1, 2. ¿Chuqui wen ñuc bʌ i cʼʌjñibal tsiʼ yʌqʼueyonla Dios, i chucoch?

JIÑI lac Tat am bʌ ti panchan tsiʼ yʌqʼueyonla jumpʼejl ñuc bʌ lac majtan: Jiñi laj cuxtʌlel yicʼot lac ñaʼtʌbal chaʼan mi lac lajiben i melbal (Génesis 1:27). Ili miʼ coltañonla lac chʼʌmben isujm jiñi principio tac am bʌ ti Biblia yicʼot mi lac ñaʼtan bajcheʼ yom mi laj cʼʌn. Mi cheʼʌch mi lac mel, mi caj laj colel majlel tiʼ chaʼan bʌ Dios. Mi caj laj cʼuxbin Jehová cheʼ bajcheʼ juntiquil tsaʼix bʌ i taja i colel «cheʼ cʌñʌlix lac chaʼan chuqui wen yicʼot chuqui mach weñic» (Hebreos 5:14).

² Ili ora yom la cujil bajcheʼ yom mi laj cʼʌn jiñi principio tac am bʌ ti Biblia. Tiʼ sujm, maʼañic jumpʼejl mandar muʼ bʌ mejlel i tsictesan tiʼ pejtelel chuqui miʼ yujtel. Laʼ lac ñaʼtan chaʼan jiñi tsʼac tac, chaʼan ñumen tsiquil mi la cʌl, tiʼ pejtelel muʼ bʌ i cʼʌjñel baqui mux i yochel jiñi chʼichʼ. Ili wen ñuc i cʼʌjñibal mi laj com lac jacʼben i mandar Jehová. ¿Bajcheʼ miʼ mejlel lac ñaʼtan chuqui yom bʌ mi lac mel chaʼan tijicña miʼ cʌy laj conciencia yicʼot miʼ coltañonla ti chʌn ajñel tiʼ cʼuxbiya Dios? Jiñʌch cheʼ mi lac wen chʼʌmben isujm jiñi principio tac am bʌ ti Biblia (Proverbios 2:6-11). Laʼ laj qʼuel chaʼpʼej uxpʼejl.

3, 4. ¿Baqui ora miʼ ñaxan al jiñi Tsʼijbujel chaʼan chʼujul jiñi chʼichʼ, i baqui bʌ principio chucul?

³ Jehová mi yʌl chaʼan jiñi cuxtʌlel yicʼot jiñi chʼichʼ lajal mucʼob ti eʼtel, i chʼujul tiʼ chaʼpʼejlel. Ili tsaʼ ñaxan ajli cheʼ bʌ Caín tiʼ tsʌnsa Abel. Dios tsiʼ sube: «I chʼichʼel a wijtsʼin tsaʼ  bʌ a tsʌnsa woliʼ cʼajtibeñon yubil chaʼan mij qʼuextʌbeñet a mul» (Génesis 4:10). Tiʼ wut Jehová, jiñi i chʼichʼel Abel jiñʌch i cuxtʌlel yubil (Hebreos 12:24).

⁴ Cheʼ bʌ tsaʼix ñumi jiñi ñuc bʌ Butʼjaʼ, Dios tsiʼ yʌlʌ chaʼan miʼ mejlel ti cʼuxtʌl i bʌcʼtal jiñi añimal tac, pero tsaʼ subentiyob: «Mach laʼ cʼux yicʼot i chʼichʼel come ticʼbil. Jiñʌch i cuxtʌlel. Mi caj j qʼuextʌben i [mul] jiñi muʼ bʌ i chaʼlen tsʌnsa» (Génesis 9:4, 5). Cʼʌlʌl ili ora, bajcheʼ i pʼolbalonbʌla Noé, yom mi lac tsʼʌctesan jiñi mandar, muʼ bʌ i yʌqʼueñonla lac ñaʼtan tsaʼ bʌ i yʌlʌ Dios cheʼ bʌ tsiʼ pejca Caín. Ñaxan mi yʌl jiñi principio chaʼan tiʼ pejtelel chuqui cuxul bʌ wʌʼ ti Pañimil jiñi i chʼichʼel jiñʌch jiñi símbolo chaʼan bʌ i cuxtʌlel. Cheʼ jaʼel, mi yʌl chaʼan Jehová, muʼ bʌ i Yʌcʼ cuxtʌlel, mi caj i yʌqʼuen i toj i mul jiñi maʼañic bʌ miʼ qʼuel ti ñuc jiñi chʼichʼ yicʼot jiñi cuxtʌlel (Salmo 36:9).

