1, 2. ¿Chuqui tsiʼ mele Balaam chaʼan miʼ yotsan ti wocol i tejclum Jehová?

JIÑI xchuc chʌy miʼ majlel ti lucbʌl yaʼ baqui ñʌmʌl i chuc jiñi chʌy muʼ bʌ i mulan. Miʼ wen yajcan chuqui ti weʼel mi caj i cʼʌn, cheʼ jiñi miʼ choc ochel i lucojib yaʼ ti jaʼ. Cheʼ bʌ miʼ qʼuel chaʼan jiñi chʌy wolix (choncolix) i tujcʼan jiñi lucojib, ti ora jach miʼ tujcʼan loqʼuel chaʼan miʼ chuc jiñi chʌy. Tiʼ tijicñʌyel miʼ suben i bʌ chaʼan weñʌch tsiʼ yajcʌbe i weʼel jiñi chʌy.

² Cheʼ ti jabil 1473 cheʼ bʌ maxto tilem Cristo, an juntiquil wiñic tsaʼ bʌ i wen yajca jaʼel jiñi weʼelʌl pero mach chaʼañic miʼ chuc chʌy. I cʼabaʼ Balaam, yom tsiʼ yʌlʌ chaʼan jiñi i tejclum Dios, yaʼ bʌ jijlemob ti jiñi joctʌl i cʼabaʼ Moab lʌcʼʌl bʌ an ti jiñi Lum tsaʼ bʌ wʌn Subentiyob, miʼ yajlelob jaʼel ti jiñi yac. Anquese tsiʼ ñaʼta ochel ti xʼaltʼan i chaʼan Jehová, pero jiñʌch juntiquil xlot tsaʼ bʌ i wen mulaj chuqui yom tiʼ bajñelil i tsaʼ bʌ tojle chaʼan miʼ pʼaj jiñi israelob. Balaam chʼijiyem tsiʼ yubi i bʌ, come Jehová tsiʼ mʌcta yicʼot tsiʼ sube chaʼan yom miʼ yʌqʼuen i bendición jiñi israelob. Pero maʼañic tsiʼ jacʼʌ come tsiʼ ñaʼta i tojol tsaʼ bʌ subenti. Tsiʼ ñaʼta chaʼan mi tsiʼ yʌcʼʌyob ti yajlel ti tsʌts bʌ mulil, Dios mi caj i cʌyob. ¿Chuqui ti yac tsiʼ cʼʌñʌ? Jiñi lecax bʌ xchʼocob yaʼ ti Moab (Números 22:1-7; 31:15, 16; Apocalipsis 2:14).

3. ¿Bajcheʼ cʼamel tsaʼ cʼʌjñibʌyi i yac Balaam?

³ ¿Tsaʼ ba yajliyob jiñi israelob tiʼ yac Balaam? Tsaʼʌch, come cabʌl mil «tsaʼ caji i melob i tsʼiʼlel yicʼot xʼixicob añoʼ bʌ ti  Moab». Tsaʼ cajiʼ chʼujutesañob i dios moabob, bajcheʼ jiñi Baal de Peor, dios bʌ chaʼan jiñi piʼleya. Chaʼan i tojolob i mul, 24,000 wiñicob xʼixicob (quixtañujob) tsaʼ chʌmiyob cheʼ bʌ lʌcʼʌlix mi caj i yochelob ti jiñi Lum tsaʼ bʌ wʌn Subentiyob. ¡Wen bʌbʌqʼuen jax jiñi tsaʼ bʌ ujti! (Números 25:1-9.)

4. ¿Chucoch tsaʼ yajliyob ti tsʼiʼlel cabʌl israelob?

⁴ ¿Chucoch tsaʼ ujti bajcheʼ jiñi? Tiʼ caj chaʼan bajcheʼ añob i pusicʼal cabʌl israelob. Mach weñic chuqui tsaʼ caji i melob cheʼ bʌ tsiʼ ñajtʼesayob i bʌ ti Jehová, tsaʼ ñajʌyi i chaʼañob bajcheʼ tsaʼ coltʌntiyob loqʼuel ti Egipto, cheʼ tsaʼ aqʼuentiyob i bʌl i ñʌcʼ yaʼ tiʼ tiquiñal lum i maʼañic chuqui tsiʼ chaʼleyob cʼʌlʌl cheʼ bʌ tsaʼ cʼotiyob ti jiñi Lum tsaʼ bʌ wʌn Subentiyob (Hebreos 3:12). Jiñi apóstol Pablo wen cʼajal i chaʼan jiñi cheʼ bʌ tiʼ tsʼijbu ili tʼan: «Mach yomic mi laʼ chaʼlen tsʼiʼlel cheʼ bajcheʼ tsiʼ chaʼleyob lamital. Tsaʼ chʌmiyob uxpʼejl i chaʼcʼal ti mil [23,000] ti jumpʼejl jach qʼuin» (1 Corintios 10:8). *

5, 6. ¿Chuqui miʼ cʌntesañonla jiñi mulil tsaʼ bʌ i mele israelob yaʼ ti joctʌl i cʼabaʼ Moab?

