1-3. a) ¿Bajcheʼ yilal miʼ qʼuel cabʌl quixtañujob jiñi eʼtel? b) ¿Chuqui mi yʌl jiñi Biblia chaʼan jiñi eʼtel, i baqui bʌ cʼajtiya tac mi caj laj qʼuel ti ili cʌntesʌntel?

ILI ora, cabʌl wiñicob xʼixicob (quixtañujob) miʼ qʼuelob bajcheʼ ticʼlʌntel jiñi eʼtel (troñel). Ti jujumpʼejl qʼuin miʼ melob eʼtel maʼañic bʌ miʼ mulañob i maʼañix bʌ i jilibal miʼ yubiñob. Pero maʼañic chucoch cheʼ yom miʼ qʼuelob tiʼ pejtelel ora bajcheʼ jiñi. Miʼ mejlel i tajob i coltʌntel chaʼan añʌch chucoch yom miʼ qʼuelob ti ñuc i yeʼtel, i cheʼ jaʼel yicʼot i tijicñʌyel.

² Jiñi Biblia miʼ pʌs bajcheʼ yom mi laj qʼuel jiñi tsʌts bʌ eʼtel. Mi yʌl chaʼan jiñʌch jumpʼejl bendición jiñi eʼtel yicʼot jiñi wenlel muʼ bʌ i cʌybeñonla. Jiñi wen am bʌ i ñaʼtʌbal Salomón tiʼ tsʼijbu: «Yom jaʼel mi lac chaʼlen weʼel, mi lac chaʼlen uchʼel. Yom mi lac taj i chobejtʌbal la queʼtel, come lac majtañʌch tilem bʌ ti Dios» (Eclesiastés 3:13). Jehová miʼ wen cʼuxbiñonla yicʼot yom chuqui wem bʌ ti lac tojlel, jin chaʼan, miʼ mulan cheʼ mi laj qʼuelben i wut laj queʼtel yicʼot cheʼ mi laj cubin lac tijicñʌyel chaʼan jiñi wenlel muʼ bʌ i yʌqʼueñonla. Mi mucʼʌch laj qʼuel jiñi eʼtel cheʼ bajcheʼ miʼ qʼuel Dios yicʼot mi laj cʌy chaʼan miʼ tojʼesañonla i principio tac, mi caj lac chʌn ajñel tiʼ cʼuxbiya (pejcan Eclesiastés 2:24; 5:18).

³ Ti ili cʌntesʌntel mi caj laj qʼuel chʌmpʼejl cʼajtiya:  ¿Bajcheʼ miʼ mejlel i qʼuel «i chobejtʌbal i yeʼtel» jiñi xñoptʼan? ¿Baqui bʌ eʼtel tac mach yomic miʼ mel? ¿Bajcheʼ yom pʼisbil jach miʼ qʼuel i yeʼtel ila ti pañimil (mulawil) yicʼot tiʼ chaʼan bʌ Jehová? ¿I baqui bʌ jiñi eʼtel yom bʌ melol ñumen ñuc bʌ i cʼʌjñibal? Laʼ lac ñaxan al jiñi chaʼtiquil wen ñuc bʌ xʼeʼtelob: Jehová yicʼot Jesucristo.

4, 5. ¿Chuqui mi yʌl jiñi Biblia chaʼan Jehová wen bʌx tiʼ yeʼtel?

⁴ Jehová jiñʌch jiñi Ñumen Yujil bʌ Eʼtel. Mach lolomic muʼ bʌ i yʌl Génesis 1:1: «Cheʼ tiʼ cajibal tsiʼ mele Dios jiñi panchan yicʼot pañimil». Ti wiʼil, cheʼ bʌ tsaʼix ujti i mel i yeʼtel wʌʼ ti Pañimil, tsiʼ yʌlʌ chaʼan «wen utsʼat» tiʼ pejtelel tsaʼ bʌ i mele (Génesis 1:31). Tsiʼ wen ubi i tijicñʌyel chaʼan i yeʼtel. Jin chaʼan, jiñi i wut i yeʼtel Dios jiñʌch muʼ bʌ i sujtesan bajcheʼ «jiñi Dios tijicña bʌ» (1 Timoteo 1:11, TNM).