5, 6. ¿Bajcheʼ tsiʼ yʌlʌ jiñi i Mandar Moisés chaʼan jiñi chʼichʼ chʼujulʌch yicʼot wen ñuc i cʼʌjñibal? (Qʼuele jiñi recuadro « Laʼ laj qʼuel ti ñuc i cuxtʌlel añimal tac.»)

⁵ Ili chaʼpʼejl i sujmlel, tsaʼ tsʼijbunti cʌlel jaʼel yaʼ tiʼ Mandar Moisés. Ti Levítico 17:10, 11, Jehová tsiʼ yʌlʌ: «Mi an majqui miʼ cʼux jiñi chʼichʼ, [...] mi caj c choc loqʼuel [o jisan] ti tejclum. Come [...] i cuxtʌlel jiñi alʌcʼʌl an tiʼ chʼichʼel. Tsaʼix cʌqʼueyet chaʼan maʼ tsijcan yaʼ ti pulʌntib chaʼan i ñusʌntel laʼ mul tiʼ qʼuexol i cuxtʌlel». (Qʼuele jiñi recuadro « Jiñi chʼichʼ miʼ toj jiñi mulil».)

⁶ Mi maʼañic miʼ cʼʌjñel jiñi chʼichʼ yaʼ ti pulʌntib, yom miʼ bejqʼuel ti lum. Lajal bajcheʼ woli (choncol) i chaʼ sutqʼuibentel i Yum jiñi cuxtʌlel (Deuteronomio 12:16; Ezequiel 18:4). Yom mi laj cʼajtesan chaʼan jiñi israelob mach yomic miʼ ñaʼtañob chaʼan maʼañix yom miʼ tsʼitaʼ cʌytʌl i chʼichʼel jiñi añimal tac. Mi mucʼʌch i tsepbeñob i bicʼ yicʼot miʼ wen locʼsʌbeñob i chʼichʼel, tijicña miʼ yajñelob i conciencia cheʼ miʼ cʼuxob, come cheʼʌch miʼ pʌsob chaʼan woliʼ qʼuelob ti ñuc jiñi tsaʼ bʌ i Yʌcʼʌ cuxtʌlel.

7. ¿Bajcheʼ tsiʼ pʌsʌ David chaʼan chʼujulʌch tsiʼ qʼuele jiñi chʼichʼ?

⁷ Juntiquil tsaʼ bʌ i wen chʼʌmbe isujm baqui bʌ principio chucul jiñi mandar chaʼan chʼichʼ, jiñʌch David, tsaʼ bʌ ‹qʼuejli  ti utsʼat ti Dios› (Hechos 13:22). Ti jumpʼejl bʌ qʼuin tsiʼ yʌlʌ chaʼan wen tiquin i tiʼ. Cheʼ bʌ tsiʼ yubi uxtiquil i wiñicob, tsaʼ wersa ochiyob yaʼ baqui an i contrajob, tsiʼ locʼsayob jaʼ ti jiñi pozo i tsiʼ chʼʌmbeyob majlel David. ¿Chuqui tsiʼ mele David? Tsiʼ yʌlʌ: «¿Muʼ ba mejlel c japbeñob i chʼichʼel jiñi wiñicob tsajñiyoʼ bʌ baʼ bʌbʌqʼuen miʼ chʌmelob?». Tiʼ wut David, jiñi jaʼ lajal bajcheʼ i chʼichʼel o i cuxtʌlel jiñi i wiñicob. Jin chaʼan,  anquese wen tiquin i tiʼ, «tsiʼ beqʼue cheʼ bajcheʼ i wentajlel i majtan lac Yum» (2 Samuel 23:15-17).

8, 9. ¿Tsaʼ ba qʼuextʌyi jiñi ñaʼtʌbil bʌ i chaʼan Dios chaʼan jiñi cuxtʌlel yicʼot jiñi chʼichʼ cheʼ bʌ tsaʼ tejchi jiñi congregación ti ñaxam bʌ siglo? Tsictesan.