⁵ Jiñi i wiñicob Jehová ili ora cheʼ añob jaʼel bajcheʼ mi yʌl yaʼ ti Números. Lʌcʼʌlix chaʼan mi la cochel ti jiñi Lum wʌn Subebilonbʌlʌ jaʼel, mach bʌ lajalic bajcheʼ ti wajali (1 Corintios 10:11). Chumulonla ti jumpʼejl pañimil (mulawil) baqui  miʼ wen mulañob piʼleya (sexo), pero ñumento bajcheʼ jiñi moabob. Cheʼ jaʼel, jiñi tsʼiʼlel jiñʌch muʼ bʌ i yʌnsan ti jujumpʼejl jab cabʌl mil xñoptʼañob, cheʼ bajcheʼ tsiʼ yʌnsa jiñi israelob (2 Corintios 2:11). Lajal bajcheʼ Zimrí, maʼañic bʌ tsiʼ chaʼle quisin cheʼ bʌ tsiʼ pʌyʌ cʼotel juntiquil xchʼoc chʼoyol bʌ ti Madián yaʼ baqui jijlemob i tsiʼ pʌyʌ ochel yaʼ ti pisil bʌ i yotot, cheʼ jaʼel yaʼ ti congregación an mach bʌ weñic miʼ pʌsob i melbal (Números 25:6, 14; Judas 4).

⁶ Laʼ laj cʼajtiben lac bʌ: «¿Muʼ ba j qʼuel c bʌ yaʼ ti ‹joctʌl i chaʼan Moab› ti ili ora? ¿Muʼ ba j qʼuel jiñi majtañʌl woli (yʌquel) bʌ c pijtan chaʼan jiñi tsijiʼ bʌ pañimil?». Mi cheʼʌchi, laʼ lac chaʼlen wersa chaʼan mi lac chʌn ajñel tiʼ cʼuxbiya Dios yicʼot chaʼan mi lac jacʼ ili mandar: «Putsʼtanla tsʼiʼlel» (1 Corintios 6:18).

7, 8. ¿Chuqui yom yʌl ti Biblia jiñi tʼan tsʼiʼlel, i bajcheʼ miʼ tajbeñob i wocolel muʼ bʌ i melob jiñi?

⁷ Ti jiñi Biblia, ¿chuqui i sujmlel jiñi tʼan «tsʼiʼlel»? Tiʼ tojlel jiñi xchʼolob jiñʌch jumpʼejl tʼan wocol bʌ ti jamʌl tsictesʌntel tiʼ caj quisin, pero yom miʼ tsictesʌntel ti wen chaʼan maʼañic majqui miʼ mel jiñi muʼ bʌ i tsʼaʼlen Dios. Cheʼ bʌ jiñi Biblia tsaʼ ñaxan tsʼijbunti ti griego, tsaʼ cʼʌjñi jiñi tʼan pornéia, ili yom yʌl tiʼ pejtelel jiñi piʼleya mach bʌ utsʼatic tiʼ wut Dios, mach bʌ cheʼic miʼ mejlel cheʼ bajcheʼ miʼ mulan Dios ti jumpʼejl ñujpuñijel. Yaʼ ochem jiñi muʼ bʌ i piʼlen mach bʌ jiñic ñujpuñem yicʼot, jiñi muʼ bʌ i piʼleñob i bʌ cheʼ mach ñujpuñemobic, muʼ bʌ i choñob i bʌ, jiñi mach bʌ ñujpuñemobic muʼ bʌ i cʼʌñob i yej (tiʼ) chaʼan miʼ tʌlbeñob i bʌ jiñi aqʼuebiloʼ bʌ chaʼan miʼ piʼleñob i bʌ, jiñi muʼ bʌ i chaʼleñob piʼleya tiʼ yit, jiñi muʼ bʌ i tʌlbeñob i bʌ jiñi aqʼuebiloʼ bʌ chaʼan miʼ piʼleñob i bʌ, jiñi muʼ bʌ i wʌlʌc piʼleñob i bʌ yicʼot jiñi muʼ bʌ i piʼleñob juncojt añimal. *

