1, 2. ¿Chucoch yom an i foco juntiquil cheʼ bʌ woli ti xʌmbal ti acʼʌlel, i bajcheʼ miʼ lajintel yicʼot laj conciencia?

ÑAʼTANCU an majqui woli (choncol) ti xʌmbal majlel, pero cheʼ jiñi miʼ yochel jiñi acʼʌlel, ¿chuqui yom miʼ chʼʌm majlel chaʼan maʼañic miʼ yajlel yicʼot maʼañic chuqui miʼ chaʼlen ti bij? Yom miʼ chʼʌm majlel jumpʼejl i foco.

² Mi maʼañic miʼ chʼʌm majlel mach mejlic i qʼuel i bijlel, tajol miʼ yajlel o an chuqui miʼ chaʼlen. Jumpʼejl foco miʼ ñejñan a bijlel chaʼan maʼañic chuqui maʼ chaʼlen. Jehová tsiʼ yʌqʼueyonla jumpʼejl lac majtan lajal bʌ bajcheʼ jiñi foco (Santiago 1:17). Ili lac majtan jiñʌch laj conciencia. Mi maʼañic lac chaʼan jiñi, maʼañic chuqui miʼ mejlel lac mel. Cheʼ utsʼat mi laj cʼʌn, miʼ tojʼesañonla majlel ti laj cuxtʌlel yicʼot ti toj bʌ bij. Ili jiñʌch ñuc bʌ lac majtan. Jin chaʼan, i cʼʌjñibal mi lac tsajin chuqui jiñi conciencia yicʼot bajcheʼ mucʼ ti eʼtel, cheʼ jiñi, mi laj qʼuel ili yambʌ tac: 1) ¿Bajcheʼ yom mi laj cʌntesan laj conciencia? 2) ¿Chucoch yom mi lac chʼʌm ti ñuc i conciencia yañoʼ bʌ? 3) ¿Baqui bʌ wenlel mi lac taj mi utsʼat an laj conciencia?

3. Ti griego, ¿chuqui i sujmlel jiñi tʼan «conciencia», i chuqui yom yʌl?

³ Yaʼ ti Biblia, jiñi tʼan «conciencia» ti griego, i sujmlel jiñʌch: «La cujil bʌ ti lac tojlel». Yom yʌl, an ti lac tojlel muʼ bʌ mejlel i coltañonla chaʼan mi laj cʌn lac bʌ ti lac bajñelil.  Maʼañic chuqui yambʌ cuxul bʌ wʌʼ ti Pañimil aqʼuebil bʌ i chaʼan Dios jiñi majtan. Yicʼot i coltaya laj conciencia, miʼ mejlel laj cʌn lac bʌ bajcheʼ yilalonla yicʼot chaʼan mi lac tsajin tiʼ pejtelel chuqui mi lac mel. Jiñi laj conciencia lajal bajcheʼ juntiquil xmeloñel am bʌ ti lac malil muʼ bʌ i tsajin tiʼ pejtelel chuqui mi lac ñaʼtan yicʼot jiñi lac melbal tac. Miʼ tojʼesañonla chaʼan mi lac ñaʼtan mi weñʌch o mach weñic chuqui com bʌ lac mel. Mi utsʼat chuqui mi lac ñaʼtan, miʼ yʌqʼueñonla lac tijicñʌyel, pero mi mach cheʼic miʼ yʌcʼonla ti mel pusicʼal.

4, 5. a) ¿Bajcheʼ mi lac ñaʼtan chaʼan Adán yicʼot Eva tsaʼ aqʼuentiyob i conciencia? ¿Bajcheʼ tsaʼ cʌyleyob tiʼ tojlel Dios cheʼ bʌ tsiʼ ñusʌbeyob i tʼan? b) ¿Baqui bʌ ejemplo tac an yaʼ ti Tsʼijbujel Hebreo chaʼan tsaʼ bʌ i ñʌchʼtayob i conciencia?

