1, 2. ¿Baqui bʌ cʼajtiya mi caj laj qʼuel, i chucoch?

MI JATET ñujpuñemetix, ¿bajcheʼ yilal a ñujpuñijel? ¿Muʼ baʼ wʌl chaʼan an cabʌl tijicñʌyel o cabʌl wocol? ¿Woli (choncol) baʼ ñajtʼesan a bʌ yicʼot a piʼʌl o maʼañic woli laʼ wʌqʼuen laʼ bʌ chuqui laʼ wom? Mi cheʼ woli (yʌquel) a ñusan, tajol miʼ yʌqʼueñet a chʼijiyemlel chaʼan maʼañix mi laʼ wen cʼuxbin laʼ bʌ. Cheʼ jaʼel, mi xñoptʼañet, tajol maʼ cʼojoʼtan yicʼot miʼ yʌqʼueñet a chʼijiyemlel chaʼan maʼañic woliʼ mejlel a wʌqʼuen i ñuclel Jehová, jiñi Dios muʼ bʌ a cʼuxbin. Pero ¡chʼejlʼesan a bʌ! Muʼto mejlel a tojʼesan.

² Laʼ laj cʼajtesan chaʼan an ñujpuñijel xñoptʼañoʼ bʌ tsaʼ bʌ i ñusayob wocol, pero ili ora wen pʼʌtʌl añob. Tsiʼ tajayob chuqui yom bʌ miʼ melob chaʼan miʼ pʼʌtʼesañob i ñujpuñel. Jatet miʼ mejlel a taj jaʼel. Jiñi cʼajtiya jiñʌch: ¿Chuqui yom miʼ mejlel chaʼan tijicña miʼ yajñel jumpʼejl ñujpuñijel?

3, 4. ¿Chucoch ñumen temel miʼ mejlelob ti ajñel cheʼ bʌ miʼ chaʼleñob wersa i lʌcʼtesañob i bʌ ti Dios? Alʌ jumpʼejl ejemplo.

³ Cheʼ bʌ jiñi ñujpuñemoʼ bʌ miʼ chaʼleñob wersa i lʌcʼtesañob i bʌ ti Dios, miʼ ñumen lʌcʼtesañob i bʌ. Laʼ la cʌl jumpʼejl lajiya. Juntiquil wiñic waʼal tiʼ junwejlel jumpʼejl wits yicʼot juntiquil xʼixic waʼal ti yambʌ i junwejlel i mi caj i cʼʌjquelob majlel yaʼ tiʼ pam. Pero yʌñʌl baqui waʼalob tiʼ chaʼticlel. Ti jujuntiquil mi caj i techob cʼʌjquel majlel. ¿Chuqui  miʼ caj ti ujtel? Cʼunteʼ cʼunteʼ mi caj i lʌcʼtʌyelob cheʼ woliʼ letselob majlel tiʼ pam jiñi wits. ¿Bajcheʼ miʼ mejlel i coltañonla ili ejemplo?

⁴ Jiñi cʼʌjquel majlel ti wits, yom yʌl chaʼan jiñʌch cheʼ bʌ jiñi xñoptʼañob miʼ chaʼleñob wersa i melbeñob i yeʼtel Jehová yicʼot tiʼ pejtelelob i cuxtʌlel. Tajol jatet yicʼot a piʼʌl mi laʼ cʼuxbin Jehová i woli laʼ chaʼlen wersa laʼ cʼʌjquel majlel tiʼ pam jiñi wits. Pero mi mach temelic añetla, lajal bajcheʼ ñajt añetla i woli laʼ tech cʼʌjquel ti jiñi wits. ¿Chuqui miʼ mejlel ti ujtel mi woli laʼ bej cʼʌjquel majlel? Anquese ti ñaxan ñajt añetla yilal, pero mi woli laʼ chaʼlen wersa laʼ cʼʌjquel majlel, yom yʌl chaʼan woli laʼ lʌcʼtesan laʼ bʌ ti Dios i mi caj laʼ ñumen lʌcʼtesan laʼ bʌ. La cujilix: Chaʼan jiñi wiñic yicʼot xʼixic  lʌcʼʌl miʼ yajñelob yom miʼ lʌcʼtesañob i bʌ ti Dios. Pero ¿bajcheʼ mi caj i mejlelob?