 ⁸ Jiñi Tsʼijbujel jamʌ tsiquil mi yʌl: Jiñi muʼ bʌ i melob tsʼiʼlel maʼañic mi caj i tajob i cuxtʌlel maʼañic bʌ miʼ jilel (1 Corintios 6:9; Apocalipsis 22:15). Ili ora miʼ tajob cabʌl wocol. Maʼañic miʼ mejlelob ti chʌn ajñel ti congregación. Miʼ wen ujtel leto (aʼleya tʼan) tiʼ ñujpuñijelob, jiñi xʼixic miʼ taj i yalobil anquese mach cheʼic ñaʼtʌbil i chaʼan, cʼamʌjel tac muʼ bʌ i toybeñob i bʌ muʼ bʌ i mejlel i tsʌnsañob, mach cojach miʼ sʌtob i tijicñʌyel i conciencia, maʼañix mi caj i qʼuejlelob ti sʌc yicʼot maʼañix mi caj i ñopbentelob chuqui miʼ yʌlob (pejcan Gálatas 6:7, 8). ¿Am ba i cʼʌjñibal cheʼ mi lac yajcan lac mel muʼ bʌ i yʌqʼueñonla wocol? Chʼijiyemtic jax cheʼ an cabʌl maʼañic bʌ miʼ ñaʼtañob i wocolel chuqui miʼ tech i melob, junchajp jiñʌch jiñi pornografía.

9. ¿Mach ba muqʼuic i mejlel i bibʼesan lac pensar jiñi pornografía, cheʼ bajcheʼ miʼ yʌlob yañoʼ bʌ? Tsictesan a jacʼbal.

⁹ Ti cabʌl país, jiñi pornografía cabʌl baqui miʼ tajtʌl: Baqui miʼ chojñel revista tac, ti cʼayʌl tac, ti programa tac chaʼan televisión yicʼot ti cabʌl página chaʼan Internet. * ¿Maʼañic ba miʼ mejlel i bibʼesan lac pensar cheʼ bajcheʼ miʼ yʌjlel? Mucʼʌch. Cheʼ bʌ miʼ melob bajcheʼ jiñi, miʼ mejlelob ti yajlel ti masturbación i miʼ tech i mulañob «quisintic jax bʌ i colosojlel [o tsuculel] i pusicʼal». Miʼ mejlel la cʌl chaʼan cojax mi caj i wen mulañob piʼleya yicʼot mi caj i wen acʼob tiʼ pensar chuqui tac bibiʼ bʌ, miʼ tejchel wocol tiʼ ñujpuñelob o miʼ chaʼleñob i bʌ ti divorciar (Romanos 1:24-27; Efesios 4:19). * Juntiquil yujil bʌ chaʼan ili temaj, tsiʼ yʌlʌ chaʼan jiñi i wen mulʌntel piʼleya lajal bajcheʼ cáncer: «Miʼ bej pʼojlel majlel i bixetic jach miʼ mejlel ti cʌyol, jin chaʼan wocol tiʼ jisʌntel».

10. ¿Bajcheʼ miʼ mejlel laj cʼʌn jiñi principio yaʼ bʌ an ti Santiago 1:14, 15? (Qʼuele jiñi recuadro « Tsaʼ c taja c pʼʌtʌlel chaʼan sʌc mi cajñel».)

 ¹⁰ Yom cʼajal lac chaʼan jiñi muʼ bʌ i yʌl Santiago 1:14, 15: «Cheʼ an majqui woliʼ pʌjyel ti mulil, jiñʌch i colosojlel [o tsuculel] i pusicʼal muʼ bʌ i pʌy, muʼ bʌ i xicʼ. I colosojlel [o tsuculel] i pusicʼal miʼ colel tiʼ pusicʼal. Miʼ ñijcan ti mulil. Cheʼ tsaʼix pʼojli mulil miʼ yʌcʼ ti chʌmel». Chaʼan maʼañic miʼ yujtel bajcheʼ jiñi, ¿chuqui yom mi lac mel cheʼ bʌ miʼ tilel lac tsucul pensar? Yom mi lac ñaʼtan chuqui mi caj lac mel i ti orajach yom mi lac locʼsan ti lac pensar. Jumpʼejl ejemplo, cheʼ bʌ mi lac taj laj qʼuel chuqui tac bibiʼ, ¿chuqui mi caj lac mel? Ti ora yom mi lac tʌtsʼ (yʌn) lac wut, mi lac yʌp jiñi computadora o mi laj qʼuextan jiñi canal chaʼan televisión... Jiñʌch chuqui jach miʼ mejlel lac mel chaʼan maʼañic mi laj qʼuel chuqui bibiʼ  bʌ yicʼot chaʼan maʼañic miʼ yʌsañonla ti wocol (pejcan Mateo 5:29, 30).

