1, 2. Tsictesan yicʼot jumpʼejl lajiya chucoch miʼ yʌqʼuen i tijicñʌyel Jehová cheʼ mi lac chaʼlen wersa lac mel chuqui utsʼat.

JUNTIQUIL chut alob woliʼ loqʼuel ti tienda yicʼot i ñaʼ. Mach yʌxʌlic i yoj jiñi ñaʼʌl, tsaʼ waʼli i yalobil i tsiʼ qʼuele chaʼan woli (choncol) ti bʌqʼuen. ¿Chuqui tsiʼ chaʼle? Woliʼ chʼʌm majlel jumpʼejl alasʌl. Tsiʼ ñaʼta i cʼajtiben i ñaʼ chaʼan miʼ mʌnben, pero tsaʼ ñajʌyi i chaʼan. Chʼijiyem tsiʼ yubi i bʌ i tsaʼ caji ti uqʼuel. Jiñi i ñaʼ tsaʼ caji i tijicñesʌben i pusicʼal i tsaʼ chaʼ majli yicʼot yaʼ ti tienda. ¡Jiñi ñaʼʌl tsiʼ wen taja i tijicñʌyel cheʼ bʌ tsiʼ qʼuele i yalobil i chaʼ sutqʼuin jiñi alasʌl yicʼot cheʼ tsiʼ cʼajti i ñusʌbentel!

² Jiñi tatʌlob miʼ tajob i tijicñʌyel cheʼ bʌ miʼ qʼuelob chaʼan jiñi i yalobilob woli (yʌquel) i cʌñob i mel chuqui utsʼat. Pero miʼ ñumen taj i tijicñʌyel jiñi lac Tat am bʌ ti panchan come jiñʌch lac ‹Yum Dios, isujmʌch bʌ› (Salmo 31:5). Cheʼ mi lac chaʼlen wersa lac mel chuqui toj, Jehová miʼ taj i tijicñʌyel come miʼ qʼuel chaʼan woliyʌch laj colel majlel tiʼ chaʼan bʌ. La com laj cʌqʼuen i tijicñʌyel yicʼot chaʼan mi lac chʌn ajñel tiʼ cʼuxbiya, jin chaʼan mi la cʌl cheʼ bajcheʼ tsiʼ yʌlʌ Pablo: «Com c mel lojon chuqui utsʼat» (Hebreos 13:18). Ñaxan mi caj lac tsajin chʌnchajp baqui an i tajol mach cʼuñic tiʼ melol chuqui utsʼat yicʼot mi caj laj qʼuel baqui bʌ wenlel tac mi lac taj cheʼ mucʼʌch lac mel.

3-5. a) ¿Bajcheʼ miʼ subeñonla jiñi Biblia i wocolel cheʼ mi lac chaʼ lotin lac bʌ? b) ¿Chuqui mi caj i coltañonla lac tsajin lac bʌ ti wen?

³ Ti ñaxan, yom utsʼatonla ti lac bajñelil. Mach wocolic miʼ  mejlel lac bajñel lotin lac bʌ, come mʌcʌl lac wut tiʼ caj mulil. Cheʼ tsaʼ ujti tiʼ tojlel jiñi xñoptʼañob ti Laodicea. Anquese yujilob chaʼan cabʌl i chubʌʼañob, pero Jesús tsiʼ subeyob, «cʼax pʼumpʼuñetla, [...], xpotsʼetla, pitsʼiletla» tiʼ chaʼan bʌ Jehová (Apocalipsis 3:17). Mach cojach miʼ yʌcʼ chʼijiyemlel cheʼ bajcheʼ añob, jiñʌch jumpʼejl tsʌts bʌ wocol jaʼel come woliʼ bajñel mʌcob i wut chaʼan jiñi i sujmlel bʌ.

⁴ Cheʼ jaʼel Santiago tsiʼ yʌlʌ: «Mi an majch miʼ lolon al choncox i wen chʼujbin tiʼ pusicʼal, pero mach yujil i ticʼol i yacʼ choncol jach i lotin i bʌ. Maʼix i cʼʌjñibal bajcheʼ miʼ chʼujbin» (Santiago 1:26, Jiñi wen bʌ tʼan). Cheʼ mi lac lon ñaʼtan chaʼan Jehová miʼ chʼʌm jiñi eʼtel (troñel) choncol bʌ lac mel cheʼ mach weñic mi lac chaʼlen tʼan, woli lac lotin lac bʌ. Jiñi chʼujutesaya maʼañic i cʼʌjñibal come maʼañic chuqui mi lac taj. ¿Chuqui yom mi lac mel chaʼan maʼañic mi lac yajlel ti jumpʼejl wocol bajcheʼ jiñi?