5. a) ¿Bajcheʼ mi lac ñumen lʌcʼtesan lac bʌ ti Jehová yicʼot ti lac piʼʌl? b) ¿Bajcheʼ yilal miʼ qʼuel Jehová jiñi ñujpuñijel?

⁵ Junchajp yom bʌ miʼ melob chaʼan miʼ «cʼʌjquelob majlel» jiñʌch cheʼ miʼ jacʼob jiñi ticʼojel am bʌ ti Biblia (Salmo 25:4; Isaías 48:17, 18). Laʼ lac wen tsajin tsaʼ bʌ i yʌlʌ jiñi apóstol Pablo: «Yom mi laʼ qʼuel ti ñuc jiñi ñujpuñijel» (Hebreos 13:4, TNM). ¿Chuqui yom yʌcʼ ti ñaʼtʌntel jiñi? Laʼ lac ñaxan tsajin jiñi tʼan «qʼuel ti ñuc». Ili yom yʌl, wen cʼuxbibil bʌ yicʼot wen i tʼojol jax bʌ cheʼ bʌ tsaʼ ñaxan tsʼijbunti. Jin chaʼan, cheʼ bʌ miʼ cʼʌjñel ili tʼan miʼ pʌsbeñonla bajcheʼ yilal miʼ qʼuel Jehová jiñi ñujpuñijel: Bajcheʼ wen letsem bʌ i tojol.

6. Cheʼ tsaʼix laj qʼuele jiñi tʼan tsaʼ bʌ i yʌlʌ Pablo chaʼan jiñi ñujpuñemoʼ bʌ, ¿chuqui tsaʼ cʼoti lac chʼʌmben isujm yicʼot chucoch wen ñuc i cʼʌjñibal cheʼ chʌn cʼajal lac chaʼan?

⁶ Mi jatet yicʼot a wijñam woli laʼ melben i yeʼtel Dios, laʼ wujil chaʼan jiñi ñujpuñijel miʼ wen qʼuejlel ti ñuc yicʼot chʼujul come Jehová tsiʼ mele (pejcan Mateo 19:4-6). Jin chaʼan, mi an laʼ wocol ti laʼ ñujpuñijel, ¿jasʌl ba mi caj i coltañetla cheʼ miʼ laʼ ñaʼtan chaʼan miʼ qʼuejlel ti ñuc jiñi ñujpuñijel? Tajol anto yom bʌ miʼ ñumen ñijcañetla chaʼan mi laʼ cʼuxbin laʼ bʌ yicʼot mi laʼ qʼuel laʼ bʌ ti ñuc. ¿Baqui bʌ? Chaʼan mi laj cʌn bajcheʼ an i sujmlel, laʼ lac chaʼ qʼuel jiñi tʼan tsaʼ bʌ i yʌlʌ Pablo. Maʼañic tsiʼ yʌlʌ: «Jiñi ñujpuñijel jiñʌch miʼ qʼuejlel ti ñuc», tsaʼ bʌ i yʌcʼʌ ti ñaʼtʌntel jiñʌch chaʼan: «Jiñi ñujpuñijel yom miʼ qʼuejlel ti ñuc». Pablo mach woli jach i yʌl bajcheʼ yilal jiñi ñujpuñel, woliʼ yʌcʼ jumpʼejl mandar. * Yom mi lac chʼʌm ti ñuc ili mandar, come mi caj i coltañonla chaʼan mi lac ñumen cʼuxbin lac piʼʌl. ¿Chucoch mi la cʌl bajcheʼ jiñi?

7. a) ¿Baqui bʌ mandar mi lac tsʼʌctesan, i chucoch? b) ¿Chuqui bʌ wenlel mi lac taj cheʼ mi lac jacʼ jiñi mandar tac?