⁸ Cheʼ ñumeñix cabʌl siglo, tsiʼ tempayob i bʌ jiñi Junmojt muʼ bʌ i pʌsob bij, añoʼ bʌ tiʼ wenta congregación. Añix ñumen 2,400 jabil cheʼ bʌ Noé tsaʼ aqʼuenti jiñi mandar chaʼan chʼichʼ, i ñumeñix 1,500 jab cʼʌlʌl cheʼ bʌ tsaʼ mejli jiñi trato chaʼan jiñi Mandar. Ti jiñi tempa bʌ, Jehová tsiʼ yʌqʼue i yespíritu jiñi Junmojt muʼ bʌ i pʌsob bij chaʼan miʼ tsʼijbuñob: «Come joñon lojon quicʼot jiñi Chʼujul bʌ Espíritu tsac ñaʼta lojon mach yomic mi cʌqʼueñetla laʼ cuch chuqui tac wocol tiʼ jacʼol. Cojach jiñi yom: Cʌyʌ laʼ cʼux jiñi tsʌnsʌbil bʌ i majtan diosteʼ yicʼot i chʼichʼel yicʼot jiñi milbil [o yʌtsʼbil] bʌ. Mach mi laʼ chaʼlen tsʼiʼlel. Mi utsʼat mi laʼ cʌntan laʼ bʌ chaʼan pejtelel jiñi, utsʼat mi laʼ mel. Ajñenla ti laʼ wenlel» (Hechos 15:28, 29).

⁹ Jiñi Junmojt muʼ bʌ i pʌsob bij ti ñaxam bʌ siglo tsiʼ chʼʌmbeyob isujm chaʼan chʼujulʌch jiñi chʼichʼ, i mi mach weñic miʼ cʼʌjñel, jiñʌch tsʌts bʌ mulil lajal bʌ bajcheʼ i chʼujutesʌntel diosteʼ tac o i melol tsʼiʼlel. Ili ora mi lac chʌn jacʼ jiñi mandar. Cheʼ bʌ mi lac taj wocol chaʼan jiñi chʼichʼ, yom mi lac tsajin jiñi principio tac am bʌ ti Biblia chaʼan weñʌch miʼ qʼuel Dios chuqui mi lac ñaʼtan.

10, 11. a) Joñonla i testigojonbʌla Jehová, ¿muʼ ba lac jacʼ chaʼan mi laj cotsʌbentel chʼichʼ o jiñi chʌnchajp am bʌ i chaʼan? b) ¿Chuqui jiñi am bʌ ti lac wenta ti jujuntiquil chaʼan mi lac yajcan mi mucʼʌch o maʼañic mi caj lac chʼʌm?

¹⁰ Jiñi i testigojob Jehová maʼañic miʼ yʌcʼob chʼichʼ, maʼañic miʼ yotsʌbentelob tiʼ bʌcʼtal yicʼot maʼañic miʼ locʼsʌbentelob chaʼan ti wiʼil miʼ chaʼ otsʌbentelob, come miʼ chʼʌmob ti ñuc jiñi mandar ‹cʌyʌ laʼ cʼux chʼichʼ›. Yicʼot jaʼel, maʼañic mi lac chʼʌm mi jumpʼejlic jiñi chʌnchajp am bʌ i chaʼan jiñi chʼichʼ: Glóbulos rojos, glóbulos blancos, plaqueta yicʼot plasma.

 ¹¹ Ili ora, jiñi chʌnchajp am bʌ i chaʼan jiñi chʼichʼ, miʼ tʼoxtʌl ti tsʼitaʼ tac chaʼan miʼ cʼʌjñel. ¿Yom ba mi laj qʼuel bajcheʼ ‹chʼichʼ›? ¿Mejl ba lac chʼʌm? An ti lac wenta ti jujuntiquil. Cheʼ miʼ yujtel jaʼel ti jiñi hemodiálisis, jiñi hemodilución yicʼot jiñi recuperación de sangre, pero mi cojach mi lac chʼichʼelʌch i mach bʌ wʌn lotbilic (qʼuele jiñi apéndice «Tsʼitaʼ loqʼuem bʌ ti chʼichʼ yicʼot muʼ bʌ i cʼʌñob doctor.»)

12. Mi yaʼ ochem laj conciencia, ¿chuqui yom mi lac mel chaʼan weñʌch muʼ bʌ i cʼotel lac ñaʼtan i chuqui jiñi mach bʌ yomic mi lac mel?

