Jehová yom chaʼan jiñi ñujpuñemoʼ bʌ miʼ tsʼʌctesañob i tʼan tsaʼ bʌ i yʌcʼʌyob cheʼ tsaʼ ñujpuñiyob. Cheʼ bʌ tsiʼ yʌcʼʌ ti ñujpuñel Adán yicʼot Eva, tsiʼ yʌlʌ: «Jiñi chaʼan wiñicob [...] miʼ chʌn ajñelob yicʼot i yijñam. Jiñi chaʼtiquil miʼ yochelob ti juntiquil jach».  Ti wiʼil, Jesucristo tsiʼ chaʼ alʌ jiñi tʼan: «Jiñi chaʼan mach i chaʼ tʼox wiñic chuqui tsiʼ tempa Dios» (Génesis 2:24; Mateo 19:3-6). Cheʼ bajcheʼ tsaʼ laj cʌñʌ, Jehová yicʼot Jesús miʼ qʼuelob jiñi ñujpuñijel chaʼañʌch tiʼ pejtelel ora, pero mi tsaʼ chʌmi juntiquil mach chʌn chuculix tiʼ piʼʌl (1 Corintios 7:39). Come chʼujul jiñi ñujpuñijel, jin chaʼan yom miʼ wen ñaʼtañob tiʼ chaʼticlel mi yom i jemob. Jehová miʼ tsʼaʼlen jiñi divorcio tac muʼ bʌ i mejlel cheʼ mach loqʼuemic ti Biblia chaʼan miʼ mejlel (Malaquías 2:15, 16).

Cheʼ bajcheʼ mi yʌl jiñi Biblia, ¿chuqui tiʼ caj miʼ mejlel i chaʼlen i bʌ ti divorciar juntiquil? Jehová tsaʼix i yʌlʌ chaʼan miʼ tsʼaʼlen jiñi tsʼiʼlel (Génesis 39:9; 2 Samuel 11:26, 27; Salmo 51:4). Jin chaʼan, miʼ yʌcʼ chaʼan miʼ yujtel jumpʼejl divorcio mi tsaʼ mejli tsʼiʼlel ti jumpʼejl ñujpuñijel. (Yaʼ ti cʌntesʌntel 9 ti párrafo 7, miʼ tsictesʌntel chuqui ochem ti jiñi tsʼiʼlel.) Dios tsiʼ yʌqʼue tiʼ wenta jiñi maʼañic bʌ tsiʼ chaʼle mulil mi yom to chʌn ajñel yicʼot i piʼʌl o miʼ chaʼlen i bʌ ti divorciar (Mateo 19:9). Jin chaʼan, mi tsiʼ ñaʼta i chaʼlen i bʌ ti divorciar, maʼañic woliʼ mel muʼ bʌ i tsʼaʼlen Jehová. Pero mi juntiquilic hermano miʼ mejlel i suben chaʼan yom miʼ chaʼlen i bʌ ti divorciar. Anquese yujil chuqui tsaʼ ujti, tajol jiñi wiñic o xʼixic miʼ cʼotel i ñaʼtan chaʼan yomʌch chʌn ajñel yicʼot i piʼʌl tsaʼ bʌ i chaʼle mulil, pero mi tsaʼix i junyajlel cʌyʌ i mul. Jiñi Biblia mi yʌl chaʼan miʼ mejlel i chaʼlen i bʌ ti divorciar yicʼot yom yujil chuqui miʼ caj ti ujtel tiʼ tojlel ti wiʼil (Gálatas 6:5).

An ñumen wocol tac bʌ baqui jiñi xñoptʼañob miʼ ñaʼtan i cʌyob i bʌ o miʼ chaʼleñob i bʌ ti divorciar, anquese jiñi i piʼʌl maʼañic melbil i chaʼan tsʼiʼlel. * Mi cheʼʌch miʼ yujtel, jiñi Biblia mi yʌl chaʼan «laʼ ajñic tiʼ bajñelil. Mi mach yomic ajñel tiʼ bajñelil, laʼ i mel i bʌ ti utsʼat yicʼot i ñoxiʼal» (1 Corintios 7:11). Jin chaʼan, jiñi xñoptʼan mach librejic chaʼan miʼ qʼuel yambʌ xʼixic o wiñic chaʼan miʼ chaʼ ñujpuñel (Mateo 5:32). Mi caj laj cʌn bajcheʼ jiñi ñujpuñemoʼ bʌ an cʼotem i cʌyob i bʌ.

