1, 2. ¿Chuqui yom mi lac yajcan chaʼan jiñi ñusaqʼuin laj com bʌ?

ÑAʼTANCU chaʼan mi caʼ cʼux jumpʼejl manzana pero maʼ taj a qʼuel chaʼan an baqui tsʼitaʼ ocʼbeñix (pʌcʼmeñix). ¿Chuqui mi caj a mel? An uxchajp muʼ bʌ mejlel a mel: Maʼ cʼux cheʼ bajcheʼ an, maʼ choc jiñi manzana o maʼ locʼben jiñi mach bʌ weñic chaʼan maʼ cʼux jiñi wen to bʌ. ¿Baqui bʌ mi caj a mel?

² Jiñi ñusaqʼuin muʼ bʌ i pʌs ili pañimil (mulawil), lajal bajcheʼ jiñi manzana. Cheʼ bʌ mi lac wen tsajin, añʌch mach bʌ weñic mi lac taj. ¿Chuqui mi caj lac mel? An muʼ bʌ i «cʼuxob» tiʼ pejtelel, mach i wentajob mi wen o mach weñic. Yañoʼ bʌ, miʼ junyajlel chocob chaʼan maʼañic miʼ yajlelob ti wocol. Cojix bʌ, an muʼ bʌ i wen qʼuelob chaʼan maʼañic miʼ melob mach bʌ weñic, pero an i tajol miʼ melob jiñi weñʌch bʌ. Cheʼ jiñi, ¿baqui bʌ mi caj lac yajcan chaʼan mi lac chʌn ajñel tiʼ cʼuxbiya Dios?

3. ¿Chuqui jiñi muʼto bʌ caj laj qʼuel?

³ Jiñi muʼ bʌ lac yajcan lac mel jiñʌch i yuxchajplel bʌ: Laj cujil chaʼan laj com lac mel ñusaqʼuin, pero cojach jiñi maʼañic bʌ miʼ yʌcʼonla ti yajlel ti wocol. Chaʼan mi lac mel bajcheʼ jiñi, yom laj cujil baqui bʌ wen yicʼot mach bʌ weñic. Pero cheʼ bʌ muʼto caj lac tech lac tsajin baqui bʌ ñusaqʼuin yom mi lac yajcan, laʼ laj qʼuel chuqui miʼ mejlel ti ujtel chaʼan jiñi eʼtel am bʌ lac chaʼan ti Jehová.

4. ¿Bajcheʼ yom miʼ coltañonla cheʼ mi laj cʌcʼ lac bʌ ti Dios tiʼ yajcʌntel lac ñusaqʼuin?

⁴ Maxto ñumeñic cabʌl jabil, juntiquil Testigo tsaʼ bʌ i chaʼle chʼʌmjaʼ ti 1946 tsiʼ yʌlʌ: «Ñʌmʌlon chaʼan maʼañic mic sʌt mi jumpʼejlic discurso chaʼan bʌ chʼʌmjaʼ yicʼot chaʼan mic wen ñʌchʼtan, cheʼ bajcheʼ joñon mij cajel ti chʼʌmjaʼ yubil». Ti wiʼil tiʼ tsictesa chucoch miʼ mel: «Cheʼ mic chʌn cʼajtesan chaʼan tsaʼ cʌqʼue c bʌ Jehová, miʼ coltañon chaʼan chʌn xucʼul mi cajñel tiʼ tojlel». Cheʼʌch mi lac ñaʼtan jaʼel bajcheʼ ili hermano: Chaʼan chʌn xucʼul mi laj cajñel yom mi lac chʌn cʼajtesan jiñi tʼan tsaʼ bʌ la cʌqʼue Jehová. ¿Chuqui tsaʼ lac sube cheʼ tsaʼ laj cʌqʼue lac bʌ? Chaʼan mi laj cʼʌn laj cuxtʌlel tiʼ melol i yeʼtel (pejcan Eclesiastés 5:4). Jiñi tʼan tsaʼ bʌ laj cʌcʼʌ yaʼʌch mi caj lac pʌs bajcheʼ yilal mi laj qʼuel jiñi subtʼan. Pero cheʼ jaʼel, mi lac pʌs ti yambʌ chuqui tac mi lac mel, cheʼ bajcheʼ lac ñusaqʼuin. Cheʼʌch tsiʼ yʌcʼʌ ti ñaʼtʌntel jiñi apóstol Pablo cheʼ bʌ tsiʼ sube jiñi xñoptʼañob: «Mi an chuqui mi laʼ cʼux, cheʼ jiñi, mi an chuqui mi laʼ jap, mi an yambʌ chuqui mi laʼ chaʼlen, chaʼlenla ti pejtelel chaʼan miʼ tsictiyel i ñuclel Dios» (1 Corintios 10:31).

