1, 2. a) Cheʼ mi lac majlel ti jumpʼejl ñujpuñel, ¿chuqui miʼ mejlel laj cʼajtiben lac bʌ, i chucoch? b) ¿Baqui bʌ cʼajtiya tac mi caj laj qʼuel ti ili cʌntesʌntel?

¿MUʼ baʼ mulan a qʼuel cheʼ miʼ yujtel jumpʼejl ñujpuñel? Cabʌl wiñicob xʼixicob (quixtañujob) mucʼʌch i mulan i qʼuelob, come jiñʌch jumpʼejl wen utsʼatax bʌ qʼuiñijel. Jiñi muʼ bʌ i cajelob ti ñujpuñel miʼ lʌpob wen utsʼatax bʌ i pislelob yicʼot wen tijicñayob tiʼ ñiʼ i wut yilal. Miʼ ñaʼtañob chaʼan utsʼatax mi caj i ñusañob yicʼot chaʼan muʼ bʌ caj i melob ti talto bʌ qʼuin.

² Yom mi lac ñaʼtan chaʼan jiñi ñujpuñijel ili ora an ti tsʌts bʌ wocol. Jin chaʼan, anquese mi lac mulan laj qʼuel jumpʼejl ñujpuñijel i mi lac subeñob chaʼan tijicña miʼ yajñelob, pero maʼañic mi laj cʌy laj cʼajtiben lac bʌ: «¿Tijicña ba mi caj i yajñel jiñi ñujpuñijel yicʼot tiʼ pejtelel ba ora?». Cheʼʌchi mi mucʼʌch i ñopob jiñi ticʼojel tilem bʌ ti Dios i bajcheʼ cʼamel miʼ chaʼleñob wersa i melob (pejcan Proverbios 3:5, 6). Mi mucʼʌch i chaʼleñob wersa, wen mi caj i yajñelob tiʼ ñujpuñijel yicʼot mi caj i chʌn ajñelob tiʼ cʼuxbiya Dios. Jin chaʼan, mi ñujpuñemoñixla o mi maxto, yom mi lac tsajin i jacʼbal jiñi Biblia chaʼan ili chʌmpʼejl cʼajtiya: ¿Baqui bʌ jiñi i sujmlel chaʼan mi lac mejlel ti ñujpuñel? ¿Chuqui yom mi lac mel chaʼan wen mi lac yajcan majqui la com ñujpuñel la quicʼot? ¿Bajcheʼ mi lac chajpan lac bʌ chaʼan wen mi la cajñel ti lac ñujpuñijel? ¿Chuqui mi caj i coltañob jiñi ñujpuñemoʼ bʌ chaʼan chʌn tijicña miʼ chumtʌlob?

3. ¿Chucoch mach yomic ti ora mi lac ñujpuñel chaʼan jach tiʼ caj mach bʌ ñuquic i cʼʌjñibal tac?

³ An muʼ bʌ i yʌlob chaʼan yom mi lac ñujpuñel mi la com lac taj lac tijicñʌyel, i chaʼan maʼañic majqui miʼ mejlel i yʌl chaʼan tsaʼix i taja i tijicñʌyel mi maʼañic ñujpuñem. ¡Jumpʼejl jach lot iliyi! Laʼ lac ñaʼtan tiʼ tojlel Jesús. Maʼañic tsaʼ ñujpuñi, pero tsiʼ yʌlʌ chaʼan jumpʼejlʌch majtañʌl cheʼ an majqui yom ajñel tiʼ bajñelil i tsiʼ yʌlʌ chaʼan utsʼatʌch cheʼ miʼ yajñelob bajcheʼ jiñi (Mateo 19:11, 12). Jiñi apóstol Pablo tsiʼ yʌlʌ chuqui ti wenlel mi lac taj cheʼ lac bajñel jaxto (1 Corintios 7:32-35). Mi jiñic to Pablo yicʼot Jesús tsiʼ yʌlʌyob chaʼan maʼañic majqui yom miʼ wis ñujpuñel. Jiñi Biblia miʼ taj ti tʼan chaʼan yaʼ ochem tiʼ «cʌntesa xibajob» cheʼ miʼ yʌjlel chaʼan mach yomic miʼ yujtel ñujpuñel (1 Timoteo 4:1-3). Yom bʌ i ñumen melbeñob i yeʼtel Jehová, mi caj i ñumen tajbeñob i yorajlel cheʼ i bajñelob jaxto. Jin chaʼan, mach weñic cheʼ ti ora jach mi lac ñujpuñel chaʼan jach tiʼ caj mach bʌ ñuquic i cʼʌjñibal tac, junchajp jiñʌch cheʼ mi lac wersa subentel ti yambʌ quixtañujob.