Maʼañic miʼ yʌqʼuen yom bʌ i familia. An wiñicob maʼañic bʌ miʼ yʌqʼueñob chuqui yom bʌ i chaʼañob i familia, mach chaʼan maʼañic  miʼ mejlelob, chaʼan jach mach yomobic i jin chaʼan an i tajol añob i wocol. ¿Chuqui mi yʌl jiñi Biblia chaʼan jiñi? «Mi an juntiquil mach bʌ añic miʼ cʌntan [...] añoʼ bʌ tiʼ yotot, tsaʼix i cʌyʌ i ñop. Ñumen lecojʌch bajcheʼ juntiquil mach bʌ añic miʼ ñop Dios» (1 Timoteo 5:8). Mi jiñi wiñic mach yomic i qʼuextan i melbal, jiñi i yijñam an tiʼ wenta miʼ qʼuel mi cʼʌñʌl miʼ cʌyob i bʌ tiʼ tojlel am bʌ i yeʼtel chaʼan i wenlel i yalobil yicʼot chaʼan tiʼ tojlel jaʼel. Jin chaʼan, mi tsaʼ sujbi chaʼan juntiquil xñoptʼan cheʼ woliʼ mel, jiñi ancianojob mi caj i qʼuelob miʼ sujmʌch jiñi woli bʌ ti ajlel, come tiʼ caj jiñi tajol miʼ mejlel i chaʼlentel ti expulsar.

Tsʌts bʌ ticʼlʌntel. An muʼ bʌ i jatsʼob i piʼʌl i miʼ yʌcʼob ti wocol i cʼocʼlel o jinto i cuxtʌlel. Mi cheʼ miʼ mel juntiquil xñoptʼan, jiñi ancianojob yom miʼ chajpañob chuqui mi caj i melob come jiñi ora bʌ michʼajel yicʼot cheʼ an i tajol juntiquil miʼ wen ticʼlan i piʼʌl chaʼañʌch miʼ chaʼlentel ti expulsar (Gálatas 5:19-21).

Muʼ bʌ i mejlel i ticʼlañob tiʼ melol i chaʼan bʌ Jehová. An muʼ bʌ i ticʼob i piʼʌl chaʼan maʼañic miʼ melben i yeʼtel Jehová o miʼ chaʼleñob wersa chaʼan jiñi i piʼʌl miʼ ñusan ti pʼis jiñi mandar am bʌ ti Biblia. Jin chaʼan, jiñi xñoptʼan jiñix mi caj i ñaʼtan mi cʼʌñʌl miʼ cʌy i piʼʌl chaʼan miʼ mejlel i ‹jacʼben i mandar Dios anquese miʼ ñusʌntel i mandar wiñicob› (Hechos 5:29).

Yom la cujil chaʼan mi an majqui woliʼ ñusan wocol bajcheʼ tsaʼ bʌ ajli, mach yomic mi lac suben chaʼan yom miʼ cʌy jiñi i piʼʌl o maʼañic. Anquese jiñi ancianojob o yambʌ hermanojob añobix bʌ cabʌl i ñaʼtʌbal miʼ mejlel i coltañob yicʼot miʼ yʌcʼob ticʼojel loqʼuem bʌ ti Biblia, pero yom yujilob chaʼan cojach Jehová yujil baqui bʌ wocol an i chaʼañob jiñi ñujpuñemoʼ bʌ. Mi juntiquil xñoptʼan mi yʌl chaʼan woliʼ ñusan cabʌl wocol tiʼ ñujpuñijel chaʼan jach yom i cʌy i piʼʌl, woliʼ pʌs chaʼan maʼañic miʼ qʼuel ti ñuc jiñi ñujpuñijel mi jiñic to Dios. Pero Jehová yujil mi wen chajpʌbil jach i chaʼan yicʼot i jontolil. Jehová «jamʌl tiʼ wut pejtel chuqui tac an. Wersa mi caj lac mel lac bʌ tiʼ tojlel jiñi muʼ bʌ i luʼ qʼuel» (Hebreos 4:13). Mi juntiquil xñoptʼan miʼ cʌy i piʼʌl chaʼan miʼ cʌlʌx ticʼlʌntel i maʼañix chuqui miʼ mejlel i mel, maʼañic majqui yom mi yʌl chaʼan mach weñic chuqui tsiʼ mele. Pero la cujil chaʼan «ti lac pejtelel mi caj lac waʼtʌl baʼ miʼ melonla Dios» (Romanos 14:10-12).