⁵ Ti jiñi ñaxan tac bʌ versículo, Santiago tsiʼ taja ti tʼan jiñi toj bʌ i mandar Dios am bʌ ti Biblia, i miʼ lajin bajcheʼ jumpʼejl espejo baqui miʼ subeñonla chaʼan mi laj «qʼuel lac bʌ» chaʼan mi lac ñaʼtan baqui to yom mi lac tojʼesan lac bʌ (pejcan Santiago 1:23-25). Jiñi Tsʼijbujel jiñʌch muʼ bʌ i cʼʌjñel chaʼan mi laj qʼuel lac bʌ ti utsʼat yicʼot chaʼan mi lac ñaʼtan baqui to yom mi lac tojʼesan lac bʌ (Lamentaciones 3:40; Hageo 1:5). Cheʼ jaʼel, yom mi laj cʼajtiben Jehová chaʼan miʼ tsajiñonla, miʼ yʌqʼueñonla laj cʌn chuqui mach bʌ utsʼatic an ti lac tojlel yicʼot chaʼan miʼ yʌqʼueñonla lac pʼʌtʌlel chaʼan mi lac tojʼesan lac bʌ (Salmo 139:23, 24). Tajol mach tsajalic lac chaʼan mi lac tech lac pʌs mach bʌ utsʼatic ti lac tojlel yicʼot mach bʌ isujmic. Pero mach ñajʌyic lac chaʼan bajcheʼ yilal miʼ qʼuel jiñi lac Tat am bʌ ti panchan. Ti Salmo 5:6 mi yʌl: «Maʼ jisan jiñi muʼ bʌ i chaʼleñob lot. C Yum, tsʼaʼ maʼ qʼuel jiñi muʼ bʌ i chaʼlen tsʌnsa yicʼot jiñi muʼ bʌ i chaʼlen lot». Dios mi caj i coltañonla chaʼan mi laj qʼuel lac bʌ cheʼ bajcheʼ miʼ qʼuelonla yicʼot chaʼan mi lac mulan lac mel chuqui yom bʌ. Cheʼ bajcheʼ jiñi, mi caj la cʌl bajcheʼ Pablo, «com c mel lojon chuqui utsʼat». Pero yom mi lac chaʼlen  wersa tiʼ pejtelel lac pusicʼal, anquese ili ora an i tajol maʼañic mi caj i mejlel lac mel ti tsʼʌcʌl.

6. ¿Chucoch jiñi ñujpuñemoʼ bʌ yom tsiquil miʼ chaʼleñob tʼan, i baqui bʌ wocol yom bʌ miʼ cʌntañob i bʌ?

⁶ Cheʼ jaʼel, tiʼ melol chuqui utsʼat yicʼot chuqui isujm bʌ jiñʌch yom bʌ miʼ yʌcʼ ti cʌjñel lac familia. Jiñi ñujpuñemoʼ bʌ yom tsiquil miʼ chaʼleñob tʼan yicʼot tiʼ sujmlel. Mach yomic mi caj i pʌsbeñob yambʌ mach bʌ i piʼʌlic chaʼan miʼ mulan, miʼ mucu pejcan yambʌ ti Internet o tiʼ qʼuelol baqui tac jach bʌ pornografía, vicio tac muʼ bʌ mejlel i yotsan ti wocol. Anquese miʼ yʌqʼueñonla lac chʼijiyemlel, pero an xñoptʼañob am bʌ i meleyob bajcheʼ jiñi cheʼ bʌ maʼañic miʼ qʼuejlelob tiʼ piʼʌl. ¡Mach wis utsʼatic bajcheʼ jiñi! Mach yomic mi lac wis mel muʼ bʌ i yʌqʼueñonla lac pʌs chaʼan chaʼchajp lac pusicʼal tiʼ tojlel lac piʼʌl. Laʼ lac lajin jiñi rey David, tsaʼ bʌ i yʌlʌ: «Maʼañic mi cajñel yicʼot wiñicob yujiloʼ bʌ lot. Maʼañic mi cajñel yicʼot jiñi chaʼpʼejl jach bʌ i pusicʼal» (Salmo 26:4).