⁵ Jehová wen bʌx tiʼ yeʼtel i maʼañic miʼ wis cʼaj i yo. Jin chaʼan, cheʼ bʌ ñumeñix cabʌl siglo tsiʼ mele tiʼ pejtelel chuqui an, Cristo tsiʼ yʌlʌ: «Cʼʌlʌl wʌle miʼ chaʼlen eʼtel c Tat» (Juan 5:17). Pero ¿chuqui woliʼ mel tilel i Tat? Cʼʌlʌl yaʼ ti panchan woli (choncol) i chʌn cʌntan yicʼot i tojʼesañob jiñi quixtañujob. Cheʼ jaʼel, an chuqui «tsijib melbilix» bʌ i chaʼan, jiñʌch jiñi xñoptʼañob bombiloʼ bʌ ti espíritu, muʼ bʌ caj i chaʼleñob yumʌntel yicʼot Jesús yaʼ ti panchan (2 Corintios 5:17). Jehová chʌn woli ti eʼtel chaʼan miʼ tsʼʌctiyel jiñi ñaʼtʌbil bʌ i chaʼan tiʼ tojlel muʼ bʌ i cʼuxbiñob chaʼan miʼ chumtʌlob tiʼ pejtelel ora ti tsijiʼ bʌ pañimil (Romanos 6:23). Wen tijicña chaʼan jiñi tajbilix bʌ i chaʼan come cabʌl millón quixtañujob tsaʼix i ñʌchʼtayob chaʼan bʌ jiñi yumʌntel, tsaʼix i lʌcʼtesayob i bʌ yicʼot an i qʼuextayob i melbal chaʼan miʼ chʌn ajñelob tiʼ cʼuxbiya (Juan 6:44).

6, 7. ¿Chuqui bʌ ejemplo tsiʼ cʌybeyonla Jesús chaʼan i bʌxlel?

 ⁶ Cʼʌlʌl ti wajali, Jesús an i yʌcʼʌ wem bʌ ejemplo chaʼan i bʌxlel tiʼ yeʼtel. Cheʼ bʌ maxto tilemic wʌʼ ti Pañimil, Jehová jiñʌch «tsiʼ cʼʌñʌ tiʼ melol pejtel chuqui tac an» (Proverbios 8:22-31; Hebreos 1:2). Cheʼ bʌ wʌʼix an ti Pañimil maʼañic tsiʼ cʌyʌ eʼtel. Tsiʼ cʌñʌ eʼtel cheʼ bʌ chut to i tsaʼ cʼoti ti cʌjñel bajcheʼ «xjucʼteʼ» (Marcos 6:3). Yom cʼajal lac chaʼan, ti jiñi bʌ ora maʼañic baqui miʼ chojñel eʼtijibʌl, muʼ bʌ i cʼʌjñel ti pʼel teʼ o muqʼuix bʌ i ñotchocontel ti luz. Ti cʼʌbʌl miʼ luʼ mejlel jiñi eʼtel, miʼ cʼʌñob i wersa yicʼot wen tsajibil miʼ melob. ¿Muʼ ba i tilel ti lac ñaʼtʌbal cheʼ bʌ Jesús woli (yʌquel) i majlel i sʌclan jiñi teʼ, cheʼ woliʼ secʼ yicʼot cheʼ wolix i tujcʼan loqʼuel chaʼan miʼ chʼʌm majlel tiʼ yotot? ¿I muʼ baʼ ñaʼtan jaʼel cheʼ bʌ wolix i chajpan jiñi teʼ yicʼot cheʼ woliʼ yotsʌben i cucujlel jiñi otot, i yotsʌben i puertajlel yicʼot cheʼ woliʼ mel tiʼ pejtelel muʼ bʌ i cʼʌjñel tiʼ malil jiñi otot? Wen i cʌñʌyʌch jiñi tijicñʌyel muʼ bʌ i yʌcʼ cheʼ bʌ wen miʼ mejlel jiñi eʼtel.