4. ¿Chucoch ti jumpʼejl ñujpuñijel jiñʌch baqui miʼ mejlel i tajob yalobil?

⁴ Jin chaʼan, ¿am ba i sujmlel chucoch mi lac ñujpuñel? Añʌch. Jiñi ñujpuñijel jiñʌch yambʌ majtañʌl tilem bʌ ti Dios muʼ bʌ mejlel i yʌqʼueñob i wenlel yicʼot cabʌl i tijicñʌyel jiñi quixtañujob (pejcan Génesis 2:18). Ti ñaxan jiñʌch baqui miʼ mejlel i tajob i yalobil come jiñi alʌl yom chaʼan jiñi i tat i ñaʼ miʼ yʌqʼueñob i cʼuxbiya, miʼ cʌntesʌntelob yicʼot miʼ tijqʼuelob (Salmo 127:3; Efesios 6:1-4). Pero an yambʌ i sujmlel chucoch la com ñujpuñel.

5, 6. a) Cheʼ bajcheʼ mi yʌl Eclesiastés 4:9-12, ¿chuqui ti wenlel mi lac taj cheʼ an wem bʌ la camigojob? b) ¿Bajcheʼ miʼ mejlel ti sujtel ti jumpʼejl lazo uxtʼujm bʌ jiñi ñujpuñijel?

⁵ Laʼ lac tsajin jiñi versículo baqui chucul ili cʌntesʌntel: «Cheʼ ti lac bajñel, tsʼitaʼ jach mi mejlel lac mel. Cheʼ  chaʼtiquilonla cabʌl miʼ mejlel. Mi tsaʼ yajli juntiquil miʼ tech letsel i piʼʌl. Pero mi tsaʼ yajli cheʼ i bajñel, ¿majqui mi caj i tech? Maʼañic majch miʼ coltan. Pʼumpʼun jax. Mi temel miʼ chaʼleñob wʌyel, miʼ qʼuixñesañob i bʌ. Pero miʼ yubiñob tsʌñal cheʼ i bajñelob. Cheʼ jaʼel cheʼ an majch miʼ contrajintel ti leto, mi an i piʼʌl mi caj i coltan. Cheʼ jiñi miʼ mʌjlel i chaʼañob cheʼ chaʼtiquilob. Ñumen utsʼat cheʼ an uxtiquil. Wocol miʼ tsʼojquel lazo jalbil bʌ ti uxtʼujm» (Eclesiastés 4:9-12).

⁶ Ili versículo tac miʼ ñumen taj ti tʼan chaʼan la camigojob. Pero ¿muʼ ba i mejlel ti cʼʌjñel jaʼel ti jumpʼejl ñujpuñijel? Mucʼʌch, come jiñʌch ñumen lʌcʼʌl bʌ mi caj i yajñelob bajcheʼ i yamigojob i bʌ, mi caj mejlel i coltañob i bʌ, i tijicñesʌbeñob i bʌ i pusicʼal yicʼot chaʼan miʼ cʌntañob i bʌ bajcheʼ mi yʌl jiñi Biblia. Pero chaʼan wen pʼʌtʌl miʼ yajñel jumpʼejl ñujpuñijel, yom miʼ yochel i yuxticlel. Cheʼ bajcheʼ jiñi, lajal bajcheʼ jumpʼejl lazo jalbil bʌ ti uxtʼujm, bajcheʼ miʼ tsictesʌntel ti Eclesiastés, ñumen tsʌts to cheʼ bajcheʼ chaʼtʼujm jach bʌ. ¿Majqui jiñi i yuxtʼujmlel muʼ bʌ i ñumen pʼʌtʼesan jiñi ñujpuñijel? Jiñʌch Jehová. Cheʼ bʌ yaʼ ochem jaʼel ti jumpʼejl ñujpuñijel i jiñi yambʌ chaʼtiquilob miʼ chaʼleñob wersa chaʼan miʼ melob cheʼ bajcheʼ yom Jehová, miʼ ñumen pʼʌtʼan jiñi ñujpuñijel.