11. Cheʼ bʌ miʼ tilel bibiʼ tac bʌ ti lac pensar, ¿bajcheʼ mi lac pʌs chaʼan mucʼʌch lac ñop ti Jehová?

¹¹ Jehová ñumen i cʌñʌyonla cheʼ bajcheʼ ti lac bajñelil. Jin chaʼan miʼ subeñonla: «Chocola pejtelel [...] am bʌ ti laʼ pusicʼal: laʼ tsʼiʼlel, laʼ bibiʼlel, laʼ jontolil, i colosojlel [o tsuculel] laʼ pusicʼal, yicʼot i tsʼiʼlel laʼ wut, come lajal i tsʼiʼlel lac wut bajcheʼ i chʼujutesʌntel diosteʼ» (Colosenses 3:5). Ti isujm mach cʼuñic tiʼ melol iliyi. Pero mucʼʌch i coltañonla jiñi lac Tat am bʌ ti panchan yujil bʌ pijt yicʼot am bʌ i cʼuxbiya (Salmo 68:19). Jin chaʼan, cheʼ bʌ miʼ tilel ti lac pensar chuqui bibiʼ tac bʌ, laʼ laj cʼajtiben «jiñi ñuc bʌ lac pʼʌtʌlel», i laʼ lac chaʼlen wersa la cotsan chuqui sʌc bʌ ti lac pensar chaʼan maʼañic miʼ yochel bibiʼ tac bʌ (2 Corintios 4:7; 1 Corintios 9:27; qʼuele jiñi recuadro « ¿Bajcheʼ miʼ mejlel j cʌy jumpʼejl vicio?»).

12. ¿Chuqui jiñi lac «pusicʼal» yicʼot chucoch yom mi laj cʌntan?

¹² Jiñi wen am bʌ i ñaʼtʌbal Salomón miʼ subeñonla: «Cʌntan a pusicʼal [...], come bajcheʼ jach an lac pusicʼal cheʼʌch añonla» (Proverbios 4:23). ¿Chuqui jiñi lac «pusicʼal» yom bʌ mi laj cʌntan? Jiñʌch majquiyonla tiʼ sujmlel tiʼ wut Dios. Jehová jiñʌch muʼ bʌ i qʼuel ti jiñi lac «pusicʼal», mach jiñic bajcheʼ miʼ qʼuelonla quixtañujob, muʼ bʌ caj i pʌs mi mucʼʌch caj lac taj laj cuxtʌlel mach bʌ añic miʼ jilel. Cheʼʌch bajcheʼ jiñi. Chaʼan mi laj cʌntan lac pusicʼal, yom mi lac lajin jiñi xucʼul bʌ Job, tsaʼ bʌ i mele jumpʼejl trato yicʼot i wut chaʼan maʼañic baqui ora miʼ wis qʼuel ti leco juntiquil xʼixic (Job 31:1). Cheʼ bajcheʼ jiñi salmista, laʼ lac suben Dios: «Mʌybeñon c wut ame mic chʌn qʼuel jiñi lolom jach bʌ. Chʼejlesañon ti a bijlel» (Salmo 119:37).

13. ¿Majqui jiñi Dina yicʼot chucoch mach weñic cheʼ bajcheʼ tsiʼ yajca i yamigojob?

¹³ Cheʼ bajcheʼ tsaʼ laj qʼuele yaʼ ti cʌntesʌntel 3, miʼ mejlel lac lajin bajcheʼ yilal laj camigojob, tajol chaʼan lac wenlel o mach cheʼic (Proverbios 13:20; pejcan 1 Corintios 15:33).  Cheʼʌch miʼ pʌs jiñi ejemplo i chaʼan Dina, i yixicpʼeñal Jacob. Anquese wen tsaʼ cʌntesʌnti, mach weñic tsiʼ mele cheʼ bʌ tsiʼ sʌcla tiʼ yamiga jiñi xchʼocob yaʼ ti Canaán, jumpʼejl tejclum cʌmbil bʌ chaʼan i tsʼiʼlel lajal bʌ bajcheʼ jiñi tejclum Moab (Levítico 18:6-25). Jin chaʼan, ¿chuqui tsiʼ ñaʼta jiñi wiñicob cheʼ bʌ tsiʼ qʼueleyob chaʼan yaʼan jiñi Dina? Chaʼan juntiquil xchʼoc mach bʌ wocolic miʼ mejlel ti pʌyol chaʼan miʼ piʼleñob. Jiñi Siquem, «ñumen ñuc [bʌ]» miʼ qʼuejlel yaʼ tiʼ yotot i tat, cheʼʌch tsiʼ ñaʼta jaʼel (Génesis 34:18, 19).

