Jiñi saludo chaʼan bandera. Jiñi i testigojonbʌla Jehová la cujil chaʼan woli laj cʌqʼuen i ñuclel jiñi bandera cheʼ mi lac chaʼlen ti saludar, i cheʼ mi laj cʼʌyin woli lac pʌs chaʼan jiñi laj coltʌntel añʌch ti jumpʼejl país yicʼot ti wiñicob i mach yaʼic ti Dios (Isaías 43:11; 1 Corintios 10:14; 1 Juan 5:21). Jiñi rey Nabucodonosor ti Babilonia tsaʼ aqʼuenti i ñuclel bajcheʼ juntiquil dios. Come wen yom i pʌsben i wiñicob i ñuclel yicʼot chaʼan chuqui miʼ ñop, tsiʼ yʌcʼʌ ti melol colem bʌ imagen chaʼan jiñi wiñicob xʼixicob miʼ ñocchocoñob i bʌ tiʼ tojlel cheʼ bʌ woliʼ yʌjlel jumpʼejl himno. Pero uxtiquil hebreojob, Sadrac, Mesac yicʼot Abednego, maʼañic tsiʼ jacʼʌyob anquese yujilob chaʼan miʼ mejlelob ti tsʌnsʌntel (Daniel, capítulo 3).

Carlton Hayes, juntiquil muʼ bʌ i tsʼijbun chaʼan historia, tsiʼ yʌlʌ yaʼ ti i libro El nacionalismo chaʼan ili ora, «jiñi símbolo chaʼan bʌ i ñopoñelob yicʼot muʼ bʌ i chʼujutesañob jiñʌch jiñi bandera. [...] Jiñi wiñicob miʼ jochob i pixol cheʼ miʼ ñumel jiñi bandera tiʼ tʼejob, an muʼ bʌ i tsʼijbuñob utsʼatax bʌ tʼan tac chaʼan miʼ yʌqʼueñob i ñuclel, i jiñi xbiʼtalob miʼ cʼʌyiñob jiñi himno tac». Cheʼ jaʼel, mi yʌl chaʼan jiñi nacionalismo an jaʼel «jumpʼejl qʼuin chaʼan miʼ melbentel i qʼuiñilel», bajcheʼ jiñi 16 i chaʼan septiembre, Día de la Independencia de México, cheʼ jaʼel an chuqui «chʼujul tac bʌ i chaʼañob yicʼot i soldadojob mʌlbil bʌ i chaʼañob guerra». Cheʼ jaʼel, jiñi Diario Oficial de la Federación, i chaʼan México, mi yʌl  chaʼan «jiñi Escudo, jiñi Bandera yicʼot Himno Nacional jiñʌch jumpʼejl Símbolo i chaʼan jiñi País» yicʼot miʼ yʌjlel chaʼan yom miʼ «chʼujutesʌntel tiʼ pejtelel jiñi». Añix cabʌl jab, jumpʼejl libro tsiʼ yʌlʌ chaʼan «jiñi bandera chʼujulʌch cheʼ bajcheʼ jiñi cruz» (The Encyclopedia Americana).

Maxto wen jalic, jiñi enciclopedia tsiʼ yʌlʌ chaʼan jiñi Himno Nacional jiñʌch baqui miʼ yʌcʼob ti cʌñol bajcheʼ yubil miʼ yubiñob tiʼ tojlel i país yicʼot baqui miʼ cʼajtibeñob jiñi Dios chaʼan miʼ pʌsbeñob jiñi bij i chaʼan miʼ cʌntʌbeñob i tejclum o jiñi añoʼ bʌ i yeʼtel. Jin chaʼan, jiñi i testigojob Jehová maʼañic miʼ ñumelob ti pʼis cheʼ bʌ miʼ yʌlob chaʼan jiñʌch jumpʼejl chʼujutesaya cheʼ miʼ melbentel i qʼuiñilel tac jumpʼejl país baqui miʼ chaʼlentel ti saludar jiñi bandera o miʼ cʼʌyintel. Ti jiñi libro Genio y figura del norteamericano i chaʼan jiñi maestro D. W. Brogan, tsiʼ yʌlʌ chaʼan cabʌl meloñel tsaʼ bʌ ujti tiʼ tojlel alumnojob testigojoʼ bʌ mach bʌ añic tsiʼ jacʼʌ i yʌqʼueñob i ñuclel jiñi i bandera Estados Unidos i maʼañic tsiʼ yʌlʌyob i xucʼtʌlel ti jiñi País, tsiʼ yʌlʌ: «Jiñi Suprema Corte tsaʼix i wen alʌ chaʼan tiʼ melol iliyi lajalʌch bajcheʼ jumpʼejl chʼujutesaya».

Jiñi testigojonbʌla maʼañic mi la cotsan lac bʌ come la cujil chaʼan ticʼbil yaʼ ti principio tac am bʌ ti Biblia, pero jiñi yambʌ quixtañujob miʼ mejlel i melob mi cheʼ yomob. Cheʼ jaʼel, mach lecojic mi laj qʼuel jiñi bandera muʼ bʌ i yʌcʼ ti cʌñol jumpʼejl País yicʼot mi lac jacʼben i tʼan jiñi yumʌlob come jiñobʌch «añoʼ bʌ i yeʼtel ti pañimil» bajcheʼ ‹i wiñicob Dios› (Romanos 13:1-4). Cheʼ jaʼel, mi lac mel oración «chaʼan yumʌlob yicʼot pejtel añoʼ bʌ i yeʼtel». Pero mi lac mel chaʼan jach «mi la cajñel tiʼ tijicñʌyel lac pusicʼal, ti wen chʼujul yicʼot ti wen toj» (1 Timoteo 2:2).