5. Chaʼan jiñi ticʼbil bʌ yaʼ ti Levítico 22:18-20, ¿chuqui ñuc bʌ i cʼʌjñibal miʼ subeñonla yaʼ ti Romanos 12:1?

 ⁵ Cheʼ bajcheʼ tsaʼ laj qʼuele, tiʼ pejtelel chuqui mi lac mel miʼ tsictiyel ti laj queʼtel ti Jehová. Pablo tsiʼ ñumen tsictesa cheʼ bʌ tsiʼ sube jiñi xñoptʼañob ti Roma ili tʼan: «Aqʼuenla Dios laʼ bʌcʼtal cheʼ bajcheʼ tsʌnsʌbil bʌ i majtan Dios anquese cuxulet to la. Jiñʌch chʼujul bʌ i majtan Dios, utsʼat bʌ miʼ qʼuel. Jiñʌch i chʼujutesʌntel Dios ti isujm» (Romanos 12:1). ¿Chuqui tsiʼ taja ti tʼan Pablo cheʼ bʌ tsiʼ yʌlʌ chaʼan bʌ lac bʌcʼtal? Jiñʌch tiʼ pejtelel chuqui am bʌ lac chaʼan, lac ñaʼtʌbal, lac pusicʼal yicʼot lac pʼʌtʌlel (Marcos 12:30). ¿Bajcheʼ mi laj cʌcʼ lac bʌcʼtal cheʼ bajcheʼ majtañʌl? Jiñʌch cheʼ mi lac melben i yeʼtel Dios tiʼ pejtelel laj cuxtʌlel. Cheʼ miʼ cʼʌjñel jiñi tʼan «tsʌnsʌbil bʌ majtañʌl», an chuqui ñuc bʌ i cʼʌjñibal miʼ subeñonla. ¿Chucoch? Come i Mandar Moisés mi yʌl chaʼan mach yomic miʼ yʌjqʼuel juncojt añimal mach bʌ cʼoqʼuic come Dios maʼañic miʼ chʼʌm (Levítico 22:18-20). Cheʼ jaʼel, mi juntiquil xñoptʼan miʼ yʌcʼ jumpʼejl eʼtel mach bʌ sʌquic, Jehová maʼañic mi caj i chʼʌm. Cheʼ jiñi, ¿chuqui miʼ mejlel ti ujtel chaʼan Jehová maʼañic miʼ chʼʌm jiñi eʼtel muʼ bʌ laj cʌqʼuen?

6, 7. ¿Bajcheʼ miʼ mejlel i bibʼesan tiʼ pejtelel i bʌcʼtal jiñi xñoptʼan, i chuqui miʼ caj ti ujtel tiʼ tojlel?

