Cheʼ bajcheʼ mi yʌl jiñi Biblia, ¿jala yicʼot chucoch yom miʼ mos i jol juntiquil hermana? Jiñi apóstol Pablo tiʼ tsictesa chaʼan jiñi hermanajob an i tajol yom miʼ mosob i jol chaʼan miʼ mejlel i melbeñob i yeʼtel Jehová. Laʼ lac tsajin tsaʼ bʌ i yʌlʌ yaʼ ti 1 Corintios 11:3-16 chaʼan mi laj qʼuel chuqui miʼ coltañob chaʼan miʼ yʌqʼueñob i ñuclel Jehová ti chuqui miʼ melob. Pablo tsiʼ yʌlʌ uxchajp yom bʌ miʼ chʼʌmob ti ñuc cheʼ bʌ yom miʼ mosob i jol, jiñʌch: Jala, baqui yicʼot chucoch.

Jala. Pablo tsiʼ yʌlʌ chaʼchajp: Cheʼ bʌ miʼ melob oración yicʼot miʼ chaʼleñob subtʼan (versículo 4, 5). Jiñi oración jiñʌch junchajp bajcheʼ mi lac chʼujutesan Jehová. Cheʼ jaʼel, jiñi subtʼan woli bʌ i taj ti tʼan ili versículo, yom yʌl jiñi cʌntesa chucul bʌ ti Biblia muʼ bʌ i yʌcʼob jiñi wiñicob yicʼot xʼixicob xñoptʼañoʼ bʌ. Cheʼ jiñi, ¿yom ba yʌl Pablo chaʼan tiʼ pejtelel ora yom miʼ mosob i jol jiñi hermanajob cheʼ bʌ miʼ melob oración o cheʼ bʌ woliyob ti cʌntesa chaʼan Biblia? Maʼañic. I sujmlel ili yaʼan tiʼ chaʼchajplel muʼ bʌ caj laj qʼuel: Baqui añob cheʼ bʌ woliʼ melob jiñi eʼtel.

Baqui. Jiñi apóstol tsiʼ yʌlʌ chaʼchajp: Tiʼ familia yicʼot ti congregación. Tiʼ tsʼijbu: «I yum xʼixic jiñʌch wiñic. [...] Cheʼ mach mosolic i jol xʼixic woli bʌ ti oración yicʼot subtʼan miʼ tsʼaʼlen i yum» (versículo 3, 5). Ti jumpʼejl familia, Jehová tsiʼ waʼchoco jiñi wiñic bajcheʼ i yum o i jol jiñi xʼixic. Jin chaʼan, ¿chuqui miʼ yujtel mi jiñi xʼixic miʼ mel eʼtel cojach bʌ tsiʼ cʌybe tiʼ wenta Jehová jiñi wiñic? Mi maʼañic miʼ qʼuel ti ñuc jiñi eʼtel cojach bʌ aqʼuebil i ñoxiʼal, miʼ yʌcʼ ti quisin. Jumpʼejl ejemplo, mi jiñi hermana cʼʌñʌl miʼ yʌcʼ  estudio cheʼ yaʼan i ñoxiʼal, mi caj i qʼuel ti ñuc jiñi eʼtel aqʼuebil bʌ i ñoxiʼal cheʼ mucʼʌch i mos i jol. Mach cʼʌñʌlic mi maxto chʼʌmʌlic i chaʼan jaʼ, come jiñʌch i jol jiñi familia. * ¿Ixcu mi jiñi hermana mi caj i mel oración o miʼ cajel ti cʌntesa cheʼ yaʼan juntiquil chut to bʌ i yalobil chʼʌmʌlix bʌ i chaʼan jaʼ? Anquese jiñi i yalobil mach jiñic i jol jiñi familia, pero yom miʼ mos i jol. ¿Chucoch? Come ñuc miʼ qʼuel jiñi eʼtel aqʼuebil bʌ jiñi wiñicob chʼʌmʌlix bʌ i chaʼañob jaʼ yaʼ ti congregación.

Pablo tsiʼ taja ti tʼan chaʼan bʌ jiñi congregación cheʼ bʌ tiʼ tsʼijbu: «Mi an majch miʼ tech cabʌl tʼan mach cheʼic mic mel lojon. Mach cheʼic miʼ melob xñoptʼañob i chaʼañoʼ bʌ Dios» (versículo 16). Jehová tsiʼ yʌcʼʌ tiʼ wenta jiñi congregación wiñicob chʼʌmʌloʼ bʌ i chaʼan jaʼ (1 Timoteo 2:11-14; Hebreos 13:17). Jin chaʼan, cojach miʼ waʼchocontel wiñicob bajcheʼ ancianojob yicʼot siervo ministerial chaʼan miʼ cʌntʌbeñob i tiñʌmeʼ Dios (1 Pedro 5:2). Pero an i tajol yom miʼ mel juntiquil hermana jiñi eʼtel tac cojach bʌ yom miʼ mel juntiquil hermano chʼʌmʌlix bʌ i chaʼan jaʼ yicʼot wen chajpʌbil bʌ. Jumpʼejl ejemplo, tajol yom miʼ mel jiñi tempa bʌ chaʼan bʌ subtʼan come maʼañic juntiquil hermano. Ili tempa bʌ jiñʌch jumpʼejl cʌntesʌntel chajpʌbil bʌ bajcheʼ jiñi yan tac bʌ cʌntesʌntel ti congregación, cʼʌñʌl miʼ chʼʌm tiʼ wenta juntiquil hermano. * Cheʼ miʼ yujtel tiʼ tojlel jaʼel juntiquil hermana woli bʌ i yʌcʼ jumpʼejl estudio, mi an juntiquil hermano chʼʌmʌlix bʌ i chaʼan jaʼ muʼ bʌ i taj i qʼuel yicʼot i ñʌchʼtan woli bʌ i yʌjlel. Yom miʼ mos i jol chaʼan miʼ pʌs chaʼan woliʼ qʼuel ti ñuc jiñi eʼtel cojach bʌ yom miʼ mel jiñi wiñic.