Votación chaʼan política. Jiñi isujm bʌ xñoptʼan maʼañic chuqui mi yʌl cheʼ jiñi yañoʼ bʌ miʼ chaʼleñob votar. Maʼañic miʼ michʼan chaʼan majqui miʼ mʌl jiñi votación tac yicʼot mucʼʌch i jacʼben i tʼan jiñi muʼ bʌ i yochelob ti i yeʼtel. Pero maʼañic miʼ wis otsan i bʌ tiʼ chaʼan bʌ política (Mateo 22:21; 1 Pedro 3:16). Pero ¿ixcu mi yaʼ tiʼ país wersa xicʼbil chaʼan yom miʼ chaʼlen votar o miʼ mejlel i taj wocol come jiñi quixtañujob miʼ michʼañob cheʼ maʼañic miʼ majlel ti votar? Mi maʼañic chuqui miʼ suben i conciencia, miʼ mejlel ti majlel yaʼ baqui miʼ yujtel votación. Pero cheʼ mi caj i  mel bajcheʼ tsiʼ mele jiñi Sadrac, Mesac yicʼot Abednego, tsaʼ bʌ i jacʼʌyob majlel ti jiñi joctʌl i chaʼan Dura. Jiñi xñoptʼan maʼañic miʼ yotsan i bʌ ti política i yom cʼajal i chaʼan ili 6 principio:

1. Jiñi xcʌntʼañob i chaʼan Jesús «mach i [chaʼañoñicla] pañimil» (Juan 15:19).

2. Jiñi xñoptʼañob waʼchocobilob tiʼ wentajlel Cristo yicʼot i Yumʌntel (Juan 18:36; 2 Corintios 5:20).

3. Ti lac pejtelel yaʼ ti congregación temel añonla come junlajal chuqui mi lac ñop yicʼot laj cʼuxbiya (1 Corintios 1:10; Colosenses 3:14).

4. Muʼ bʌ i chaʼlen votar chaʼan miʼ waʼchocontel juntiquil yumʌl an tiʼ wenta chuqui miʼ mel (qʼuele jiñi principio tac am bʌ ti 1 Samuel 8:5, 10-18 yicʼot 1 Timoteo 5:22).

5. Cheʼ bʌ jiñi israelob tsiʼ cʼajtiyob juntiquil yumʌl muʼ bʌ i mejlel i qʼuelob, Jehová tsiʼ qʼuele chaʼan woliʼ tsʼaʼlebeñob i Yumʌntel (1 Samuel 8:7).

6. Jiñi xñoptʼañonbʌla mach la comic chuqui miʼ mʌctañonla chaʼan mi lac subeñob chaʼan i Yumʌntel Dios jiñi ochemoʼ bʌ ti política (Mateo 24:14; 28:19, 20; Hebreos 10:35).

Eʼtel ti tejclum. An país baqui miʼ wersa xicʼob jiñi mach bʌ yomic i melob i servicio militar chaʼan miʼ melob jiñi eʼtel tiʼ tojlel tejclum. ¿Chuqui yom mi lac mel mi cheʼ woli lac ñusan bajcheʼ jiñi? Yom mi lac melben oración Jehová yicʼot mi lac wen chʼʌmben isujm bajcheʼ an jiñi, tajol cheʼ mi laj cʼajtiben i coltaya juntiquil hermano añix bʌ i ñaʼtʌbal. Cheʼ bajcheʼ jiñi, mi caj lac ñaʼtan chuqui mi caj lac mel tiʼ tijicñʌyel laj conciencia (Proverbios 2:1-5; Proverbios 11:14).

Jiñi i Tʼan Dios miʼ subeñonla chaʼan yom «utsʼat miʼ yajñelob tiʼ wenta yumʌlob yicʼot añoʼ bʌ i yeʼtel ti gobierno» i yom ‹la cujil ti melol pejtelel chuqui wen› yicʼot yom «utsob jach» (Tito 3:1, 2). Cheʼ la cujil iliyi, yom mi laj cʼajtiben lac bʌ chuqui miʼ mejlel ti ujtel cheʼ mi lac mel eʼtel ti tejclum: «¿Mi caj i ñaʼtʌntel chaʼan woli cotsan c bʌ ti política o ti jiñi mach bʌ isujmic ñopbalʌl?» (Miqueas 4:3, 5; 2 Corintios 6:16, 17). «¿Wocol ba mi caj cubin o muʼ ba caj i mʌctañon chaʼan mic mel queʼtel bajcheʼ xñoptʼan?»  (Mateo 28:19, 20; Efesios 6:4; Hebreos 10:24, 25.) «O, ¿muʼ ba caj i ñumen aqʼueñon i yorajlel chaʼan mic mel eʼtel tac i chaʼan bʌ Jehová, bajcheʼ jiñi eʼtel chaʼan precursor?» (Hebreos 6:11, 12.)

Mi juntiquil xñoptʼan mi yʌl tiʼ conciencia chaʼan yomʌch miʼ mel jiñi chaʼan maʼañic miʼ yotsʌntel ti cárcel, jiñi yambʌ hermanojob mach yomic miʼ chaʼleñob tʼan tiʼ tojlel (Romanos 14:10). Cheʼ miʼ yujtel jaʼel mi jiñi hermano mach yomic i mel jiñi eʼtel (1 Corintios 10:29; 2 Corintios 1:24).