7, 8. a) ¿Baqui bʌ jiñi ticʼojel tsaʼ bʌ i yʌcʼʌ Pablo tiʼ tojlel jiñi xñoptʼañob maxto bʌ añobic i piʼʌl, wocol bʌ miʼ yubiñob chaʼan miʼ ticʼob i bʌ chaʼan jiñi piʼleya? b) ¿Chuqui miʼ tsictesʌbeñonla ti wen jiñi Biblia chaʼan bʌ jiñi ñujpuñel?

⁷ Cheʼ jaʼel, jiñi ñujpuñel cojach baqui juntiquil wiñic o xʼixic miʼ mejlel i piʼleñob i bʌ. Cojach ilayi baqui miʼ mejlel i tajob i tijicñʌyel (Proverbios 5:18). Anquese jiñi maxto bʌ añic i piʼʌl tsaʼix i taja i colel, cheʼ bʌ tsaʼix ñumi i yorajlel chaʼan wen yom piʼleya miʼ yubin tiʼ bʌcʼtal, yom miʼ chʌn chaʼlen wersa i cʌntan i bʌ. Mi an i tajol wocol maʼ wubin cheʼ maʼañic maʼ ñujpuñel o tajol maʼ mejlel ti yajlel tiʼ melol bibiʼ bʌ, Pablo tsiʼ yʌcʼʌ ili ticʼojel: «Mi mach mejlicob i bajñel ajñelob  ti utsʼat, laʼ i chaʼleñob ñujpuñel. Utsʼat miʼ chaʼleñob ñujpuñel. Mach utsʼatic miʼ jacʼob i colosojlel [o tsuculel] i pusicʼal» (1 Corintios 7:9; Santiago 1:15).

⁸ Majqui jach yom bʌ ñujpuñel an chuqui yom miʼ chʼʌmben isujm. Pablo tsiʼ yʌlʌ: «Jiñi muʼ bʌ i pʌyob i bʌ, wersa mi caj i yubiñob wocol» (1 Corintios 7:28). Mi caj i tajob wocol maʼañic bʌ miʼ tajob jiñi i bajñelob jaxto bʌ. Jin chaʼan, mi an majqui yom ñujpuñel, ¿chuqui yom miʼ mel chaʼan maʼañic miʼ taj cabʌl wocol, i miʼ ñumen taj bendición tac? Junchajp jiñʌch cheʼ wen miʼ sʌclan i piʼʌl.

9, 10. a) ¿Chuqui bʌ wocol miʼ mejlel i taj tsiʼ yʌlʌ Pablo mi juntiquil miʼ ñujpuñel yicʼot mach bʌ xñoptʼañic? b) ¿Chuqui miʼ yujtel tiʼ tojlel jiñi muʼ bʌ i ñusañob ti pʼis jiñi ticʼojel am bʌ ti Biblia i miʼ ñujpuñelob yicʼot mach bʌ xñoptʼañobic?

⁹ Pablo tiʼ tsictesa jumpʼejl principio wen i cʼʌjñibal bʌ tiʼ tojlel jiñi woli (choncol) bʌ i sʌclan i piʼʌl, tsiʼ yʌlʌ: «Mach mi laʼ chaʼlen ñujpuñel yicʼot jiñi mach bʌ añic miʼ ñop Dios» (2 Corintios 6:14). Mi chaʼcojt añimal mach bʌ lajalic i colemlel yicʼot i pʼʌtʌlel miʼ laja cʌjchelob, mi caj i yilañob wocol. Cheʼ lajal jaʼel ti jiñi ñujpuñijel. Mi juntiquil xñoptʼan miʼ ñujpuñel yicʼot mach bʌ xñoptʼañic, mi caj i tajob cabʌl wocol. Come mach lajalic chuqui miʼ ñaʼtañob: Juntiquil yom chʌn ajñel tiʼ cʼuxbiya Dios, i jiñi yambʌ mach lajalic bajcheʼ miʼ ñaʼtan. Tiʼ sujmlel mach wen tijicñayic mi caj i yajñelob. Jin chaʼan, Pablo tsiʼ yʌlʌ chaʼan cojach «ti lac Yum» yom miʼ ñujpuñelob (1 Corintios 7:39).