⁴ Jiñi Adán yicʼot Eva tsaʼ aqʼuentiyob jumpʼejl i conciencia jaʼel, come cheʼ bʌ tsiʼ chaʼleyob mulil, ti wiʼil tsiʼ yubiyob quisin (Génesis 3:7, 8). Pero maʼañix i cʼʌjñibal cheʼ tsaʼ to subentiyob tiʼ conciencia chaʼan mach weñic tsaʼ bʌ i meleyob. ¿Chucoch? Come wʌn i ñaʼtayobix chuqui mi caj i chaʼleñob mi tsiʼ ñusʌbeyob i tʼan Dios. Mach xmulilobic tsaʼ mejliyob, jin chaʼan, cheʼ bʌ tsiʼ ñusʌbeyob i tʼan Jehová yicʼot tsaʼ sujtiyob tiʼ contra, wen yujilobix chuqui mi caj i chaʼleñob.

⁵ Cabʌl wiñicob xʼixicob (quixtañujob) an i ñʌchʼtayob muʼ bʌ i subentelob tiʼ conciencia, i mach lajalobic bajcheʼ Adán yicʼot Eva. Juntiquil jiñʌch Job, tsaʼ bʌ i yʌlʌ: «Mach xmuliloñic, chaʼ choʼon. Ñʌchʼʌl c pusicʼal. Maʼañic muʼ ti tʼan» (Job 27:6). * Cheʼ bʌ an chuqui miʼ ñaʼtan i mel Job, miʼ ñaxan ñʌchʼtan chuqui miʼ suben i conciencia. Jin chaʼan, yicʼot i tijicñʌyel tsiʼ yʌlʌ chaʼan jiñi i conciencia  maʼañic tsiʼ wen acʼʌ ti mel pusicʼal i maʼañic miʼ yubin quisin tiʼ caj chuqui miʼ mel. Tsaʼ bʌ ujti tiʼ tojlel David mach lajalic. Jiñi i conciencia maʼañic tsiʼ yʌqʼue i tijicñʌyel. Jiñi Biblia mi yʌl chaʼan «tsaʼ cajiʼ [chʌn] mel i pusicʼal» cheʼ jumpʼejl bʌ qʼuin maʼañic tsiʼ chʼʌmʌ ti ñuc jiñi rey Saúl, juntiquil yajcʌbil bʌ i chaʼan Jehová (1 Samuel 24:5). Cheʼ bajcheʼ tsiʼ yubi i bʌ, tsiʼ colta chaʼan yom miʼ ñumen qʼuel ti ñuc yañoʼ bʌ.

6. ¿Chuqui miʼ yʌqʼueñonla lac ñaʼtan chaʼan tsaʼʌch aqʼuentiyonla laj conciencia?

⁶ Jiñi i wiñicob Jehová mach cojach tsaʼ bʌ aqʼuentiyob i conciencia. Jiñi apóstol Pablo tsiʼ yʌlʌ: «Come jiñi gentilob mach bʌ añic i chaʼañob jiñi tsʼijbubil bʌ mandar, an i chaʼañob i mandar Dios tiʼ pusicʼal cheʼ miʼ bajñel melob cheʼ bajcheʼ tsʼijbubil, anquese mach i cʌñʌyobic jiñi tsʼijbubil bʌ. Miʼ tsictesañob jiñi mandar tsʼijbubil bʌ tiʼ pusicʼalob. Miʼ bajñel ñaʼtañob tiʼ pusicʼal mi toj woli melob o mi mach tojic» (Romanos 2:14, 15). An i tajol jiñi quixtañujob miʼ melob cheʼ bajcheʼ miʼ mulan Dios anquese mach i cʌmbeyobic i mandar, pero cheʼʌch miʼ subentelob tiʼ conciencia.

7. ¿Chucoch an i tajol mach weñic mucʼ ti eʼtel laj conciencia?