⁷ Jesús tsaʼʌch i wen acʼʌ i bʌ jaʼel tiʼ melol i yeʼtel ti subtʼan. Uxpʼejl jab yicʼot ojlil tsiʼ mele bajcheʼ jiñi. Yom tsiʼ yʌlʌ chaʼan cabʌl quixtañujob miʼ cʌntesañob, jin chaʼan tsiʼ chaʼle wersa subtʼan ti jujumpʼejl qʼuin, wen sʌcʼan jach miʼ chʼojyel i ochemix acʼʌlel miʼ cʌy (Lucas 21:37, 38; Juan 3:2). Miʼ majlel «ti pejtelel tejclum yicʼot tiʼ pejtelel xchumtʌl. Tsiʼ subu jiñi wen tʼan chaʼan i yumʌntel Dios» (Lucas 8:1). Cabʌl kilómetro tsiʼ chaʼle xʌmbal, tajol baqui cʌlʌx tsʼubejn chaʼan miʼ majlel i sub jiñi wen tʼan.

8, 9. ¿Bajcheʼ tsiʼ qʼuelbe ‹i chobejtʌbal i yeʼtel› Jesús?

⁸ ¿Tsaʼ ba i qʼuelbe i wut i yeʼtel Jesús? Tsaʼʌch. Tsiʼ wen pʌcʼʌ cʌytʌl i sujmlel bʌ chaʼan jiñi Yumʌntel i chajpʌbilix tsiʼ cʌyʌ jiñi cholel chaʼan cʼajbal. Tiʼ melol i yeʼtel Dios jiñʌch tsaʼ bʌ i yʌqʼue i pʼʌtʌlel cheʼ bʌ maʼañic miʼ yuchʼel tiʼ caj i yeʼtel (Juan 4:31-38). Cheʼ ti yujtibal i subtʼan wʌʼ ti  Pañimil, ¡wen tijicñayʌch tsiʼ yubi cheʼ bʌ tsiʼ sube i Tat: «Tsac pʌsʌ a ñuclel ila ti pañimil. Tsaʼix c tsʼʌctesa jiñi eʼtel tsaʼ bʌ a wʌqʼueyon chaʼan mic mel»! (Juan 17:4.)

⁹ Cojach Jehová yicʼot Jesús aqʼuebil i chaʼañonla ñuc bʌ ejemplo chaʼan i qʼuelol i «chobejtʌbal la queʼtel». Jiñi cʼuxbiya jiñʌch miʼ ñijcañonla lac «tsajcan [...] i melbal Dios» yicʼot chaʼan mi lac «tsajcan [...] majlel» Cristo (Efesios 5:1; 1 Pedro 2:21). Laʼ lac tsajin bajcheʼ miʼ mejlel lac taj lac tijicñʌyel tiʼ wut la queʼtel.

10, 11. ¿Chuqui mi caj i coltañonla chaʼan utsʼat bajcheʼ mi lac ñaʼtan chaʼan laj queʼtel?

¹⁰ Jiñi troñel i cʼʌjñibalʌch i chaʼan juntiquil xñoptʼan. La com la cubin lac tijicñʌyel cheʼ mi lac mel. Pero ili mach cʼuñic tiʼ tajol cheʼ maʼañic mi lac mulan jiñi woli bʌ lac mel. Mi cheʼ bajcheʼ jiñi, ¿bajcheʼ miʼ mejlel laj qʼuelben i «chobejtʌbal la queʼtel»?

¹¹ Yom utsʼat bajcheʼ mi lac ñaʼtan. Tajol mach mejlic laj qʼuextan chuqui tac yom melol, pero miʼ mejlel laj qʼuextan bajcheʼ yilalonla. Cheʼ mi lac wen ñaʼtan bajcheʼ miʼ qʼuel Dios jiñi eʼtel mi caj i coltañonla. Jumpʼejl ejemplo, mi an lac familia yom bʌ mi lac mʌcʼlan, yom cʼajal lac chaʼan, anquese mach wen ñuquic laj queʼtel yilal, pero tiʼ wut Dios cheʼʌchi come mucʼʌch i coltañonla chaʼan mi la cʌqʼuen chuqui yom lac familia. Yaʼ ti i Tʼan mi yʌl chaʼan jiñi mach bʌ añic miʼ cʌntan i chaʼañoʼ bʌ «ñumen lecojʌch bajcheʼ juntiquil mach bʌ añic miʼ ñop Dios» (1 Timoteo 5:8). Cheʼ bʌ mi lac chʼʌmben isujm chaʼan jiñi eʼtel miʼ coltañonla chaʼan mi lac tsʼʌctesan jiñi subebil bʌ i chaʼañonla Dios, miʼ ñumen pʼʌtʼesañonla yicʼot utsʼat miʼ yʌqʼueñonla la cubin lac bʌ i mach cheʼic bajcheʼ jiñi yañoʼ bʌ.

