Jiñi masturbación jiñʌch jumpʼejl vicio muʼ bʌ i ticʼlañonla tiʼ chaʼan bʌ Jehová come miʼ yʌqʼueñonla lac sajcan lac bajñel wenlel yicʼot miʼ bibʼesan lac pensar. * Muʼ bʌ i melob jiñi, cheʼ jax bajcheʼ jumpʼejl ʌlasʌl chaʼan jach bʌ miʼ cʼʌn i tijicñesañob i bʌ mi caj i qʼuelob jiñi yambʌ quixtañujob. Tiʼ sujm, maʼañix miʼ chʌn acʼob ti ñuc jiñi cʼuxbiya yom bʌ ti jumpʼejl piʼleya, miʼ melob chaʼan jach miʼ jumucʼ ubiñob i tijicñʌyel yicʼot chaʼan miʼ ticʼob i bʌcʼtal cheʼ bʌ ñoj yomob piʼleya miʼ yubiñob. Pero jumucʼ jach miʼ yubiñob bajcheʼ jiñi. Jiñi masturbación maʼañic miʼ ticʼ chuqui yom lac bʌcʼtal muʼ bʌ mejlel i pʌyonla ti mel tsʼiʼlel yicʼot chuqui bibiʼ, cojach miʼ yʌcʼ chaʼan ñumen la com piʼleya (Colosenses 3:5).

Jiñi apóstol Pablo tiʼ tsʼijbu: «Cʼuxbibiloʼ bʌ hermanojob, [...] laʼ lac poc loqʼuel pejtelel bibiʼ tac bʌ am bʌ ti lac bʌcʼtal yicʼot lac pusicʼal [o lac pensar]. Laʼ lac bʌcʼñan Dios chaʼan chʼujul mi la cajñel tiʼ tojlel» (2 Corintios 7:1). Chaʼan chaʼtiquil uxtiquil quixtañujob, ili ticʼojel chaʼan sʌclel wen wocol miʼ yubiñob, pero mach yomic miʼ cʌy i chaʼleñob wersa, come Jehová chʌn chajpʌbil chaʼan miʼ ‹ñusʌbeñonla lac mul› yicʼot chaʼan miʼ coltañonla (Salmo 86:5; Lucas 11:9-13). An i tajol miʼ chaʼ yajlelob tiʼ melol jiñi bibiʼ bʌ,  pero miʼ pʌsob chaʼan yomʌch i qʼuextañob i bʌ cheʼ bʌ miʼ chaʼleñob mel pusicʼal yicʼot cheʼ miʼ chaʼleñob wersa i cʌyob jiñi vicio. Mach yomic miʼ ñajʌyel lac chaʼan: «Ñumen ñuc Dios bajcheʼ lac pusicʼal. Yujil pejtelel chuqui an» (1 Juan 3:20). Dios mach cojach miʼ chʌn qʼuel lac mul, miʼ qʼuel jaʼel bajcheʼ yilalonla tiʼ sujmlel. Come wen i cʌñʌ bajcheʼ yilal mi lac ñusan qʼuin, miʼ pʌsbeñonla i pʼuntaya cheʼ bʌ mi laj cʼajtiben. Jin chaʼan, mach yom mi laj cʌy laj cʼajtiben ti oración tiʼ pejtelel lac pusicʼal yicʼot lac pecʼlel, lajal bajcheʼ jiñi chut alob muʼ bʌ i cʼajtiben i coltaya i tat cheʼ bʌ yom i coltʌntel. Jehová miʼ mejlel i sʌqʼuesan laj conciencia (Salmo 51:1-12, 17; Isaías 1:18). Pero mach cojach yom mi lac chaʼlen oración. Yom mi lac mel cheʼ bajcheʼ woli laj cʼajtin: Mi lac chaʼlen wersa laj cʌy tiʼ pejtelel ochem bʌ yaʼ ti pornografía yicʼot jiñi mach bʌ weñic amigojob. *

Mi choncol to lac bej ubin jiñi wocol, mach yomic mi laj quisñin lac suben lac tat lac ñaʼ o juntiquil hermano o hermana wen añix bʌ i ñaʼtʌbal tiʼ chaʼan bʌ Jehová o muʼ bʌ i pʌs chaʼan yom i coltañonla (Proverbios 1:8, 9; 1 Tesalonicenses 5:14; Tito 2:3-5). *