1-3. a) ¿Chucoch miʼ wen qʼuel jiñi ñaʼʌlob mi sʌcʌch i yalobilob? b) ¿Chucoch yom Jehová chaʼan sʌc i wiñicob, i chuqui miʼ ñijcañonla chaʼan sʌc mi la cajñel?

CHEʼ bʌ juntiquil chut alob mi caj i majlel ti xʌmbal, jiñi i ñaʼ miʼ qʼuel mi tsʼʌmeñix yicʼot mi sʌcʌch i pislel. ¿Chucoch? Come yujil chaʼan maʼañic mi caj i cʼamʼan yicʼot chaʼan utsʼat mi caj i colel, cheʼ jaʼel yujil chaʼan jiñʌch mi caj i yʌjlelob cheʼ bajcheʼ yilal miʼ qʼuejlelob i yalobil.

² Jiñi lac Tat am bʌ ti panchan yom sʌcob jaʼel jiñi i wiñicob. Yaʼ ti Biblia miʼ yʌqʼueñonla i tʼan chaʼan sʌc mi caj i pʌs i bʌ tiʼ tojlel «jiñi sʌc bʌ» (Salmo 18:26). * ¿Chucoch miʼ wersa subeñonla  Jehová chaʼan yom sʌconla? Ti ñaxan, come miʼ cʼuxbiñonla yicʼot yujil chaʼan lac wenlelʌch. I chaʼchajplel, come cheʼ bajcheʼ yilal mi laj qʼuejlel jiñʌch mi caj i yʌcʼ ti ñaʼtʌntel jaʼel bajcheʼ yilal Jehová. Joñonla mach la comic la cʌcʼ ti tsʼaʼlentel Dios mi jiñic chʼujul bʌ i cʼabaʼ. La com la cʌcʼ ti ñuc. Jin chaʼan la com sʌc mi lac pʌs lac bʌ yicʼot ti lac melbal (Ezequiel 36:22; pejcan 1 Pedro 2:12).

³ ¿Chuqui miʼ ñijcañonla chaʼan sʌc mi la cajñel? Ñaxam bʌ, come la cujil chaʼan Dios miʼ cʼuxbin wiñicob xʼixicob (quixtañujob) sʌcoʼ bʌ. I chaʼpʼejlel, come mi laj cʼuxbin Jehová yicʼot la com laj cʌcʼ ti ñuc tiʼ pejtelel chuqui mi lac mel. Cojix bʌ, come la com chʌn ajñel tiʼ cʼuxbiya tiʼ pejtelel ora. Jin chaʼan, laʼ lac tsajin chucoch yom sʌconla, chuqui yom yʌl yicʼot bajcheʼ yom chʌn sʌconla. Ili mi caj i coltañonla laj qʼuel mi anto baqui yom mi lac tojʼesan lac bʌ.

4, 5. a) ¿Baqui bʌ jiñi ñuc bʌ i sujmlel chaʼan mach yomic mi lac wis bibʼesan lac bʌ? b) ¿Bajcheʼ miʼ tsictesan jiñi melbil bʌ i chaʼan Jehová chaʼan mucʼʌch i cʼuxbin jiñi sʌclel?

⁴ Jehová cabʌl bajcheʼ miʼ pʌsbeñonla. Junchajp come jiñʌch miʼ yʌqʼueñonla jiñi ejemplo. Jiñi Biblia miʼ subeñonla: «Tsajcanla i melbal Dios» (Efesios 5:1). Cheʼ bajcheʼ tsaʼ laj qʼuele, jiñi ñuc bʌ i sujmlel chaʼan mach yomic mi lac wis bibʼesan lac bʌ, jiñʌch cheʼ mi lac chʼujutesan juntiquil Dios sʌc bʌ, chʼujul bʌ yicʼot mach bʌ wis añic i bibiʼlel (pejcan Levítico 11:44, 45).

⁵ Cheʼ mi laj qʼuel jiñi melbil bʌ i chaʼan Jehová, yaʼ miʼ cʼotel laj cʌmben i sʌclel yicʼot cheʼ bajcheʼ yilal miʼ pʌs i bʌ (Romanos 1:20). Miʼ mejlel la cʌl chaʼan Jehová tsiʼ mele ili Pañimil ti sʌc chaʼan i chumlib wiñicob xʼixicob. Tsiʼ cʌyʌ jiñi muʼ bʌ mejlel i sʌqʼuesan icʼ yicʼot jaʼ cʌmbil bʌ bajcheʼ ciclo ecológico. Ili Pañimil cabʌl chuqui miʼ mejlel i mel chaʼan miʼ bajñel sʌqʼuesan i bʌ. La cujil chaʼan jiñi «tsaʼ bʌ i Mele Pañimil» miʼ wen qʼuel ti ñuc jiñi sʌclel (Jeremías 10:12). ¿Mach ba cheʼic yomonla jaʼel? Cheʼʌchi.