¹⁰ Pero an i bajñel jach bʌ miʼ yubiñob i bʌ i miʼ ñaʼtañob chaʼan ñumen wen mi caj i yajñelob mi tsaʼ ñujpuñiyob yicʼot «mach bʌ añic miʼ ñop Dios». An i tajol miʼ ñusañob ti pʼis jiñi ticʼojel am bʌ ti Biblia i cheʼʌch miʼ melob. Ti wiʼil miʼ cʼotel i chʼʌmbeñob isujm tsaʼ bʌ i meleyob. Miʼ cʼotel i ñaʼtañob chaʼan mach weñic tsiʼ yajcayob i piʼʌl come maʼañic miʼ mejlel i melob chuqui yomob tiʼ cuxtʌlel, jin chaʼan ñumen i  bajñel miʼ yubiñob i bʌ. An cabʌl xñoptʼañob maʼañic bʌ yajlemob ti ili wocol come miʼ ñopob chuqui mi yʌl Jehová yicʼot miʼ jacʼbeñob i tʼan (pejcan Salmo 32:8). Chʌn i bajñelob to, i miʼ ñaʼtañob chaʼan ti jumpʼejl bʌ qʼuin mi caj i tajob i piʼʌl yaʼ tiʼ tejclum Dios.

11. ¿Chuqui bʌ coltʌntel an lac chaʼan mi laj com lac yajcan ti wen jiñi lac piʼʌl? (Qʼuele jiñi recuadro « Yom bʌ maʼ mel chaʼan wen maʼ yajcan».)

¹¹ Tiʼ sujm, chaʼan wen mi lac yajcan juntiquil lac piʼʌl, mach jasʌlic jach yom cheʼ xñoptʼañʌch i chaʼan Jehová. Yom lajal chuqui miʼ ñaʼtañob, chuqui yom i melob tiʼ chaʼan bʌ Jehová yicʼot chaʼan lajal miʼ cʼuxbiñob Dios. Jiñi xucʼul bʌ xʼeʼtel am bʌ cabʌl i ñaʼtʌbal chajpʌbil i chaʼan cabʌl jun loqʼuem bʌ ti Biblia baqui miʼ mejlel lac taj ticʼojel tac chaʼan ili, jin chaʼan yom mi lac wen tsajin yicʼot oración i mi lac mel muʼ bʌ laj cʌn yaʼi (pejcan Salmo 119:105). *

12. ¿Bajcheʼ miʼ yajcañob i piʼʌl ti cabʌl cultura, i baqui bʌ ejemplo am bʌ ti Biblia yom miʼ cʼʌjñel cheʼ bʌ miʼ yujtel bajcheʼ jiñi?

¹² Ti cabʌl cultura, jiñi tatʌlob jiñʌch yom bʌ miʼ sʌclʌbeñob i piʼʌl i yalobil. Miʼ ñaʼtañob bajcheʼ jiñi, come miʼ yʌlob chaʼan añobix cabʌl i ñaʼtʌbal yicʼot cabʌlix chuqui yujilob, i ñumen chajpʌbilobix chaʼan miʼ sʌclʌbeñob i piʼʌl i yalobilob. I cheʼ bajcheʼ ti wajali, an i tajol weñʌch miʼ loqʼuel. Jiñi tatʌlob añoʼ bʌ tiʼ wenta chaʼan miʼ sʌclʌbeñob i piʼʌl i yalobil yom miʼ cʌñob bajcheʼ tsiʼ mele Abraham. Cheʼ bʌ tiʼ sʌclʌbe i yijñam Isaac, mach jiñic tsiʼ qʼuele ti ñuc mi an i taqʼuin o mi cabʌl i chubʌʼan jiñi xchʼoc. Tsiʼ cʼʌñʌ juntiquil i wiñic chaʼan miʼ majlel i sʌclan juntiquil xʼixic muʼ bʌ i chʼujutesan Jehová (Génesis 24:3, 67). *