¹² ¿Muʼ ba i qʼuel ti ñuc Jehová muʼ bʌ lac bajñel ñaʼtan lac mel? Mucʼʌch, miʼ wen qʼuel ti ñuc chuqui mi lac ñaʼtan yicʼot chucoch cheʼ mi lac ñaʼtan bajcheʼ jiñi (pejcan Proverbios 17:3; 24:12). Cheʼ jiñi, ¿chuqui yom mi lac mel cheʼ woli (yʌquel) lac subentel lac chʼʌm jumpʼejl tsʼac o cheʼ an chuqui mi caj lac melbentel baqui mi caj i cʼʌjñel chʼichʼ? Ñaxan yom mi laj cʼajtiben Dios ti oración yicʼot mi lac sajcan bajcheʼ an  i sujmlel, cheʼ jiñi mi lac jacʼ chuqui miʼ subeñonla laj conciencia (Romanos 14:2, 22, 23). Mach yomic miʼ subeñonla yañoʼ bʌ chuqui miʼ yʌlob i conciencia, i mach yomic mi laj cʼajtibeñob: «¿Chuqui maʼ mel jatetic?». Cheʼ tac bʌ jiñi, «an ti lac wenta lac melbal ti jujuntiquilonla» (Gálatas 6:5; Romanos 14:12; qʼuele jiñi recuadro « ¿Chʼujul ba mij qʼuel jiñi chʼichʼ?»). *

13. ¿Chuqui miʼ yʌcʼ ti cʌñol jiñi mandar yicʼot jiñi principio tac am bʌ ti Biblia chaʼan Jehová? Acʼʌ jumpʼejl ejemplo.

¹³ Jiñi mandar yicʼot jiñi principio tac am bʌ ti Biblia miʼ pʌs chaʼan Jehová jiñʌch xʼAcʼ mandar am bʌ i ñaʼtʌbal i juntiquilʌch Tatʌl wen uts bʌ muʼ bʌ i qʼuel i wenlel i yalobilob (Salmo 19:7-11). Anquese mach jiñic doctor muʼ bʌ yʌcʼob jiñi mandar ‹chaʼan miʼ cʌyob i cʼux chʼichʼ› jiñi xñoptʼañob, pero miʼ coltañonla chaʼan maʼañic mi lac tajtʌl ti cʼamʌjel tilem bʌ ti jiñi chʼichʼ (Hechos 15:20). Cheʼ jaʼel, cabʌl doctor miʼ yʌlob chaʼan jiñi pʼoʼoñel baqui maʼañic miʼ cʼʌjñel chʼichʼ jiñʌch ñumen wem bʌ ili ora. Jiñi isujm bʌ xñoptʼañonla miʼ cʼotel laj cʌn chaʼan Jehová jiñʌch lac Tat wen yujil bʌ cʼuxbiya yicʼot am bʌ i ñaʼtʌbal (pejcan Isaías 55:9; Juan 14:21, 23).

14, 15. a) ¿Baqui tac bʌ jiñi mandar tsiʼ pʌsʌ chaʼan Dios miʼ cʼuxbin i tejclum? b) ¿Bajcheʼ miʼ mejlel laj cʼʌn jiñi principio tac baqui miʼ yʌjlel chaʼan bajcheʼ yom mi laj cʌntan lac bʌ?

¹⁴ Dios qʼuelbil i chaʼan i tejclum tiʼ pejtelel ora chaʼan wen miʼ yajñel. Cheʼʌch miʼ pʌs tiʼ mandar tac tsaʼ bʌ i yʌqʼue israelob. Tsiʼ subeyob chaʼan yom miʼ ñupʼob i joytʌlel jiñi i pam i yototob am bʌ ti chan. Come miʼ wen cʼʌñob jiñi, cheʼ joy ñupʼul maʼañic majqui miʼ mejlel ti yajlel (Deuteronomio 22:8; 1 Samuel 9:25, 26; Nehemías 8:16; Hechos 10:9). Yicʼot tsaʼ subentiyob chaʼan yom wen mʌcʌl i chaʼañob jiñi jontol tac bʌ tat wacax (Éxodo 21:28, 29). Mi maʼañic tsiʼ jacʼʌyob jiñi  mandar miʼ yajlelob ti tsʌts bʌ mulil yicʼot miʼ cʼotelob tiʼ wenta mi an majqui miʼ chʌmel.