 ⁷ Laʼ lac ñaʼtan jumucʼ. ¿Bajcheʼ yilal maʼ qʼuel jiñi yan tac bʌ mandar baqui mi yʌl chaʼan mi lac sujtesan ti xñoptʼan jiñi wiñicob xʼixicob (quixtañujob) o mi lac tempan lac bʌ chaʼan mi lac chʼujutesan Dios? (Mateo 28:19; Hebreos 10:24, 25.) Woli lac tsʼʌctesan anquese wocol ti melol. Maʼ loqʼuel ti subtʼan anquese jiñi quixtañujob mach yomic i ñʌchʼtañob chaʼan jiñi Yumʌntel. Maʼ majlel ti tempa bʌ anquese wen lujbet chaʼan a weʼtel. Anquese an a wocol maʼañic maʼ cʌy subtʼan yicʼot jiñi tempa bʌ. Maʼañic maʼ wʌcʼ chaʼan chuqui jach miʼ mʌctañet mi jiñic to Satanás. ¿Chucoch? Come maʼ wen cʼuxbin Jehová tiʼ pejtelel a pusicʼal i jiñʌch muʼ bʌ i ñijcañet chaʼan maʼ jacʼben i mandar (1 Juan 5:3). ¿Chuqui bʌ wenlel maʼ taj cheʼ maʼ chaʼlen subtʼan yicʼot cheʼ maʼ tempan a bʌ? Maʼ taj a ñʌchʼtilel yicʼot i tijicñʌyel a pusicʼal come a wujil chaʼan woli a melben i yeʼtel Dios. Jin tacʌch muʼ bʌ i chaʼ pʼʌtʼesañet (Nehemías 8:10). ¿Chuqui mi laj cʌn ti jiñi tsaʼ bʌ laj qʼuele?

8, 9. a) ¿Chuqui miʼ ñijcañonla chaʼan mi laj qʼuel ti ñuc jiñi ñujpuñijel, i chucoch cheʼ yom mi lac mel? b) ¿Chuqui jiñi chaʼchajp muʼ bʌ caj laj cʌn?

⁸ Cheʼ bajcheʼ tsaʼ laj cʌñʌ, jiñi cʼuxbiya ti Dios jiñʌch muʼ bʌ i ñijcañonla chaʼan mi lac jacʼ jiñi mandar chaʼan subtʼan yicʼot cheʼ mi lac tempan lac bʌ anquese mi lac taj cabʌl wocol. Jiñi cʼuxbiya jiñʌch miʼ ñijcañonla jaʼel chaʼan mi lac jacʼ jiñi ticʼojel am bʌ ti Biblia chaʼan mi lac chaʼlen wersa «[laj] qʼuel ti ñuc jiñi ñujpuñijel», anquese wocol mi laj qʼuel (Hebreos 13:4, TNM; Salmo 18:29; Eclesiastés 5:4). Cheʼʌch bajcheʼ miʼ yʌcʼ bendición cheʼ mi lac chaʼlen subtʼan yicʼot cheʼ mi lac tempan lac bʌ, mi caj i yʌqʼueñonla i bendición jaʼel cheʼ mi lac pʌs chaʼan mucʼʌch laj qʼuel ti ñuc jiñi ñujpuñijel (1 Tesalonicenses 1:3; Hebreos 6:10).

⁹ Jin chaʼan, ¿bajcheʼ miʼ mejlel i cʼotel laj qʼuel ti ñuc jiñi ñujpuñijel? Ñaxan, mach yomic mi lac mel muʼ bʌ i mejlel  i jem, i chaʼchajplel, yom mi lac chaʼlen wersa chaʼan mi lac pʼʌtʼesan.

10, 11. a) ¿Chuqui miʼ jisʌben i cʼʌjñibal jumpʼejl ñujpuñijel? b) ¿Chuqui yom bʌ miʼ cʼajtiben i piʼʌl jiñi ñujpuñem bʌ?

¹⁰ Añix ñumen cabʌl ora, juntiquil hermana tsiʼ yʌlʌ: «Mij cʼajtiben Jehová chaʼan miʼ coltañon c lʌtʼ». ¿Chuqui yom bʌ miʼ lʌtʼ? Jiñʌch tsiʼ chaʼ tsictesa: «Jiñi c ñoxiʼal miʼ lowon tiʼ tʼan. Tic bʌcʼtal maʼañic c lojweñal, pero tic pusicʼal cabʌl c lojweñal, ti jujumucʼ miʼ subeñon: ‹Maʼañic chuqui a cʼʌjñibal›». Tsaʼ bʌ i ñusa ili hermana miʼ cʼajtesʌbeñonla jumpʼejl tsʌts bʌ wocol: Jiñi ticʼlaya ti lac tʼan yaʼ ti ñujpuñijel.