⁷ Pero jiñi laj conciencia mach tiʼ pejtelelic ora utsʼat miʼ caj ti eʼtel. Chaʼan mi lac ñaʼtan chucoch, laʼ lac chaʼ cʼajtesan jiñi ejemplo i chaʼan foco. Cheʼ bʌ mach pʼʌtʌlix i cʼʌcʼal jiñi pila, maʼañix miʼ chʌn tsʼʌjyel jiñi foco chaʼan miʼ ñejñan lac bijlel. Cheʼ miʼ yujtel jaʼel laj conciencia, mi maʼañic mi lac pejcan i Tʼan Dios, maʼañic mi caj lac ñaʼtan baqui bʌ wen yicʼot mach bʌ weñic. Mi cojach mi lac mel muʼ bʌ lac bajñel mulan, jiñi laj conciencia miʼ mejlel i pʌyonla majlel ti jumpʼejl bij mach bʌ weñic. Cheʼ jaʼel, mi laj com chaʼan wen miʼ chaʼlen eʼtel laj conciencia ti lac tojlel, yom mi laj cʼajtiben Dios chʼujul bʌ i yespíritu. Cheʼ bajcheʼ tsiʼ yʌlʌ Pablo: «Cheʼʌch miʼ subeñon c pusicʼal cʌntesʌbil bʌ chaʼan jiñi Chʼujul bʌ Espíritu» (Romanos 9:1). Cheʼ jiñi, ¿chuqui yom mi lac mel chaʼan jiñi laj conciencia miʼ jacʼ chuqui miʼ  suben jiñi chʼujul bʌ i yespíritu Jehová? Cheʼ bajcheʼ mi caj laj cʌn, yom mi laj cʌntesan.

8. a) ¿Bajcheʼ miʼ mejlel i ticʼlan laj conciencia lac pusicʼal? ¿Chuqui ñumen i cʼʌjñibal bʌ yom chaʼañonla cheʼ bʌ an chuqui mi lac ñaʼtan lac mel? b) ¿Chucoch mach jasʌlic yom tijicña an laj conciencia? (Qʼuele jiñi nota.)

⁸ ¿Bajcheʼ yom mi laj cʼʌn laj conciencia cheʼ bʌ an chuqui mi lac ñaʼtan lac mel? Cabʌl miʼ yʌlob chaʼan jasʌl jach bajcheʼ yilal mi laj qʼuel ti lac bajñelil. Tajol miʼ yʌlob: «Come jiñi j conciencia mach lecojic miʼ qʼuel». Pero mach yomic miʼ ñajʌyel lac chaʼan: Tiʼ pejtelel chuqui ora bʌ miʼ mulan lac pusicʼal miʼ mejlel i ticʼlan laj conciencia. Cheʼʌch mi yʌl jiñi Biblia: «Wen yujilob lot i pusicʼal wiñicob. Cabʌl i sajtemal. ¿Majqui miʼ luʼ cʌn?» (Jeremías 17:9). Jin chaʼan, jiñi ñumen ñuc bʌ yom mi laj qʼuel jiñʌch mi lac tijicñesʌben i pusicʼal Jehová i mach jiñic lac bajñel pusicʼal. *

9. ¿Chuqui yom yʌl i bʌcʼñʌntel Dios, i bajcheʼ miʼ chaʼlen eʼtel yicʼot laj conciencia?

⁹ Cheʼ bʌ juntiquil miʼ pʌs chaʼan wen chajpʌbil i chaʼan i conciencia, maʼañic miʼ bajñel mel chuqui miʼ mulan. Miʼ yʌcʼ chaʼan jiñi i bʌqʼuen ti Dios miʼ tojʼesan, yom yʌl chaʼan miʼ bʌcʼñan i mel muʼ bʌ i yʌqʼuen i chʼijiyemlel Jehová. Cheʼ  miʼ pʌs tsaʼ bʌ ujti tiʼ tojlel Nehemías. Come jiñʌch gobernador ti Jerusalén, an tiʼ wenta miʼ wersa suben jiñi wiñicob chaʼan miʼ yʌcʼob tojoñel. Pero mach cheʼic tsiʼ mele. ¿Chucoch? Jiñʌch tsiʼ yʌlʌ chucoch: «Mach cheʼic tsac mele joñon chaʼan wolic bʌcʼñan Dios» (Nehemías 5:15). Mach yomic i yʌqʼuen i chʼijiyemlel Jehová chaʼan jach tiʼ caj chuqui miʼ wersa cʼajtiben jiñi tejclum. Cheʼ yom mi lac pʌs lac bʌqʼuen jaʼel ti Jehová, come mi caj i coltañonla lac sajcan laj coltaya ti Biblia cheʼ bʌ an chuqui mi lac ñaʼtan lac mel.

10. ¿Baqui bʌ principio tac am bʌ ti Biblia mi caj i coltañonla chaʼan mi lac ñaʼtan mi mucʼʌch caj lac jap lembal o maʼañic?

