Yaʼ ti 1 Corintios 6:1-8, jiñi apóstol Pablo tsiʼ taja ti tʼan chaʼan jiñi leto woli bʌ ti ujtel tiʼ tojlel jiñi hermanojob. Ñaxan, tsiʼ yʌlʌ chaʼan maʼañic tsiʼ mulaj cheʼ bʌ chaʼtiquil uxtiquil xñoptʼañob yaʼ ti Corinto ‹miʼ majlel i melob i bʌ baʼan jiñi am bʌ i yeʼtel mach bʌ i cʌñʌyic Dios› (versículo 1). Tsiʼ yʌlʌ chaʼan jiñi i wocolob yom miʼ tojʼesʌntel ti congregación i mach yaʼic ti melobʌjʌl i chaʼan yumʌlob. Laʼ lac tsajin baqui tac bʌ jiñi jamʌ tsiquil bʌ tsiʼ yʌlʌ Pablo yaʼ tiʼ carta yicʼot mi caj laj qʼuel baqui tac bʌ jiñi muʼ bʌ i mejlel ti ujtel baqui tajol maʼañic miʼ yochel ti jiñi ticʼojel tsaʼ bʌ i yʌcʼʌ jiñi apóstol.

Cheʼ bʌ miʼ tejchel jumpʼejl wocol tiʼ caj taqʼuin o lum tiʼ tojlel chaʼtiquil xñoptʼañob, Jehová yom chaʼan mi lac tojʼesan cheʼ bajcheʼ miʼ mulan i mach cheʼic bajcheʼ laj com (Proverbios 14:12). Cheʼ bajcheʼ tsiʼ yʌlʌ Jesús, ñumen wen cheʼ mi lac tojʼesan ti ora i maʼañic mi lac pijtan chaʼan mi ñumen tsʌtsʼan (Mateo 5:23-26). Anquese chʼijiyemtic, pero an xñoptʼañob ñʌmʌloʼ bʌ ti tech leto i miʼ majlelob cʼʌlʌl ti melobʌjʌl. Pero Pablo tsiʼ yʌlʌ chaʼan jiñi ‹woli bʌ i contrajiñob i bʌ› jumpʼejlʌch ‹sajtemal›. ¿Chucoch? Come miʼ mejlel i yʌcʼ ti wocol i cʼabaʼ Dios yicʼot miʼ yʌcʼ ti ajlel jiñi congregación. Chaʼan maʼañic miʼ yujtel bajcheʼ jiñi, yom mi lac jacʼ ili ticʼojel: «¿Chucoch maʼañic mi laʼ cuchben i mul laʼ wermaño cheʼ miʼ techbeñetla wocol?» (versículo 7).

Pablo tsiʼ yʌlʌ jaʼel chaʼan Dios tsiʼ yʌcʼʌ jiñi congregación bajcheʼ jumpʼejl laj coltʌntel tiʼ tojʼesʌntel wocol tac. Tsiʼ yʌlʌ chaʼan yaʼ ti congregación an wiñicob tsaʼix bʌ i wen tajayob i ñaʼtʌbal tiʼ pejcʌntel jiñi Tsʼijbujel. Jin chaʼan, jiñi ancianojob chajpʌbilobix chaʼan miʼ chaʼleñob ‹meloñel tiʼ tojlel› jiñi hermanojob «chaʼan chuqui tac woli ti ujtel ti ili ora» (versículo 3-5). Cheʼ jaʼel, Jesús tsiʼ yʌlʌ chaʼan an uxchajp muʼ bʌ i mejlel ti mejlel chaʼan miʼ tojʼesʌntel jumpʼejl leto tiʼ caj jumpʼejl tʼan mach bʌ isujmic tiʼ tojlel yambʌ o tiʼ caj xujchʼ. Ñaxam bʌ jiñʌch chaʼan miʼ tojʼesañob jiñi wocol tiʼ bajñelob, mi maʼañic miʼ tojʼan, i chaʼchajplel jiñʌch cheʼ miʼ chaʼ pejcan pero yicʼotix yambʌ juntiquil o chaʼtiquil, i mi maʼañic miʼ tojʼan, i yuxchajplel jiñʌch cheʼ yom miʼ majlelob tiʼ tojlel ancianojob ti congregación (Mateo 18:15-17).

