiʼ qʼuextayob i melbal. Jiñi rey bʌ yaʼ ti Nínive tiʼ sube jiñi quixtañujob: «Wersa subenla Dios chaʼan miʼ ñusan laʼ mul, tajol cheʼ jiñi maʼañic mi lac jisʌntel». Jehová maʼañic tsiʼ jisayob come tsiʼ qʼueleyob chaʼan tsaʼʌch i cʌyʌyob i mul.

Jonás tsaʼ michʼa come Jehová maʼañic tsiʼ jisa jiñi tejclum. Ñaʼtancu jumucʼ: Jehová maʼañic tsaʼ seb michʼa yicʼot Jonás i tsiʼ pʼunta. Pero Jonás maʼañic tsiʼ pʼunta jiñi quixtañujob yaʼ ti Nínive. Tsaʼ buchle tiʼ yebal juntejc acʼ cheʼ bʌ yilal bajcheʼ chʼujm i wen michʼicña. Tsaʼ tiqui jiñi acʼ i Jonás tsaʼ ñumen michʼa. Jehová tsiʼ sube: «Maʼ ñumen qʼuel ti ñuc jiñi acʼ cheʼ bajcheʼ jiñi quixtañujob yaʼ ti Nínive. Tsaʼ c pʼuntayob, jin chaʼan tsaʼ j coltayob». ¿Chuqui yom i pʌsben Dios jiñi Jonás? Chaʼan ñumen ñuc i cʼʌjñibal jiñi quixtañujob yaʼ ti Nínive bajcheʼ yac tac bʌ acʼ.