¹¹ ¡Chʼijiyemtic jax cheʼ bʌ jumpʼejl xñujpuñijel xñoptʼañoʼ bʌ miʼ subeñob i bʌ cʼux tac bʌ tʼan wocol bʌ ti chaʼ tsʼʌcʌntel! Muʼ bʌ i cʼʌñob tʼan bajcheʼ jiñi maʼañic woliʼ qʼuelob ti ñuc i ñujpuñijel. ¿Ixcu jatet, bajcheʼ yilal an a ñujpuñijel? Chaʼan maʼ ñaʼtan, cʼajtiben ti a pecʼlel jiñi a piʼʌl: «¿Bajcheʼ yubil maʼ wubin muʼ bʌ c subeñet?». Mi tsiʼ subeyet chaʼan an i tajol maʼ low, yom maʼ chaʼlen wersa a qʼuextan bajcheʼ muqʼuet ti tʼan (Gálatas 5:15; pejcan Efesios 4:31).

12. ¿Bajcheʼ miʼ mejlel ti sajtel i cʼʌjñibal jiñi lac chʼujutesaya ti Dios?

¹² Mi mach utsʼatic bajcheʼ mi lac pejcan lac piʼʌl, mach utsʼatic mi caj la cajñel la quicʼot Jehová. Jiñi i tʼan Dios mi yʌl: «Jiñi muʼ bʌ i lon ñaʼtan utsʼat woliʼ chʼujutesan Dios cheʼ maʼañic miʼ ticʼ i yacʼ, woli jach i ñop lot. Tontojʌch. Miʼ lon sub i bʌ ti hermano» (Santiago 1:26). Mach yomic mi lac ñaʼtan chaʼan mach yaʼic ochen ti lac chʼujutesaya ti Jehová jiñi muʼ bʌ la cʌl. Cheʼ bajcheʼ mi yʌl jiñi Biblia, mach weñic cheʼ mi lac ñaʼtan chaʼan mi woli lac chʼujutesan Dios mi la cʌl, maʼañic i wocolel chaʼan chuqui muʼ bʌ lac mel ti la cotot. Mach lac lotin lac bʌ: Wen ñucʌch i cʼʌjñibal jaʼel (pejcan 1 Pedro 3:7). Juntiquil quixtañu miʼ mejlel i pʌs chaʼan  wen chʼejl ti congregación. Pero mi woliʼ cʼʌn tsʌts bʌ tʼan tiʼ yotot, woliʼ pʌs chaʼan maʼañic miʼ qʼuel ti ñuc i ñujpuñijel i maʼañic i cʼʌjñibal mi caj i qʼuel Dios jiñi i chʼujutesaya.

13. ¿Bajcheʼ miʼ mejlel i low i piʼʌl juntiquil xñoptʼan?

¹³ Jiñi ñujpuñemoʼ bʌ yom tsajilob chaʼan maʼañic miʼ lowob i piʼʌl cheʼ mach cheʼic ñaʼtʌbil i chaʼañob. Laʼ laj qʼuel chaʼpʼejl ejemplo. Juntiquil ñaʼʌl i bajñel jach bʌ miʼ wen julaʼtan juntiquil tatʌl am bʌ yaʼ tiʼ congregación chaʼan miʼ cʼajtiben ticʼojel, i wen jal miʼ chaʼleñob tʼan. Yambʌ, juntiquil hermana ñujpuñem bʌ miʼ wen chaʼlen subtʼan ti jujumpʼejl semana yicʼot juntiquil hermano i bajñel jax to bʌ. Jiñi tatʌl yicʼot jiñi hermana tsaʼ bʌ ujti laj cʌl, tajol weñʌch chuqui woli bʌ i melob, pero ¿bajcheʼ yubil woliʼ yubiñob i bʌ jiñi i piʼʌl? Juntiquil hermana choncol bʌ i ñusan bajcheʼ jiñi tsiʼ yʌlʌ: «Miʼ yʌqʼueñon c chʼijiyemlel cheʼ mij qʼuel chaʼan jiñi c ñoxiʼal cabʌl ora miʼ pejcan juntiquil hermana yaʼ ti congregación. Miʼ yʌqʼueñon cubin c bʌ chaʼan maʼañic j cʼʌjñibal».