¹⁵ ¿Bajcheʼ mi laj cʼʌn jiñi principio tac baqui miʼ yʌjlel ili mandar tac? Jin mi woliyʌch laj qʼuel mi weñʌch an jiñi laj carro, bajcheʼ yom miʼ ñijcʌntel, bajcheʼ yilal jiñi otot, bajcheʼ yilal baqui woliyonla ti eʼtel, bajcheʼ woli laj cʌntan jiñi añimal tac am bʌ ti laj cotot yicʼot bajcheʼ yilal bʌ ñusaqʼuin yom mi lac yajcan. An país tac baqui cabʌl xcolelob an chʌmeñob tiʼ caj mach tsajalic miʼ ñijcañob carro yicʼot tiʼ caj tontotic chuqui miʼ melob. Jin chaʼan, jiñi xcolel yom bʌ chʌn ajñel tiʼ cʼuxbiya Dios yicʼot miʼ qʼuel ti ñuc i cuxtʌlel maʼañic miʼ mel ñusaqʼuin muʼ bʌ i mejlel i yʌcʼ i sʌt i cuxtʌlel. Maʼañic mi yʌl chaʼan maʼañic chuqui miʼ mejlel i chaʼlen. Come miʼ wen cʌntan i bʌ, jin chaʼan miʼ taj i tijicñʌyel (Eclesiastés 11:9, 10).

16. ¿Baqui bʌ principio miʼ taj ti tʼan chaʼan jiñi muʼ bʌ i yʌlo chocob i yal cʌntʌbilto bʌ i chaʼañob? (Qʼuele jiñi nota.)

¹⁶ Dios miʼ qʼuel ti ñuc i cuxtʌlel jiñi quixtañu yicʼot jiñi alʌl anto bʌ tiʼ mal i ñʌcʼ i ñaʼ. Yaʼ tiʼ Mandar Moisés, tsiʼ yʌlʌ chuqui yom miʼ mejlel mi an majqui miʼ low juntiquil xʼixic cʌntʌbil bʌ i chaʼan i yalobil. Tsiʼ yʌlʌ: «Mi an wiñicob woliyoʼ bʌ ti jatsʼ i miʼ tajob i jatsʼ juntiquil xʼixic cʌntʌbil bʌ i chaʼan i yalobil, mi tsiʼ choco i yal, pero maʼañic miʼ chʌmel jiñi alʌl o jiñi xʼixic, jiñi tsaʼ bʌ i chaʼle jatsʼ, yom miʼ ñumel i toj i mul ti juez cheʼ bajcheʼ cʼamel miʼ cʼajtin i ñoxiʼal jiñi xʼixic. Pero mi jiñi alʌl o jiñi xʼixic miʼ chʌmel, wersa yom miʼ yʌcʼ i cuxtʌlel jiñi tsaʼ bʌ i chaʼle jatsʼ» (Éxodo 21:22, 23, TNM). * Tiʼ ili ora mi laj qʼuel cabʌl mil xʼixicob muʼ bʌ i yʌlo chocob i yal cʌntʌbilto bʌ tiʼ ñʌcʼob, chaʼan jach mach yomic i cʌntañob. Ili xʼixicob an i meleyob iliyi chaʼan yom i chʌn choñob i bʌ. Cheʼ miʼ qʼuel Jehová iliyi cʼux miʼ yubin tiʼ pusicʼal.

17. ¿Bajcheʼ miʼ mejlel laj coltan miʼ an majqui tsiʼ yʌlo choco i yal cʌntʌbilto bʌ i chaʼan cheʼ maxto cʌmbilic i chaʼan jiñi am bʌ ti Biblia?

¹⁷ Pero ¿ixcu mi an majqui tsiʼ choco i yal cʌntʌbilto bʌ tiʼ  ñʌcʼ cheʼ bʌ maxto cʌmbilic i chaʼan am bʌ ti Biblia? ¿Yom ba miʼ ñaʼtan chaʼan maʼañic mi caj i pʼuntʌntel ti Dios? Maʼañic. Muʼ bʌ i cʌy i mul tiʼ pejtelel i pusicʼal, Jehová miʼ ñusʌben i mul tiʼ coltaya i chʼichʼel Jesús tsaʼ bʌ i yʌcʼʌ ti bejqʼuel (Salmo 103:8- 14; Efesios 1:7). Cristo tsiʼ yʌlʌ: «Maʼañic tsaʼ tili c pʌy jiñi tojoʼ bʌ, jiñi jach xmulilob» chaʼan miʼ cʌyob i mul (Lucas 5:32).

18. ¿Chuqui tiʼ caj mi wen ujtel becʼ chʼichʼ mi yʌl jiñi Biblia?