⁶ Pablo tsiʼ sube xñoptʼañob ti Roma: «Mach mi laʼ wʌcʼ laʼ bʌcʼtal chaʼan miʼ chaʼlen jontolil». Cheʼ jaʼel, tsiʼ subeyob: «[Yom] mi laʼ wʌcʼ ti chʌmel i melbal laʼ tsucul pusicʼal [o bʌcʼtal]» (Romanos 6:12-14; 8:13). Cheʼ jaʼel, tsiʼ wʌn alʌ chaʼan bajcheʼ miʼ cʼʌñob jiñi añoʼ bʌ tiʼ bʌcʼtal tiʼ melol i tsuculel. Cheʼ bʌ tsiʼ taja ti tʼan woli (choncol) bʌ i melob mulil, tsiʼ yʌlʌ chaʼan ‹i yej wiñicob wen butʼul ti pʼajoñel yicʼot wajleya›. «Ajñel miʼ majlelob [tiʼ yoc] i tsʌnsañob i piʼʌlob.» «Maʼañic miʼ wis bʌcʼñañob Dios.» (Romanos 3:13-18.) * ¿Chuqui miʼ yujtel mi juntiquil xñoptʼan miʼ cʼʌn  junchajp am bʌ tiʼ bʌcʼtal o cuctal chaʼan miʼ mel mulil tac bajcheʼ jiñi? Miʼ bibʼesan tiʼ pejtelel i bʌcʼtal. Jumpʼejl ejemplo, cheʼ muqʼuic i wʌn ñaʼtan chaʼan miʼ qʼuel chuqui bibiʼ tac bʌ bajcheʼ pornografía o chaʼan tac bʌ jatsʼ, wolix ‹i yʌcʼ i wut chaʼan miʼ chaʼlen jontolil› yicʼot woliʼ bibʼesan tiʼ pejtelel i bʌcʼtal. Maʼañix miʼ mejlel i yʌcʼ i bʌcʼtal bajcheʼ tsʌnsʌbil bʌ majtañʌl ti Dios come maʼañic woliʼ yʌqʼuen jumpʼejl eʼtel sʌc bʌ o chʼujul bʌ (Deuteronomio 15:21; 1 Pedro 1:14-16; 2 Pedro 3:11). Tiʼ caj jiñi ñusaqʼuin mach bʌ weñic, wen lets mi caj i toj.

⁷ Tsaʼix laj cʌñʌ chaʼan jiñi ñusaqʼuin muʼ bʌ lac yajcan miʼ mejlel i yʌqʼueñonla wocol. Jin chaʼan, mach la comic chaʼan jiñi muʼ bʌ lac mel miʼ jisʌben i cʼʌjñibal jiñi majtañʌl woli (yʌquel) bʌ la cʌqʼuen Dios, la com chaʼan miʼ ñumen qʼuejlel ti ñuc. Wʌle mi caj laj qʼuel bajcheʼ miʼ mejlel lac ñaʼtan mi wen o mach weñic jiñi com bʌ lac mel.

8, 9. a) ¿Baqui bʌ chaʼchajp ñusaqʼuin an? b) ¿Baqui bʌ ñusaqʼuin mi lac tsʼaʼlen, i chucoch?

⁸ An chaʼchajp ñusaqʼuin chaʼan jiñi xñoptʼan: Jiñi mach bʌ yomic miʼ wis mel yicʼot jiñi muʼ bʌ mejlel i mel mi cheʼʌch yom i conciencia. Laʼ laj cʌl jiñi ñaxam bʌ: Jiñi ñusaqʼuin mach bʌ yomic miʼ wis mel i wiñic Dios.

⁹ Cheʼ bajcheʼ tsaʼ laj qʼuele ti ñaxam bʌ cʌntesʌntel ti ili libro, an ñusaqʼuin tac muʼ bʌ i pʼojlesan mach bʌ weñic ti lac pensar yicʼot tiʼ melol tsʼaʼlebil bʌ ti Biblia. Miʼ mejlel laj cʌl cheʼ bajcheʼ jiñi muʼ bʌ i ñumel tac ti televisión, ti Internet, ti película yicʼot ti cʼayʌl tac. Miʼ yʌcʼ chaʼan jiñi wiñicob xʼixicob (quixtañujob) miʼ melob mach bʌ cheʼic yom, jatsʼ tac wen ñumeñix bʌ ti pʼis, jiñi pornografía yicʼot yambʌ tac i chaʼan bʌ xiba. ¿Chuqui yom mi lac mel isujm bʌ xñoptʼañonla cheʼ miʼ pʌstʌl ñusaqʼuin tac muʼ bʌ  i yʌl ti mandar yicʼot principio tac am bʌ ti Biblia chaʼan mach weñic? Yom mi lac junyajlel tsʼaʼlen (Hechos 15:28, 29; 1 Corintios 6:9, 10; Apocalipsis 21:8). Cheʼ bajcheʼ jiñi, mi caj lac pʌsben Jehová chaʼan mucʼʌch lac jacʼ ili chaʼpʼejl mandar: «Tsʼaʼlenla jontolil» yicʼot «cʌyʌ jontolil». Mi cheʼʌch mi lac mel, choncol lac pʌs chaʼan «woli lac ñop Dios ti jumpʼejl lac pusicʼal» (Romanos 12:9; Salmo 34:14; 1 Timoteo 1:5).