12. ¿Chucoch yomʌch bʌxonla yicʼot mi lac mel chuqui wem bʌ ti la queʼtel?

 ¹² Laʼ lac mel chuqui wem bʌ yicʼot laʼ lac pʌs lac bʌxlel. Jiñi isujm bʌ xñoptʼañob yom wen yujilob eʼtel yicʼot yom miʼ melob ti wen. Cheʼ wen mi lac mel la queʼtel mi lac taj cabʌl lac wenlel, jiñi lac yum ti eʼtel mi caj i qʼueloñobla ti ñuc (Proverbios 12:24; 22:29). Mi wen chuqui mi lac mel i maʼañic mi lac xujchʼin eʼtijibʌl tac, jiñi taqʼuin yicʼot maʼañic mi lac toʼol sʌt qʼuin, mi caj lac taj cabʌl lac wenlel (Efesios 4:28). Cheʼ bajcheʼ tsaʼix laj qʼuele ti yambʌ  cʌntesʌntel, mi laj qʼuejlel ti utsʼat ti lac yumob ti eʼtel. Mi maʼañic miʼ taj i qʼuelob chaʼan wem bʌ xʼeʼtelonla, mi caj la cubin lac tijicñʌyel cheʼ la ‹cujil maʼañic lac mul› yicʼot chaʼan utsʼat woliʼ qʼuelonla Dios (Hebreos 13:18; Colosenses 3:22-24).

13. ¿Chuqui mi lac taj chaʼan jiñi wem bʌ lac melbal ti laj queʼtel?

¹³ Yom mi lac ñaʼtan chaʼan jiñi lac melbal miʼ yʌqʼuen i ñuclel Jehová. Mi weñʌch chuqui mi lac mel, jiñi yañoʼ bʌ mi caj i cʌñob. ¿Chuqui mi lac taj cheʼ jiñi? «Utsʼat miʼ [caj] yubiñob i cʌntesa Dios, Xcoltaya lac chaʼan.» (Tito 2:9, 10.) Jiñi wem bʌ lac melbal mi caj i ñumen aqʼuen i yutsʼatlel jiñi isujm bʌ ñopbalʌl i jiñi quixtañujob mi caj i qʼuelob jiñi. ¡Wen utsʼatax cheʼ bʌ juntiquil lac piʼʌl ti eʼtel miʼ cʼotel i cʌn i sujmlel bajcheʼ jiñi! Yom cʼajal lac chaʼan: Jiñi wen ñuc bʌ i cʼʌjñibal chaʼañonla jiñʌch mi lac tijicñesʌben i pusicʼal Jehová yicʼot mi laj cʌqʼuen i ñuclel ti lac melbal (pejcan Proverbios 27:11; 1 Pedro 2:12).

14-16. ¿Baqui bʌ chaʼpʼejl cʼajtiya yom bʌ mi lac melben lac bʌ mi woli lac yajcan la queʼtel?

¹⁴ Jiñi Biblia maʼañic mi yʌl baqui bʌ eʼtel miʼ mejlel lac mel yicʼot jiñi mach bʌ añic. Pero mach yomic yʌl chaʼan miʼ mejlel lac jacʼ baqui jach bʌ troñel. Jiñi Tsʼijbujel miʼ coltañonla lac ñaʼtan baqui bʌ jiñi eʼtel tac wem bʌ yicʼot i cʼʌjñibal bʌ, i maʼañic bʌ miʼ yʌcʼ ti tsʼaʼlentel Dios (Proverbios 2:6). ¿Bajcheʼ miʼ mejlel lac ñaʼtan mi maʼañic miʼ tsʼaʼlen? Jiñʌch cheʼ mi lac melben lac bʌ chaʼpʼejl cʼajtiya.

¹⁵ ¿Jumpʼejl ba eʼtel ticʼbil bʌ ti Biblia? Jiñi i Tʼan Dios mach utsʼatic miʼ qʼuel jiñi xujchʼ, jiñi lot yicʼot tiʼ melol diosteʼ tac (Éxodo 20:4; Hechos 15:29; Efesios 4:28; Apocalipsis 21:8). Jin chaʼan, maʼañic mi lac jacʼ eʼtel baqui miʼ  mejlel tac jiñi. Jiñi laj cʼuxbiya ti Jehová mi caj i ticʼonla chaʼan maʼañic mi lac jacʼ eʼtel baqui miʼ ñusʌbeñob ti pʼis i mandar (pejcan 1 Juan 5:3).