7, 8. ¿Baqui tac bʌ miʼ mejlel laj cʼʌn am bʌ yaʼ ti Biblia chaʼan mi laj cʌntesan la calobilob i qʼuelob ti ñuc chuqui utsʼat bʌ yom miʼ mejlel?

⁷ Jiñi tatʌlob yom miʼ cʌntesan i yalobilob chaʼan ñuc i cʼʌjñibal cheʼ miʼ melob chuqui utsʼat yicʼot miʼ yʌlob i sujmlel. Yom miʼ cʼʌñob jiñi Biblia chaʼan miʼ melob. Jiñi Tsʼijbujel miʼ chʼʌm tilel ejemplo tac mach bʌ yomic mi lac mel. Junchajp jiñʌch chaʼan bʌ Acán, tsaʼ bʌ i chaʼle xujchʼ i tsiʼ ñopo i muc, o chaʼan bʌ Giezi (Guehazí), tsaʼ  bʌ i chaʼle lot chaʼan miʼ taj cabʌl i chubʌʼan. Yambʌ jiñʌch chaʼan Judas, mach bʌ cojach tsiʼ xujchʼi taqʼuin, tsiʼ chaʼle lecojax bʌ lot chaʼan miʼ yʌcʼ ti ticʼlʌntel Jesús (Josué 6:17-19; 7:11-25; 2 Reyes 5:14-16, 20-27; Mateo 26:14, 15; Juan 12:6).

⁸ Pero añʌch ejemplo tac muʼ bʌ i coltañonla jaʼel. Bajcheʼ Jacob, cheʼ bʌ tsaʼ cʼoti i ñaʼtan chaʼan jiñi i yalobilob tsiʼ tajayob taqʼuin yaʼ tiʼ coxtal, tsiʼ subeyob chaʼan miʼ chaʼ sutqʼuiñob, come tsiʼ ñaʼta chaʼan tajol mach tsajalic i chaʼañob tsiʼ chʼʌmʌyob cʼotel. O jiñi tsaʼ bʌ ujti tiʼ tojlel Jefté yicʼot i yixicpʼeñal, tsaʼ bʌ i tsʼʌctesa jiñi tsaʼ bʌ i yʌlʌ i tat anquese machʌch cʼuñic tsiʼ yubi. O tsaʼ bʌ ujti tiʼ tojlel Jesús, cheʼ bʌ tsiʼ qʼuele chaʼan jiñi wiñicob xʼixicob (quixtañujob) wen michʼob, maʼañic tsiʼ chaʼle bʌqʼuen yicʼot maʼañic tsiʼ mucu chaʼan jiñʌch Jesús, tsiʼ pʌsʌ chaʼan ñumen ñuc bʌ tiʼ tojlel jiñʌch miʼ tsʼʌctiyel jiñi profecía am bʌ ti Biblia yicʼot chaʼan wen miʼ yajñel i yamigojob (Génesis 43:12; Jueces 11:30-40; Juan 18:3-11). Ili jiñʌch muʼ bʌ i pʌs chaʼan bajcheʼ cʼamel miʼ mejlel lac taj yaʼ ti Biblia muʼ bʌ mejlel laj cʼʌn laj cʌntesan la calobilob chaʼan miʼ cʼuxbiñob i miʼ qʼuelob ti ñuc chuqui utsʼat bʌ yom miʼ mejlel.

9. ¿Chucoch ñuc i cʼʌjñibal cheʼ mi lac pʌsbeñob wem bʌ ejemplo la calobilob chaʼan miʼ melob chuqui utsʼat bʌ, i chuqui mach bʌ yomic miʼ melob?