 Tiʼ sujm, jiñi ancianojob mach chaʼañic miʼ sujtelob bajcheʼ abogado o bajcheʼ muʼ bʌ i yʌcʼob ticʼojel chaʼan bajcheʼ yom miʼ mejlel choñoñel tac. Maʼañic mi caj i yʌcʼob i tʼan chaʼan bajcheʼ mi caj i tojʼesañob i leto chaʼtiquil hermano tiʼ caj taqʼuin o lum. Jiñi i yeʼtelob chaʼañʌch miʼ coltañob jiñi añoʼ bʌ i wocol chaʼan miʼ yʌcʼob ti ñuc jiñi principio tac am bʌ ti Biblia yicʼot chaʼan miʼ tojʼesañob ti utsʼat jiñi wocol. Mi wen tsʌts jiñi wocol, tajol miʼ mejlel i pejcañob jiñi superintendente i chaʼan circuito o yaʼ ti sucursal i chaʼan i testigojob Jehová. Pero an tac chuqui miʼ mejlel baqui tajol mach wersajic mi caj i cʼʌjñel i ticʼojel jiñi Pablo bajcheʼ tsaʼix laj qʼuele. Laʼ laj qʼuel baqui tac bʌ.

Cheʼ mi lac mel jumpʼejl demanda mach tiʼ pejtelelic ora yom yʌl chaʼan mach utsʼatic woli bʌ lac mel. Tajol chaʼan cheʼʌch com lac mel bajcheʼ mi yʌl jiñi yumʌlob o chaʼan miʼ tojʼesʌntel jiñi wocol ti wen. Jumpʼejl ejemplo, tajol miʼ mejlel jiñi demanda chaʼan miʼ yujtel jumpʼejl divorcio, chaʼan miʼ jacʼbentel jiñi tatʌl o ñaʼʌl chaʼan jin yom i chʼʌm tiʼ wenta i yalobil, chaʼan jiñi ñaʼʌl i bajñel bʌ miʼ cʼajtin chaʼan jiñi i ñoxiʼal yom miʼ yʌcʼ taqʼuin chaʼan miʼ cosan i yalobil, chaʼan miʼ tojtʌl jumpʼejl seguro, chaʼan miʼ ñaʼtan jiñi añoʼ bʌ i yeʼtel chaʼan tsaʼ lajmi o tsaʼix jubi i choñoñel jiñi quixtañu o chaʼan miʼ mejlel ti wen jumpʼejl testamento. Cheʼ jaʼel, juntiquil xñoptʼan miʼ mejlel i chaʼ chaʼlen ti demandar jiñi yʌquel bʌ i chaʼlen ti demandar chaʼan miʼ coltan i bʌ. *

Jiñi xñoptʼan muʼ bʌ i majlel ti melobʌjʌl chaʼan tiʼ caj jiñi wocol tac bajcheʼ tsaʼ ujti la cʌl, maʼañic woliʼ ñusan ti pʼis jiñi ticʼojel tsaʼ bʌ i yʌlʌ Pablo, pero mi maʼañic woliʼ mel chaʼan jach yom leto. * Yom cʼajal lac chaʼan, jiñi ñumen ñuc bʌ i cʼʌjñibal jiñʌch chaʼan chʼujul miʼ yajñel i cʼabaʼ Jehová yicʼot chʌn temel miʼ yajñel jiñi congregación i tiʼ ñʌchʼtʌlel. Jiñi cʼuxbiya jiñʌch jiñi wen ñuc bʌ muʼ bʌ i yʌcʼonla ti cʌjñel chaʼan woli lac tsajcan Cristo, jumpʼejl cʼuxbiya «maʼañic [bʌ] miʼ sajcan chuqui yom tiʼ bajñel pusicʼal» (1 Corintios 13:4, 5; Juan 13:34, 35).