10. ¿Chuqui miʼ yʌlob jiñi quixtañu, i chucoch mach weñic cheʼ mi lac ñaʼtan bajcheʼ jiñi?

¹⁰ An quixtañujob muʼ bʌ i yʌlob chaʼan maʼañic i wocolel cheʼ miʼ qʼuelob película tac baqui maʼañic miʼ jamʌl pʌs jiñi tsʼaʼlebil bʌ yaʼ ti Biblia. Tajol miʼ yʌlob: «Mach lajalic cheʼ mi laj qʼuel yicʼot cheʼ mi lac mel». Pero cheʼ bʌ miʼ ñaʼtañob bajcheʼ jiñi, woliʼ lotiñob i bʌ yicʼot miʼ mejlelob ti yajlel ti tsʌts bʌ wocol (pejcan Jeremías 17:9). Mi joñonla mi lac mulan laj qʼuel muʼ bʌ i tsʼaʼlen Jehová, ¿muʼ ba i mejlel la cʌl chaʼan woliyʌch lac «tsʼaʼlen[...] jontolil»? Cheʼ jajayajl mi la cotsan lac bʌ ti jontolil, jiñi laj conciencia maʼañix chuqui mi caj i subeñonla, miʼ mejlel i yʌcʼonla ti yajlel ti mulil o chaʼan utsʼat mi laj qʼuel chuqui mach bʌ weñic miʼ mel jiñi yañoʼ bʌ (Salmo 119:70; 1 Timoteo 4:1, 2).

11. ¿Bajcheʼ miʼ mejlel laj cʼʌn Gálatas 6:7 cheʼ mi lac yajcan lac ñusaqʼuin?

¹¹ Cheʼ ujtem cabʌl xñoptʼañob bajcheʼ jiñi. Come ñʌmʌl i qʼuelob baqui miʼ pʌstʌl tsʼiʼlel, jin chaʼan an cʼotem i melob jaʼel bajcheʼ jiñi. Cheʼʌch miʼ cʼotel i ñaʼtañob chaʼan tiʼ «pejtelel chuqui jach miʼ pʌcʼ wiñic mi caj i cʼaj» (Gálatas 6:7). Pero joñonla mach yomic mi lac yajlel jaʼel ti jiñi yac. Mi mucʼʌch lac chaʼlen wersa laj cotsan chuqui wem bʌ ti lac pensar, mi caj lac taj lac wenlel (qʼuele jiñi recuadro « ¿Bajcheʼ yilal bʌ ñusaqʼuin yom mic yajcan?»).

12. ¿Bajcheʼ miʼ mejlel laj cʼʌn Gálatas 6:5 cheʼ mi lac yajcan lac ñusaqʼuin tac i baqui mi lac taj laj coltʌntel chaʼan mi lac ñaʼtan ti wen jiñi woli bʌ lac ñaʼtan lac mel?

¹² Laʼ laj cʌl i chaʼchajplel jiñi ñusaqʼuin: Jiñi maʼañic bʌ miʼ yʌjlel tiʼ Tʼan Dios mi wen o mach weñic. Mi cheʼ bajcheʼ jiñi, jujuntiquil an tiʼ wenta mi maʼañic mi caj i yʌqʼuen wocol o mucʼʌch (pejcan Gálatas 6:5). Pero mach yaʼic jach chucul ti muʼ bʌ lac bajñel ñaʼtan. An aqʼuebilonla muʼ bʌ mejlel i coltañonla.  An principio tac, i sujmlel tac cʼax ñuc bʌ i cʼʌjñibal, tsʼijbubil bʌ yaʼ ti Biblia. Ili principio tac miʼ pʌsbeñonla chuqui miʼ ñaʼtan Jehová. Jin chaʼan, mi mucʼʌch lac wen tsajin, mi caj laj cʌn «chuqui yom lac Yum [Jehová]» ti lac tojlel, yaʼ ochem jaʼel jiñi lac ñusaqʼuin (Efesios 5:17).