⁹ Pero ili cʌntesa mach cojach yom mi laj cʌl. Yom mi lac mel cheʼ bajcheʼ mi laj cʌl ti lac subtʼan. Jin chaʼan, jiñi apóstol Pablo tsiʼ cʼajti: «Jatet maʼ cʌntesan a piʼʌlob. ¿Chucoch maʼañic maʼ bajñel cʌntesan a bʌ? Maʼ sub mach weñic xujchʼ. ¿Muʼ ba a chaʼlen xujchʼ?» (Romanos 2:21). An tatʌlob muʼ bʌ i yʌlob chaʼan utsʼat chuqui yom miʼ mejlel, pero an i tajol mach cheʼic miʼ melob, tajol mach tsʼʌcʌlic miʼ yʌlob chuqui isujm bʌ o tajol miʼ chʼʌmob mach bʌ i chaʼañobic. Ti wiʼil miʼ poj alob: «Jumpʼejl jach alʌ lot mach bʌ añic miʼ yʌcʼ ti wocol yañoʼ bʌ» o «Yujilobix chaʼan majqui jach miʼ mejlel i chʼʌm majlel iliyi». Pero cojach mi caj i ñumen jembeñob i pensar i yalobilob. Jiñi xujchʼ, xujchʼʌch tiʼ pejtelel ora, anquese lets o mach letsic i tojol jiñi muʼ bʌ i chʼʌjmel, i jiñi lot, lotʌch  tiʼ pejtelel ora, mach yʌlʌyic chuqui woliʼ yʌjlel o mi jiñi lot mach wen tsʌtsic (pejcan Lucas 16:10). * Cheʼ jaʼel, jiñi xcolelob miʼ mejlelob i cʌn jiñi chaʼchajp jax bʌ i pusicʼal, jin chaʼan cheʼ miʼ colelob tajol mach utsʼatic chuqui miʼ melob jaʼel (Efesios 6:4). Pero mi jiñi tatʌlob miʼ chaʼleñob wersa i pʌsbeñob chuqui utsʼat bʌ yom miʼ melob i yalobil, tajol cheʼ bʌ añobix i jabilel mi caj i chʌn chʼujutesañob Jehová ti ili jontol bʌ pañimil (mulawil) (Proverbios 22:6).

10. Chaʼan utsʼat chuqui mi laj cʌl, ¿chuqui yom bʌ mi laj qʼuel cheʼ woliyonla ti tʼan yicʼot laj quermañojob?

¹⁰ An cabʌl chuqui utsʼat bʌ miʼ mejlel lac pʌs tiʼ tojlel laj quermañojob lajal bʌ lac ñopoñel la quicʼotob. Tsaʼix laj qʼuele yaʼ ti cʌntesʌntel 12 chaʼan yom wen tsajilonla tiʼ tojlelob chaʼan chuqui mi laj cʌl chaʼan maʼañic mi lac tech tʼan tiʼ tojlel yañoʼ bʌ, o tajol ñumento, jiñi jopʼtʼan. Mi tsaʼ lac chaʼ alʌ chuqui tsaʼ bʌ subentiyonla pero mach wen ñaʼtʌbilic mi isujmʌch, tajol anquese mach cheʼic ñaʼtʌbil lac chaʼan, wolix lac puc jumpʼejl lot. Jin chaʼan, ñaxan yom mi lac wen ñaʼtan chuqui mi laj cʌl (Proverbios 10:19). Cheʼ yom mi lac mel jaʼel anquese la cujil chaʼan isujmʌch jiñi muʼ bʌ caj la cʌl.  ¿Chucoch? Come tajol woli lac chaʼlen tʼan baqui mach yomic mi la cotsan lac bʌ o maʼañic woli lac pʌs la cutslel (1 Tesalonicenses 4:11; 1 Pedro 4:15). Pero cheʼ an chuqui yom tsiquil mi laj cʌl, mach yomic yʌl chaʼan tsʌts mi lac chaʼlen tʼan, tiʼ pejtelel ora yom tsajil chuqui mi la cʌl yicʼot ti laj cutslel (pejcan Colosenses 4:6).

11, 12. a) ¿Bajcheʼ miʼ ñumen pʼojlesañob wocol jiñi xñoptʼañob cheʼ bʌ miʼ chaʼleñob tsʌts bʌ mulil? b) ¿Baqui bʌ lotiya miʼ puc Satanás chaʼan jiñi tsʌts bʌ mulil, i bajcheʼ miʼ mejlel lac mʌl (jot) jiñi? c) ¿Baqui bʌ jiñi junchajp bajcheʼ mi lac pʌs chaʼan utsʼat chuqui mi lac mel tiʼ yorganización Jehová?