¹⁰ Laʼ la cʌl chaʼan jiñi jap lembal. Cheʼ mi lac pʌjyel majlel baqui mi cajel jumpʼejl uchʼibʌl yicʼot son i miʼ yʌjqʼuel lembal, tajol mi laj cʼajtiben lac bʌ: «¿Yom ba mic jap o maʼañic?». Chaʼan wen muʼ bʌ lac mel, yom mi lac ñaxan cʌntesan laj conciencia cheʼ mi lac tsajin jiñi principio tac am bʌ ti Biblia. Jiñi Tsʼijbujel maʼañic mi yʌl chaʼan mach yomic mi lac tsʼitaʼ jap lembal. Miʼ yʌqʼuen i ñuclel Dios chaʼan tsiʼ yʌcʼʌ jiñi vino (Salmo 104:14, 15). Pero miʼ tsʼaʼlen jiñi mux bʌ i ñumelob ti pʼis ti jap lembal yicʼot jiñi qʼuiñijel tac ñumeñix bʌ ti pʼis (Lucas 21:34; Romanos 13:13). Cheʼ jaʼel, mi yʌl chaʼan jiñi yʌcʼʌjel (qʼuixñijel) jiñʌch tsʌts bʌ mulil lajal bʌ bajcheʼ tsʼiʼlel (1 Corintios 6:9, 10). *

11. ¿Chuqui yom mi lac mel chaʼan Dios miʼ coltañonla lac chʼʌm ti ñuc jiñi principio tac?

¹¹ Principio tac bajcheʼ jiñi, miʼ ñumen chajpan laj conciencia i miʼ coltan i cʌn chuqui wen yicʼot mach bʌ weñic. Jin chaʼan, cheʼ mi lac majlel ti jumpʼejl uchʼibʌl yicʼot son baqui tajol miʼ yʌjqʼuel lembal, yom mi laj cʼajtiben lac bʌ: «¿Bajcheʼ yilal mi cajel jiñi? ¿Mejl ba ti ñumel ti pʼis? ¿Chuqui mi caj c mel? ¿Com jax ba c wen jap lembal? ¿Yaʼ jax ba cuxulon ti lembal? ¿Cʼʌñʌl ba mic jap chaʼan tijicñayon yicʼot  chaʼan mic mel chuqui jach com? ¿Muʼ ba cac mejlel cʌl chaʼan jasʌlix?». Cheʼ mi lac tsajin jiñi principio tac am bʌ ti Biblia o cʼajtiya tac chaʼan bajcheʼ yom mi la cʌcʼ ti ñuc jiñi, yom mi laj cʼajtiben Jehová ti oración chaʼan miʼ tojʼesañonla yicʼot chʼujul bʌ i yespíritu (pejcan Salmo 139:23, 24). Cheʼ bajcheʼ iliyi, mi caj lac taj laj coltʌntel ti Jehová yicʼot miʼ mejlel laj cʌntesan laj conciencia. Pero anto yambʌ chuqui yom mi lac chʼʌm ti ñuc cheʼ bʌ an chuqui mi lac ñaʼtan lac mel.

12, 13. ¿Chucoch mach junlajalic i conciencia laj quermañojob, i bajcheʼ yom mi laj qʼuel joñonla jiñi?

¹² An tajol toj sajtel lac pusicʼal cheʼ mi laj qʼuel chaʼan mach lajalic laj conciencia yicʼot yañoʼ bʌ yaʼ ti congregación. Mach lecojic yom mi laj qʼuel cheʼ bʌ juntiquil laj quermaño miʼ subeñonla chaʼan mach weñic miʼ qʼuel muʼ bʌ i mel yambʌ hermanojob, pero tajol an yañoʼ bʌ weñʌch miʼ qʼuelob. Laʼ lac chaʼ ñaʼtan chaʼan jiñi lembal, an muʼ bʌ i mulañob i tsʼitaʼ jap yicʼot yambʌ hermanojob i yamigojoʼ bʌ, pero an mach bʌ utsʼatic miʼ qʼuelob. ¿Chucoch mach lajalic bajcheʼ miʼ qʼuelob, i bajcheʼ yilal yom mi laj qʼuel joñonla?