14. ¿Chuqui ti wocol tsiʼ chʼʌmʌ tilel tsaʼ bʌ i mele Dina?

¹⁴ Ti wiʼil, Dina tsiʼ cʌñʌ Siquem. Tajol maʼañic tsiʼ ñaʼta chaʼan an majqui yom i piʼlen. Pero Siquem cheʼʌchi. Ti jumpʼejl bʌ qʼuin, cheʼ bʌ Siquem tsaʼ caji i yubin tiʼ bʌcʼtal chaʼan yom piʼleya, tsiʼ mele cheʼ bajcheʼ miʼ melob yambʌ cananeojob: Anquese mach yomic jiñi xchʼoc, «tsiʼ pʌyʌ» i tsiʼ chaʼle ti violar. Ti wiʼil «tsiʼ ñaʼta i pʌy», pero maʼañic tsiʼ tojʼesa tsaʼ bʌ i mele (pejcan Génesis 34:1-4). Mach cojach Dina tsiʼ taja wocol chaʼan mach weñic bajcheʼ tsiʼ yajca i yamigojob, tsaʼ  tejchi cabʌl wocol tiʼ familia tsaʼ bʌ i yʌqʼueyob i chʼijiyemlel i cheʼ jaʼel mach utsʼatix tsaʼ qʼuejliyob (Génesis 34:7, 25-31; Gálatas 6:7, 8).

15, 16. ¿Bajcheʼ mi lac taj jiñi isujm bʌ lac ñaʼtʌbal? (Qʼuele jiñi recuadro « Texto tac chaʼan maʼ wen ñaʼtan».)

¹⁵ Tajol Dina tsiʼ cʌñʌ chuqui ñuc bʌ i cʼʌjñibal, pero yicʼot i wocolel. Joñonla mach cheʼic yom mi laj cʌn bajcheʼ jiñi. Mi  laj cʼuxbin Jehová, jin chaʼan mi lac jacʼben i ticʼojel tac, junchajp jiñʌch muʼ bʌ i yʌl chaʼan yom mi lac «[tsajcañob] jiñi weñoʼ bʌ i pusicʼal» (Proverbios 13:20a). Mi mucʼʌch lac chʌn jacʼben i tʼan Dios, mi caj laj cʌn jiñi bij baqui miʼ mejlel «chuqui tac wen», i maʼañic mi caj lac taj cabʌl wocol (Proverbios 2:6-9; Salmo 1:1-3).

¹⁶ Dios miʼ yʌqʼuen i ñaʼtʌbal majqui yom bʌ. Pero yom mi lac mel oración, mi lac pejcan jiñi Biblia yicʼot yan tac bʌ jun loqʼuem bʌ ti Biblia muʼ bʌ i yʌqʼueñonla jiñi xucʼul bʌ xʼeʼtel am bʌ cabʌl i ñaʼtʌbal (Mateo 24:45; Santiago 1:5). Yicʼot jaʼel, yom an lac pecʼlel i mi lac jacʼ jiñi ticʼojel tac am bʌ yaʼ ti Tsʼijbujel (2 Reyes 22:18, 19). Chaʼan mi lac ñumen chʼʌmben isujm, laʼ la cʌl iliyi. La cujilix chaʼan jiñi lac pusicʼal yujil lot yicʼot miʼ mejlel i yʌcʼonla ti wocol (Jeremías 17:9). Pero cheʼ muqʼuic la cʌqʼuentel jumpʼejl tsʌts bʌ ticʼojel yicʼot laj coltʌntel, ¿muʼ ba caj lac pʌs lac pecʼlel yicʼot mi caj lac jacʼ, o mi caj laj cʌy chaʼan miʼ lotiñonla lac pusicʼal?

17. ¿Baqui bʌ wocol miʼ mejlel ti ujtel ti juntiquil tatʌl yicʼot i yixicpʼeñal, i bajcheʼ miʼ mejlel i coltan i chʼʌmben isujm jiñi wocol?