6, 7. ¿Bajcheʼ tiʼ tsictesa jiñi i Mandar Moisés chaʼan yom sʌc miʼ yajñel i wiñicob Jehová?

 ⁶ ¿Baqui bʌ yambʌ i sujmlel cheʼ chʌn sʌc la com ajñel? Come jiñi Cʼax Ñuc bʌ Yumʌl Jehová, tiʼ pejtelel ora an i sube i wiñicob chaʼan yom sʌcob. Jumpʼejl ejemplo, jiñi Mandar tsaʼ bʌ aqʼuenti jiñi israelob miʼ pʌs chaʼan jiñi sʌclel lʌcʼʌl an yicʼot jiñi chʼujutesaya. Jin chaʼan, jiñi ñuc bʌ xmotomaj yom chaʼyajl miʼ ñaxan tsʼʌmel cheʼ mi caj i pul majtañʌl cheʼ miʼ cʼotel i Yorajlel i Ñusʌntel Mulil (Levítico 16:4, 23, 24). Tsiʼ yʌlʌ jaʼel chaʼan tiʼ pejtelel jiñi motomajob yom miʼ pocob i cʼʌb yicʼot i yoc cheʼ miʼ majlel i yʌqʼueñob tsʌnsʌbil bʌ i majtan Jehová (Éxodo 30:17-21; 2 Crónicas 4:6). Yicʼot jaʼel, an cheʼ bʌ 70 baqui mi yʌl chucoch juntiquil yaʼ ti Israel bibiʼ miʼ cʌytʌl cheʼ bajcheʼ yilal miʼ pʌs i bʌ yicʼot tiʼ pejtelel chuqui miʼ mel chaʼan bʌ i chʼujutesaya. Cheʼ bibiʼob, maʼañic miʼ mejlelob ti chʼujutesaya i an tajol miʼ tsʌnsʌntelob (Levítico 15:31). Jiñi Mandar mi yʌl jaʼel chaʼan tiʼ pejtelel muʼ bʌ i chaʼlen mulil cʼʌñʌl miʼ chaʼ sʌqʼuesan i bʌ cheʼ bajcheʼ albil chaʼan miʼ mejlel, yaʼ ochem jaʼel jiñi tsʼʌmel yicʼot chaʼan miʼ wutsʼ i pislel, mi mach cheʼic miʼ mel, yom miʼ «chojquel loqʼuel [o tsʌnsʌntel] ti Israel» (Números 19:17-20).

⁷ Anquese maʼañix chuculonla tiʼ Mandar Moisés, pero miʼ coltañonla lac chʼʌmben isujm bajcheʼ miʼ qʼuel Dios jiñi sʌclel. Ili mandar miʼ pʌs chaʼan Jehová miʼ qʼuel ti ñuc cheʼ yom sʌconla chaʼan mi lac chʼujutesan. Jehová maʼañic qʼuextʌyem (Malaquías 3:6). Cheʼ bajcheʼ wajali, ili ora cojach miʼ chʼʌm jiñi chʼujutesaya «mach bʌ añic i bibiʼlel» (Santiago 1:27). Jin chaʼan mi caj lac tsajin chuqui i sujmlel jiñi sʌclel ili ora.

8. ¿Bajcheʼ yilal bʌ lac sʌclel yom Jehová ti lac tojlel?

⁸ Jiñi Biblia mach cojach mi yʌl chaʼan yom sʌconla ti lac bʌcʼtal. Mi yʌl jaʼel chaʼan mach yomic mi lac wis mel chuqui bibiʼ bʌ chaʼan sʌconla mi la cajñel tiʼ wut Dios. An chʌnchajp baqui yom Jehová chaʼan mi lac pʌs lac sʌclel: Ti lac chʼujutesaya,  ti chuqui mi lac mel, ti lac pensar yicʼot ti bajcheʼ yilalonla. Mi caj laj qʼuel chuqui i sujmlel ti jujunchajp.