¹⁸ Pero Jehová mach jasʌlic mi yʌl chaʼan mach yomic mi lac ticʼlan lac piʼʌlob. Yom mi lac locʼsan ti lac pusicʼal jiñi tsʼaʼleya come jiñʌch tiʼ caj miʼ wen bejqʼuel chʼichʼ. Jehová miʼ subeñonla tiʼ tojlel jiñi apóstol Juan: «Majqui jach miʼ tsʼaʼlen i yermaño, stsʌnsajʌch» (1 Juan 3:15). Ili mach cojach yom yʌl cheʼ mi mach utsʼatic mi laj qʼuel juntiquil quixtañu, jiñʌch mi la com chaʼan miʼ chʌmel. Ti caj jiñi, tajol mi lac jopʼben i mul chaʼan miʼ yʌqʼuentel i toj ti Dios (Levítico 19:16; Deuteronomio 19:18-21; Mateo 5:22). Jin chaʼan, yom mi lac chaʼlen wersa lac locʼsan ti lac pusicʼal jiñi mach bʌ weñic (Santiago 1:14, 15; 4:1-3).

19. ¿Chuqui bʌ cʌntesʌntel miʼ taj ti Salmo 11:5 yicʼot Filipenses 4:8, 9 jiñi quixtañu muʼ bʌ i yʌcʼ i bʌ ti tojʼesʌntel ti jiñi principio tac am bʌ ti Biblia?

¹⁹ Mi mucʼʌch laj qʼuel ti ñuc laj cuxtʌlel bajcheʼ Dios yicʼot mi la com chʌn ajñel tiʼ cʼuxbiya, mi caj lac choc tiʼ pejtelel jiñi chaʼan bʌ tsʌnsa. Jehová mi yʌl ti Salmo 11:5 chaʼan «miʼ tsʼaʼlen [...] jiñi muʼ bʌ i lon mulan jisaya [o tsʌnsa]». Pero ili mach cojach miʼ subeñonla bajcheʼ yubil miʼ yubin Dios, miʼ pʌsbeñonla jumpʼejl principio muʼ bʌ i tojʼesañonla ti chuqui mi lac mel: Mi mucʼʌch laj cʼuxbin Dios, maʼañic mi caj lac yajcan ñusaqʼuin baqui miʼ pʌstʌl tsʌnsa. Cheʼ lajal jaʼel, cheʼ la cujil chaʼan Jehová ‹jiñʌch muʼ bʌ yʌcʼ ñʌchʼtʌlel›, mi laj cʌn chaʼan yom mi lac butʼ ti lac pensar yicʼot ti lac pusicʼal chuqui wem bʌ, uts bʌ, toj bʌ chuqui yom melol, muʼ bʌ i yʌjqʼuel ti ñuc yicʼot muʼ bʌ i yʌcʼ lac ñʌchʼtʌlel (pejcan Filipenses 4:8, 9).

20-22. ¿Bajcheʼ yom miʼ yajñel jiñi xñoptʼañob ti pañimil cheʼ bʌ añob ti wocol, i chucoch?

²⁰ Tiʼ wut Dios, jiñi i pañimil Satanás pʌjqʼuen i cʼʌb tiʼ chʼichʼel quixtañujob mach bʌ añobic i mul. Jiñi yumʌlob, muʼ  bʌ i lajintelob yaʼ ti Tsʼijbujel bajcheʼ jontol tac bʌ bʌteʼel, an cabʌl millón tsʌnsʌbil i chaʼañob quixtañujob, yaʼ ochem jaʼel cabʌl i wiñicob Jehová (Daniel 8:3, 4, 20-22; Apocalipsis 13:1, 2, 7, 8). Yonlel añoʼ bʌ tiʼ wenta ñuqui choñoñibʌl tac yicʼot científicojob an i coltayob jiñi yumʌlob chaʼan miʼ melob muʼ bʌ i cʼʌjñel tac ti guerra, i cheʼʌch miʼ tajob cabʌl i chubʌʼañob. Ti isujm: «Pejtelel i chaʼañoʼ bʌ pañimil añob tiʼ cʼʌb jiñi xjontolil» (1 Juan 5:19).