13. ¿Chuqui mi caj i coltañonla chaʼan maʼañic mi lac mel ñusaqʼuin mach bʌ weñic miʼ qʼuel Jehová?

¹³ Mach tiʼ pejtelelic jiñi xñoptʼañob junlajal miʼ tajob majlel i ñaʼtʌbal chaʼan miʼ cʌñob chuqui wen yicʼot mach bʌ weñic (Filipenses 1:9). Cheʼ jaʼel, jujuntiquil la cujil bajcheʼ yilal bʌ ñusaqʼuin mi lac mulan. Jin chaʼan, mach yomic mi lac ñaʼtan chaʼan junlajal muʼ bʌ caj lac yajcan. Pero mi cheʼ bajcheʼ jiñi, cʼʌñʌl mi lac wen ñaʼtan jiñi principio tac i chaʼan bʌ Dios i mi laj cʌy chaʼan miʼ tojʼesan lac ñaʼtʌbal yicʼot lac pusicʼal. Cheʼ bajcheʼ jiñi, mi caj lac ñumen tsʼaʼlen jiñi ñusaqʼuin tac mach bʌ weñic miʼ qʼuel Jehová (Salmo 119:11, 129; 1 Pedro 2:16).

14. a) ¿Chuqui yambʌ yom mi lac tsajin cheʼ mi lac yajcan lac ñusaqʼuin? b) ¿Chuqui mi caj i coltañonla chaʼan mi laj cʌcʼ ti ñaxan i chaʼan bʌ Jehová?

¹⁴ Yom mi lac wen tsajin bajcheʼ yilal bʌ ñusaqʼuin mi lac yajcan, come jiñʌch mi caj i tsictesan bajcheʼ yilal mi laj qʼuel jiñi wen bʌ yicʼot mach bʌ weñic. Pero anto yambʌ chuqui yom bʌ mi laj cʌn: Jiñʌch jaypʼejl ora woli laj cʼʌn. ¿Chucoch? Come jiñʌch mi caj i yʌqʼueñonla lac ñaʼtan mi jin choncol bʌ lac ñumen acʼ ti ñuc. Mach yomic miʼ ñajʌyel lac chaʼan, ñumen i cʼʌjñibal lac chaʼan jiñʌch i chaʼan bʌ Jehová (pejcan Mateo 6:33). ¿Chuqui mi caj i coltañonla chaʼan jiñʌch mi la cʌcʼ ti ñaxan tiʼ pejtelel ora? Jiñʌch cheʼ mi lac jacʼ jiñi ticʼojel tsaʼ bʌ i yʌcʼʌ apóstol Pablo: «Tsajaletla ame mi laʼ ñusan qʼuin cheʼ bajcheʼ jiñi tontojoʼ bʌ. Ti pejtelel qʼuin pʌsʌ laʼ bʌ ti utsʼat, come cabʌl woliʼ pʼojlel jontolil ti ili ora» (Efesios 5:15, 16). Jin chaʼan, mi mucʼʌch lac wen chajpan bajcheʼ cʼamel mi caj lac jalijel ti lac ñusaqʼuin, mi caj lac ñumen tajben i yorajlel tiʼ melol «chuqui ñumen  wen», muʼ bʌ i yʌqʼueñonla lac wenlel tiʼ chaʼan bʌ Jehová (Filipenses 1:10).

15. ¿Chucoch wen cheʼ pʼisbil jach yom mi lac yajcan lac ñusaqʼuin?