¹⁷ Laʼ lac ñaʼtan iliyi: Juntiquil tatʌl maʼañic miʼ yʌcʼ ti loqʼuel i yixicpʼeñal yicʼot juntiquil chʼiton xñoptʼan bʌ mi maʼañic yambʌ majqui miʼ majlel yicʼotob. Pero jiñi xchʼoc mi yʌl: «Papá, chʼujbibeñon. ¡Maʼañic chuqui lecoj bʌ mi caj c mel lojon!». La cujil chaʼan jiñi xchʼoc mucʼʌch i cʼuxbin Jehová i yom i mel chuqui wem bʌ, pero ¿muʼ ba la cʌl chaʼan woliʼ «mel chuqui utsʼat [tiʼ sujmlel]» yicʼot chaʼan woliyʌch i ‹putsʼtan tsʼiʼlel›? ¿O muʼ ba caj lac ñaʼtan chaʼan woliʼ «bajñel ñaʼtan xucʼul i pusicʼal»? (Proverbios 28:26.) Tajol miʼ tilel ti lac pensar yambʌ principio tac muʼ bʌ i mejlel i coltan jiñi tatʌl chaʼan miʼ yʌqʼuen i chʼʌmben isujm woli bʌ i suben i yixicpʼeñal (qʼuele Proverbios 22:3; Mateo 6:13; 26:41).

18, 19. ¿Chuqui bʌ wocol tsiʼ taja José, i bajcheʼ tsiʼ cʌnta i bʌ?

¹⁸ Jumpʼejl wem bʌ ejemplo chaʼañonla jiñʌch José, ijtsʼiñʌl bʌ i chaʼan Dina tiʼ tojlel i tat, tsiʼ wen cʼuxbi Dios i tsaʼ mejli  i putsʼtan tsʼiʼlel. (Génesis 30:20-24). Cheʼ bʌ chut alob to, tsiʼ qʼuele jiñi wocol tac tsaʼ bʌ i ñusa i chich tiʼ caj tsaʼ bʌ i mele. Chaʼan tsaʼ bʌ i qʼuele yicʼot chaʼan yom chʌn ajñel tiʼ cʼuxbiya Dios, jiñʌch tsiʼ colta ti wiʼil cheʼ bʌ xmoso yaʼ ti Egipto, i jiñi i yijñam i yum ti eʼtel (troñel) tsiʼ sube «ti jujumpʼejl qʼuin» chaʼan miʼ ñoltʌl yicʼot. Jose maʼañic tsaʼ mejli i len cʌy i yeʼtel come juntiquil xmoso. Tsaʼ bʌ i mele jiñʌch tsiʼ pʌsʌ i chʼejlel yicʼot tsiʼ cʼʌñʌ i ñaʼtʌbal chaʼan miʼ ñusan jiñi wocol. Maʼañic tsiʼ jacʼʌ chuqui tsiʼ sube jiñi xʼixic ti jujumpʼejl qʼuin, tsaʼ bʌ i mele jiñʌch tsiʼ putsʼta (pejcan Génesis 39:7-12).

¹⁹ Laʼ lac jumucʼ ñaʼtan: ¿Xucʼul ba tsaʼ ajñi José cheʼ tsaʼic caji i ñaʼtan ti jujumpʼejl qʼuin chaʼan woliyix i piʼlen jiñi xʼixic? Maʼañic. Cheʼ maʼañic tsiʼ yotsa tiʼ pensar chuqui tac bibiʼ, José ñumen ñuc tsiʼ qʼuele chaʼan wen miʼ yajñel yicʼot Jehová. Cheʼ tsiʼ pʌsʌ cheʼ bʌ tiʼ sube i yijñam Potifar: «C yum [...] maʼañic chuqui tsiʼ loto tiʼ bajñel pʼʌtʌlel, cojach jatet, come i yijñamet. ¿Bajcheʼ miʼ mejlel c chaʼlen jiñi ñuc bʌ mulil? ¿Bajcheʼ miʼ mejlel c chaʼlen mulil tiʼ contra Dios?» (Génesis 39:8, 9).

20. ¿Chuqui tsiʼ mele Jehová tiʼ tojlel José?

²⁰ ¡Wen tijicña tsiʼ yubi Jehová cheʼ bʌ tsiʼ qʼuele chaʼan José chʌn xucʼul tsaʼ ajñi, anquese ñajt an tiʼ tojlel i familia! (Proverbios 27:11.) Ti wiʼil, José tsaʼ otsʌnti ti cárcel, pero Jehová tsiʼ colta chaʼan libre miʼ loqʼuel i miʼ yochel ti jiñi ñaxam bʌ ñuc bʌ xʼeʼtel i chaʼan Faraón yicʼot chaʼan miʼ qʼuel tiʼ pejtelel jiñi bʌlñʌcʼʌl yaʼ ti Egipto  (Génesis 41:39-49). Jiñi tsaʼ bʌ i ñusa miʼ pʌsbeñonla chaʼan i sujmʌch muʼ bʌ yʌl Salmo 97:10: «Jatetla muʼ bʌ laʼ cʼuxbin lac Yum, tsʼaʼlenla jontolil. Lac Yum miʼ cʌntan i chaʼañoʼ bʌ. Miʼ pʌyob loqʼuel tiʼ pʼʌtʌlel jiñi jontoloʼ bʌ».