14. a) Cheʼ bajcheʼ mi yʌl Génesis 2:24, ¿chuqui yom miʼ melob jiñi ñujpuñemoʼ bʌ? b) ¿Chuqui jiñi yom bʌ miʼ cʼajtibeñob i bʌ?

¹⁴ Wen tsiquil chaʼan jiñi hermana tsaʼʌch lojwi tsiʼ yubi i bʌ. Cheʼ miʼ yujtel jaʼel tiʼ tojlel jiñi woli bʌ i qʼuel chaʼan jiñi i piʼʌl woliʼ ñusan ti pʼis jiñi mandar aqʼuebil bʌ i chaʼan Dios jiñi ñujpuñemoʼ bʌ: «Jiñi chaʼan wiñicob miʼ cʌyob i tat i ñaʼ. Miʼ chʌn ajñelob yicʼot i yijñam. Jiñi chaʼtiquil miʼ yochelob ti juntiquil jach» (Génesis 2:24). ¿Yom ba yʌl ili versículo chaʼan cheʼ bʌ miʼ ñujpuñelob maʼañix mi caj i chʌn qʼuelob chuqui yomob i tat i ñaʼ? Mach cheʼiqui. Yom yʌl chaʼan ti jiñi bʌ ora jiñʌch mi caj i ñaxan qʼuel chuqui yom bʌ i piʼʌl. Cheʼ miʼ yujtel jaʼel tiʼ tojlel jiñi hermanojob tiʼ congregación: Anquese miʼ wen cʼuxbiñob, pero jiñi ñaxam bʌ mi caj i chʼʌm tiʼ wenta jiñʌch i piʼʌl. Jin chaʼan, mi woliʼ wen ñusan cabʌl ora yicʼot juntiquil hermano o hermana mach bʌ i piʼʌlic, mi caj i chʼʌm tilel wocol tiʼ yotot. Cʼajtiben a bʌ: «¿Jimba tiʼ caj chaʼan an wocol ti cotot? ¿Muʼ ba c ñusan  cabʌl ora quicʼot c piʼʌl, mij qʼuel chuqui yom yicʼot mic wen cʼuxbin cheʼ bajcheʼ yom?».

15. Cheʼ bajcheʼ mi yʌl Mateo 5:28, ¿chucoch jiñi ñujpuñemoʼ bʌ mach yomic miʼ cʌlʌx pejcañob yambʌ mach bʌ i piʼʌlic?

¹⁵ Cheʼ jaʼel, cheʼ bʌ juntiquil ñujpuñem bʌ miʼ wen pejcan yambʌ mach bʌ i piʼʌlic i miʼ wen ñochtan cheʼ bajcheʼ i piʼʌl, woliʼ yotsan i bʌ ti wocol. Anquese mach laj comic  laj cʌl, pero an xñoptʼañob añʌch bʌ i meleyob i miʼ cʼotel i mulañob i bʌ (Mateo 5:28). Cheʼ jaʼel, an i pʌsʌyob chaʼan maʼañic miʼ qʼuelob ti ñuc i ñujpuñijel. Laʼ laj qʼuel chuqui tsiʼ yʌlʌ jiñi apóstol Pablo chaʼan ili.

16. ¿Chuqui bʌ ticʼojel tsiʼ yʌcʼʌ Pablo cheʼ bʌ tsiʼ taja ti tʼan chaʼan jiñi ñujpuñijel?

¹⁶ Cheʼ bʌ Pablo tsiʼ yʌlʌ chaʼan «yom miʼ qʼuejlel ti ñuc jiñi ñujpuñijel», tsiʼ yʌcʼʌ jaʼel jiñi ticʼojel chaʼan «yaʼ tiʼ wʌyib ñujpuñemoʼ bʌ mach yomic an i bibiʼlel, come Dios miʼ caj i mel jiñi muʼ bʌ i chaʼleñob tsʼiʼlel yicʼot jiñi muʼ bʌ i piʼleñob yambʌ mach bʌ ñujpuñemic yicʼot» (Hebreos 13:4, TNM). Ti ili texto, jiñi tʼan «tiʼ wʌyib ñujpuñemoʼ bʌ» woliʼ yʌcʼ ti ñaʼtʌntel chaʼan jin cheʼ miʼ piʼleñob i bʌ. Chaʼan «mach yomic an i bibiʼlel» jiñi piʼleya, o sʌc miʼ yajñel, cojach yom miʼ mejlel ti jumpʼejl ñujpuñijel, cheʼ bajcheʼ mi yʌl ili tʼan: «Yom tijicñayet a wicʼot a wijñam tsaʼ bʌ a pʌyʌ cheʼ chʼitoñet to» (Proverbios 5:18).