²¹ Jiñi muʼ bʌ i tsajcañob Jesús maʼañic miʼ yotsañob i bʌ ti becʼ chʼichʼ, anquese an yicʼot yañoʼ bʌ o tiʼ bajñelob. ¿Chucoch? Come «mach i chaʼañobic pañimil», jin chaʼan, maʼañic miʼ yotsañob i bʌ ti política yicʼot ti guerra tac (Juan 15:19; 17:16). * Cheʼ jaʼel, cheʼ bʌ miʼ contrajintelob, miʼ lajiñob Cristo i maʼañic miʼ chaʼleñob jatsʼ, miʼ cʼuxbiñob i contra i miʼ melob oración tiʼ tojlelob (Mateo 5:44; Romanos 12:17-21).

²² Jiñi isujm bʌ xñoptʼañob maʼañic miʼ yotsañob i bʌ ti «jiñi  ñuc bʌ Babilonia», yumʌl bʌ tiʼ pejtelel pañimil (mulawil) i chaʼan jiñi ñopbalʌl mach bʌ isujmic, jumpʼejl organización añix bʌ i beque cabʌl chʼichʼ. Jiñi Tsʼijbujel mi yʌl: «Yaʼ tsaʼ bejqʼui i chʼichʼel xʼaltʼañob yicʼot i chʼichʼel i chaʼañoʼ bʌ Dios, yicʼot tiʼ pejtelel tsaʼ bʌ tsʌnsʌntiyob ti pañimil». Jin chaʼan, Dios miʼ subeñonla: «Loqʼuenla yaʼi, c chaʼañet bʌ la» (Apocalipsis 17:6; 18:2, 4, 24).

23. ¿Chuqui yom yʌl cheʼ mi lac loqʼuel ti jiñi ñuc bʌ Babilonia?

²³ Majqui jach miʼ jacʼ jiñi mandar chaʼan miʼ loqʼuel ti jiñi ñuc bʌ Babilonia miʼ junyajl cʌy tiʼ pejtelel loqʼuem bʌ ti jiñi mach bʌ isujmic ñopbalʌl. An cabʌl chuqui miʼ mel. Miʼ tsʼaʼlen tiʼ pejtelel jontol bʌ i melbal jiñi mach bʌ isujmic ñopbalʌl yicʼot chuqui tac miʼ pʌs, cheʼ bajcheʼ tsʼiʼlel, muʼ bʌ i yotsañob i bʌ ti política yicʼot i tempʌntel cabʌl chubʌʼañʌl (pejcan Salmo 97:10; Apocalipsis 18:7, 9, 11-17). Tiʼ caj melbalʌl tac muʼ bʌ i pʌs jiñi Babilonia, wen bejqʼuen chʼichʼ.

24, 25. ¿Chuqui miʼ cʼʌn Jehová chaʼan miʼ pʌs i pʼuntaya tiʼ tojlel jiñi muʼ bʌ i cʌyob i mul chaʼan tiʼ caj tsiʼ beqʼueyob chʼichʼ, i bajcheʼ tsaʼ lajinti iliyi ti wajali yaʼ ti Israel?

²⁴ Cheʼ maxto ochemonla ti jiñi isujm bʌ ñopbalʌl, muʼto la cotsan lac bʌ tiʼ chaʼan bʌ ili pañimil am bʌ tiʼ pʼʌtʌlel Satanás. Jin chaʼan, tsʼitaʼ añʌch lac mul jaʼel. Pero tsaʼ lac chʼʌmʌ yambʌ bij, tsaʼ lac ñopo chaʼan Cristo tsiʼ yʌcʼʌ i cuxtʌlel i tsaʼ la cʌcʼʌ lac bʌ ti Dios. Cheʼ bajcheʼ ili mi lac taj lac wenlel tiʼ pʼuntaya Dios yicʼot miʼ cʌntañonla chaʼan wen mi la cajñel tiʼ tojlel (Hechos 3:19). Cheʼ bajcheʼ mi caj laj qʼuel, ili coltʌntel tsaʼ lajinti yaʼ ti Israel ti wajali cheʼ bajcheʼ jiñi tejclum tac yajcʌbil bʌ baqui miʼ mejlel ti putsʼel jiñi muʼ bʌ i chaʼlen tsʌnsa cheʼ mach yʌlolic i chaʼan (Números 35:11-15; Deuteronomio 21:1-9).