21. ¿Bajcheʼ tsiʼ pʌsʌ juntiquil chʼiton chʼoyol bʌ ti África chaʼan xucʼulʌch ti jiñi principio tac?

²¹ Cheʼ bajcheʼ José, cabʌl mil xñoptʼañob miʼ jacʼob ili mandar: «Tsʼaʼlenla jontolil. Cʼuxbinla chuqui utsʼat» (Amós 5:15). Jumpʼejl ejemplo, juntiquil chʼiton ti África tsiʼ yʌlʌ chaʼan juntiquil xchʼoc i piʼʌl bʌ ti escuela tsiʼ sube chaʼan mi caj i mejlel i piʼlen mi mucʼʌch i yʌqʼuen i jacʼbal jiñi examen chaʼan matemáticas. Tsiʼ yʌlʌ: «Maʼañic tsac jacʼʌ c mel. Cheʼ chʌn xucʼul mic jacʼ jiñi principio tac, maʼañic chuqui mij quisñin, jinto ñumen ñuc bʌ i cʼʌjñibal mach bʌ lajalic bajcheʼ jiñi oro am bʌ tiʼ pejtelel pañimil». Tajol juntiquil mucʼʌch i «poj tijicñesan i pusicʼal jumucʼ ti mulil», pero ti wiʼil mucʼ jach i chʼʌm tilel cabʌl wocol (Hebreos 11:25). Maʼañic miʼ mejlel ti lajintel yicʼot jiñi tijicñʌyel mach bʌ añic miʼ jilel muʼ bʌ caj lac taj cheʼ mi lac jacʼben i tʼan Jehová (Proverbios 10:22).

22, 23. a) ¿Chucoch mi la cʌl chaʼan añʌch chuqui miʼ mejlel i mel jiñi muʼ bʌ i chaʼlen tsʌts bʌ mulil? b) ¿Chuqui ti coltʌntel miʼ mejlel i taj jiñi muʼ bʌ i chaʼlen mulil?

²² Come xmulilonla ti lac pejtelel, yom mi lac chaʼlen wersa chaʼan maʼañic miʼ yochel lac tsucul pensar i mi lac mel muʼ bʌ i cʼajtibeñonla Dios (Romanos 7:21-25). Jehová «yujil melbilonla ti tsʼubejn» (Salmo 103:14). Pero ¿ixcu mi tsaʼ lac mele tsʌts bʌ mulil? ¿Maʼañix ba chuqui miʼ mejlel lac mel? Mach cheʼiqui. Tajol miʼ mejlel lac taj cabʌl wocol cheʼ bajcheʼ jiñi rey David. Pero Dios chʌn chajpʌbil chaʼan ‹miʼ ñusʌbeñonla› mi mucʼʌch laj cʌy lac mul yicʼot mi mucʼʌch lac «sub» (Salmo 86:5; Santiago 5:16; pejcan Proverbios 28:13).

²³ Cheʼ jaʼel, yaʼ ti congregación mi lac taj laj coltʌntel chʼoyol bʌ ti Jehová: «Majtan tac [bajcheʼ] wiñicob», xcʌnta tiñʌmeʼob añobix bʌ i ñaʼtʌbal chajpʌbiloʼ bʌ chaʼan miʼ coltañoñobla, i  yomʌch i melob (Efesios 4:8, 12; Santiago 5:14, 15). Mi tsaʼ lac chaʼle mulil, mi caj i coltañoñobla chaʼan pʼʌtʌl mi la cajñel la quicʼot Dios, i an junchajp bajcheʼ miʼ coltañoñobla chaʼan maʼañic mi lac chaʼ yajlel. ¿Bajcheʼ? Jiñʌch chaʼan mi lac taj lac «ñaʼtʌbal» (Proverbios 15:32). ¿Bajcheʼ miʼ laj cʼʌn ili ticʼojel?

24, 25. a) ¿Bajcheʼ tsiʼ pʌsʌ jiñi chʼiton muʼ bʌ i yʌjlel ti Proverbios 7:6-23 chaʼan ‹maʼañic i ñaʼtʌbal›? b) ¿Bajcheʼ mi lac taj lac «ñaʼtʌbal»?