Pero mach cʼʌñʌlic miʼ mos i jol jiñi hermana cheʼ an yan tac bʌ chuqui miʼ mel tiʼ chʼujutesʌntel Dios. Jumpʼejl ejemplo, cheʼ bʌ miʼ yʌcʼ i comentario ti tempa bʌ, cheʼ bʌ miʼ chaʼlen subtʼan ti otot tac (anquese yaʼan yicʼot i ñoxiʼal o yambʌ hermano chʼʌmʌlix bʌ i chaʼan jaʼ) i cheʼ miʼ chaʼlen oración yicʼot i yalobilob maxto bʌ chʼʌmʌlic i chaʼañob jaʼ o miʼ cʌntesañob cheʼ mach yaʼic an i ñoxiʼal.  Pero ¿chuqui yom miʼ mel mi an baqui maʼañic miʼ wen ñaʼtan mi yom miʼ mos i jol o maʼañic? Ñaxan yom miʼ wen tsajin. * Pero mi maxto yujilic chuqui yom miʼ mel i mach tijicñayic jiñi i conciencia, maʼañic i wocolel mi tsiʼ moso i jol bajcheʼ jiñi hermana am bʌ ti jiñi foto.

Chucoch. Yaʼ ti versículo 10 mi lac taj chaʼchajp muʼ bʌ caj i ñijcʌben i pusicʼal jiñi hermana chaʼan miʼ tsʼʌctesan ili tʼan: «Laʼ tsictiyic tiʼ jol xʼixic i yejtal i pʼʌtʌlel [i yeʼtel] wiñic, come woliʼ qʼuelob jiñi ángelob». Jiñi ñaxam bʌ, yaʼʌch chucul ti jiñi tʼan: «Laʼ tsictiyic tiʼ jol xʼixic i yejtal i pʼʌtʌlel [i yeʼtel] wiñic». Jiñi pisil muʼ bʌ i cʼʌn i mos i jol jiñi hermana miʼ pʌs chaʼan miʼ qʼuel ti ñuc jiñi eʼtel aqʼuebil bʌ i chaʼan Jehová jiñi hermanojob ti jiñi congregación. Jiñʌch junchajp bajcheʼ miʼ pʌsbeñob i cʼuxbiya yicʼot i xucʼtilel jiñi Dios. ¿Baqui bʌ jiñi i chaʼchajplel? Cheʼ bajcheʼ tsiʼ yʌlʌ jiñi versículo, «come woliʼ qʼuelob jiñi ángelob». Pero ¿chuqui miʼ tajob jiñi pʼʌtʌl bʌ ángelob mi jiñi hermanajob mucʼʌch i mosob i jol?

Jiñi ángelob miʼ taj i qʼuelob tiʼ pejtelel jiñi añoʼ bʌ tiʼ yorganización Jehová, bajcheʼ añoʼ bʌ ti panchan yicʼot wʌʼ ti Pañimil, i wen yʌxʌlob i yoj tiʼ tojlel muʼ bʌ i qʼuelob ti ñuc jiñi eʼtel am bʌ i chaʼan Dios. Miʼ tajob i wenlel jaʼel cheʼ miʼ qʼuelob chaʼan mucʼʌch i jacʼob tʼan jiñi quixtañujob xmuliloʼ bʌ. Ti isujm, ili ángelob yom miʼ pʌsob jaʼel chaʼan yaʼʌch chuculob ti jiñi chajpʌbil bʌ i chaʼan Jehová, mach bʌ cheʼic tsiʼ meleyob yan tacoʼ bʌ ti jiñi bʌ ora (Judas 6). Ti ili ora, cheʼ bʌ juntiquil hermana anquese wen añix chuqui yujil i wen añix i ñaʼtʌbal miʼ pʌs chaʼan chuculʌch tiʼ tojlel juntiquil hermano am bʌ i yeʼtel chʼʌmʌlix bʌ i chaʼan jaʼ, jiñʌch wen ñuc bʌ ejemplo tiʼ tojlel ángelob. I ñumen  ñuc to chuqui miʼ cʌñob mi jiñi hermana jiñʌch juntiquil bombil bʌ. ¿Chucoch? Come ti talto bʌ qʼuin yaʼʌch mi caj i yajñel ti jiñi junmojt muʼ bʌ caj i chaʼleñob yumʌntel yicʼot Cristo yaʼ ti panchan, jumpʼejl eʼtel ñumen ñuc bʌ tiʼ tojlel ángelob. Cheʼ bajcheʼ mi laj qʼuel, jiñi hermanajob wen ñuc chuqui aqʼuebilob tiʼ tojlel jaʼel. Mi xucʼul i melbalob i cheʼʌch miʼ melob bajcheʼ miʼ subentelob, miʼ pʌsbeñob jiñi millón ángelob bajcheʼ yom miʼ pʌsob i pecʼlel yicʼot chaʼan yom miʼ jacʼob tʼan.