¹⁵ Cheʼ woli lac ñaʼtan chuqui ti ñusaqʼuin la com, yom pʼisbil jach chuqui mi caj lac mel. ¿Chuqui com laj cʌl? Laʼ lac chaʼ al jiñi ejemplo tsaʼ bʌ laj cʌlʌ ti ñaxan bʌ párrafo. Chaʼan maʼañic mi laj cʼux baqui pʌcʼmeñix, cʼʌñʌl mi lac tsʼitaʼ tsep loqʼuel jaʼel baqui wen to bʌ. Jiñi xñoptʼañonbʌla cheʼ mi lac mel jaʼel ti jiñi ñusaqʼuin tac, maʼañic mi lac mel muʼ bʌ i yʌl jiñi principio chaʼan mach weñic, pero yom miʼ cʼotel lac ñaʼtan chaʼan yom mi lac choc tiʼ pejtelel mach bʌ weñic muʼ bʌ mejlel i bibʼesañonla tiʼ chaʼan bʌ Jehová (Proverbios 4:25-27). Muʼ bʌ caj i coltañonla jiñʌch cheʼ mi lac jacʼ jiñi ticʼojel tac am bʌ ti Biblia.

16. a) ¿Bajcheʼ mi lac pʌs chaʼan cheʼʌch mi lac ñaʼtan bajcheʼ miʼ ñaʼtan Jehová? b) ¿Chuqui jiñi yom bʌ mi lac mel ti jujumpʼejl qʼuin?

¹⁶ Cheʼ mi lac yajcan lac ñusaqʼuin tac, yom mi lac ñaxan qʼuel bajcheʼ yilal miʼ qʼuel Dios. Jin chaʼan, mi lac pejcan jiñi Biblia, baqui miʼ pʌs chuqui miʼ ñaʼtan Jehová yicʼot jiñi i mandar tac. Jumpʼejl ejemplo, miʼ mejlel lac pejcan tsaʼ bʌ i tsʼijbu jiñi rey Salomón chaʼan muʼ bʌ i tsʼaʼlen tac Jehová, yaʼ ochem «jiñi muʼ bʌ i chaʼlen lot», «jiñi muʼ bʌ i tsʌnsan jiñi toj bʌ», «jiñi muʼ bʌ i tech mulil [o jontolil] tiʼ pusicʼal» yicʼot «jiñi muʼ bʌ i sʌclan majlel jontolil» (Proverbios 6:16-19). Cheʼ laj cujilix chuqui miʼ ñaʼtan Dios, ¿bajcheʼ yom mi laj  qʼuel jiñi ñusaqʼuin tac? Jiñi salmista miʼ yʌcʼ i jacʼbal: «Jatetla muʼ bʌ laʼ cʼuxbin lac Yum, tsʼaʼlenla jontolil» (Salmo 97:10). Jin chaʼan, laʼ lac pʌs chaʼan mucʼʌch lac tsʼaʼlen tiʼ pejtelel jiñi muʼ bʌ i tsʼaʼlen Jehová cheʼ baʼ ora mi lac yajcan lac ñusaqʼuin tac (Gálatas 5:19-21). Ñumento yom mi lac pʌs mi añonla baʼan cabʌl quixtañu o mi lac bajñel jach (Salmo 11:4; 16:8). ¿Laj com ba chumtʌl tiʼ pejtelel lac pusicʼal cheʼ bajcheʼ miʼ mulan Jehová? Mi cheʼʌchi, tiʼ pejtelel ora mi caj laj cʼajtesan jiñi principio tac am bʌ ti Biblia cheʼ an chuqui la com lac mel. Cheʼ yom mi lac mel ti jujumpʼejl qʼuin (Efesios 5:1).

17. ¿Chuqui yom mi laj cʼajtiben lac bʌ cheʼ woli lac yajcan jumpʼejl ñusaqʼuin?

¹⁷ ¿Chuqui miʼ mejlel lac mel chaʼan mi lac ñaʼtan mi mucʼʌch i mulan Jehová jiñi lac ñusaqʼuin? Mi lac melben lac bʌ ili cʼajtiya: «¿Chuqui mi caj i mel tic tojlel yicʼot ti bajcheʼ añon quicʼot Jehová?». Jumpʼejl ejemplo, cheʼ muʼto caj laj qʼuel jumpʼejl película yom mi lac ñaʼtan: «¿Bajcheʼ yilal mi caj i qʼuel j conciencia?». Laʼ laj qʼuel principio tac muʼ bʌ mejlel i coltañonla.

18, 19. a) ¿Bajcheʼ miʼ coltañonla jiñi Filipenses 4:8 chaʼan mi lac yajcan wem bʌ ñusaqʼuin? b) ¿Baqui bʌ yambʌ principio tac miʼ mejlel i coltañonla? (Qʼuele jiñi nota.)