¹⁶ ¿Mach ba wolic cotsan c bʌ o cʌcʼ j coltaya jaʼel ti jiñi mach bʌ utsʼatic woliʼ mejlel? Laʼ lac ñaʼtan jiñi eʼtel chaʼan mel otot. Ili eʼtel mach mulilic. Pero ¿ixcu mi juntiquil xñoptʼan miʼ subentel eʼtel chaʼan miʼ mel jumpʼejl iglesia? Tiʼ sujm, jiñi i yeʼtel mach yomic yʌl chaʼan woliʼ junyajlel  otsan i bʌ ti jiñi mach bʌ isujmic chʼujutesaya. Pero ¿mach ba wolic i yʌcʼ i coltaya ti jiñi cʌntesa mach bʌ isujmic cheʼ miʼ mel jiñi eʼtel? (Apocalipsis 18:4). Chaʼan laj cʼuxbiya ti Jehová, mach la comic lac mel ticʼbil bʌ yaʼ ti Tsʼijbujel.

17. a) ¿Chuqui yom mi lac tsajin chaʼan wen mi lac yajcan la queʼtel? (Qʼuele jiñi recuadro « ¿Yom ba mic chʼʌm ili eʼtel?») b) ¿Chuqui yom mi lac mel chaʼan jiñi laj conciencia miʼ coltañonla lac mel muʼ bʌ i mulan Dios?

¹⁷ Chaʼan wen chuqui mi lac ñaʼtan cheʼ mi lac yajcan la queʼtel, an i tajol jasʌl mi lac wen tsajin jiñi chaʼpʼejl cʼajtiya am bʌ yaʼ ti párrafo 15 yicʼot 16. Pero an yan tac bʌ yom bʌ xucʼul mi lac tsajin. * Maʼañic mi lac pijtan chaʼan jiñi xucʼul bʌ xʼeʼtel miʼ jamʌl tsictesan tiʼ pejtelel chuqui yom  bʌ mi lac mel. Jiñix baqui joñonla yom laj cujil cʌñol chuqui yom bʌ mi lac mel. Yaʼ ti cʌntesʌntel 2 tsaʼix laj qʼuele chaʼan yom mi laj cʌntesan laj conciencia cheʼ mi lac tsajin i Tʼan Dios i mi laj qʼuel bajcheʼ yom mi laj cʼʌn ti laj cuxtʌlel. Cheʼ jiñi, mi laj cʌl chaʼan «cʌñʌlix lac chaʼan» chuqui yom mi lac mel, i jiñi laj conciencia mi caj i coltañonla lac mel muʼ bʌ i mulan Dios yicʼot chaʼan mi lac chʌn ajñel tiʼ cʼuxbiya (Hebreos 5:14).

18. ¿Chucoch an i tajol wocol mi laj cubin cheʼ pʼisbil jach yom mi laj qʼuel lac troñel yicʼot jiñi i chaʼan bʌ Jehová?

¹⁸ Ti ili «cojix bʌ qʼuin tac» baqui wen «bʌbʌqʼuen tac bʌ», wocol chaʼan pʼisbil jach bajcheʼ mi laj qʼuel lac troñel chaʼan bʌ ili pañimil yicʼot laj queʼtel ti Jehová (2 Timoteo 3:1). Tiʼ sujm, wocol ti tajol jumpʼejl eʼtel i chaʼan maʼañic mi lac sʌt. Yicʼot an ti lac wenta chuqui yom bʌ lac familia. Pero mi maʼañic mi laj cʌntan lac bʌ, tajol mi caj lac jacʼ cheʼ mi lac subentel lac mel mach bʌ weñic o mi caj lac mulan taqʼuin, muʼ bʌ i mʌctañonla tiʼ melol i yeʼtel Jehová (1 Timoteo 6:9, 10). Laʼ laj qʼuel muʼ bʌ caj i coltañonla chaʼan maʼañic miʼ ñajʌyel lac chaʼan chuqui jiñi ‹ñumen ñuc bʌ i cʼʌjñibal› (Filipenses 1:10).