17. a) ¿Chucoch mach lajalic yom mi laj qʼuel bajcheʼ miʼ qʼuel jiñi wiñicob cheʼ bʌ juntiquil miʼ piʼlen yambʌ mach bʌ ñujpuñemic yicʼot? b) ¿Bajcheʼ yom mi lac lajin jiñi ejemplo i chaʼan Job?

¹⁷ Jiñi muʼ bʌ i piʼlen yambʌ mach bʌ ñujpuñemic yicʼot, maʼañic woliʼ qʼuel ti ñuc jiñi mandar tac tsaʼ bʌ i yʌcʼʌ Dios chaʼan jiñi piʼleya. Anquese cabʌl quixtañu ila ti pañimil (mulawil) weñʌch miʼ qʼuelob, pero jiñi isujm bʌ xñoptʼañonla mach cheʼic yom mi laj qʼuel bajcheʼ miʼ qʼuel jiñi wiñicob. La cujil chaʼan «Dios [jiñʌch] miʼ caj i mel jiñi muʼ bʌ i chaʼleñob tsʼiʼlel yicʼot jiñi muʼ bʌ i piʼleñob yambʌ mach bʌ ñujpuñemic yicʼot», mach juntiquilic wiñic (Hebreos 10:31; 12:29). Jin chaʼan mi laj qʼuel ti ñuc i mandar Jehová (pejcan Romanos 12:9). Mi lac lajin jiñi Job, tsaʼ bʌ i yʌlʌ: «Tsaʼix c mele trato yicʼot c wut» (Job 31:1). Mi la cʌcʼ lac tʼan chaʼan maʼañic mi caj laj qʼuel chaʼan mi lac mulan  yambʌ xʼixic o wiñic mach bʌ jiñic lac piʼʌl. Cheʼ bajcheʼ jiñi, woli lac ticʼ lac bʌ chaʼan maʼañic mi lac mel muʼ bʌ mejlel i pʌyonla chaʼan mi lac piʼlen yambʌ mach bʌ ñujpuñemic la quicʼot (qʼuele jiñi apéndice «¿Chuqui mi yʌl jiñi Biblia chaʼan jiñi divorcio yicʼot cʌy bʌ?»).

18. a) ¿Bajcheʼ yilal bʌ mulil miʼ qʼuel Jehová cheʼ bʌ juntiquil miʼ piʼlen yambʌ mach bʌ ñujpuñemic yicʼot? b) ¿Bajcheʼ lajal jiñi piʼleya yicʼot yambʌ mach bʌ i piʼʌlic yicʼot i chʼujutesʌntel diosteʼ?

¹⁸ ¿Bajcheʼ yilal bʌ mulil miʼ qʼuel Jehová cheʼ bʌ juntiquil miʼ piʼlen yambʌ mach bʌ ñujpuñemic yicʼot? Jiñi Mandar tsaʼ bʌ i yʌqʼue Moisés miʼ yʌcʼ ti ñaʼtʌntel bajcheʼ yilal miʼ qʼuel jiñi, come cheʼ bʌ juntiquil israel bʌ miʼ piʼlen yambʌ mach bʌ ñujpuñemic yicʼot o miʼ chʼujutesan diosteʼ tac, yom miʼ tsʌnsʌntel (Levítico 20:2, 10). ¿Bajcheʼ lajal jiñi chaʼpʼejl mulil? Come tiʼ chaʼpʼejlel an chuqui cʼax ñuc bʌ miʼ ñusañob ti chan: Cheʼ miʼ chʼujutesañob jiñi diosteʼ tac miʼ jejmel jiñi trato tsaʼ bʌ i meleyob yicʼot Jehová i cheʼ bʌ juntiquil miʼ piʼlen yambʌ mach bʌ ñujpuñemic yicʼot miʼ jejmel jaʼel jiñi trato yicʼot jiñi i piʼʌl. Tiʼ chaʼpʼejlel miʼ yujtel jumpʼejl lot (Éxodo 19:5, 6; Deuteronomio 5:9; pejcan Malaquías 2:14). Tiʼ chaʼpʼejlel jiñi mulil miʼ tojtʌl ti Jehová, jiñi xucʼul bʌ Dios yicʼot muʼ bʌ i mejlel ti ñopbentel chuqui mi yʌl (Salmo 33:4).