¹⁸ Jumpʼejl principio ñuc bʌ i cʼʌjñibal jiñʌch am bʌ ti Filipenses 4:8: «Yom mi laʼ [chʌn] ñaʼtan chuqui tac isujm, chuqui tac toj, chuqui tac utsʼat, chuqui tac sʌc, chuqui tac i tʼojol, chuqui tac wen. Mi an chuqui cʼax wen, mi an chuqui yom sujbel ti ñuc, ñaʼtanla». Cheʼ bʌ Pablo tsiʼ yʌlʌ ili tʼan, maʼañic woliʼ taj ti tʼan jiñi ñusaqʼuin, tsaʼ bʌ i yʌcʼʌ ti ñaʼtʌntel jiñʌch chaʼan yom mi lac wen ñaʼtan chuqui wem bʌ miʼ qʼuel Dios (Salmo 19:14). Pero ili miʼ mejlel i taj ti tʼan jaʼel jiñi ñusaqʼuin. ¿Bajcheʼ?

¹⁹ Laʼ lac ñaʼtan jiñi ñusaqʼuin muʼ bʌ lac yajcan, bajcheʼ película, videojuego, cʼay tac yicʼot yan tac bʌ, laʼ laj cʼajtiben lac bʌ: «¿Muʼ ba i yʌqʼueñon c ñaʼtan chuqui sʌc tac bʌ?». Jumpʼejl ejemplo, cheʼ miʼ yujtel laj qʼuel jumpʼejl película, laʼ  lac tsajin chuqui tsiʼ cʌyʌ ti lac pensar. Mi utsʼatʌch, mi sʌcʌch yicʼot miʼ pʼʌtʼesañonla, yom yʌl chaʼan weñʌch chuqui tsaʼ lac yajca. Pero mach cheʼic mi tsaʼ caji lac ñaʼtan chuqui bibiʼ bʌ (Mateo 12:33; Marcos 7:20-23). ¿Bajcheʼ miʼ mejlel i ticʼlañonla cheʼ mi lac ñaʼtan chuqui mach bʌ utsʼatic? Mi lac sʌt lac ñʌchʼtʌlel, maʼañix chuqui mi caj i subeñonla laj conciencia, i miʼ mejlel lac sʌt bajcheʼ utsʼat añonla la quicʼot Dios (Efesios 5:5; 1 Timoteo 1:5, 19). Come jiñi ñusaqʼuin tac miʼ mejlel i ticʼlañonla, mach yomic mi lac tsʼitaʼ mel (Romanos 12:2). * Com lac mel bajcheʼ jiñi salmista tsaʼ bʌ i cʼajtibe Jehová: «Mʌybeñon c wut ame mic chʌn qʼuel jiñi lolom jach bʌ» (Salmo 119:37).

20, 21. ¿Bajcheʼ miʼ mejlel laj cʼʌn jiñi 1 Corintios 10:23, 24 cheʼ mi lac yajcan lac ñusaqʼuin?

²⁰ Pablo tsiʼ yʌlʌ yambʌ principio am bʌ ti Biblia mach bʌ yomic miʼ ñajʌyel lac chaʼan mi an chuqui woli lac ñaʼtan lac mel: «Pejtelel jiñi la com bʌ lac mel mi mejlel lac mel, pero [...] maʼañic i cʼʌjñibal ti pejtelel chaʼan miʼ xucʼchocoñonla. Mach i lon sʌclan i bajñel wenlel mi juntiquilic. Laʼ i ñaʼtan i wenlel yañoʼ bʌ» (1 Corintios 10:23, 24). ¿Chuqui mi caj i coltañonla chaʼan mi lac jacʼ ili principio cheʼ laj com lac yajcan wem bʌ lac ñusaqʼuin? Jiñʌch cheʼ mi laj cʼajtiben lac bʌ: «¿Bajcheʼ yilal mi caj i qʼuelob jiñi yañoʼ bʌ muʼ bʌ caj c mel?».