¹¹ Ñuc i cʼʌjñibal cheʼ mi lac subeñob i sujmlel bʌ jiñi ancianojob ti congregación. Mi an majqui miʼ muc jumpʼejl tsʌts bʌ mulil cheʼ an chuqui miʼ cʼajtibentel, cojach mi caj i ñumen acʼ ti pʼojlel jiñi wocol. Tajol miʼ caj ti chumtʌl ti chaʼchajp jax i pusicʼal, miʼ sujtel ti xlot, mi caj i yʌl chaʼan woliʼ melben i yeʼtel Jehová pero woliʼ mel mulil jaʼel (Salmo 12:2). Yambʌ mach bʌ weñic jiñʌch cheʼ mach tsʼʌcʌlic miʼ suben i sujmlel jiñi ancianojob i miʼ muc jiñi wen ñuc tac bʌ i cʼʌjñibal (Hechos 5:1-11). An i tajol, muʼ bʌ i melob bajcheʼ jiñi woliʼ yajlelob ti jiñi lotiya muʼ bʌ i puc Satanás (qʼuele jiñi recuadro « Lotiya tac i chaʼan bʌ Satanás chaʼan jiñi tsʌts tac bʌ mulil»).

¹² Cheʼʌch yom mi lac mel jaʼel tiʼ tojlel i yorganización Jehová cheʼ bʌ mi lac butʼ jumpʼejl jun baqui mi lac melbentel cʼajtiya tac o cheʼ mi lac butʼ lac informe. ¿Bajcheʼ? Jumpʼejl ejemplo, jiñʌch cheʼ tsʼʌcʌl mi lac tsʼijbun jaypʼejl ora tsaʼ lac chaʼle subtʼan o cheʼ mi lac butʼ jumpʼejl jun baqui mi laj cʌl chaʼan laj com ñumen cʼʌjquel ti la queʼtel ti Jehová yom isujm mi laj cʌl bajcheʼ an laj cʼocʼlel o yan tac bʌ cʼajtiya (pejcan Proverbios 6:16-19).

13. ¿Bajcheʼ mi lac pʌs chaʼan utsʼat chuqui mi lac mel ti chaʼan bʌ choñoñel o eʼtel tac tiʼ tojlel yambʌ hermano?

¹³ Cheʼ jaʼel, yom utsʼat chuqui mi lac mel chaʼan bʌ jiñi choñoñel o eʼtel tac tiʼ tojlel laj quermañojob. Pero mach yaʼic mi caj lac mel yaʼ ti i Yotlel Tempa bʌ o cheʼ woliyonla  ti subtʼan. Mi woli laj cʌqʼuen eʼtel juntiquil xñoptʼan, yom ti i yorajlel mi lac toj cheʼ bajcheʼ cʼamel yom miʼ tojtʌl yicʼot chaʼan tsʼʌcʌl miʼ yʌqʼuentelob jiñi albil bʌ i chaʼan jiñi yumʌlob (1 Timoteo 5:18; Santiago 5:1-4). Pero mi joñonla woliyonbʌla ti eʼtel tiʼ tojlel yambʌ i testigo Jehová, tsʼʌcʌl mi caj lac mel laj queʼtel (2 Tesalonicenses 3:10). Maʼañic mi caj lac pijtan chaʼan mi lac ñumen cʼuxbintel, i mach yomic mi lac ñaʼtan come lajal xñoptʼañonla yom yʌl chaʼan ñumen librejonla bajcheʼ jiñi yambʌ xʼeʼtelob yicʼot chaʼan ñumen utsʼat mi caj i qʼuelonla jiñi hermano (Efesios 6:5-8).

14. ¿Chuqui yom miʼ mejlel cheʼ bʌ miʼ mejlel jumpʼejl trato yicʼot yambʌ hermano, i chucoch?