19. ¿Chuqui mi caj i coltañonla laj cʌl ti lac pusicʼal chaʼan maʼañic mi caj lac piʼlen yambʌ mach bʌ jiñic ñujpuñem la quicʼot, i chucoch?

¹⁹ Joñonla maʼañic mi lac xijqʼuel chaʼan mi lac jacʼ jiñi i Mandar Moisés bajcheʼ tiʼ yorajlel israelob. Pero yom mi laj cʼajtesan chaʼan jiñi mandar wen tsiquil tsiʼ yʌlʌ baqui bʌ i tojol cheʼ bʌ juntiquil miʼ piʼlen yambʌ mach bʌ ñujpuñemic yicʼot. ¿Chucoch? Come mi caj i coltañonla chaʼan maʼañic mi lac wis yajlel ti ili mulil. Laʼ laj cʌl jumpʼejl lajiya. ¿Muʼ ba caj a wochel ti jumpʼejl templo i maʼ ñoctʌl a chʼujutesan jumpʼejl imagen? Tajol mi caj a wʌl: «Maʼañic baʼ ora». Pero ¿ixcu muqʼuic a wʌqʼuentel cabʌl taqʼuin? «¡Yom cu!», cheʼ mi caj a wʌl. Cheʼʌch miʼ yujtel, come jiñi isujm bʌ xñoptʼañonla mach utsʼatic mi laj cubin chaʼan mi laj cʌy Jehová cheʼ mi lac chʼujutesan jumpʼejl diosteʼ. I cheʼ miʼ  mejlel ti ujtel jaʼel cheʼ bʌ juntiquil miʼ tilel tiʼ pensar chaʼan miʼ cʌy Jehová o tajol jiñi i piʼʌl chaʼan miʼ piʼlen yambʌ mach bʌ ñujpuñemic yicʼot, mach yʌlʌl chuqui woliʼ ñijcan i mel bajcheʼ jiñi (Salmo 51:1, 4; Colosenses 3:5). Mach comic la cʌqʼuen i tijicñʌyel Satanás i mi la cʌqʼuen i chʼijiyemlel Jehová yicʼot chaʼan mach chʼujulix mi la cʌcʼ ti qʼuelol jiñi ñujpuñijel.

20. Tsictesan yicʼot jumpʼejl lajiya chuqui tac ujtem ti jiñi ñujpuñijel.

²⁰ Chaʼan miʼ ñumen qʼuelob i bʌ ti ñuc, mach jasʌlic chaʼan maʼañic miʼ melob jiñi mach bʌ utsʼatic chaʼan tiʼ ñujpuñijelob. ¿Chuqui yambʌ yom miʼ melob? Chaʼan mi lac jacʼ ili cʼajtiya, laʼ lac lajin jiñi ñujpuñijel bajcheʼ jumpʼejl otot. ¿Chuqui muʼ bʌ i mejlel i chʼʌl? Junchajp jiñʌch jiñi uts bʌ tʼan, cheʼ miʼ pʌsbeñob i bʌ cʼuxbiya yicʼot cheʼ miʼ qʼuelob ti ñuc. Cheʼ bʌ wen temel añob tiʼ chaʼticlel, miʼ mejlel la cʌl chaʼan cabʌl chuqui miʼ chʼʌl yicʼot miʼ yʌqʼuen i yutsʼatlel jiñi otot. Pero mi maʼañic miʼ wen cʼuxbiñob i bʌ, jiñi i chʼʌjlil tac xucʼu xucʼul mi caj i jilel i cojach miʼ caj ti cʌytʌl jiñi chʼijiyemlel. Jatet mach cheʼic a wom miʼ yujtel bajcheʼ jiñi. A wom chaʼan jiñi a ñujpuñijel «miʼ qʼuejlel ti ñuc», cheʼʌch bajcheʼ miʼ cʼajtin Dios. La cujilix chaʼan weñʌch bajcheʼ melbil i la com chaʼan mi lac chaʼ tojʼesan. Jin chaʼan, mi woliʼ jejmel majlel maʼ qʼuel, mi caj a sajcan bajcheʼ maʼ tojʼesan. Jiñi i Tʼan Dios mi yʌl: «Wen ñaʼtʌntel yom chaʼan miʼ wen xucʼtʌl lac chumlib. Xucʼul miʼ yajñel i yotot jiñi yujil bʌ i melol. Wen ñaʼtʌntel yom chaʼan mi la cotsʌben i bʌl la cotot tiʼ pejtelel chuqui tac yom lac pusicʼal letsem tac bʌ i tojol» (Proverbios 24:3, 4). Laʼ lac tsajin bajcheʼ miʼ mejlel laj cʼʌn ili tʼan ti jiñi ñujpuñijel.