13-15. a) ¿Bajcheʼ miʼ coltan Proverbios 24:27 jiñi chʼiton wiñic woli bʌ i sʌclan i yijñam? b) ¿Bajcheʼ miʼ mejlel i chajpan i bʌ chaʼan ñujpuñijel jiñi xʼixic?

¹³ Mi woli (yʌquel) lac ñaʼtan ñujpuñel, yom mi laj cʼajtiben lac bʌ: «¿Chajpʌbiloñix ba tiʼ sujm chaʼan mic ñujpuñel?». Jiñi lac jacʼbal mach cojach yom yʌl chaʼan bajcheʼ mi laj qʼuel jiñi cʼuxbiya, jiñi piʼleya, chaʼan mi lac bajñel mi la cubin lac bʌ o chaʼan jach com la calobil. Ti jujuntiquil yom mi lac wen ñaʼtan baqui bʌ eʼtel mi caj lac taj cheʼ ñujpuñemoñixla.

¹⁴ Laʼ lac ñaxan ñaʼtan jiñi chʼiton wiñic woli bʌ i sajcan i yijñam. Yom miʼ wen ñaʼtan ili versículo: «Ñaxan taja a weʼtel baqui jach maʼ taj. Cʼajtin a lum. Ti wiʼil waʼchocon a wotot» (Proverbios 24:27). ¿Chuqui miʼ cʌntesañonla ili versículo? Ti wajali, mi juntiquil wiñic yomix i bajñel familia, yom miʼ cʼajtiben i bʌ: «¿Chajpʌbiloñix ba chaʼan mij cʌntan yicʼot mic mʌcʼlan juntiquil xʼixic yicʼot mi tsaʼ tili calobilob?». Cheʼ muʼto i cajelob ti ñujpuñel, yom tsaʼix i ñaxan meleyob i cholel. Jin jach bʌ principio miʼ mejlel i coltan jiñi chʼiton wiñic ili ora. Mi yomob ñujpuñel, yom miʼ chajpañob i bʌ chaʼan miʼ tsʼʌctesañob i yeʼtel. Mi cʼocʼob to, yom miʼ chaʼleñob eʼtel. Jiñi i Tʼan Dios mi yʌl chaʼan jiñi wiñic maʼañic bʌ miʼ yʌqʼuen chuqui yom i familia, i tijicñʌyel yicʼot maʼañic miʼ cʌntesañob tiʼ chaʼan bʌ Jehová, ñumen lecojʌch bajcheʼ juntiquil mach bʌ añic miʼ ñop Dios (pejcan 1 Timoteo 5:8).

¹⁵ Jiñi xʼixic yom miʼ chajpan i bʌ jaʼel chaʼan miʼ mel ti tsʼʌcʌl i yeʼtel. Jiñi Biblia mi yʌl chaʼan añʌch wen tac bʌ i melbal yicʼot chaʼan miʼ mejlel i coltan i ñoxiʼal i miʼ mejlel i cʌntan i yotot (Proverbios 31:10-31). Jiñi ora bʌ miʼ ñujpuñel, miʼ pʌs chaʼan woli jach i bajñel ñaʼtan i bʌ. ¿Chucoch? Come maʼañic miʼ ñaʼtan chuqui mi caj i yʌqʼuen i piʼʌl. Pero jiñi ñumen ñuc bʌ i cʼʌjñibal baqui yom miʼ chajpañob i bʌ, jiñʌch tiʼ chaʼan bʌ Jehová. Laʼ laj qʼuel chuqui yom yʌl.

16, 17. ¿Baqui bʌ principio tac loqʼuem bʌ ti Biblia yom miʼ wen ñaʼtan jiñi woli bʌ i chajpañob i bʌ chaʼan miʼ ñujpuñelob?