19. ¿Chucoch yom mi lac ñop ti tsʼʌcʌl Jehová, i chuqui jiñi yac baqui yom mi laj cʌntan lac bʌ?

¹⁹ Laʼ lac ñop Jehová tiʼ pejtelel lac pusicʼal (pejcan Proverbios 3:5, 6). ¿Mach ba cojach yom mi lac ñop ti tsʼʌcʌl Jehová? Cheʼʌchi, come miʼ cʼuxbiñonla yicʼot miʼ cʌntañonla (1 Pedro 5:7). Jiñʌch ñumen yujil chuqui laj com i maʼañic baqui ora mi caj i cʌy i yʌqʼueñonla (Salmo 37:25). Jin chaʼan, mach yomic miʼ ñajʌyel lac chaʼan muʼ bʌ i yʌl jiñi Biblia: «Mach mi laʼ tsʌjyun [o mulan] taqʼuin. Yom tijicña mi laʼ wajñel yicʼot chuqui tac an laʼ chaʼan. Come Dios tsiʼ yʌlʌ: Maʼañic mi caj a cʌytʌl ti  mebaʼ. Maʼañic mi caj j cʌyet» (Hebreos 13:5). Yonlel hermanojob am bʌ i yajcayob i melben i yeʼtel Jehová tiʼ pejtelel ora, miʼ yʌlob chaʼan Dios miʼ chʌn aqʼueñob chuqui yomob. Cheʼ mucʼʌch lac ñop chaʼan Jehová miʼ cʌntañonla, maʼañic mi caj lac wen cʼojoʼtan chaʼan chuqui yom bʌ lac familia (Mateo 6:25-32). Maʼañic mi caj laj cʌy chaʼan jiñi la queʼtel miʼ mʌctañonla ti lac subtʼan, lac  tempa bʌ yicʼot yambʌ eʼtel tac i chaʼan bʌ Jehová (Mateo 24:14; Hebreos 10:24, 25).

20. ¿Chuqui i sujmlel cheʼ junsujm jach baqui yom miʼ qʼuel lac wut, i bajcheʼ mi caj mejlel lac mel?

²⁰ Junsujm jach baqui yom miʼ qʼuel lac wut (pejcan Mateo 6:22, 23). Ili yom yʌl, chaʼan mach yomic mi lac mel muʼ bʌ i yotsañonla ti wocol. Jiñi xñoptʼan cojach yom miʼ yʌcʼ tiʼ ñaʼtʌbal tiʼ melol chuqui yom Dios. Mi cheʼʌch mi lac mel, maʼañic mi caj lac sʌclan wen letsem bʌ lac tojol yicʼot maʼañic mi caj lac wen mulan cabʌl lac chubʌʼan. Yicʼot jaʼel maʼañic mi caj la cotsan ti lac pensar tiʼ mʌñol chuqui wen tsijib tac to bʌ an ti chojñel i cʼʌjñibal bʌ miʼ yʌjlel chaʼan lac tijicñʌyel. ¿Chuqui mi caj i coltañonla chaʼan junsujm jach baqui mi laj qʼuel? Jiñʌch cheʼ maʼañic mi lac wen otsan lac bʌ ti bet. Cheʼ cabʌl lac chubʌʼan miʼ yʌqʼueñonla lac sʌt qʼuin yicʼot miʼ mʌctañonla. Cheʼ bajcheʼ mi yʌl jiñi Biblia, jasʌl «cheʼ an lac waj yicʼot lac pislel, yom tijicñayonla» (1 Timoteo 6:8). Yom pʼisbil jach chuqui yom bʌ an lac chaʼan.

21. ¿Chucoch yom mi lac wen ñaʼtan chuqui yom bʌ melol, i chuqui jiñi ñaxam bʌ yom mi laj cʌcʼ ti laj cuxtʌlel?

