Jiñi rey Benadad (Ben-Hadad) ti Siria tsiʼ wen sʌcla bajcheʼ miʼ jisan Israel. Pero jiñi xʼaltʼan Eliseo tiʼ pejtelel ora miʼ suben jiñi rey ti Israel chaʼan miʼ putsʼel. Jin chaʼan Benadad tsiʼ ñaʼta i chuc Eliseo. Tsaʼ yubi chaʼan yaʼan ti tejclum Dotán i tsiʼ choco majlel i soldadojob chaʼan miʼ chucob.

Jiñi siriojob tsaʼ cʼotiyob yaʼ ti Dotán cheʼ ti acʼʌlel. Cheʼ bʌ tsaʼ sʌcʼa pañimil, tsaʼ chʼojyi i wiñic Eliseo i tsiʼ qʼuele chaʼan joyol jiñi tejclum ti soldadojob. Tsaʼ wen bʌcʼña i tsiʼ yʌlʌ ti cʼam bʌ tʼan: «Eliseo, ¿chuqui mi caj lac mel?». Eliseo tsiʼ jacʼbe: «Ñumen cabʌlob jiñi muʼ bʌ i coltañonla cheʼ bajcheʼ jiñi laj contrajob». Ti jiñi bʌ ora, Jehová tsiʼ yʌqʼue i qʼuel i wiñic Eliseo chaʼan joyolob ti cabʌl cʼajc yaʼ ti wits, i cheʼ yilal bajcheʼ caballo yicʼot carreta tac chaʼan bʌ guerra.

Cheʼ bʌ jiñi soldadojob tsiʼ ñopo i chucob Eliseo, tsiʼ chaʼle oración: «Jehová, a wocolic, sʌtbeñob i wut». Ti ora jach, jiñi soldadojob maʼañic tsiʼ ñaʼtayob baqui añob anquese muqʼuix to i cʼotelob i wut. Cheʼ jiñi, Eliseo tiʼ subeyob: «Mach jiñic ili tejclum woli bʌ laʼ sʌclan.  Tsajcañonla tilel, mi caj c pʌyetla majlel yaʼ baqui an jiñi wiñic woli bʌ laʼ sʌclan». Tiʼ tsajcayob majlel Eliseo cʼʌlʌl ti Samaria, yaʼ baqui chumul i rey Israel.

Jiñi siriojob tsaʼ cʼoti i ñaʼtañob baqui añob pero maʼañobix i putsʼib. I rey Israel tsiʼ cʼajtibe Eliseo: «¿Muʼ baʼ c tsʌnsañob?». Jiñi siriojob tsiʼ ñopo i ticʼlañob Eliseo, ¿muʼ ba caj i yʌqʼueñob i toj i mul jiñi siriojob? Maʼan. Eliseo tiʼ sube jiñi rey: «Mach laʼ tsʌnsañob. Aqʼueñob i bʌl i ñʌcʼ i laʼ sujticob». Jiñi rey tsiʼ chajpʌbeyob wen ñuc bʌ bʌlñʌcʼʌl, i cheʼ jiñi, tsaʼ yʌcʼʌyob majlel tiʼ yotot.