9, 10. ¿Chuqui yom yʌl jiñi sʌc bʌ chʼujutesaya, i baqui maʼañic mi la cotsan lac bʌ isujm bʌ xñoptʼañonla?

⁹ Sʌclel ti chʼujutesaya. Yom yʌl chaʼan maʼañic mi lac xʌcʼ jiñi isujm bʌ ñopbalʌl yicʼot jiñi mach bʌ isujmic. Laʼ laj cʼajtesan jiñi israelob tsaʼ bʌ chujquiyob majlel ti Babilonia. Cheʼ bʌ muqʼuix caj i chaʼ majlelob ti Jerusalén, tsaʼ subentiyob chaʼan yom miʼ jacʼob ili mandar: «Loqʼuenla ti Babilonia, [...]. Mach yomic mi laʼ tʌl chuqui tac bibiʼ. Sʌqʼuesan laʼ bʌ» (Isaías 52:11). Tsaʼ subentiyob chaʼan mi caj i sujtelob chaʼan miʼ chaʼ chʼujutesañob Jehová. Jin chaʼan, jiñi cʌntesa tac, chuqui muʼ bʌ i melob yicʼot jiñi costumbre tac am bʌ i chaʼañob yaʼ ti Babilonia mach yomic miʼ melob come yom sʌc jiñi chʼujutesaya muʼ bʌ caj i melob chaʼan maʼañic miʼ yʌcʼob ti pʼajtʌl Dios.

¹⁰ Ili ora jiñi isujm bʌ xñoptʼañonla yom mi laj cʌntan lac bʌ chaʼan maʼañic mi lac mel muʼ bʌ i mel jiñi mach bʌ isujmic ñopbalʌl (pejcan 1 Corintios 10:21). Wen pujquemix jiñi muʼ bʌ i melob, jin chaʼan yom mi laj cʌntan lac bʌ chaʼan maʼañic miʼ yʌcʼonla ti yajlel. Jiñi mach bʌ isujmic ñopbalʌl miʼ yʌlob chaʼan anto chuqui cuxul miʼ cʌytʌl lac chaʼan cheʼ bʌ mi lac chʌmel i cheʼ jaʼel miʼ chaʼleñob cʌntesa mach bʌ isujmic. Muʼ bʌ i ñopob jiñi cʌntesa miʼ chʼʌmob majlel bʌlñʌcʼʌl yaʼ baqui muculob i familia yicʼot miʼ tsʼʌybeñob vela i diosteʼob (Eclesiastés 9:5, 6, 10). Pero jiñi isujm bʌ xñoptʼañonla mach la comic la cotsan lac bʌ tiʼ costumbre tac jiñi mach bʌ isujmic ñopbalʌl. * Jin chaʼan, mach yomic mi lac jacʼ chuqui miʼ subeñoñobla jiñi muʼ bʌ mejlel yʌqʼueñonla lac ñusan ti pʼis jiñi mandar am bʌ ti Biblia chaʼan jiñi sʌc bʌ chʼujutesaya (Hechos 5:29).

11. ¿Chuqui yom yʌl jiñi sʌclel ti chuqui mi lac mel, i chucoch ñuc i cʼʌjñibal?

¹¹ Sʌclel ti chuqui mi lac mel. Junchajp yom bʌ yʌl ili sʌclel jiñʌch chaʼan yom mi lac choc tiʼ pejtelel chuqui ochem ti  tsʼiʼlel chaʼan mi lac chʌn ajñel tiʼ cʼuxbiya Dios (pejcan Efesios 5:5). Cheʼ bajcheʼ mi caj laj qʼuel ti yambʌ cʌntesʌntel, jiñi xñoptʼañob yom miʼ ‹putsʼtañob tsʼiʼlel›. Muʼ bʌ i chaʼleñob jiñi mulil i maʼañic miʼ cʌyob i mul «maʼañic [baqui ora] mi caj i yochelob tiʼ yumʌntel Dios» (1 Corintios 6:9, 10, 18). Jehová miʼ qʼuelob ti «bibiʼoʼ bʌ» i mi maʼañic miʼ sʌqʼuesañob i bʌ, mi caj i yʌqʼueñob jiñi ‹i chaʼyajlel bʌ chʌmel› (Apocalipsis 21:8).