²⁴ Jiñi Biblia mi yʌl chaʼan juntiquil wiñic «mach bʌ añic i ñaʼtʌbal» yicʼot yambʌ muʼ bʌ i taj i «ñaʼtʌbal» (Proverbios 7:7). ¿Majqui jiñi «mach bʌ añic i ñaʼtʌbal»? Jiñʌch maʼañic bʌ miʼ cʼotel i ñaʼtan yicʼot maʼañic bʌ miʼ cʌn baqui bʌ wen yicʼot mach bʌ weñic, tajol chaʼan maxto i wen taja i colel tiʼ chaʼan bʌ Jehová o maxto wen cʼotem i ñaʼtan bajcheʼ yom miʼ melben i yeʼtel Dios. Jin chaʼan, muʼto i yajlel ti wocol lajal bajcheʼ jiñi chʼiton muʼ bʌ i yʌl ti Proverbios 7:6-23. ¿I majqui jiñi muʼ bʌ i taj i «ñaʼtʌbal»? Jiñʌch muʼ bʌ i yʌcʼ ti ñuc bajcheʼ yilal tiʼ sujmlel tiʼ wut Dios, jin chaʼan miʼ pejcan ti jujumpʼejl qʼuin i Tʼan Dios yicʼot oración. Jiñʌch bajcheʼ cʼamel miʼ mejlel i mel, miʼ chaʼlen wersa chaʼan jiñi i pensar, jiñi muʼ bʌ i mulan, cheʼ bajcheʼ miʼ yubin i bʌ yicʼot chuqui yom bʌ i taj, utsʼat tiʼ wut Jehová. Cheʼ bajcheʼ jiñi, miʼ pʌs chaʼan «woliʼ chʼʌl» i cuxtʌlel, yom yʌl, woliʼ mel chuqui wem bʌ tiʼ tojlel yicʼot chaʼan yom «i taj i wenlel» (Proverbios 19:8).

²⁵ Yom mi laj cʼajtiben lac bʌ: «¿Muʼ ba c ñop chaʼan utsʼatʌch i mandar tac Dios yicʼot chaʼan mi mucʼʌch c jacʼ mi caj c taj jiñi ñumen ñuc bʌ tijicñʌyel?» (Salmo 19:7-10; Isaías 48:17, 18). Mi maʼañic mi lac wen ñop, ¿chuqui miʼ mejlel lac mel? Mi lac wen ñaʼtan chuqui ti wocol miʼ mejlel lac taj cheʼ maʼañic mi lac jacʼ ti utsʼat i mandar Dios. Cheʼ jaʼel, yom mi lac ñop chaʼan «utsʼat lac Yum» cheʼ mi lac chumtan i sujmlel bʌ i mi lac butʼ ti lac pensar chuqui tac sʌc, toj, utsʼat yicʼot wen tac bʌ (Salmo 34:8; Filipenses 4:8, 9). Cheʼ mi lac ñumen chaʼlen wersa, mi caj i ñumen colel laj cʼuxbiya ti Dios yicʼot ti chuqui muʼ bʌ i cʼuxbin, i mi caj lac ñumen tsʼaʼlen tiʼ pejtelel  muʼ bʌ i tsʼaʼlen jaʼel. Laʼ laj cʼajtesan jiñi José. Mach juntiquilic wiñic mach bʌ xmulilic, pero tsaʼʌch mejli i «putsʼtan tsʼiʼlel». ¿Chucoch? Come tsiʼ cʌyʌ chaʼan Jehová miʼ tojʼesan majlel tiʼ pejtelel i jabilel yicʼot chaʼan miʼ pʼʌtʼesʌben i pusicʼal. Cheʼ yom mi lac mel joñonla jaʼel (Isaías 64:8).

26. ¿Chuqui jiñi ñuc bʌ i cʼʌjñibal mi caj laj qʼuel?

²⁶ Yom mi laj cʼajtesan chaʼan jiñi tsaʼ bʌ aqʼuenti wiñic yicʼot xʼixic chaʼan miʼ cʼʌñob ti piʼleya mach alasʌlic. Jehová tsiʼ yʌcʼʌ chaʼan jiñi ñujpuñemoʼ bʌ miʼ tajob i yalobil yicʼot chaʼan miʼ piʼleñob i bʌ ti tijicña (Proverbios 5:18). Ti jiñi yambʌ chaʼpʼejl cʌntesʌntel mi caj laj qʼuel bajcheʼ yilal miʼ qʼuel Dios jiñi ñujpuñijel.