21. ¿Bajcheʼ miʼ mejlel lac pʼʌtʼesan majlel jiñi lac ñujpuñijel? (Qʼuele jaʼel jiñi recuadro « ¿Bajcheʼ miʼ mejlel c pʼʌtʼesan c ñujpuñijel?»)

²¹ Jiñi «letsem tac bʌ i tojol» an tac bʌ ti jiñi familia jiñʌch isujm bʌ cʼuxbiya, bʌqʼuen ti Dios yicʼot jiñi xucʼul  bʌ lac ñopoñel (Proverbios 15:16, 17; 1 Pedro 1:7). Ili tac yicʼot yan tac bʌ lac melbal miʼ mejlel i pʼʌtʼesan jiñi ñujpuñijel. Pero ¿tsaʼ ba a qʼuele ti Proverbios 24:4 bajcheʼ miʼ mejlel i pʼʌtʼesʌntel jiñi ñujpuñijel ti chuqui «letsem tac bʌ i tojol»? Yicʼot «wen [bʌ] ñaʼtʌntel». Jin chaʼan, jiñi yomoʼ bʌ i tojʼesan i melbal yicʼot i pʼojlesañob i cʼuxbiya yom miʼ tajob i ñaʼtʌbal yaʼ ti Biblia, cheʼ jiñi, miʼ jacʼob (Romanos 12:2; Filipenses 1:9). Yom miʼ pejcañob ti tijicña jiñi texto muʼ bʌ i pejcʌntel ti jujumpʼejl qʼuin o jumpʼejl cʌntesʌntel chaʼan ñujpuñemoʼ bʌ am bʌ yaʼ ti La Atalaya o ti jiñi ¡Despertad! muʼ bʌ caj i coltañob i cʌn baqui bʌ jiñi «letsem tac bʌ i tojol» i cʼʌjñibal bʌ chaʼan miʼ chʼʌlob i familia. Ti wiʼil yom miʼ yotsañob jiñi chʼʌjlibʌl yaʼ tiʼ mal i ‹yotot›. Ili yom yʌl, chaʼan jiñi i cʼuxbiyajob ti Jehová mi caj i ñijcañob chaʼan miʼ jacʼob jiñi ticʼojel tsaʼix bʌ i chajpayob. Cheʼ bajcheʼ jiñi, mi caj i mejlel i chaʼ tajob jiñi tijicñʌyel bajcheʼ ti ñaxan.

22. ¿Baqui bʌ tijicñʌyel miʼ tajob jiñi muʼ bʌ i chaʼleñob wersa i tsʼʌctesan jiñi yom bʌ miʼ melob chaʼan miʼ pʼʌtʼesañob i ñujpuñijel?

²² Tiʼ sujm, mach ti orajic miʼ mejlel lac chaʼ taj tiʼ pejtelel i chʼʌjlil tac jiñi otot. Pero jiñi xñoptʼañob muʼ bʌ i chaʼleñob wersa i tsʼʌctesan yom bʌ miʼ melob, mi caj i tajob cabʌl i tijicñʌyel: Jiñi tijicñʌyel chaʼan woliyʌch i jacʼob jiñi mandar am bʌ ti Biblia cheʼ yom miʼ pʌsob chaʼan miʼ qʼuelob i bʌ ti ñuc (Romanos 12:10; Salmo 147:11). Mi woliyʌch i chaʼleñob wersa i qʼuelob ti ñuc jiñi i ñujpuñijel mi caj i chʌn ajñelob tiʼ cʼuxbiya Dios.