12, 13. ¿Chuqui miʼ mejlel i mel ti lac tojlel jiñi muʼ bʌ lac ñaʼtan, i chuqui mi caj i coltañonla chaʼan sʌc miʼ yajñel lac pensar?

¹² Sʌclel ti lac pensar. Come jiñi muʼ bʌ lac ñaʼtan miʼ pʌyonla chaʼan mi lac mel chuqui la com, mi tsaʼ la cʌcʼʌ ti colel ti lac pensar yicʼot ti lac pusicʼal mach bʌ weñic, mach jalic mi caj lac yajlel ti mulil (Mateo 5:28; 15:18-20). Pero mi tsaʼ lac butʼu lac jol ti chuqui wem bʌ, mi caj lac mulan ajñel ti sʌc (pejcan Filipenses 4:8). Cheʼ jiñi, ¿chuqui mi caj i coltañonla chaʼan sʌc miʼ yajñel lac pensar? Ñaxan, yom mi lac tsʼaʼlen jiñi ñusaqʼuin muʼ bʌ i mejlel i bibʼesan. * I chaʼchajplel, yom mi lac pejcan i Tʼan Dios tiʼ pejtelel ora chaʼan mi lac taj wem bʌ lac ñaʼtʌbal (Salmo 19:8, 9).

¹³ Cheʼ bajcheʼ tsaʼ laj qʼuele, chaʼan mi lac chʌn ajñel tiʼ cʼuxbiya Dios yom sʌc lac chʼujutesaya, chuqui mi lac mel yicʼot lac pensar. Pero ili ora mach tiʼ pejtelelic mi caj la cʌl, cojach chaʼan bʌ jiñi sʌclel ti bajcheʼ yilalonla.

14. ¿Chucoch mach yomic mi la cʌl chaʼan maʼañic majqui yom miʼ yotsan i bʌ chaʼan lac sʌclel? Tsictesan.

¹⁴ Ñuc i cʼʌjñibal cheʼ sʌc lac bʌcʼtal yicʼot baqui chumulonla. An muʼ bʌ i yʌlob chaʼan maʼañic majqui yom miʼ yotsan i bʌ chaʼan iliyi. Pero jiñi xñoptʼan mach cheʼic yom mi yʌl. Cheʼ bajcheʼ tsaʼ lac ñaxan qʼuele, Jehová mach cojach miʼ cʼajtin lac sʌclel ti bajcheʼ yilalonla chaʼan lac bajñel wenlel, come cheʼ bajcheʼ yilalonla mi caj i ñaʼtañob bajcheʼ yilal Jehová jaʼel. Yom  mi lac chaʼ cʼajtesan jiñi chut alob tsaʼ bʌ ajli ti ñaxam bʌ párrafo: Cheʼ bibiʼic mi laj qʼuel tiʼ pejtelel ora o mach weñic miʼ xoj i pislel, ¿mach ba yʌñʌl chuqui mi caj lac ñaʼtan tiʼ tojlelob i tat? Cheʼ lajal ti lac tojlel jaʼel, mi an chuqui mach bʌ weñic ti lac tojlel o ti laj cuxtʌlel, ¿maʼañic ba mi caj la cʌcʼ ti alol jiñi lac Tat am bʌ ti panchan yicʼot jiñi wen tʼan muʼ bʌ lac sub? Mach yomic miʼ ñajʌyel lac chaʼan ili tʼan: «Mic mel lojon chuqui toj ame añic majch mi cʌcʼ lojon ti yajlel, ame wajlentic queʼtel lojon. Tiʼ pejtelel queʼtel lojon tsiquil xʼeʼtelon lojon i chaʼan Dios, cheʼ mic chaʼlen lojon pijt tiʼ xucʼtʌlel c pusicʼal lojon» (2 Corintios 6:3, 4). Laʼ lac tsajin baqui tac yom mi lac chʌn pʌs ili sʌclel.

15, 16. ¿Chuqui jiñi yom bʌ melol chaʼan sʌc mi la cajñel yicʼot bajcheʼ yilal yom lac pislel?

