Tsaʼ chumle juntiquil alʌ xchʼoc yaʼ ti Siria i wen ñajt tsiʼ cʌyʌ i yotot yicʼot i familia come chʼoyol ti Israel. Jiñi soldadojob ti Siria tsiʼ pʌyʌyob majlel ti majtan eʼtel tiʼ yotot i yijñam juntiquil i yum soldadojob, i cʼabaʼ Naamán. Maʼañic majqui miʼ chʼujutesan Dios yaʼ baqui chumul pero jiñi alʌ xchʼoc tsaʼʌch i chʼujutesa Jehová.

Naamán tsiʼ taja wen cʼux bʌ cʼamʌjel tiʼ bʌcʼtal. Jiñi alʌ xchʼoc yom i coltan, jin chaʼan tiʼ sube i yijñam Naamán: «J cʌñʌ juntiquil wiñic muʼ bʌ i mejlel i coltan a ñoxiʼal. Ti Israel an juntiquil xʼaltʼan i chaʼan Jehová, i cʼabaʼ Eliseo. Miʼ mejlel i tsʼʌcan a ñoxiʼal».

Tsiʼ sube i ñoxiʼal tsaʼ bʌ i yʌlʌ jiñi alʌ xchʼoc. Naamán yom i mel (chaʼlen) chuqui jach miʼ subentel chaʼan miʼ cʼocʼan, jin chaʼan tsaʼ majli tiʼ yotot Eliseo yaʼ ti Israel. Naamán tsiʼ ñaʼta chaʼan Eliseo mi caj i loqʼuel i pejcan bajcheʼ juntiquil wiñic wen ñuc bʌ i cʼʌjñibal. Pero Eliseo tsiʼ choco majlel juntiquil xʼeʼtel chaʼan miʼ pejcan yicʼot chaʼan  miʼ suben ili tʼan: «Cucu otsan a bʌ wucyajl (7) yaʼ ti Jordán jaʼ i mi caj a cʼocʼan».

Naamán maʼañic tsiʼ mulaj i tsiʼ yʌlʌ: «Tsaʼ lon c ñaʼta chaʼan mi caj i pejcan i Dios ili xʼaltʼan yicʼot i tichʼ i cʼʌb tic pam chaʼan miʼ tsʼʌcañon. Pero cojach woliʼ subeñon chaʼan mic majlel yaʼ ti jaʼ am bʌ ti Israel. An tsaʼ ñumen wem bʌ jaʼ yaʼ ti Siria. ¿Chucoch maʼañic mic mejlel ti majlel yaʼi?». Naamán tsaʼ wen michʼa i tsaʼ loqʼui tiʼ yotot Eliseo.

Jiñi xʼeʼtelob i chaʼan Naamán tsiʼ coltayob chaʼan miʼ wen ñaʼtan jiñi tsaʼ bʌ i yʌlʌ Eliseo. Tsiʼ subeyob: «¿Maʼañic ba mi caj a jacʼ chuqui jach maʼ subentel chaʼan maʼ cʼocʼan? Jiñi tsaʼ bʌ i subeyet jiñi xʼaltʼan mach wocolic ti jacʼol. ¿Chucoch maʼañic maʼ jacʼ?». Naamán tsiʼ jacʼʌ, tsaʼ majli yaʼ ti Jordán jaʼ i wucyajl tsiʼ yotsa i bʌ. Cheʼ tiʼ wucyajlel, cʼoqʼuix tsaʼ loqʼui yaʼ ti jaʼ. Wen tijicña tsaʼ yubi i tsaʼ majli i yʌqʼuen wocolix i yʌlʌ Eliseo. Tsiʼ sube: «Wʌle cujil chaʼan jiñʌch Jehová jiñi isujm bʌ Dios». Naamán cʼoqʼuix tsaʼ majli tiʼ yotot. ¿Bajcheʼ yubil tsaʼ yubi maʼ wʌl jiñi alʌ chʼoc cheʼ bʌ tsiʼ qʼuele Naamán?