 ¹⁶ Ti ñaxan, jiñi wiñic yicʼot xʼixic yom miʼ wen ñaʼtañob chuqui yom Dios miʼ melob cheʼ bʌ miʼ ñujpuñelob. Jiñi wiñic yom wen yujil baqui bʌ i yeʼtel bajcheʼ i jol jiñi familia. Maʼañic mi caj i cʼʌn jiñi i yeʼtel tsaʼ bʌ aqʼuenti chaʼan jach miʼ chaʼlen xicʼoñel. Yom miʼ mel bajcheʼ tsiʼ mele Jesús (Efesios 5:23). Cheʼ jaʼel, jiñi xʼixic xñoptʼan bʌ, yom miʼ ñaʼtan chuqui mi caj i mel. Jin chaʼan, yom miʼ cʼajtiben i bʌ: «¿Muʼ ba caj c jacʼben i ‹mandar c ñoxiʼal›?» (Romanos 7:2). Jiñi xʼixic i bajñel jaxto bʌ chuculix tiʼ mandar Jehová yicʼot Cristo (Gálatas 6:2). Mi tsaʼ ñujpuñi, mi caj i chuc i bʌ ti yambʌ jumpʼejl mandar: Tiʼ mandar i ñoxiʼal. Yom miʼ chaʼ cʼajtiben i bʌ: «¿Muʼ ba caj c jacʼben i tʼan juntiquil wiñic xmulil bʌ yicʼot chaʼan mi cʌqʼuen j coltaya?». Mi maʼañic miʼ mulan i mel bajcheʼ jiñi, tajol jiñi ñujpuñel mach jiñic yom bʌ miʼ ñaʼtan.

¹⁷ Cheʼ jaʼel, mi an majqui miʼ ñujpuñel yom chajpʌbil chaʼan miʼ yʌqʼuen chuqui yom i piʼʌl, come mach lajalic chuqui yom jiñi xʼixic bajcheʼ jiñi wiñic (pejcan Filipenses 2:4). Pablo tiʼ tsʼijbu: «Ti jujuntiquiletla yom mi laʼ cʼuxbin laʼ wijñam cheʼ bajcheʼ mi laʼ bajñel cʼuxbin laʼ bʌ. Jiñi xʼixic laʼ i qʼuel ti ñuc i ñoxiʼal». Yicʼot i coltaya Dios, jiñi apóstol tsiʼ chʼʌmbe isujm chaʼan jiñi wiñic yom chaʼan miʼ qʼuejlel ti ñuc, i jiñi xʼixic yom miʼ cʼuxbintel (Efesios 5:21-33).

18. ¿Chucoch yomʌch yujilob ticʼol i bʌcʼtal jiñi añoʼ bʌ ti jumpʼejl noviazgo?

¹⁸ Jin chaʼan, jiñi noviazgo mach yomic miʼ qʼuejlel bajcheʼ jumpʼejl ñusaqʼuin. Jiñʌch baqui yom miʼ wen cʌñob i bʌ chaʼan miʼ ñaʼtañob mi yomʌch miʼ ñujpuñelob. Ti jimbʌ ora yom yujilob ticʼol i bʌcʼtal. ¿Chucoch? Come mi caj i wen mulañob i bʌ, i tajol miʼ mejlel i ñumelob ti pʼis cheʼ mi caj i pʌsbeñob i bʌ cʼuxbiya. Pero mi mucʼʌch i cʼuxbiñob i bʌ tiʼ sujmlel, maʼañic mi caj i melob muʼ bʌ mejlel i yotsañob ti wocol tiʼ chaʼan bʌ Jehová (1 Corintios 13:5). Jin chaʼan, muʼ bʌ i techob jumpʼejl noviazgo yom yujilob ticʼol i bʌcʼtal,  come jiñʌch muʼ bʌ caj i coltañob tiʼ pejtelel ora, miʼ tsaʼ ñujpuñiyob o maʼañic.