¹⁴ ¿Chuqui yom miʼ mejlel cheʼ bʌ juntiquil miʼ majñʌben i taqʼuin yambʌ o miʼ comol melob i choñoñel? Jiñi Biblia miʼ yʌqʼueñonla jumpʼejl ñuc bʌ principio: Ñumen wen cheʼ mi lac tsʼijbun ti jumpʼejl jun chuqui mi lac mel. Cheʼ bʌ Jeremías tsiʼ mʌñʌ jumpʼejl lum, tsiʼ chajpa jumpʼejl jun tiʼ wut chaʼtiquil uxtiquil wiñicob i tsiʼ mele yambʌ i copiajlel, cheʼ jiñi tsiʼ wen loto (Jeremías 32:9-12; qʼuele jaʼel Génesis 23:16-20). Cheʼ mi lac tsʼijbun, mi laj cʌcʼ ti ñaʼtʌntel tiʼ tojlel yambʌ yicʼot miʼ chaʼlentel ti firmar jiñi woli bʌ i mejlel mach yomic yʌl chaʼan maʼañic mi lac ñop muʼ bʌ i yʌl jiñi yambʌ, utsʼatʌch cheʼ mi lac mel chaʼan maʼañic miʼ loqʼuel tʼan ti wiʼil, jumpʼejl lot o leto (aʼleya tʼan). Mi tsaʼ lac ñaʼta lac mel jumpʼejl trato yicʼot yambʌ hermano, yom cʼajal lac chaʼan, maʼañic i cʼʌjñibal mi lac sʌt lac ñʌchʼtʌlel yicʼot chaʼan mach chʌn temelic mi la cajñel yicʼot jiñi congregación tiʼ caj jach taqʼuin (1 Corintios 6:1-8). *

15. ¿Bajcheʼ yilal miʼ qʼuel Jehová chaʼan jiñi xujchʼ muʼ bʌ i mejlel ti choñoñel tac, i bajcheʼ yilal miʼ qʼuel jiñi xñoptʼañob?

¹⁵ Jiñi xñoptʼañob yom utsʼatʌch chuqui miʼ melob jaʼel tiʼ  tojlel jiñi mach bʌ lajalic i ñopoñel yicʼotob. Lajal bajcheʼ Pablo, mi laj cʌl: «Com c mel lojon chuqui utsʼat [«tiʼ pejtelel», TNM]» (Hebreos 13:18). Jiñi tsaʼ bʌ i Mele tiʼ pejtelel chuqui an, wen ñuc i cʼʌjñibal miʼ qʼuel cheʼ tiʼ pejtelel ora mi lac mel jiñi trato cheʼʌch bajcheʼ yom, yicʼot o mach yicʼotic hermanojob. Yaʼ ti Proverbios miʼ yʌqʼueñonla lac ñaʼtan chaʼan cheʼʌchi, come mi yʌl cabʌl baqui mach tojic i yʌlel chuqui miʼ pʼistʌl tac (Proverbios 11:1; 20:10, 23). Jiñi balanza yicʼot pesa tac miʼ cʼʌjñel ti wajali chaʼan mʌñoñel, chaʼan choñoñel yicʼot chaʼan miʼ cʼʌñob i pʼis jiñi oro yicʼot plata muʼ bʌ i cʼʌñob ti tojoñel. Yonlel xchoñoñelob miʼ cʼʌñob chaʼpʼejl pesa mach bʌ lajalic yicʼot balanza tac mach bʌ tojic chaʼan miʼ chaʼleñob xujchʼ. Pero Jehová miʼ tsʼaʼlen cheʼ bʌ miʼ mejlel bajcheʼ jiñi. Mi la com chʌn ajñel tiʼ cʼuxbiya Dios, mach yomic mi lac mel cheʼ tac bʌ xujchʼ bajcheʼ jiñi.

16, 17. ¿Baqui bʌ lotiya tac miʼ wen mejlel ti ili pañimil, i chuqui yom bʌ mi lac mel isujm bʌ xñoptʼañonla?

¹⁶ Jiñi xñoptʼañonbʌla wocol mi lac ñusan come an i tajol miʼ tilel ti lac pusicʼal lac mel mach bʌ utsʼatic. I mach toj sajtelic lac pusicʼal, come ti ili pañimil am bʌ tiʼ pʼʌtʌlel Satanás cabʌl mach bʌ utsʼatic chuqui miʼ melob. Chaʼan miʼ tajob chuqui yomob, miʼ chaʼleñob lot cheʼ bʌ miʼ yʌlob bajcheʼ cʼamel chajpʌbilob i bʌ yicʼot chuqui yujilob melol cheʼ bʌ woliʼ cʼajtiñob eʼtel. Miʼ chaʼleñob lot ti jiñi jun tac chaʼan bʌ tojoñel, chaʼan bʌ seguro, chaʼan bʌ inmigración o yan tac bʌ. O miʼ chaʼleñob lot ti examen o tiʼ troñelob, tajol cheʼ bʌ an chuqui miʼ juʼsañob ti Internet i ti wiʼil miʼ yʌlob chaʼan jiñʌch tsiʼ meleyob. An muʼ bʌ i mucu aqʼueñob taqʼuin jiñi xʼeʼtelob. ¿Chuqui to mi lac pijtan ti ili pañimil butʼul bʌ ti quixtañujob muʼ bʌ i «tsʼaʼleñob chuqui utsʼat», muʼ bʌ «i bajñel cʼuxbi[ñob] i bʌ» yicʼot muʼ bʌ «i mulañob taqʼuin»? (2 Timoteo 3:1-5.)