²⁵ Cheʼ bʌ miʼ cʼotel ti jiñi tejclum, miʼ mejlel tiʼ tojlel añoʼ bʌ i yeʼtel yicʼot yaʼʌch yom miʼ chumtʌl jinto miʼ chʌmel jiñi ñuc bʌ motomaj, jinto cheʼ jiñi miʼ mejlel ti majlel ti chumtʌl baqui yom. Iliyi tsiʼ yʌcʼʌ ti ñaʼtʌntel chaʼan Dios wen yujilʌch pʼuntaya i chaʼan wen ñuc miʼ qʼuel i cuxtʌlel quixtañu. ¿Chuqui i sujmlel ti ili ora jiñi tejclum tac baqui miʼ yujtel putsʼel wajali? Jiñʌch muʼ bʌ i cʼʌn Jehová chaʼan miʼ cʌntañonla.  ¿Chuqui yom yʌl jiñi? Chaʼan miʼ cʼʌn i cuxtʌlel tsaʼ bʌ i yʌcʼʌ Cristo, chaʼan miʼ coltañonla chaʼan maʼañic mi lac chʌmel tiʼ caj cheʼ mach tsajalic lac chaʼan mi lac ñusan ti pʼis jiñi mandar chaʼan jiñi cuxtʌlel yicʼot chʼichʼ. ¿Bajcheʼ mi lac pʌs chaʼan mi laj qʼuel ti ñuc jiñi? Junchajp jiñʌch cheʼ mi lac pʌy tilel jiñi quixtañujob ti jiñi lajiya jach bʌ «tejclum baqui miʼ majlel ti putsʼel». Ili ñumen ñuc i cʼʌjñibal, come lʌcʼʌlix «mi caj i tilel [jiñi ñuc bʌ] wocol» (Mateo 24:21; 2 Corintios 6:1, 2).

26-28. ¿Chucoch cheʼ lajal chumulonla ili ora cheʼ bajcheʼ tiʼ yorajlel jiñi xʼaltʼan Ezequiel, i bajcheʼ miʼ mejlel lac chʌn ajñel tiʼ cʼuxbiya Dios?

²⁶ Ili ora jiñi i tejclum Dios an ti jumpʼej wocol lajal bajcheʼ tiʼ yorajlel Ezequiel, juntiquil xʼaltʼan tsaʼ bʌ i waʼchoco Jehová bajcheʼ juntiquil xcʌntaya tsaʼ bʌ ajñi ti jiñi templo yaʼ ti Israel. Tsaʼ subenti chaʼan miʼ mel iliyi: «Yom maʼ ñʌchʼtan [jiñi tʼan woli bʌ c subeñet] chaʼan maʼ chaʼ subeñob». Mi jiñi Ezequiel maʼañic miʼ mel i yeʼtel cheʼ bajcheʼ tsaʼ subenti, miʼ yajlel tiʼ wenta mi an majqui miʼ chʌmel cheʼ ba ora Dios miʼ chaʼlen meloñel yaʼ ti Jerusalén (Ezequiel 33:7-9). Pero cheʼ bajcheʼ la cujilix, jiñi xʼaltʼan tsaʼʌch i mele i yeʼtel i maʼañic tsaʼ yajli tiʼ mul chaʼan jiñi tsaʼ bʌ chʌmiyob.

²⁷ Mach jalix mi caj i jilel i pañimil Satanás. Jin chaʼan, jiñi i testigojonbʌla Jehová mi lac chʼʌm ti ñuc yicʼot cheʼ bajcheʼ jumpʼejl la queʼtel i tsictesʌntel «jiñi qʼuin cheʼ mi caj i qʼuextan mulil lac Dios» yicʼot cheʼ mi lac tsictesan i Yumʌntel (Isaías 61:2; Mateo 24:14). ¿Yicʼot ba lac tijicñʌyel mi lac chaʼlen subtʼan? Cheʼʌch tsiʼ mele Pablo, jin chaʼan tsiʼ yʌlʌ: «Mach chʌn c wentajix laʼ cuxtʌlel ti laʼ pejtelel. Maʼañic tsac chaʼle bʌqʼuen, pero tsʼʌcʌl tsac subeyetla i tʼan Dios» (Hechos 20:26, 27). Jiñʌch yom bʌ mi lac lajin.

²⁸ Jin chaʼan, mi laj com chʌn ajñel tiʼ cʼuxbiya lac Tat mach jasʌlic yom mi laj qʼuel ti ñuc jiñi cuxtʌlel yicʼot jiñi chʼichʼ cheʼ bajcheʼ miʼ qʼuel. Yaʼ ti yambʌ cʌntesʌntel mi caj laj qʼuel chaʼan i cʼʌjñibalʌch cheʼ chʼujul mi la cajñel tiʼ wut.