¹³ Cabʌl i sujmlel cheʼ mach junlajaloñicla. Junchajp, come mach junlajalic chuqui tsaʼ lac ñusa ti jujuntiquil. An yujiloʼ bʌ chaʼan ti wajali, an chuqui tsiʼ mulayob i mel mach bʌ junyajlic jach tsiʼ yʌcʼʌyob ti mulil (1 Reyes 8:38, 39). Laʼ lac ñaʼtan chaʼan miʼ julaʼtañonla juntiquil hermano muʼ bʌ i wen mulan jap lembal ti wajali, pero ili ora tsaʼix i cʌyʌ i maʼañix miʼ jap mi tsʼitaʼic. Mi tsaʼ lac sube chaʼan miʼ tsʼitaʼ jap, tajol jiñi i conciencia mi caj i suben chaʼan maʼañic miʼ chʼʌm. ¿Muʼ ba caj lac michʼan? ¿Muʼ ba caj lac wersa suben i jap? Maʼañic. Mi añʌch laj cʼuxbiya, mi caj lac chʼʌm ti ñuc chuqui miʼ ñaʼtan anquese maʼañic miʼ tsictesʌbeñonla chucoch maʼañic miʼ jap.

14, 15. ¿Chuqui bʌ wocol tsaʼ ujti cheʼ ti ñaxam bʌ siglo, i chuqui yom miʼ mejlel tsiʼ yʌlʌ Pablo?

 ¹⁴ Cʼʌlʌl cheʼ ti ñaxam bʌ siglo, jiñi apóstol Pablo tsiʼ qʼuele chaʼan mach junlajalic i conciencia jiñi hermanojob. Jumpʼejl ejemplo, an xñoptʼañob mach bʌ chʌn sʌquic tsiʼ qʼueleyob jiñi weʼelʌl chaʼan bʌ miʼ yʌqʼuentel diosteʼ tac, i ti wiʼil miʼ chaʼ chojñel (1 Corintios 10:25). Pero Pablo mach lecojic tsiʼ qʼuele. Maʼañic i cʼʌjñibal tsiʼ qʼuele jiñi diosteʼ tac come jiñi añimal tac i chaʼañʌch Jehová, i jiñʌch tsiʼ mele. Pero Pablo tsiʼ chʼʌmbe isujm chaʼan mach tiʼ pejtelobic junlajal mi caj i ñaʼtañob. An tsaʼ bʌ i chʼujutesayob diosteʼ tac cheʼ maxto xñoptʼañobic, jin chaʼan, bibiʼ tsiʼ qʼueleyob cheʼ bajcheʼ jiñi weʼel chaʼan bʌ miʼ yʌqʼuentel diosteʼ tac. ¿Chuqui yom miʼ mejlel?

¹⁵ Pablo tsiʼ yʌlʌ: «Mi pʼʌtʌlonla yom mi laj cuchbeñob i sajtemal jiñi tile bixeloʼ bʌ i pusicʼal. Mach yomic mi lac mel chuqui yom lac bajñel pusicʼal. Come Cristo maʼañic tsiʼ mele chuqui yom i bajñel pusicʼal» (Romanos 15:1, 3). Ili yom yʌl, chaʼan cheʼ bajcheʼ Jesús, yom mi lac ñaxan qʼuel i wenlel bʌ laj quermañojob i mach jiñic lac bajñel wenlel. Ti yambʌ texto baqui miʼ taj ti tʼan jaʼel iliyi, Pablo tsiʼ yʌlʌ chaʼan maʼañic mi caj i cʼux jiñi weʼelʌl chaʼan maʼañic miʼ yʌcʼ ti yajlel i tiñʌmeʼ Jehová tsaʼ bʌ chʌmi Cristo tiʼ caj (pejcan 1 Corintios 8:13; 10:23, 24, 31-33).

16. ¿Chucoch mach yomic mi laj cʌl mi wen o mach weñic miʼ qʼuel laj conciencia chuqui miʼ mel jiñi yañoʼ bʌ?