¹⁵ Sʌclel ti lac bʌcʼtal yicʼot ti bajcheʼ yilalonla. Anquese mach lajal laj cultura yicʼot yʌñʌl tac jiñi tejclum baqui chumulonla,  yom mi lac tsʼʌmel tiʼ pejtelel ora. Ti lac pejtelel an jaʼ ti la cotot yicʼot xapom (xapun) chaʼan wen mi lac tsʼʌmel yicʼot mi lac tsʼʌnsan la calobilob. Cheʼ jaʼel, yom mi lac poc laj cʼʌb cheʼ mi caj lac chaʼlen uchʼel o cheʼ mi caj lac tʌl uchʼibʌl yicʼot cheʼ tsajñiyonla ti baño o cheʼ mi laj qʼuextan alʌl. Mi cheʼʌch mi lac mel mi caj i coltañonla chaʼan maʼañic mi laj cʼamʼan yicʼot chaʼan maʼañic mi lac chʌmel. Mi mach cheʼiqui, miʼ mejlel i tajonla cʼamʌjel bajcheʼ jaʼtaʼ. Jin chaʼan, cʼʌñʌlʌch mi lac wen poc laj cʼʌb. Mi maʼañic drenaje yaʼ baqui chumulonla, yom mi lac pic lum baqui mi laj cajel ti wutstʌl i miʼ chaʼ mujlʌntel, lajal bajcheʼ tsiʼ mele jiñi israelob ti wajali (Deuteronomio 23:12, 13).

¹⁶ Cheʼ jaʼel yom mi lac wutsʼ lac pislel tiʼ pejtelel ora. Mach cʼʌñʌlic wen lets i tojol lac pislel o mi woli (choncol) jaxto bʌ i loqʼuel ti chojñel, i cʼʌjñibal bʌ jin cheʼ sʌc yicʼot wen jax ti qʼuelol (pejcan 1 Timoteo 2:9, 10). La com chaʼan tiʼ pejtelel ora yicʼot baqui jach añonla mi laj qʼuejlel ti sʌc yicʼot ti wen «chaʼan utsʼat miʼ yubiñob i cʌntesa Dios» (Tito 2:10).

17. ¿Chucoch yom sʌc la cotot yicʼot chuqui tac an lac chaʼan?

¹⁷ Lac chumlib yicʼot yambʌ chuqui tac an lac chaʼan. Jiñʌch baqui jaxʌl miʼ mejlel lac mel yom mi lac chaʼlen wersa chaʼan chʌn sʌc la cotot, mach cʼʌñʌlic mi wen i tʼojol jax yicʼot cabʌl chuqui an lac chaʼan o mi mach cheʼiqui. Cheʼ yom mi lac mel jaʼel ti laj carro, yom mi lac sʌqʼuesan i malil, ñumento cheʼ mi laj cʼʌn majlel ti tempa bʌ o ti subtʼan. Yom sʌc tiʼ pejtelel chuqui an lac chaʼan. Cheʼ bajcheʼ iliyi mi caj lac pʌs chaʼan sʌconla. Mi caj la cʌqʼuen i cʌn jaʼel jiñi wiñicob xʼixicob chaʼan Jehová mi caj i jisan «jiñi muʼ bʌ i jisañob Pañimil» yicʼot chaʼan mi caj i cʼʌn i Yumʌntel chaʼan miʼ sujtesan ti paraíso ili Pañimil come miʼ cʼuxbin jiñi sʌclel (Apocalipsis 11:18; Lucas 23:43). Jin chaʼan, cheʼ mi lac sʌqʼuesan la cotot yicʼot chuqui an lac chaʼan, mi lac pʌs chaʼan choncolʌch laj cʌn bajcheʼ mi caj lac mel cheʼ bʌ yaʼix chumulonla ti tsijiʼ bʌ pañimil.

18. ¿Bajcheʼ mi lac pʌs chaʼan mucʼʌch laj qʼuel ti ñuc jiñi i Yotlel Tempa bʌ?

¹⁸ Jiñi i Yotlel Tempa bʌ. Yom mi laj qʼuel ti ñuc jiñi, come jiñʌch baqui mi lac chʼujutesan jiñi cʼuxbibil bʌ lac Dios.  La com chaʼan sʌc tiʼ pejtelel ora i miʼ qʼuelob ti wen jiñi muʼ bʌ i cʼotelob yaʼi. Cʼʌñʌl an wem bʌ programa chaʼan miʼ sʌqʼuesʌntel yicʼot chaʼan miʼ qʼuejlel mi an chuqui yom miʼ tojʼesʌntel. Cheʼ mi lac chaʼlen coltaya tiʼ melol iliyi, mi lac pʌs chaʼan mucʼʌch laj qʼuel ti ñuc yaʼ baqui mi lac chaʼlen sʌc bʌ chʼujutesaya. Jumpʼejlʌch ñuc bʌ eʼtel cheʼ miʼ sʌqʼuesʌntel yicʼot cheʼ «miʼ chaʼ wen melob ti utsʼat» jiñi i Yotlel lac tempa bʌ (2 Crónicas 34:10). Jin chaʼan, ili principio tac mucʼʌch i mejlel ti cʼʌjñel jaʼel chaʼan baqui miʼ mejlel colem tempa bʌ tac.