¹⁷ An i tajol wocol mi laj cubin chaʼan maʼañic mi lac chaʼlen lot. Tajol mi laj qʼuel chaʼan jiñi muʼ bʌ i tajob i ñuclel yicʼot cabʌl i chubʌʼañob jin jach mucʼoʼ bʌ ti lot, i jiñi i  wiñicob Dios miʼ ñusañob wocol chaʼan taqʼuin tiʼ caj chaʼan miʼ melob «chuqui utsʼat [«tiʼ pejtelel», TNM]» (Salmo 73:1-8). Pero cabʌl chuqui mi caj lac taj cheʼ mi lac mel bajcheʼ jiñi, mach yomic mi lac wis ñaʼtan chaʼan maʼañic i cʼʌjñibal. ¿Chuqui mi caj lac taj? Laʼ laj qʼuel baqui tac bʌ i wenlel mi lac taj cheʼ mucʼʌch lac pʌs wen tac bʌ principio.

18. ¿Chucoch wen ñuc cheʼ mi laj cʌjñel tiʼ melol chuqui utsʼat bʌ?

¹⁸ Cheʼ mi laj cʌjñel ti utsʼat yicʼot chaʼan mi lac tsʼʌctesan muʼ bʌ la cʌl jiñʌch wen ñuc bʌ chaʼañonla (qʼuele jiñi recuadro « ¿Utsʼat ba tiʼ pejtelel chuqui mic mel?»). Jiñʌch muʼ bʌ mejlel lac mel ti lac pejtelel. Mach yaʼic cʌyʌlonla ti chuqui wen la cujil, mi cabʌl lac taqʼuin, bajcheʼ yilalonla o mi wen chumulonla. Cheʼ mi laj cʌjñel ti utsʼat, jiñʌch jiñi wen letsem bʌ mach bʌ cabʌlic majqui miʼ mejlel i taj (Miqueas 7:2). Jin chaʼan, anquese an majqui miʼ wajleñonla chaʼan mi lac mel chuqui utsʼat, pero an yañoʼ bʌ muʼ bʌ caj i qʼueloñobla ti ñuc i mi caj i ñopob chuqui mi laj cʌl. Tajol mi caj mejlel lac ñumen taj lac taqʼuin. ¿Bajcheʼ? An i tajol, jiñi i testigojob Jehová maʼañic miʼ chilbentelob i troñel o miʼ yajcʌntelob chaʼan yambʌ troñel baqui yom ñumen xucʼulob, pero jiñi yañoʼ bʌ miʼ locʼsʌntelob chaʼan mach utsʼatic chuqui miʼ melob.

19. ¿Bajcheʼ miʼ taj i wenlel laj conciencia yicʼot chaʼan bajcheʼ añonla laj quicʼot Jehová cheʼ mi lac mel chuqui utsʼat?

¹⁹ Anquese mach tiʼ pejtelelic ora cheʼ mi caj i yujtel bajcheʼ tsaʼ ujti laj cʌl, pero an yambʌ tac ñumen ñuc bʌ mucʼʌch bʌ caj lac taj tiʼ pejtelel ora. Ñaxam bʌ jiñʌch lac tijicñʌyel, bajcheʼ tsiʼ yʌlʌ Pablo, cheʼ la ‹cujil maʼañic lac mul› (Hebreos 13:18). I chaʼpʼejlel jiñʌch lac tijicñʌyel chaʼan woli lac chʌn ajñel tiʼ cʼuxbiya jiñi lac Tat am bʌ ti panchan, muʼ bʌ i qʼuel ti ñuc chuqui utsʼat miʼ mel i wiñicob (pejcan Salmo 15:1, 2; Proverbios 22:1). Maʼañic yambʌ cʼax ñuc bʌ lac majtan. Laʼ laj qʼuel yambʌ junchajp: Chaʼan bajcheʼ yilal miʼ qʼuel Jehová jiñi eʼtel.