²¹ Laʼ laj cʌcʼ ti ñaxan i chaʼan bʌ Jehová. Come mach wen jocholoñicla ili ora, jin chaʼan, yom mi lac wen ñaʼtan chuqui yom bʌ melol. Mi maʼañic, mi caj lac sʌt qʼuin ti mach bʌ wen i cʼʌjñibalic, i maʼañix mi caj lac mel jiñi ñaxam bʌ yom melol. ¿I chuqui jiñi ñaxam bʌ yom melol? Anquese cabʌl miʼ ñaʼtañob chaʼan jiñʌch cheʼ miʼ majlelob ti ñuc tac bʌ escuela yicʼot cheʼ miʼ tajob eʼtel wen tojbil bʌ, pero Jesús tsiʼ sube jiñi xcʌntʼañob i chaʼan, chaʼan miʼ «ñaxan sajca[ñob] i yumʌntel Dios» (Mateo 6:33). Jiñi isujm bʌ xñoptʼañonla mi la cʌcʼ ti ñaxan jiñi i Yumʌntel Dios. Cheʼ bajcheʼ chumulonla, muʼ bʌ lac ñaʼtan, chuqui com bʌ lac taj yicʼot muʼ bʌ lac mel mi lac pʌs chaʼan jiñi ñumen ñuc bʌ chaʼañonla jiñʌch  chuqui yom Dios yicʼot chaʼan bʌ i Yumʌntel i mach jiñic jiñi chubʌʼañʌl tac muʼ bʌ i yʌcʼ ili pañimil.

22, 23. a) ¿Baqui bʌ jiñi cʼax ñuc bʌ eʼtel mi lac mel, i bajcheʼ mi lac pʌs chaʼan jiñʌch mi lac ñumen acʼ ti ñuc? (Qʼuele jiñi recuadro « Añʌch i yʌqʼueyon c tijicñʌyel jiñi tsaʼ bʌ c ñaʼta c mel»). b) ¿Baqui bʌ jiñi mach bʌ yomic mi lac mel tiʼ caj eʼtel?

²² Jiñi i wiñicob Dios yujilob chaʼan chumulobix ti cojix bʌ qʼuin. Jin chaʼan, jiñi ñaxam bʌ miʼ melob jiñʌch: Jiñi subtʼan chaʼan bʌ Yumʌntel yicʼot chaʼan miʼ sujtesañob ti xcʌntʼan jiñi quixtañujob (Mateo 24:14; 28:19, 20). Lajal bajcheʼ Jesucristo, woliyob ti eʼtel jaʼel chaʼan miʼ coltan jiñi quixtañujob. ¿Bajcheʼ miʼ pʌsob chaʼan cheʼʌch woliʼ melob? Yonlel woliʼ chaʼleñob wersa ti eʼtel bajcheʼ xsubtʼañob yicʼot i chʼejlel. An muʼ bʌ i chajpañob i bʌ chaʼan miʼ yochelob bajcheʼ precursor yicʼot misionero. Yonlel tatʌlob miʼ subeñob i yalobil chaʼan miʼ yajcañob tiʼ melol i yeʼtel Jehová tiʼ pejtelel ora, come yujilob chaʼan jiñʌch yom bʌ miʼ melob. Jiñi isujm bʌ xñoptʼañob miʼ pʌsob i chʼejlel ti subtʼan, jin chaʼan, ¿muʼ ba mejlel laj cʌl chaʼan choncol i tajob ‹i chobejtʌbal i yeʼtel›? Mucʼʌch. Tiʼ melol i yeʼtel Jehová tiʼ pejtelel laj cuxtʌlel jiñʌch muʼ bʌ i ñumen aqʼueñonla lac tijicñʌyel yicʼot bendición tac (pejcan Proverbios 10:22).

²³ Chaʼan miʼ mʌcʼlañob i familia, an muʼ bʌ i chaʼleñob cabʌl ora eʼtel. Pero mucʼʌch i mejlel laj qʼuelben i «chobejtʌbal la queʼtel», cheʼʌch miʼ mulan Jehová. Cheʼ mucʼʌch lac jacʼ cheʼ bajcheʼ miʼ subeñonla yicʼot jiñi principio tac, mi caj laj cubin lac tijicñʌyel chaʼan la queʼtel. Pero mach yomic mi laj cʌy chaʼan chuqui jach miʼ mʌctañonla tiʼ melol jiñi cʼax ñuc bʌ eʼtel: I subol jiñi wen tʼan chaʼan bʌ Yumʌntel. Cheʼʌch mi caj la cʌcʼ ti cʌñol chaʼan mi laj cʼuxbin Jehová yicʼot chaʼan com la chʌn ajñel tiʼ cʼuxbiya.