¹⁶ Mi an hermanojob muʼ bʌ i melob lecoj bʌ miʼ qʼuel laj conciencia, mach yomic mi la cʌl chaʼan leco chuqui woliʼ melob, come mach ti lac pejtelelic junlajal bajcheʼ mi caj i cʼotel lac ñaʼtan cheʼ bʌ an chuqui com la mel (pejcan Romanos 14:10). Jiñi laj conciencia chaʼañʌch mi lac ticʼ lac bʌ joñonla i mach chaʼañic mi laj cʌl mi wen o mach weñic chuqui miʼ mel yañoʼ bʌ. Yom cʼajal lac chaʼan tsaʼ bʌ i yʌlʌ Jesús: «Mach mi laʼ wʌl ti laʼ pusicʼal mi an i mul laʼ piʼʌlob. Cheʼ jiñi, maʼañic mi caj i yʌlob tiʼ pusicʼal mi an  laʼ mul» (Mateo 7:1). Mach yomic miʼ tech wocol juntiquil hermano ti congregación chaʼan jach mach jun lajalic chuqui miʼ subentelob tiʼ conciencia. Laj com lac pʼʌtʼesan lac bʌ i mach chaʼañic mi lac tsʼaʼlen lac bʌ, jin chaʼan mi laj cʼuxbin lac bʌ i mi lac tem ajñel ti lac ñʌchʼtʌlel (Romanos 14:19).

17. ¿Chuqui an i chaʼle i conciencia cabʌl quixtañujob?

¹⁷ Jiñi apóstol Pedro tsiʼ sube jiñi xñoptʼañob: «Ajñenla ti utsʼat [...] ti laʼ pusicʼal [o conciencia]» (1 Pedro 3:16). Yonlel quixtañujob maʼañic miʼ tajob jiñi ñuc bʌ bendición come mach sʌcobic i conciencia tiʼ wut Jehová. Cheʼ bajcheʼ tsiʼ yʌlʌ Pablo: «Chʌme[ñob] i pusicʼal chaʼan mulil» (1 Timoteo 4:2). Ili versículo miʼ yʌqʼueñonla lac chʼʌmben isujm chaʼan  cabʌl quixtañujob chʌmeñobix i conciencia, i maʼañix chuqui miʼ chʌn subentelob chaʼan bʌ i sajtemalob. Maʼañic miʼ chʌn ubiñob tiʼ pusicʼal chaʼan añob i sajtemal yicʼot maʼañix miʼ cʼojoʼtañob mi tsiʼ meleyob mach bʌ utsʼatic.

18. ¿Bajcheʼ miʼ coltañonla cheʼ an i tajol mi lac chaʼlen mel pusicʼal chaʼan tsaʼ bʌ lac mele?

¹⁸ Cheʼ an i tajol mi la cubin lac chʼijiyemlel, jiñʌch laj conciencia woliʼ yʌl chaʼan an mach bʌ weñic tsaʼ lac mele. Mi mucʼʌch lac jacʼ chuqui miʼ subeñonla yicʼot mi laj cʌy lac mul, mi caj lac ñusʌbentel anquese wen tsʌts tsaʼ bʌ lac mele. Cheʼ tsaʼ ujti jiñi rey David. Tsiʼ chaʼle tsʌts tac bʌ mulil, pero Dios tsiʼ ñusʌbe come tsiʼ cʌyʌ i mul tiʼ pejtelel i pusicʼal. Tsiʼ tsʼaʼle jiñi mach bʌ wentaquic tsiʼ mele i tsiʼ yʌlʌ chaʼan maʼañic baqui ora mi caj i cʌy i jacʼben i mandar Dios, jin  chaʼan tsaʼ cʼoti yʌl: «Isujm utsʼatet, c Yum, maʼ ñusʌbeñon lojon c mul» (Salmo 51:1-19; 86:5). Pero anquese tsaʼix laj cʌyʌ lac mul yicʼot tsaʼix ñusʌbentiyonla, an i tajol muʼto la cubin lac chʼijiyemlel yicʼot mi lac chaʼlen quisin. ¿Chuqui mi caj lac mel?

19. ¿Chuqui miʼ mejlel lac mel mi jiñi laj conciencia maʼañic miʼ cʌy i subeñonla chaʼan jiñi mulil tsaʼ bʌ lac mele anquese tsaʼix laj cʌyʌ?

