Cʼuxbibil bʌ hermanojob:

Jiñi muʼ bʌ lac chʼujutesan Jehová mi laj cʼuxbiben i Tʼan. Wen la cujil chaʼan mi la c taj yaʼ ti Biblia isujm bʌ historia, ticʼojel tac yicʼot jiñi cʼuxbiya am bʌ i chaʼan Jehová tiʼ tojlel jiñi familia tac (Salmo 119:105; Lucas 1:3; 1 Juan 4:19). Com lon j coltan yambʌlob chaʼan miʼ cʌñob i sujmlel i Tʼan Dios. Jin chaʼan, tijicña mi cubin lojon c cheʼ mic pʌsbeñetla ili libro: Cʌñʌ am bʌ ti Biblia. Mi caj c subeñetla bajcheʼ yilal ili libro.

Ili tsaʼ mejli chaʼan miʼ pejcan jiñi alobob. Pero i chaʼañʌch jaʼel jiñi yom bʌ i ñumen cʌñob i tʼan Dios. Mi caj lac taj lac wenlel cheʼ miʼ lac pejcan jiñi am bʌ ti Biblia come jumpʼejlʌch libro chaʼan tiʼ pejtelel pañimil i miʼ mejlel i coltañonla chaʼan miʼ lac taj isujm bʌ lac tijicñʌyel.

Ili libro miʼ tech i yʌl tsaʼ bʌ ujti tiʼ tojlel jiñi ñaxam bʌ familia. Tsaʼ chaʼlenti wersa chaʼan miʼ chʼʌmbentel isujm jiñi cʌntesʌntel tac yicʼot quepecña miʼ tsictesan chuqui tac tsaʼ ujti.

Pero mach cojach miʼ chʼʌm tilel historia tac loqʼuem bʌ ti Biblia. Jiñi texto yicʼot jiñi dibujo tac, tsaʼ chajpʌnti chaʼan miʼ yʌqʼuen i sujmlel jiñi relato tac yicʼot chaʼan miʼ ñaʼtʌntel bajcheʼ yubil tsaʼ yubiyob jiñi muʼ bʌ i tajtʌlob ti tʼan.

Ili jun miʼ pʌs chaʼan jiñi Biblia jumpʼejlʌch libro muʼ bʌ i taj ti tʼan quixtañujob tsaʼ bʌ i jacʼbeyob i tʼan Jehová yicʼot jiñi mach bʌ añic. Miʼ coltañonla jaʼel chaʼan mi laj cʌn chuqui miʼ pʌsbeñonla ili quixtañujob (Romanos 15:4; 1 Corintios 10:6). Tʼoxbil ti 14 sección i tiʼ tejchibal jujumpʼejl sección, miʼ yʌl chuqui tac miʼ mejlel laj cʌn.

 Mi an a walobilob, miʼ mejlel a pejcʌbeñob jumpʼejl cʌntesʌntel i miʼ mejlel laʼ wʌl jiñi dibujo tac. Cheʼ jiñi, miʼ mejlel laʼ pejcan jiñi texto tac. Coltan a walobil chaʼan miʼ qʼuel bajcheʼ miʼ taj i bʌ jiñi am bʌ ti Biblia yicʼot jiñi am bʌ ti jujumpʼejl cʌntesʌntel ti ili libro. Cheʼʌch miʼ mejlel ti melol jaʼel ti tojlel jiñi ñucobix bʌ chaʼan miʼ cʌñob chuqui miʼ yʌl jiñi Biblia.

Com lojon chaʼan ili libro miʼ coltan jiñi weñoʼ bʌ i pusicʼal, jiñi xcolelob yicʼot jiñi ñucobix bʌ, chaʼan miʼ cʌmbeñob i Tʼan Dios yicʼot chaʼan miʼ jacʼob muʼ bʌ i yʌl jiñi cʌntesʌntel tac. Cheʼ jiñi, mi caj i chʼujutesañob yicʼot mi caj i yochelob tiʼ familia Jehová.