19, 20. Tsictesan yicʼot ejemplo tac bajcheʼ yilal miʼ qʼuelob jiñi ñujpuñijel cabʌl quixtañu, i bajcheʼ yom miʼ qʼuel jiñi xñoptʼañob.

¹⁹ Chaʼan miʼ jalijel jumpʼejl ñujpuñijel, yom miʼ yʌcʼob i tʼan chaʼan temel mi caj i yajñelob tiʼ pejtelel ora. Ti jumpʼejl película yicʼot ti libro tac, jiñi ñujpuñel luʼ tijicña miʼ yujtel yilal. Pero tiʼ sujm, mach i yujtibalic, i tejchibal jaxto jumpʼejl xchumtʌl tsaʼ bʌ i mele Jehová chaʼan tiʼ pejtelel ora (Génesis 2:24). Pero ili pañimil (mulawil) yʌñʌl bajcheʼ miʼ qʼuel. Ti cabʌl cultura miʼ lajintel jiñi ñujpuñel bajcheʼ jumpʼejl «lazo jalbil bʌ ti chaʼtʼujm». Jiñi quixtañujob miʼ wen acʼob ti ñuc ili tʼan, come yomob chaʼan jiñi i ñujpuñijel miʼ jalijel cheʼ jach bajcheʼ yomob yicʼot chaʼan mach wocolic miʼ mejlel i cʌyob i bʌ.

²⁰ Cabʌl muʼ bʌ i qʼuelob jiñi ñujpuñijel bajcheʼ jumpʼejl trato maʼañic bʌ miʼ jalijel. Jin chaʼan, tijicñayob come yujilob chaʼan miʼ mejlel i chaʼ cʌyob i bʌ mi mach tijicñayobic o mi tsaʼ caji i tajob wocol. Pero yom mi laj cʼajtesan chaʼan jiñi Biblia miʼ lajin jiñi ñujpuñijel bajcheʼ jumpʼejl lazo. An cabʌl lazo wen cʌmbil bʌ come wen tsʌts. Jumpʼejl ejemplo, junchajp lazo jiñʌch jiñi soga. Ili melbil chaʼan miʼ jalijel yicʼot chaʼan maʼañic miʼ tujqʼuel cheʼ miʼ cʼʌjñel ti cujchel chuqui al bʌ. Cheʼ lajal ti jiñi ñujpuñijel: Jehová tsiʼ mele chaʼan miʼ jalijel tiʼ pejtelel ora. Laʼ laj cʼajtesan tsaʼ bʌ i yʌlʌ Jesús: «Mach i chaʼ tʼox wiñic chuqui tsiʼ tempa Dios» (Mateo 19:6). Cheʼʌch yom miʼ ñaʼtañob jaʼel jiñi xñoptʼañob. Pero, mi cheʼ yom miʼ qʼuejlel jiñi ñujpuñijel bajcheʼ jiñi, ¿mach ba muqʼuic caj i sujtel ti jumpʼejl al bʌ cuch? Maʼañic.

21. ¿Chuqui yom miʼ cʌn jiñi ñujpuñemoʼ bʌ, i majqui bʌ i ejemplo yom miʼ lajiñob?

²¹ Jiñi ñujpuñijel miʼ mejlel i yʌcʼ cabʌl tijicñʌyel. Jin chaʼan, yom miʼ cʌn i qʼuel ti wen jiñi i piʼʌl, wen tac bʌ i melbal yicʼot  cheʼ miʼ chaʼlen wersa i mel chuqui wem bʌ, i mach jiñic yom miʼ qʼuel chuqui mach bʌ weñic miʼ mel. Pero ¿yom ba yʌl chaʼan maʼañic mi caj i wis acʼ ti ñuc chuqui mach bʌ weñic miʼ yujtel? Mach cheʼiqui. Jehová maʼañic miʼ mutsʼ i wut chaʼan chuqui miʼ yujtel, pero laj com chaʼan jin miʼ qʼuel chuqui wem bʌ mi lac mel. Cheʼ miʼ cʼotel lac ñaʼtan bajcheʼ tsiʼ yʌlʌ jiñi salmista: «C Yum, muqʼuic a chʌn [qʼuel] c mul lojon. Mach tojic maʼ qʼuelon [lojon]» (Salmo 130:3). Jin chaʼan, jiñi ñujpuñemoʼ bʌ yom yujilob i ñʌchʼtʌbentel i tʼan i piʼʌl yicʼot miʼ ñusʌbeñob i bʌ i mul (pejcan Efesios 4:32).