19. ¿Chuqui mach bʌ yomic mi lac mel chaʼan maʼañic mi lac bibʼesan lac bʌ, i chuqui miʼ subeñonla jiñi Biblia chaʼan tac iliyi?

¹⁹ ¿Chuqui yambʌ ochem ti jiñi sʌclel ti bajcheʼ yilalonla? Chaʼan mach yomic mi lac mel muʼ bʌ i bibʼesan lac bʌcʼtal. Jin chaʼan, maʼañic mi lac ñucʼ cʼujts, mi laj cʌlʌx jap lembal, o mi lac jap tsʼac mach bʌ subebiloñicla ti doctor muʼ bʌ i mejlel i ticʼlañonla. Isujm, jiñi Biblia maʼañic miʼ tsictesan ti jujumpʼejl chuqui miʼ mulan jiñi wiñicob xʼixicob ila ti pañimil (mulawil), pero añʌch principio muʼ bʌ i coltañonla lac chʼʌmben isujm chaʼan Jehová miʼ tsʼaʼlen. Mi caj laj qʼuel joʼchajp principio com bʌ lac jacʼ come mi laj cʼuxbin Dios i mi caj i coltañonla chaʼan mi laj qʼuejlel ti wen tiʼ tojlel Dios.

20, 21. ¿Chuqui mach bʌ yomic mi lac mel Jehová, i chucoch mi yʌl chaʼan cheʼ yom mi lac mel bajcheʼ jiñi?

²⁰ «Lac chaʼañʌch jiñi albil bʌ i tʼan Dios. Jiñi chaʼan laʼ lac poc loqʼuel pejtelel bibiʼ tac bʌ am bʌ ti lac bʌcʼtal yicʼot lac pusicʼal [o pensar]. Laʼ lac bʌcʼñan Dios chaʼan chʼujul mi la cajñel tiʼ tojlel.» (2 Corintios 7:1.) Cheʼ bajcheʼ mi laj qʼuel, Jehová yom chaʼan mi laj cʌy tiʼ pejtelel muʼ bʌ i bibʼesan lac bʌcʼtal yicʼot lac pensar (yom yʌl, chuqui muʼ bʌ lac ñaʼtan). Jin chaʼan, mach yomic mi la cotsan ti lac bʌcʼtal muʼ bʌ i mejlel i cʼamʼesañonla o miʼ ticʼlan lac pensar.

²¹ Yaʼ ti Biblia miʼ subeñonla chaʼan yom mi «lac poc loqʼuel pejtelel bibiʼ tac bʌ» am bʌ lac chaʼan. Laʼ laj qʼuel yaʼ ti  2 Corintios 7:1 muʼ bʌ i tech i yʌl: «Lac chaʼañʌch jiñi albil bʌ i tʼan Dios». ¿Baqui bʌ jiñi albil bʌ tʼan? Jiñʌch tsaʼ bʌ i yʌlʌ Jehová ti yambʌ versículo tac: «Mi caj c pʌyetla tilel baʼ añon. Mi caj cochel ti laʼ Tat» (2 Corintios 6:17, 18). ¡Miʼ wen aqʼueñonla lac tijicñʌyel! Miʼ yʌcʼ i tʼan chaʼan mi caj i cʌntañonla yicʼot cʼuxbiya cheʼ bajcheʼ miʼ mel juntiquil tatʌl tiʼ tojlel i yalobil. Pero miʼ subeñonla chaʼan mach yomic mi lac mel muʼ bʌ i bibʼesan lac bʌcʼtal yicʼot lac pensar. Mach weñic cheʼ tiʼ cajach an chuqui mi lac mulan tsʼaʼlebil bʌ i chaʼan Jehová mi lac ñajtʼesan lac bʌ tiʼ tojlel.

22-25. ¿Baqui bʌ principio am bʌ ti Biblia mi caj i coltañonla chaʼan maʼañic mi lac yajlel ti jiñi tsʼaʼlebil bʌ i chaʼan Jehová?