²¹ Tajol jiñi laj conciencia mi yʌl chaʼan an ñusaqʼuin tac mucʼʌch bʌ i mejlel lac mel. Pero mi laj cujil chaʼan an yambʌ la quermañojob mach bʌ weñic miʼ qʼuelob, tajol yom mi lac sʌclan yambʌ. ¿Chucoch? Come mach laj comic laj cʌcʼob ti yajlel tiʼ melol i yeʼtel Dios. I woli lac chaʼlen mulil «tiʼ contra jiñi hermanojob», i cheʼ bajcheʼ tsiʼ yʌlʌ Pablo,  jiñʌch «mulil tiʼ contra Cristo». Yom mi lac chʼʌm ti ñuc ili lac subentel: «Mach mi laʼ wʌcʼ ti yajlel [...] xñoptʼañob» (1 Corintios 8:12; 10:32). Jiñi isujm bʌ xñoptʼañob maʼañic miʼ melob ñusaqʼuin tac mach bʌ añic i ‹cʼʌjñibal chaʼan miʼ xucʼchocon› yambʌ hermanojob, anquese mucʼʌch i ‹mejlel i melob›. Cheʼ bajcheʼ jiñi, woli lac jacʼ jiñi isujm bʌ ticʼojel tsaʼ bʌ i yʌcʼʌ Pablo yicʼot bʌ cʼuxbiya (Romanos 14:1; 15:1).

22. ¿Chucoch yom mi laj qʼuel ti ñuc chuqui miʼ ñaʼtan i melob jiñi yañoʼ bʌ?

²² Mi yʌñʌl chuqui mi lac ñaʼtan, yom mi lac ñaxan qʼuel ti ñuc i wenlel yañoʼ bʌ. Mi cheʼʌchi, mach yomic mi lac pijtan chaʼan jiñi laj quermañojob lajal mi caj i ñaʼtañob bajcheʼ mi lac ñaʼtan joñonla chaʼan jiñi ñusaqʼuin. Mach cheʼic yom mi lac ñaʼtan, lajal cheʼ bajcheʼ la com chaʼan tiʼ pejtelel jiñi carro junlajal miʼ chaʼleñob ajñel majlel cheʼ bajcheʼ woli lac majlel joñonla jaʼel. Jin chaʼan, mi yambʌ hermanojob miʼ yajcañob jumpʼejl ñusaqʼuin tajol mach bʌ weñic mi laj qʼuel, pero yaʼ ti principio tac am bʌ ti Biblia maʼañic miʼ yʌcʼ ti ñaʼtʌntel chaʼan mach weñic, ¿chuqui mi caj lac mel? Come an laj cʼuxbiya, mi caj laj qʼuel ti ñuc chuqui miʼ ñaʼtañob. Cheʼ bajcheʼ jiñi, mi caj i qʼuelob i «yutslel [lac] pusicʼal pejtelel wiñicob» (Filipenses 4:5; Eclesiastés 7:16).

23. ¿Chuqui yom mi lac mel chaʼan mi lac yajcan wem bʌ lac ñusaqʼuin?

²³ Ti tsʼitaʼ bʌ tʼan, ¿chuqui yom mi lac mel chaʼan wen mi lac yajcan lac ñusaqʼuin tac? Ñaxan yom mi laj qʼuel mi an jamʌ tsiquil bʌ melbalʌl miʼ pʌs mach bʌ utsʼatic mi yʌl jiñi Biblia, mi cheʼi, mach yomic mi lac mel. Cheʼ bʌ an chuqui la com lac mel maʼañic bʌ mi yʌl yaʼ tiʼ Tʼan Dios, laʼ lac tsajin jiñi principio tac chaʼan mi lac ñaʼtan bajcheʼ yom mi laj qʼuel. Maʼañic mi lac mel muʼ bʌ mejlel i low laj conciencia i mi caj lac chaʼlen wersa chaʼan maʼañic mi lac low jiñi yañoʼ bʌ, ñumento mi laj quermañojob. Cheʼ mi lac chaʼlen wersa lac yajcan wem bʌ ñusaqʼuin, mi caj la cʌqʼuen i ñuclel Dios yicʼot mi caj lac chʌn ajñel tiʼ cʼuxbiya i temel yicʼot lac familia.