22, 23. ¿Chuqui bʌ ejemplo tsiʼ yʌcʼʌ Abraham yicʼot Sara chaʼan jiñi ñujpuñemoʼ bʌ ili ora?

 ²² Jiñi tijicñʌyel am bʌ ti jumpʼejl ñujpuñijel miʼ colel majlel cheʼ miʼ ñumel majlel jabil. Mi caj laj qʼuel i ejemplo Abraham yicʼot Sara, tsaʼ bʌ i ñusayob tsʌts tac bʌ wocol cheʼ añobix i jabilel. Tajol Sara añix 60 i jabilel cheʼ baʼ ora tsiʼ cʌyʌyob jiñi wen utsʼat bʌ i chumlibob ti jiñi tejclum i cʼabaʼ Ur, ili wocolʌch tsiʼ yubi tiʼ melol yicʼot chaʼan miʼ majlel ti chumtʌl ti otot melbil bʌ ti pisil cʼʌlʌl baqui ora miʼ chʌmel. Pero tsiʼ mele jiñi come tsiʼ qʼuele ti ñuc i yeʼtel i ñoxiʼal. Tiʼ pejtelel ora tsiʼ chʌn aqʼue i coltaya i ñoxiʼal chaʼan wen miʼ loqʼuel chajpʌbil bʌ i chaʼañob. Tsiʼ chʌn jacʼbe i tʼan i ñoxiʼal tiʼ xucʼtilel. «Tiʼ pusicʼal» miʼ suben i ñoxiʼal tiʼ yum (Génesis 18:12 *; 1 Pedro 3:6). Tsiʼ qʼuele ti ñuc i ñoxiʼal tiʼ pejtelel i pusicʼal.

²³ La cujilix chaʼan tiʼ chaʼticlelob mach tiʼ pejtelelic ora lajal chuqui tsiʼ ñaʼtayob. Ti jumpʼejl bʌ qʼuin, Sara tiʼ sube tsaʼ bʌ i yʌqʼue i «chʼijiyem[lel] i pusicʼal Abraham». Pero cheʼ bʌ Jehová tsiʼ pejca, tsiʼ pʌsʌ i pecʼlel i tsiʼ jacʼʌ tsaʼ bʌ i sube i yijñam, i jiñi tsiʼ yʌqʼue i wenlel i familia (Génesis 21:9-13). Ili ora, jiñi añix bʌ cabʌl jabil i ñujpuñelob, cabʌl chuqui miʼ mejlel i cʌñob tiʼ tojlel Abraham yicʼot Sara.

24. ¿Baqui bʌ ñujpuñijel miʼ qʼuel ti ñuc Jehová Dios, i chucoch?

²⁴ Ti jiñi congregación an yonlel ñujpuñemobix bʌ baqui jiñi wiñic miʼ qʼuejlel ti ñuc, i jiñi xʼixic miʼ cʼuxbintel, i jiñʌch miʼ ñumen ajqʼuel ti ñuc chuqui yom bʌ Jehová. Tiʼ sujmlel mucʼʌch i mejlel ti ajñel ti tijicña jumpʼejl ñujpuñijel. Cheʼ bajcheʼ tsaʼix laj cʌñʌ, majqui yom i taj i tijicñʌyel yom wen miʼ sʌclan i piʼʌl, miʼ chajpan i bʌ ti wen yicʼot miʼ chaʼlen wersa chaʼan an cʼuxbiya yicʼot ñʌchʼtʌlel tiʼ ñujpuñijel. Jumpʼejl ñujpuñijel bajcheʼ iliyi, mach cojach miʼ yʌqʼuen i ñuclel Jehová, mi caj i coltan jaʼel jiñi xñoptʼan chaʼan miʼ chʌn ajñel tiʼ cʼuxbiya Dios.