²² «Cʼuxbin a Yum Dios ti pejtelel a pusicʼal, ti pejtelel a [«cuxtʌlel», TNM], ti pejtelel a ñaʼtʌbal.» (Mateo 22:37.) Jesús tiʼ tsictesa chaʼan iliyi jiñʌch jiñi ñumen ñuc bʌ mandar (Mateo 22:38). Yom mi laj cʼuxbin Jehová tiʼ pejtelel bajcheʼ yilalonla, tiʼ pejtelel lac pensar yicʼot lac pusicʼal. Jin chaʼan, mach yomic mi lac mel muʼ bʌ i mejlel i comʼesan laj cuxtʌlel o muʼ bʌ i mejlel i cʼunʼesan jiñi lac pensar aqʼuebilonbʌla ti Jehová.

²³ «[Jehová] miʼ yʌqʼueñonla laj cuxtʌlel yicʼot la quiqʼuilel yicʼot pejtelel lac chubʌʼan.» (Hechos 17:24, 25.) Come jiñi laj cuxtʌlel jiñʌch jumpʼejl majtañʌl tsaʼ bʌ i yʌqʼueyonla jiñi cʼuxbibil bʌ Dios, jiñi chaʼan mi lac wen qʼuel ti ñuc. Cheʼ jaʼel, mi lac tsʼaʼlen jiñi muʼ bʌ i mejlel i cʼamʼesañonla. Mi mach cheʼic mi lac mel, mi lac pʌs chaʼan maʼañic woli (yʌquel) laj qʼuel ti ñuc laj cuxtʌlel (Salmo 36:9).

²⁴ «Cʼuxbin a piʼʌlob cheʼ bajcheʼ maʼ cʼuxbin a bʌ ti a bajñelil.» (Mateo 22:39.) An i tajol, jiñi añoʼ bʌ i vicio mach i bajñel jach miʼ ticʼlañob i bʌ, miʼ ticʼlañob jaʼel jiñi yañoʼ bʌ. Cheʼ miʼ yujtel cheʼ bʌ an majqui miʼ ñucʼ cʼujts i jiñi i butsʼil miʼ pam pujquel tiʼ tojlel yañoʼ bʌ. Cheʼ bʌ miʼ mel bajcheʼ jiñi, miʼ ñusan ti pʼis jiñi i mandar Dios baqui mi yʌl chaʼan yom mi laj cʼuxbin jiñi quixtañujob, i woliʼ pʌs chaʼan maʼañic miʼ cʼuxbin Dios (1 Juan 4:20, 21).

²⁵ «Utsʼat miʼ yajñelob tiʼ wenta yumʌlob yicʼot añoʼ bʌ i yeʼtel  ti gobierno.» (Tito 3:1.) An cabʌl tejclum baqui mach yomic miʼ cʼʌjñel droga, i joñonla maʼañic mi laj cʼʌn (Romanos 13:1).

26. a) ¿Chuqui yom mi lac mel chaʼan mi lac chʌn ajñel tiʼ cʼuxbiya Dios? b) ¿Chucoch maʼañic yambʌ muʼ bʌ i mejlel i yʌqʼueñonla lac tijicñʌyel cheʼ bajcheʼ lac sʌclel tiʼ wut Dios?

²⁶ Chaʼan mi lac chʌn ajñel tiʼ cʼuxbiya Dios, mach jasʌlic yom sʌconla ti junchajp, cʼʌñʌl sʌconla tiʼ pejtelel laj cuxtʌlel. Isujm chaʼan wocol miʼ mejlel laj cʌy jumpʼejl vicio yicʼot chaʼan maʼañix mi lac chʌn yajlel, pero mucʼʌch i mejlel lac mel. * Ñumen wem bʌ jiñʌch cheʼ sʌconla tiʼ pejtelel laj cuxtʌlel. Come la cujil cheʼ miʼ cʼajtibeñonla Jehová bajcheʼ jiñi, chaʼañʌch lac wenlel (pejcan Isaías 48:17). Cheʼ jaʼel, miʼ yʌqʼueñonla lac tijicñʌyel cheʼ mi lac ñaʼtan chaʼan woli la cʌcʼ ti cʌjñel chuqui wen tiʼ tojlel Dios, muʼ bʌ lac wen cʼuxbin i muʼ bʌ i wen cʼuxbiñonla.