¹⁹ Mi tsaʼix laj cʌyʌ lac mul maʼañix chucoch miʼ chʌn subeñonla laj conciencia chaʼan jiñi tsaʼ bʌ lac mele. Mi jiñi chʼijiyemlel maʼañic miʼ loqʼuel ti lac pusicʼal, yom mi laj cʌqʼuen i ñaʼtan chaʼan Jehová ñumen ñuc i mach jiñix miʼ yʌcʼ ti ñuc tsaʼ bʌ lac mele. I yorajlelix mi lac chʼʌm ti ñuc cheʼ bajcheʼ tajol an subebil lac chaʼan jiñi yañoʼ bʌ: «Cʼajtesan chaʼan Jehová miʼ cʼuxbiñet yicʼot chaʼan tsaʼix i ñusa a mul» (pejcan 1 Juan 3:19, 20). Cheʼ bʌ sʌquix an laj conciencia, mi caj laj cubin lac ñʌchʼtʌlel yicʼot lac tijicñʌyel maʼañic bʌ miʼ mejlel i taj yambʌ quixtañujob ila ti pañimil (mulawil). Cabʌl quixtañujob am bʌ i chaʼleyob tsʌts bʌ mulil, an i tajayob jiñi tijicñʌyel, i cheʼ jaʼel chʌn utsʼat i conciencia woliʼ melbeñob i yeʼtel Jehová (1 Corintios 6:11).

20, 21. a) ¿Bajcheʼ mi caj i coltañonla ili libro? b) ¿Chuqui tsaʼ aqʼuenti jiñi xñoptʼañob, i bajcheʼ yom miʼ cʼʌñob?

²⁰ Ili libro ñaʼtʌbil chaʼan miʼ coltañonla lac taj lac tijicñʌyel yicʼot chaʼan chʌn utsʼat miʼ yajñel laj conciencia cheʼ wolito laj contrajin i pañimil Satanás ti ili cojix bʌ qʼuin. Tiʼ sujm maʼañic mi caj i yʌl tiʼ pejtelel jiñi mandar tac yicʼot principio tac am bʌ ti Biblia chaʼan bajcheʼ yom mi lac chumtʌl ti jujumpʼejl qʼuin. Yicʼot maʼañic mi caj lac taj baqui tsʼijbubil tiʼ pejtelel chuqui yom bʌ mi lac mel. Jiñʌch miʼ tsictesan bajcheʼ yom mi laj cʌcʼ ti ñuc jiñi cʌntesʌntel tac loqʼuem bʌ tiʼ Tʼan Dios yicʼot bajcheʼ yom mi laj cʌntesan laj conciencia. Mach yomic miʼ ñajʌyel lac chaʼan, anquese ñuc tsaʼ qʼuejli jiñi i Mandar Moisés, pero jiñi «i mandar Cristo» miʼ ñumen acʼ ti ñuc bajcheʼ yom mi laj cʼʌn laj conciencia  yicʼot chaʼan yom mi laj cʌy chaʼan miʼ tojʼesañonla jiñi principio tac am bʌ ti Biblia (Gálatas 6:2). Tiʼ sujm, Jehová libre an i chaʼañonla. Pero jiñi Biblia miʼ subeñonla chaʼan yom mi laj cʼʌn chaʼan mi lac pʌsben bajcheʼ cʼamel mi laj cʼuxbin Jehová, i «mach chaʼañic mi [lac] chaʼlen mulil» (1 Pedro 2:16).

²¹ Cheʼ bʌ tsaʼ caji a cʌn Jehová, tsaʼ teche xʌmbal ti jiñi bij muʼ bʌ i pʌyonla majlel ti laj cuxtʌlel. Chaʼan maʼañic maʼ loqʼuel ti jiñi bij, yom maʼ cʼajtin ti oración bajcheʼ yom maʼ wʌcʼ ti ñuc jiñi principio tac loqʼuem bʌ ti Biblia chaʼan maʼ mejlel a tsʼʌctesan bajcheʼ woli a cʌn majlel. Cheʼ jiñi, ‹cheʼ tsaʼix a taja a colel›, muqʼuix caʼ mejlel a cʌn «chuqui wen yicʼot chuqui mach weñic» (Hebreos 5:14). Jiñi a conciencia mi caj i coltañet cheʼ bʌ wen cʌntesʌbilix ti jiñi principio tac loqʼuem bʌ ti Biblia. Lajal bajcheʼ jiñi foco miʼ ñejñan a bijlel, jiñi a conciencia mi caj i subeñet baqui yom maʼ chaʼlen xʌmbal i mi caj i coltañet chaʼan maʼ mel chuqui wem bʌ miʼ qʼuel a Tat am bʌ ti Panchan. Cheʼ jaʼel, mi caj i coltañet chaʼan maʼ chʌn ajñel tiʼ cʼuxbiya Dios.